JULIAN ukhumbula indlela lativa ngayo ngesikhatsi kukhishwa simemetelo sekutsi indvodzana yakhe ayisasiye lomunye waBoFakazi BaJehova. Utsi: “Kwaba shengatsi kuphila kungiphelele. Bekalitibulo lami futsi besisondzelene kakhulu. Sasenta tintfo letinyenti ndzawonye.” Julian utsi indvodzana yakhe beyisolo itiphetse kahle, kodvwa yashintja yase yenta tintfo letimbi. Umfati waJulian abehlale akhala, futsi Julian abengati kutsi utamdvudvuta njani. Utsi: “Sasihlale sitibuta kutsi kukhona yini lesingakakwenti kahle.”

Ngutiphi tizatfu letiseBhayibhelini letenta umuntfu ayekeliswe kuba nguFakazi? Njengobe kuyekeliswa kuba nguFakazi kubanga lusizi, sisho ngani kutsi kusento selutsandvo?

Nangabe Fakazi WaJehova lobhajatisiwe enta sono lesikhulu futsi angaphendvuki, uyayekeliswa kuba nguFakazi.

Jehova akalindzeli kutsi singawenti emaphutsa, kodvwa ulindzele kutsi tinceku takhe tilalele imitsetfo yakhe futsi tihlale tingcwele. Sibonelo saloko kutsi Jehova uyala tinceku takhe kutsi titibalekele tono letinkhulu letifaka ekhatsi kutiphatsa kabi ngekwelicansi, kukhonta titfombe, kweba, bugebengu, kubulala kanye nekusebentelana nemimoya.—1 Khorinte 6:9, 10; Sembulo 21:8.

Loko Jehova lakulindzele kitsi akusiwo umtfwalo futsi kuyasivikela. Nasi sibonelo: Sonkhe siyafuna kuphila nebantfu labanekuthula, labahloniphekile nalabetsembekile futsi nguloko lesikutfola kubazalwane nabodzadzewetfu. Kungani banjalo? Kungobe batinikele kuJehova futsi betsembisa kuphila ngekuvumelana naloko lakushoko eBhayibhelini.

Kodvwa kutsiwani nangabe umKhristu lobhajatisiwe enta sono lesikhulu ngenca  yebutsakatsaka lanabo? Nguloku lokwenteka kuletinye tinceku taJehova esikhatsini lesendlulile, kodvwa Jehova akazange atilahle ngalokuphelele. Nasi sibonelo: Ngisho nobe iNkhosi Davide yaphinga futsi yabulala, umphrofethi Nathani watjela Davide kutsi Jehova umtsetselele.—2 Samuweli 12:13.

Kungani Jehova amtsetselela Davide? Kungobe wabona kutsi uphendvuke mbamba. (Tihlabelelo 32:1-5) Nalamuhla, umuntfu lowente sono angatsetselelwa nakaphendvuka mbamba futsi ayekele kwenta lokubi. (Imisebenti 3:19; 26:20) Nangabe labadzala labasekomitini yekwehlulela babona kutsi umuntfu akaphendvuki, loyo muntfu uyayekeliswa kuba nguFakazi.

Nangabe lilunga lemndeni wakho nobe umngani lomkhulu ayekeliswa kuba nguFakazi, ungakutfola kumatima kusemukela leso sincumo futsi ungaba nemuva wekutsi sicine kakhulu. Nobe kunjalo, liVi laJehova lisho ngalokucacile kutsi kuyekeliswa kuba nguFakazi kusento selutsandvo.

Jesu watsi “kuhlakanipha kubonakala kulungile ngemisebenti yako.” (Matewu 11:19) Asesifundze ngetizatfu letintsatfu letenta kutsi kube kuhlakanipha kuyekelisa umuntfu longaphendvuki kuba nguFakazi.

Kuyekeliswa kuba nguFakazi kwenta kutsi libito laJehova lingahlanjalatwa. Njengobe siBoFakazi bakhe, loko lesikwentako kungamdvumisa Jehova nobe kumhlambalate ngobe sibitwa ngelibito lakhe. (Isaya 43:10) Njengobe kutiphatsa kwemntfwana kungabadvumisa nobe kubahlambalate batali bakhe, kutiphatsa kwetinceku taJehova kungamdvumisa nobe kumhlambalate. Ngesikhatsi saHezekeli, bantfu bakuletinye tive bebahlobanisa emaJuda nelibito laJehova. (Hezekeli 36:19-23) Nalamuhla, bantfu bahlobanisa BoFakazi BaJehova nelibito lakhe. Ngako-ke nangabe sihlonipha imitsetfo yaJehova, sitawuletsa ludvumo kuye.

Umphostoli Phetro weluleka emaKhristu watsi: “Njengebantfwana labalalelako, yekelani kucondziswa tifiso lebeninato ngesikhatsi nisengakati lutfo, kepha ngekuvumelana naLoyo Longcwele lowanibita, nani banini ngcwele kuko konkhe kutiphatsa kwenu, ngobe kubhaliwe kutsi: ‘Kufanele nibe ngcwele, njengobe nami ngingcwele.’” (1 Phetro 1:14-16) Nasi sibonelo: Nangabe sitiphatsa kabi ngekwelicansi, sitalihlambalata libito laNkulunkulu. Kodvwa nasitiphatsa kahle, siyamdvumisa Jehova.

Nangabe lomunye waBoFakazi BaJehova enta lokubi, bantfu labamatiko batawukwati loko lakwentako. Ngako nasebati kutsi akasasuye lomunye waBoFakazi BaJehova, batawubona kutsi bantfu baJehova bayakulalela loko lokushiwo liBhayibheli futsi bagcina libandla lihlantekile. Sibonelo saloku kutsi lenye indvodza yaseSwitzerland yeta esifundvweni futsi yatsi ifuna kuba lilunga lelibandla. Sisi wayo abeyekelisiwe kuba nguFakazi ngenca yekutiphatsa kabi ngako beseyifuna kuba lilunga lenhlangano “lengakubeketeleli kutiphatsa kabi.”

Kuyekeliswa kuba nguFakazi kugcina libandla lebuKhristu lihlantekile. Umphostoli Pawula wecwayisa baseKhorinte ngengoti yekuvumela soni lesingaphendvuki kutsi sichubeke sisebandleni. Wafanisa umoya waso lomubi nemvubelo lebilisa inhlama. Pawula watsi: “Imvubelo lencane iyibilisa yonkhe inhlama.” Ngako wabeluleka watsi: “Msuseni umuntfu lomubi emkhatsini wenu.”—1 Khorinte 5:6, 11-13.

‘Lomuntfu lomubi’ bekatiphatsa kabi ngekwelicansi futsi ete emahloni ngaloko. Labanye ebandleni besebacale nekukubeketelela  kutiphatsa kwakhe lokubi. (1 Khorinte 5:1, 2) Loku bekuyingoti ngobe lamanye emaKhristu abengahungwa kutiphatsa kabi lobekuvamile eKhorinte. Nalamuhla, nangabe libandla lingasinaki sono lesikhulu, labanye bangacabanga kutsi timiso taJehova atikabaluleki. (Umshumayeli 8:11) Njengobe ‘emadvwala lafihlwe ngephansi kwemanti’ angawephula umkhumbi, toni letingaphendvuki tingalimata kukholwa kwalabanye ebandleni.—Juda 4, 12.

Kuyekeliswa kuba nguFakazi kungasita lesoni kutsi sibone liphutsa laso. Jesu wasebentisa umfanekiso welijaha lelashiya likhaya lakubo lahamba layodlabhatisa lifa lalo liphila imphilo lembi. Ngekuhamba kwesikhatsi lelijaha labona kutsi imphilo lebeliyiphila beyimunyu. Ngako laphendvuka labuyela ekhaya. Uyise wajabula kakhulu nakabona kutsi indvodzana yakhe seyiphendvukile, futsi wayemukela ngetandla letimhlophe. (Lukha 15:11-24) Lomfanekiso uyasisita sibone indlela Jehova lativa ngayo nangabe lotsite aphendvuka. Jehova utsi: “Angikujabuleli kufa kwalomubi, kodvwa ngitsandza kutsi agucuke etindleleni takhe letimbi aphile.”—Hezekeli 33:11.

Libandla lebuKhristu lingumndeni wetfu. Nangabe lotsite ayekeliswa kuba nguFakazi, usuke angasasilo lilunga lalomndeni. Nasekatfole imiphumela lebuhlungu yekutiphatsa kwakhe lokubi, angalibona liphutsa lakhe futsi akhumbule injabulo labekanayo ngesikhatsi anebudlelwane lobuhle naJehova nelibandla. Loku kungamkhutsata kutsi abuye ebandleni.

Kute sisite umuntfu loyekelisiwe kuba nguFakazi kutsi abuye ebandleni, kufanele sikhombise kutsi siyamtsandza ngekuhlonipha lelilungiselelo. Nasi sibonelo: Cabanga ngebacanci lababili betintsaba labalindzele kutfola lusito ngelilanga lelishubisa umnkantja lasebusika. Ngesizatfu sekutsi kubandza kakhulu, munye kulabacanci uyadzinwa futsi afune kulala. Kodvwa nakalala echweni, utakufa. Kute amsite ahlale aphapheme, umngani wakhe umshaya ngemphama ebusweni. Ngisho nobe loku kubuhlungu, kungakusindzisa kuphila kwakhe. Davide washo intfo lefanako ngesikhatsi atsi: “Ngingamane ngijeziswe ngumuntfu lolungile, loko kungumusa kimi.” (Tihlabelelo 141:5) Davide wabona kutsi ngisho nobe sijeziso sibuhlungu, sitamsita.

Njengalokushaywa ngemphama, kuyekeliswa kuba nguFakazi kuyaye kube nguloko umuntfu lakudzingako kute abuye kuJehova. Indvodzana yaJulian lokukhulunywe ngayo ekucaleni kwalesihloko, yakushintja kuphila kwayo futsi yabuya ebandleni ngemuva kweminyaka lelishumi iyekelisiwe kuba nguFakazi. Nyalo ingulomdzala welibandla. Iyavuma itsi: “Kuyekeliswa kuba nguFakazi kwangenta ngayibona imiphumela yekutiphatsa kwami. Ngangisidzinga leso sijeziso.”—Hebheru 12:7-11.

Kubuhlungu kakhulu nangabe lotsite ayekeliswa kuba nguFakazi. Kodvwa loko akusho kutsi ngeke aphindze abuye kuJehova. Kubalulekile kutsi sonkhe sisivumele lesijeziso kutsi sisebente. Singakwenta njani loko?

Labadzala betama ngaso sonkhe sikhatsi kulingisa lutsandvo lwaJehova, ikakhulukati nakufanele batjele lotsite kutsi akasasiye lomunye waBoFakazi BaJehova. Ngemusa nangendlela lecacile bayamchazela loko lokufanele akwente kute abuye kuJehova futsi aphindze abe yincenye yelibandla. Nangabe lotsite loyekelisiwe kuba nguFakazi  akhombisa kutsi uyafuna kubuya ebandleni, labadzala bangamvakashela tikhatsi letinyenti kute bamkhumbute loko langakwenta kuze abuye kuJehova. *—Fundza umbhalo longentansi.

Emalunga emndeni akhombisa lutsandvo ngelibandla nangemuntfu loyekelisiwe kuba nguFakazi nangabe asisekela sincumo lesitsetfwe ngulabadzala. Julian uyachaza: “Abesolo ayindvodzana yami, kodvwa indlela labephila ngayo yasehlukanisa.”

Bonkhe labasebandleni bakhombisa lutsandvo kuloyo loyekelisiwe kuba nguFakazi ngekutsi basisekele sijeziso Jehova lamnike sona ngalabadzala belibandla. Loku kusho kutsi akukafaneli bacitse sikhatsi naye nobe bamkhulumise. (1 Khorinte 5:11; 2 Johane 10, 11) Libandla kufanele liwukhombise lutsandvo umndeni waloyo loyekelisiwe kuba nguFakazi liphindze liwusekele. Lesi kusuke kusikhatsi lesimatima kakhulu emndenini waloyo muntfu. Akukafaneli sibente bative shengatsi abasanakwa ebandleni.—Roma 12:13, 15.

Julian uphetsa ngekutsi: “Kuyekeliswa kuba nguFakazi lilungiselelo lesilidzingako, lelisisita kutsi siphile ngekuvumelana netimiso taJehova. Nanobe libuhlungu, ngekuhamba kwesikhatsi liletsa imiphumela lemihle. Kube ngakubeketelela kutiphatsa kabi kwendvodzana yami, ngabe ayizange isitakale.”