1-3. Kungani Pawula bekaciniseka kutsi angetsembela kuJehova? (Buka sitfombe lesisekucaleni kwalesihloko.)

NANGABE bewungumKhristu eRoma ngelikhulu lekucala, bewutabe uphila ngesikhatsi lesiyingoti. EmaKhristu bekahlushwa ngemaRoma. EmaRoma awasola ngekutsi okhele lidolobha ngemlilo nangekutsi enyanya labanye bantfu. Bazalwane nabodzadze labanyenti bebaboshwa. Labanye bebadzabudzabulwa tilwane. Labanye bebabetselwa etigodvweni bese bashiswa baphila kuze kukhanyiswe ebusuku. Onkhe malanga bewati kutsi lokunye kwaloku kungenteka nakuwe.

² Ngalesikhatsi lesimatima, umphostoli Pawula wavalelwa ejele. Kungenteka bekatibuta kutsi bomnakabo labangemaKhristu batamsita yini, ngobe wakhumbula kutsi ekucaleni kute lowamsita. Kodvwa Pawula watfola lusito kuJehova ngeNkhosi Jesu. Wabhala watsi: “INkhosi yema eceleni kwami yanginika emandla.” Jesu wanika Pawula emandla labekawadzinga. Pawula waphindze wabhala watsi ‘wakhululwa emlonyeni welibhubesi.’—2 Thimothi 4:16, 17. * (Fundza umbhalo longentansi.)

 ³ Pawula wakhumbula kutsi Jehova abemsite njani esikhatsini lesendlulile. Ngako bekaciniseka kutsi Jehova utamnika emandla lawadzingako kute akhone kubeketelela bumatima labekabhekene nabo kanye nanobe nguluphi luvivinyo lwesikhatsi lesitako. Bekaciniseka kakhulu ngaloku, ngako wabhala watsi: “INkhosi itangikhulula kuyo yonkhe imisebenti lemibi.” (2 Thimothi 4:18) Pawula wafundza kutsi ngisho nalapho bazalwane bebangeke bakhone kumsita, angahlala etsembele kuJehova nakuJesu kute atfole lusito. Abengakungabati loku.

4, 5. (a) Ngubani longakunika lusito loludzingako ngaso sonkhe sikhatsi? (b) Ungabucinisa njani budlelwane bakho naJehova?

⁴ Uke waba nayo yini inkinga lematima futsi wativa uyinhlwa, weswele nemuntfu longakusita? Kungenteka ulahlekelwe ngumsebenti nobe uyacindzetelwa esikolweni. Kungenteka bewugula kakhulu nobe uhlangabetene neluvivinyo lolumatima. Mhlawumbe wacela lusito kulabanye bantfu kodvwa wadvumateka ngobe awulutfolanga lusito loludzingako. Kuliciniso kutsi bantfu ngeke bakhone kuticatulula letinye tinkinga. Ngako-ke yini lotayenta? LiBhayibheli lisitjela kutsi ‘setsembe Jehova.’ (Taga 3:5, 6) Kodvwa ungaciniseka yini kutsi utakusita? Yebo ungaciniseka! Singafundza ngetibonelo letinyenti eBhayibhelini letingasenta sibone kutsi Jehova ubasita mbamba bantfu bakhe.

⁵ Ungadvumateki nangabe labanye bantfu bangakuniki lusito loludzingako. Esikhundleni saloko, njengaPawula, tsatsa loluvivinyo njengelitfuba lekwetsembela ngalokuphelele kuJehova. Kuphindze kube litfuba lekubona kutsi Jehova ukukhatsalela mbamba. Kwetsembela kwakho kuJehova nebudlelwane lonabo naye butawucina kakhulu.

6. Kungani kungaba lukhuni kwetsembela kuJehova nasinenkinga lematima?

⁶ Kungenteka unenkinga lematima lekukhatsatako. Wente konkhe lokusemandleni kute uyilungise futsi uthantazile nakuJehova wacela lusito. Ungativa yini uncono ngobe wetsemba kutsi utakusita? Yebo! (Fundza Tihlabelelo 62:8; 1 Phetro 5:7.) Nawufuna kuba nebudlelwane lobuhle naJehova, kubalulekile kutsi ufundze kwetsembela kuye. Kodvwa ngaletinye tikhatsi akusiko melula kwenta njalo. Ngani? Lesinye sizatfu kutsi Jehova angase angayiphendvuli ngekushesha imithantazo yakho.—Tihlabelelo 13:1, 2; 74:10; 89:46; 90:13; Habakhuki 1:2.

7. Kungani ngaletinye tikhatsi Jehova angayiphendvuli ngekushesha imithantazo yetfu?

⁷ Kungani ngaletinye tikhatsi Jehova angayiphendvuli ngekushesha imithantazo yetfu? LiBhayibheli litsi Jehova unguBabe wetfu futsi tsine sibantfwana bakhe. (Tihlabelelo 103:13) Babe akamniki umntfwana wakhe konkhe lakucelako nobe amnike ngaleso sikhatsi. Uyati kutsi umntfwana angase afune intfo letsite aphindze futsi angasayifuni.  Babe uyakwati loko lokulungele umntfwana wakhe, futsi uyati kutsi kungase kubatsintse njani labanye. Uyakwati loko umntfwana lakudzingako nesikhatsi lokufanele akutfole ngaso. Nangabe babe aniketa umntfwana wakhe konkhe lakufunako ngaleso sikhatsi, angaba sisebenti salomntfwana. Jehova longuBabe wetfu wasezulwini, uyasitsandza. Njengobe anguMdali wetfu lohlakaniphile, uyakwati lesikudzingako futsi ukhetsa sikhatsi lesifanele sekusinika kona. Kubalulekile kutsi silindze kute sibone indlela Jehova layiphendvula ngayo imithantazo yetfu.—Catsanisa na-Isaya 29:16; 45:9.

8. Yini Jehova lasetsembisa yona mayelana naloko lesingeke sikhone kukubeketelela?

⁸ Khumbula nekutsi Jehova uyatati tintfo ngamunye wetfu langakhona kutibeketelela nalangeke akhone kutibeketelela. (Tihlabelelo 103:14) Ngako-ke usiniketa emandla lesiwadzingako. Kuliciniso kutsi ngaletinye tikhatsi singase sitive siphelelwe ngemandla. Kodvwa Jehova uyasetsembisa kutsi nangabe singasakhoni kulubeketelela luvivinyo, “utawukwenta nendlela yekuphuma.” (Fundza 1 Khorinte 10:13.) Kuyasidvudvuta kwati kutsi singetsemba kutsi Jehova uyakwati loko lesingakubeketelela.

9. Yini lokufanele siyente nangabe sithantaza sicela lusito kuJehova kodvwa angasiphendvuli ngekushesha?

⁹ Nangabe sithantaza sicela lusito kuJehova kodvwa angasiphendvuli ngekushesha, kufanele sibeketele. Khumbula kutsi Jehova uyafisa kusisita, kodvwa ulindza kuze kube sikhatsi lesikahle sekusinika loko lesikudzingako. LiBhayibheli litsi: “Simakadze ulangatelela kangaka kutsi abe nemusa kini. Uyaphakama kutsi anihawukele, ngobe Simakadze nguNkulunkulu lowehlulela ngemtsetfocotfo. Babusisiwe bonkhe labalindzela yena.”—Isaya 30:18.

10-12. (a) Yini lengase ikwente kube matima kunakekela lilunga lemndeni leligulako? (b) Nangabe wetsembele kuJehova ngetikhatsi letimatima, loko kutabutsintsa njani buhlobo bakho naye? Shano sibonelo.

¹⁰ Simo lobhekene naso singase sibe lukhuni kakhulu udzimate utive ngendlela Pawula lativa ngayo futsi udzinge kusindziswa “emlonyeni welibhubesi.” (2 Thimothi 4:17) Nawubhekene nesimo lesinjalo, kubaluleke kakhulu kutsi wetsembele kuJehova. Nasi sibonelo: Kungenteka kutsi unakekela lilunga lemndeni leligulako. Uthantazile kuJehova kutsi akusite kute utsatse sincumo lesikahle futsi ucine. * (Fundza umbhalo longentansi.) Ungativa unekuthula nawukhumbula kutsi Jehova uyakubona futsi uyasicondza simo lobhekene naso. Utakusita kutsi ubeketele futsi wetsembeke kuye.—Tihlabelelo 32:8.

¹¹ Ngaletinye tikhatsi, kungase kubonakale  shengatsi Jehova akakusiti. Mhlawumbe bodokotela abavumelani ngaloko lokufanele kwentiwe. Kungenteka bewutitjele kutsi tihlobo takho titakudvudvuta, kodvwa tihlohlela linyeva ekhatsi. Ngaso sonkhe sikhatsi, yetsembela kuJehova kute akunike emandla. Chubeka usondzela kuye. (Fundza 1 Samuweli 30:3, 6.) Ngemuva kwesikhatsi nawubona indlela Jehova lakusite ngayo, buhlobo bakho naye butawucina kakhulu.

¹² Nguleyo indlela Linda labetiva ngayo. * (Fundza umbhalo longentansi.) Abesanakekele batali bakhe labagulako sikhatsi lesidze ngaphambi kwekutsi bafe. Utsi: “Ngesikhatsi sibhekene nalesimo, mine nendvodza yami kanye nemnaketfu besititfola singati kutsi kufanele senteni. Ngaletinye tikhatsi sasiphelelwa ngemandla. Nobe kunjalo, nasicabanga ngaloko lokwenteka, siyibona kahle indlela Jehova lakhombisa ngayo kutsi unatsi. Wasinika emandla naloko lebesikudzinga, ngisho nobe besesiphelelwe litsemba.”

13. Kwetsembela kuJehova kwamsita njani Rhonda kutsi abeketelele tinhlekelele letamehlela tilandzelana?

¹³ Kwetsembela kuJehova ngalokuphelele kutasisita kutsi sibeketelele ngisho netinhlekelele. Nguloko lokwenteka kuRhonda. Indvodza yakhe lengasiye Fakazi WaJehova, yayimdivosa. Ngaleso sikhatsi, umnakabo Rhonda watfola kutsi unesifo lesibi lokutsiwa yi-lupus. Ngemuva kwetinyanga letimbalwa, sikoni wakhe washona. Ngesikhatsi Rhonda acala kululama kuloku lobekumehlele, waba lihlahlandlela lelivamile. Kwatsi kusenjalo, kwashona unina. Rhonda wakhona njani kubeketelela tonkhe letinhlekelele? Utsi: “Ngangikhuluma naJehova onkhe emalanga, ngisho nobe kufanele ngitsatse tincumo letincane. Loko kwenta Jehova waba nguMuntfu mbamba kimi. Kwangifundzisa kutsi ngetsembele kuye kunekutsi ngitetsembe mine nobe labanye bantfu. Ngalubona lusito labekanginika lona—tonkhe tidzingo tami betinakekelwa. Ngesizatfu saloko, ngibonile kutsi kunjani kusebentisana naJehova.”

14. Jehova angakusita njani nangabe lilunga lemndeni liyekeliswa kuba nguFakazi?

¹⁴ Cabanga nangalesinye simo lesilukhuni. Mhlawumbe lilunga lemndeni wakho liyayekeliswa kuba nguFakazi. Uyakwati loko liBhayibheli lelikushoko ngendlela yekuphatsa labo labayekelisiwe kuba BoFakazi. (1 Khorinte 5:11; 2 Johane 10) Kodvwa ngesizatfu sekutsi uyamtsandza loyo muntfu, ungase ukutfole kumatima nobe kuyintfo lengeke yenteke kuhlonipha umyalo weliBhayibheli. Utawetsemba yini kutsi Babe wakho wasezulwini utakunika emandla kuze umlalele ngekwetsembeka? Lesimo singakwenta yini utfole litfuba lekusondzela kakhulu kuJehova?

15. Kungani Adamu angamlalelanga Jehova?

¹⁵ Loku kufanana njani naloko lokwenteka  ku-Adamu? Abecabanga kutsi angachubeka aphila yini nangabe angamlaleli Jehova? Cha, Adamu “akazange ayengwe.” (1 Thimothi 2:14) Kungani angamlalelanga Jehova? Adamu wadla lesitselo umfati wakhe lamnika sona ngobe bekatsandza yena kakhulu kunaJehova. Walalela umfati wakhe esikhundleni sekutsi alalele umyalo waJehova.—Genesisi 3:6, 17.

16. Ngubani lokufanele simtsandze kakhulu, futsi ngani?

¹⁶ Sincumo sa-Adamu sisifundzisa kutsi kufanele sitsandze Jehova ngetulu kwanome ngumuphi umuntfu. (Fundza Matewu 22:37, 38.) Nangabe lutsandvo lwetfu ngaJehova lucinile, singatisita ngendlela lephumelelako tihlobo tetfu, ngisho nobe timkhonta Jehova nome tingamkhonti. Ngako-ke chubeka ukhulisa lutsandvo lwakho ngaJehova futsi umetsembe. Nangabe ukhatsatekile ngelilunga lemndeni leliyekelisiwe kuba nguFakazi, thantaza kuJehova umtjele indlela lotiva ngayo. * (Fundza umbhalo longentansi.) (Roma 12:12; Filiphi 4:6, 7) Ngisho nobe ubhekene nebumatima lobukhulu, tsatsa lesimo lokuso njengelitfuba lekucinisa buhlobo bakho naJehova. Ngako-ke utawukhona kwetsembela kuye futsi wati kutsi kumlalela kutakuletsela imiphumela lemihle.

17. Nasihlala simatasatasa emsebentini wekushumayela, yini lesingetsemba kutsi Jehova utasentela yona?

¹⁷ Kungani Jehova asindzisa Pawula “emlonyeni welibhubesi”? Pawula watsi: “Kuze kutsi ngami umsebenti wekushumayela wentiwe ngalokugcwele.” (2 Thimothi 4:17) Jehova usinikete umsebenti wekushumayela “tindzaba letimnandzi” futsi usibita ngekutsi “sitisebenti letikanye” naye. (1 Thesalonika 2:4; 1 Khorinte 3:9) Nasihlala simatasatasa kulomsebenti, singetsemba kutsi Jehova utasinika konkhe lesikudzingako. (Matewu 6:33) Ngaleyo ndlela kutawuba melula ngatsi kulindza Jehova kutsi aphendvule imithantazo yetfu.

18. Yini longayenta kuze wetsembele kuJehova futsi ucinise budlelwane bakho naye?

¹⁸ Ngako-ke, onkhe malanga yetama kucinisa budlelwane lonabo naJehova. Nawuvivinywa futsi utiva ukhatsatekile, loko kutsatse njengelitfuba lekusondzelana naJehova. Fundza liVi laNkulunkulu liBhayibheli, ulitadishe futsi uzindle ngalo. Chubeka uthantaza kuJehova futsi uhlale umatasatasa ekumkhonteni. Nawenta loku, ungetsemba kutsi Jehova utakusita ubeketelele lonkhe luvivinyo longahlangabetana nalo nyalo nasesikhatsini lesitako.