Sekuphele iminyaka leminyenti tincwadzi tetfu titsi ligama lelitsi Gogi wakaMagogi lisho Sathane ngemuva kwekucoshwa kwakhe ezulwini. Kungani betisho njalo? Kungobe incwadzi yeSembulo ichaza Sathane njengaloholako ekuhlaseleni bantfu baNkulunkulu emhlabeni wonkhe. (Sembulo 12:1-17) Ngako bekubonakala shengatsi ligama lelitsi Gogi ngulelinye libito laSathane.

Nobe kunjalo, lenchazelo beyinetinkinga letitsite. Cabanga nganaku lokulandzelako: Nakakhuluma ngekubhujiswa kwaGogi, Jehova watsi abetamenta abe “kudla kuto tonkhe tinhlobonhlobo tetinyoni letidla letinye tilwane, nasetilwaneni tesiganga.” (Hezekeli 39:4) Jehova wachubeka watsi: “Ngalelo langa ngiyawuniketa Gogi indzawo yekungcwatjwa ka-Israyeli.” (Hezekeli 39:11) Kodvwa kungenteka njani kutsi Sathane, losidalwa semoya lesingabonakali, adliwe tinyoni netilwane tesiganga? Kungenteka njani kutsi angcwatjwe emhlabeni? LiBhayibheli lisho ngalokucacile kutsi Sathane utawujikijelwa emgodzini longenamkhawulo iminyaka lengu-1 000. Ngeke adliwe tilwane nobe angcwatjwe.—Sembulo 20:1, 2.

LiBhayibheli litsi ekupheleni kweminyaka lengu-1 000, Sathane utawukhishwa emgodzini longenamkhawulo futsi “aphume ayewudukisa tive emagumbini lamane emhlaba, Gogi naMagogi, kuze atibutsele kulemphi.” (Sembulo 20:8) Kodvwa-ke nangabe Gogi kunguSathane, loko kusho kutsi Sathane utawutidukisa yena. Ngako-ke, encwadzini yaHezekeli nobe yeSembulo, “Gogi” akameleli Sathane.

Ngako-ke ungubani Gogi wakaMagogi? Kuze sitfole imphendvulo, kufanele sihlole liBhayibheli kute sibone kutsi ngubani lohlasela bantfu baNkulunkulu. LiBhayibheli likhuluma ngekuhlasela ‘kwaGogi wakaMagogi,’ kuhlasela ‘kwenkhosi yasenyakatfo’ nekuhlasela ‘kwemakhosi emhlaba.’ (Hezekeli 38:2, 10-13; Danyela 11:40, 44, 45; Sembulo 17:14; 19:19) Lokuhlasela kwehlukahlukene yini? Akubonakali kunjalo. Kubonakala shengatsi liBhayibheli lisebentisa emagama lehlukahlukene kuze lichaze kuhlasela lokufanako. Kungani sisho njalo? Kungobe liBhayibheli lisitjela kutsi tonkhe tive temhlaba titawuba yincenye yalokuhlasela kwekugcina lokutawuholela emphini ye-Amagedoni.—Sembulo 16:14, 16.

 Nasicatsanisa onkhe lamavesi lakhuluma ngekuhlaselwa kwekugcina kwebantfu baNkulunkulu, kuyacaca kutsi ligama lelitsi Gogi wakaMagogi alisho Sathane. Esikhundleni saloko, lisho licembu letive. Lelicembu litawube liholwa ‘yinkhosi yasenyakatfo’ yini? Asiciniseki. Kodvwa kubonakala shengatsi lenchazelo ivumelana naloko Jehova lakusho mayelana naGogi nakatsi: “Uyawuchamuka endzaweni yakho lesenyakatfo lekhashane, wena netive letinyenti letikanye nawe, bonkhe bagibele emahhashi, inyakanyaka yemabutfo, imphi lenemandla kakhulu.”—Hezekeli 38:6, 15.

Ngendlela lefanako, umphrofethi Danyela lowaphila ngesikhatsi sinye naHezekeli washo nawa emavi ngenkhosi yasenyakatfo: “Imibiko levela emphumalanga nasenyakatfo iyakuyetfusa, bese itihlelela kuphuma nemphi lenkhulu, iyewubhubhisa labanyenti bangaphindzi babe khona. Iyawumisa emathende ayo ebukhosi emkhatsini wetilwandle entsabeni lenhle nalengcwele. Noko iyawufika esiphetfweni sayo, futsi kute namunye loyawuyilamulela.” (Danyela 11:44, 45) Loku kuyafana naloko incwadzi yaHezekeli letsi Gogi utakwenta.—Hezekeli 38:8-12, 16.

Yini letawenteka ngemuva kwalokuhlasela kwekugcina? Danyela utsi: ‘Ngaleso sikhatsi Mikhayeli [Jesu Khristu], ingilosi lenkhulu lengumvikeli wesive sakini [kusukela nga-1914], uyawukuma [e-Amagedoni]., lesingazange sesibe khona, seloku kwacala Kuyawuba sikhatsi sekuhlupheka lokukhulu kuba netive kuze kube nguleso sikhatsi. Kodvwa ngaleso sikhatsi, bonkhe bantfu bakini lekwatfolakala emabito abo abhaliwe encwadzini yaNkulunkulu, bayawukhululwa.’ (Danyela 12:1) KuSembulo 19:11-21 sitfola inchazelo lefanako yaloko lokutawentiwa nguJesu.

Kodvwa ungubani “Gogi naMagogi” lokukhulunywa ngaye kuSembulo 20:8? Leligama lisho bonkhe labavukela Jehova futsi bahlasele bantfu bakhe ngesikhatsi sekuvivinywa kwekugcina ekupheleni kweminyaka lengu-1 000. Batawuba nenzondo lefana neyaGogi wakaMagogi, lomelela tive letihlasela bantfu baNkulunkulu ekupheleni kwekuhlupheka lokukhulu. Njengaletive letitawubhujiswa e-Amagedoni, Gogi naMagogi utawubhujiswa. (Sembulo 19:20, 21; 20:9) Ngako kubonakala kunengcondvo kutsi bonkhe labatawuvukela ekupheleni kweminyaka lengu-1 000 babitwe ngekutsi ‘nguGogi naMagogi.’

Njengobe sibafundzi beliBhayibheli labakhutsele, silangatelela kubona kutsi ngubani lotawuba ‘yinkhosi yasenyakatfo’ esikhatsini lesitako. Kodvwa ngisho nobe kungubani lotawuhola tive ekuhlaseleni bantfu baNkulunkulu, kunetintfo letimbili lesiciniseka ngato: (1) Gogi wakaMagogi kanye nemabutfo akhe batawuncotjwa futsi babhujiswe. (2) INkhosi yetfu Jesu Khristu, itawukhulula bantfu baNkulunkulu futsi ibangenise emhlabeni lomusha lonekuthula nekulondzeka sibili.—Sembulo 7:14-17.