1. Kusizuzisa ngani kucabanga ngetintfo lesingakaze sitibone? (Buka sitfombe lesisekucaleni kwalesihloko.)

JEHOVA usiphe sipho lesihle kakhulu. Usiphe likhono lekutibona ngeliso lengcondvo tintfo lesingakaze sitibone. Lelikhono lisisita kutsi sibuke embili kulokuhle lokutawenteka esikhatsini lesitako, sibalekele tinkinga futsi silihlelele kahle likusasa. Jehova uyakwati lokutawenteka esikhatsini lesitako futsi usitjela ngaletinye tintfo lesingabuka embili kuto. Nanobe singatiboni, singakhona kucabanga ngato futsi sikholwe kutsi titawenteka.—2 Khorinte 4:18.

2, 3. (a) Imicabango yetfu ingasisita njani? (b) Ngumiphi imibuto lesitayiphendvula kulesihloko?

² Kuliciniso kutsi ngaletinye tikhatsi sicabanga ngetintfo letingeke tenteke. Sibonelo saloku kutsi intfombatanyana letsite ingase iticabange igibele luvivane. Loko ngeke kuze kwenteke. Hana unina waSamuweli wacabanga ngetintfo lebetingenteka. Abehlale acabanga ngelilanga labetawumikisa ngalo indvodzana yakhe ethendeni lekukhontela kuze isebente nebaphristi. Leli bekungasilo nje liphupho. Kwakuyintfo labencume kuyenta. Ngako kucabanga ngaloko kwamsita kutsi agcine setsembiso labesente  kuJehova. (1 Samuweli 1:22) Nasicabanga ngaloko Jehova lasetsembise kona, sisuke sicabanga ngetintfo letitawenteka mbamba.—2 Phetro 1:19-21.

³ Bantfu baJehova labanyenti bangetikhatsi tekubhalwa kweliBhayibheli bebacabanga ngetintfo labebatsembise tona. Bekubazuzisa ngani loko? Kungani kungasisita kucabanga ngekutsi kuphila kwetfu kutawuba njani nasetigcwalisekile tetsembiso taNkulunkulu?

4. Yini leyasita Abela kutsi acabange ngelikusasa lelincono?

⁴ Abela waba ngumuntfu wekucala lowaba nekukholwa etetsembisweni taJehova. Abekwati loko Jehova lakutjela inyoka ngemuva kwekutsi Adamu na-Eva sebonile. Jehova watsi: “Ngitawubeka butsa emkhatsini wakho nemfati, nasemkhatsini wentalo yakho nentalo yemfati. Yona iyawufihlita inhloko yakho, wena uyawuluma sitsendze sayo.” (Genesisi 3:14, 15) Abela abengati ngalokucondzile kutsi loku bekutawenteka njani. Kodvwa kungenteka kutsi wacabangisisa ngaloko Nkulunkulu labekushito. Kungenteka Abela wacabanga: ‘Ngubani lobekatawulunywa ngulenyoka futsi asite bantfu kutsi babebete sono?’ Abela abekholwa kutsi nobe yini Jehova layetsembisile itawugcwaliseka, futsi ngesikhatsi enta umnikelo, Jehova wawemukela.—Fundza Genesisi 4:3-5; Hebheru 11:4.

5. Kwamsita ngani Enoki kucabanga ngelikusasa?

⁵ Enoki abengulenye indvodza lebeyinekukholwa lokucinile kuNkulunkulu. Abephila emkhatsini webantfu lababi lebebakhuluma ‘tintfo letetfusako’ letimelene naNkulunkulu. Kodvwa Enoki abenesibindzi futsi washumayela umlayeto waNkulunkulu. Watjela labantfu kutsi Jehova abetababhubhisa lababi. (Juda 14, 15) Yini leyamsita kutsi ente loko? Kungenteka Enoki wacabanga ngekutsi umhlaba utawuba njani nasekuphila bantfu labakhonta Jehova kuphela.—Fundza Hebheru 11:5, 6.

6. Yini lokungenteka Nowa wacabanga ngayo ngemuva kwaZamcolo?

⁶ Nowa abenekukholwa kuJehova, ngako akazange abhujiswe nguZamcolo. (Hebheru 11:7) Ngesizatfu sekukholwa kwakhe, Nowa wentela Jehova umnikelo wetilwane. (Genesisi 8:20) Ngemuva kwaZamcolo, live laphindze laba libi. Nimrodi wacala kubusa futsi wenta kutsi bantfu bavukele Jehova. (Genesisi 10:8-12) Kodvwa Nowa wachubeka anekukholwa lokucinile. Njenga-Abela, abeciniseka kutsi ngalelinye lilanga Nkulunkulu utawucedza sono nekufa. Kungenteka Nowa waphindze wacabanga ngesikhatsi lapho babusi lababi batawube bangasekho. Natsi singacabanga ngalesikhatsi lesijabulisako lesesisondzele kakhulu!—Roma 6:23.

7. Nguliphi likusasa bo-Abrahama, Isaka naJakobe lebebangabuka embili kulo?

⁷ Bo-Abrahama, Isaka naJakobe bebangacabanga ngelikusasa lelihle. Jehova bekabetsembise kutsi bantfu bato tonkhe tive bebatawubusiswa ngentalo  yabo. (Genesisi 22:18; 26:4; 28:14) Nkulunkulu bekabetsembise nekutsi umndeni wabo bewutawuba sive lesikhulu futsi uhlale eVeni lelihle Lesetsembiso. (Genesisi 15:5-7) Njengobe bo-Abrahama, Isaka naJakobe bebati kutsi tetsembiso taJehova titawugcwaliseka, bebangayibona ngeliso lengcondvo imindeni yabo seyihlala kulelo live. Ecinisweni, kusukela ngesikhatsi bo-Adamu na-Eva bona, Jehova usite tinceku takhe letetsembekile kutsi tiyicondze indlela bantfu labatawubuyela ngayo babe bete sono.

8. Yini leyasita Abrahama kutsi abe nekukholwa lokucinile futsi alalele?

⁸ Ngesizatfu sekutsi Abrahama abenekukholwa lokucinile, walalela Jehova ngisho nasetimeni letimatima. Abrahama kanye nalabanye labetsembekile batibona ngeliso lengcondvo tintfo Jehova labetetsembisile, ngisho nobe tingazange tigcwaliseke ngesikhatsi basaphila. LiBhayibheli litsi: “Batibona tisekhashane, batemukela.” (Fundza Hebheru 11:8-13.) Abrahama bekati kutsi Jehova abehlale atigcina tetsembiso takhe esikhatsini lesendlulile, ngako abeciniseka kutsi tonkhe tetsembiso taJehova tesikhatsi lesitako titawugcwaliseka.

9. Kwamsita njani Abrahama kukholwa labenako etetsembisweni taNkulunkulu?

⁹ Ngenca yekutsi Abrahama abenekukholwa etetsembisweni taJehova, wachubeka enta intsandvo yaJehova. Nasi sibonelo: Washiya likhaya lakhe lebelisedolobheni lase-Uri futsi wacitsa konkhe kuphila kwakhe asakhamuti sesikhashana emadolobheni aseKhenani. Bekati kutsi emadolobha labomakhelwane abengeke ahlale akhona phakadze ngobe babusi bawo bebangamkhonti Jehova. (Joshuwa 24:2) Abesilangatelela sikhatsi lapho Jehova atawubusa emhlabeni phakadze asebentisa hulumende wakhe. Lohulumende “lidolobha lelinetisekelo leticinile, lelisungulwe laphindze lakhiwa nguNkulunkulu.” (Hebheru 11:10) Abrahama, Abela, Enoki, Nowa kanye nalabanye bebakholelwa eluvukweni. Ngaso sonkhe sikhatsi nabacabanga ngekuphila phakadze emhlabeni lomuhle, kukholwa kwabo kuJehova bekucina kakhulu.—Fundza Hebheru 11:15, 16.

10. Kwamzuzisa ngani Sara kulangatelela likusasa?

¹⁰ Sara umka-Abrahama, abenekukholwa lokucinile etetsembisweni taJehova. Ngisho nangesikhatsi aneminyaka lengu-90 budzala futsi solo ete umntfwana, abesilangatelela sikhatsi lapho abetawuba nemntfwana khona. Bekaze ababone ngeliso lengcondvo bantfwana bakhe baba sive lesikhulu. (Hebheru 11:11, 12) Yini lebeyimenta aciniseke ngaloko? Kungobe Jehova abekhulume nendvodza yakhe watsi:  “Ngiyawumbusisa, ngikunike indvodzana ngaye. Ngiyawumbusisa, abe ngunina wetive. Kuyawuvela kuye emakhosi etive.” (Genesisi 17:16) Sara waba nendvodzana lebekutsiwa ngu-Isaka, njengobe nje Jehova abetsembisile. Lesimangaliso samenta waciniseka kutsi tonkhe tetsembiso taJehova betitawugcwaliseka. Natsi singacinisa kukholwa kwetfu ngekutsi sicabange ngako konkhe lokuhle Jehova lasetsembise kona.

11, 12. Yini leyasita Mosi kutsi amtsandze kakhulu Jehova?

¹¹ NaMosi abenekukholwa etetsembisweni taJehova. Wakhulela eGibhithe njengemntfwanenkhosi. Ngesizatfu sekutsi bekatsandza Jehova ngetulu kwako konkhe, Mosi akazange afune sikhundla nekunjinga. Batali bakhe labangemaHebheru bebamfundzisile ngaJehova, bamtjela kutsi Jehova beketsembise kukhulula emaHebheru ebugcilini futsi awanike liVe Lesetsembiso. (Genesisi 13:14, 15; Eksodusi 2:5-10) Njengobe Mosi abechubeka acabanga ngaletetsembiso, lutsandvo labenalo ngaJehova lwakhula.

¹² LiBhayibheli lisitjela loko Mosi labehlale acabanga ngako. Litsi: “Ngekukholwa, watsi Mosi nasakhulile wala kubitwa ngekutsi uyindvodzana yendvodzakati yaFaro, wakhetsa kuhlushwa nebantfu baNkulunkulu kunekutsi atijabulise kwesikhashana esonweni, ngobe watsatsa kuhlanjalatwa ngenca yaKhristu njengeligugu lelikhulu kakhulu kunemcebo waseGibhithe, futsi abenakisise umvuzo.”—Hebheru 11:24-26.

13. Kwamsita ngani Mosi kuchubeka acabanga ngetetsembiso taJehova?

¹³ Kungenteka kutsi Mosi wacabangisisa ngesetsembiso saJehova sekukhulula emaHebheru ebugcilini. Njengaletinye tinceku taJehova, Mosi bekati kutsi Jehova utawukhulula bonkhe bantfu ekufeni. (Jobe 14:14, 15; Hebheru 11:17-19) Ngako bekayicondza indlela Jehova labatsandza ngayo bantfu. Loku kwenta Mosi wamtsandza kakhulu Jehova futsi waba nekukholwa lokucinile kuye. Kwamsita kutsi achubeke akhonta Jehova kuko konkhe kuphila kwakhe. (Dutheronomi 6:4, 5) Ngisho nangesikhatsi Faro afuna kumbulala, Mosi akazange esabe. Bekati kutsi Jehova abetambusisa esikhatsini lesitako.—Eksodusi 10:28, 29.

14. Yini labanye labayicabangako ngelikusasa?

¹⁴ Bantfu labanyenti bayacabanga ngelikusasa futsi bacabanga ngetintfo letingeke tenteke. Nasi sibonelo: Labanye bantfu labaphuye kakhulu baticabanga sebanjingile futsi sekute lokubakhatsatako. Kodvwa liBhayibheli litsi kuphila kulelive laSathane kutawuhlale ‘kuphetse kuhlupheka nelusizi.’ (Tihlabelelo 90:10) Labanye bacabanga kutsi umbuso webantfu utaticatulula tinkinga talomhlaba. Kodvwa liBhayibheli litsi ngumbuso waNkulunkulu kuphela longakhona kwenta loko. (Danyela 2:44) Bantfu labanyenti bacabanga kutsi lelive ngeke lize lishintje. Kodvwa liBhayibheli litsi Nkulunkulu utalibhubhisa lelive lelibi. (Zefaniya 1:18; 1 Johane 2:15-17) Bonkhe labacabanga  imicabango lengahambisani neyaJehova batawujabha kakhulu.

15. (a) Kusisita ngani kucabanga ngelikusasa Nkulunkulu lasetsembise lona? (b) Yini lobuke embili kuyo?

¹⁵ Jehova usetsembise likusasa lelihle. Nasicabanga ngaleso sikhatsi, siyajabula futsi sitfole nesibindzi kuze sichubeke simkhonta. Uyaticabanga yini wenta tintfo Jehova lakwetsembise tona, kungaba sezulwini nobe emhlabeni? Nangabe ubuke embili ekuphileni emhlabeni phakadze, ticabange usebenta nebangani bakho nenta umhlaba ube yingadze lenhle. Labo labacondzisa lomsebenti banendzaba nawe. Bonkhe bantfu lophila nabo batsandza Jehova njengobe nawe umtsandza. Uphile saka, unemandla futsi kute lokukukhatsatako. Uyajabula ngobe ungasebentisa emakhono netiphiwo takho kute usite labanye futsi udvumise Jehova. Kungenteka sewuvele usita bantfu labavusiwe kutsi bafundze ngaJehova. (Johane 17:3; Imisebenti 24:15) Nawucabanga ngaletintfo, usuke ungabhudzi. Konkhe loku kutawugcwaliseka ngesizatfu saloko liBhayibheli lelikushoko ngelikusasa.—Isaya 11:9; 25:8; 33:24; 35:5-7; 65:22.

16, 17. Kusisita ngani kukhuluma ngelikusasa Jehova lasetsembise lona?

¹⁶ Nasicocela bazalwane nabodzadzewetfu ngaloko lesifise kukwenta emhlabeni lomusha, sisuke sisitana kute silibone ngalokucacile likusasa lelihle. Asati ngalokucondzile kutsi ngamunye kitsi utawube entani emhlabeni lomusha. Kodvwa nasikhuluma ngetintfo lesibuke embili kuto, sisuke sikhombisa kutsi sinekukholwa etetsembisweni taJehova. Ngaleyo ndlela, sisuke sikhutsatana kutsi sichubeke sikhonta Jehova nasetikhatsini letimatima njengobe umphostoli Pawula kanye nebazalwane  baseRoma benta.—Roma 1:11, 12.

¹⁷ Nawucabanga ngelikusasa Jehova laletsembisile, ngeke ucabange kakhulu ngetinkinga takho. Ngalesinye sikhatsi, Phetro abekhatsatekile futsi watsi kuJesu: “Nkhosi, sishiye tonkhe tintfo sakulandzela; yini-ke lesitayitfola?” Jesu abefuna kutsi Phetro kanye nalabanye bafundzi bacabange ngetintfo letinhle lebebatawutenta esikhatsini lesitako. Wabatjela watsi: “Lapho iNdvodzana yemuntfu ihlala esihlalweni sebukhosi lesikhatimulako, nani nine leningilandzele nitawuhlala etihlalweni tebukhosi letilishumi nakubili, nehlulele tive letilishumi nakubili taka-Israyeli. Nobe ngubani loshiye tindlu, banakabo, bodzadzewabo, uyise, unina, nobe bantfwana nobe emasimu ngenca yami, utawutfola loku sekuphindvwe kanyenti, atfole nekuphila lokuphakadze.” (Matewu 19:27-29) Ngako Phetro kanye nalalabanye bafundzi bebangaticabanga sebabusa naJesu ezulwini futsi basita bantfu labalalelako labasemhlabeni kutsi babebete sono.

18. Kusisita ngani kucabanga ngesikhatsi Nkulunkulu latawufeza ngaso loko lakwetsembisile?

¹⁸ Sesifundzile ngaloko lokwasita tinceku taJehova kutsi tibe nekukholwa lokucinile. Abela wacabanga ngesetsembiso saJehova selikusasa lelihle futsi ngesizatfu sekuba nekukholwa kulesetsembiso, wajabulisa Jehova. Abrahama wacabanga ngesikhatsi lapho setsembiso saJehova lesimayelana ‘nentalo’ besitawugcwaliseka khona, ngako walalela Jehova ngisho nasetikhatsini letimatima kakhulu. (Genesisi 3:15) Mosi wabuka embili emvuzweni Jehova labemetsembise wona futsi loko kwamsita kutsi atsandze Jehova aphindze etsembeke kuye. (Hebheru 11:26) Nasicabanga ngesikhatsi lapho Jehova atawugcwalisa khona konkhe lakwetsembisile, kukholwa kwetfu kanye nelutsandvo lwetfu ngaye kuyacina. Esihlokweni lesilandzelako, sitawufundza ngalenye indlela lesingakusebentisa ngayo kucabanga kwetfu.