1. Nguliphi likhono lelingasisita kutsi silingise Jehova?

JEHOVA wasidala saba nelikhono lekucondza indlela labanye bantfu labativa ngayo nanobe singakake saba sesimeni sabo. (Fundza Efesu 5:1, 2.) Lelikhono lingasisita njani kutsi silingise Jehova? Kungani kufanele siyigadze indlela lesilisebentisa ngayo?

2. Jehova utiva njani nasihlupheka?

² Jehova usetsembise likusasa lelihle lelite kuhlupheka. Labagcotjiwe ‘naletinye timvu’ bangabuka embili ekuphileni phakadze, kungaba sezulwini nobe emhlabeni. (Johane 10:16; 17:3; 1 Khorinte 15:53) Kodvwa Jehova uyabucondza buhlungu lesibuvako nangabe kwenteka tintfo letimbi kitsi lamuhla. Esikhatsini lesendlulile, Jehova weva buhlungu ngesikhatsi bantfu bakhe bahlupheka eGibhithe. “Naye abekhatsatekile.” (Isaya 63:9) Ngemuva kwaloko, ngesikhatsi bantfu bakhe bakha kabusha lithempeli futsi besaba titsa tabo, Jehova wayicondza indlela lebebativa ngayo. Wabatjela watsi: “Lotsintsa nine  utsintsa inhlavu yeliso [lami].” (Zakhariya 2:8) Njengobe nje namake amtsandza umntfwana wakhe, Jehova uyatitsandza tinceku takhe futsi ufuna kutisita. (Isaya 49:15) Silingisa lutsandvo lwaJehova nasetama kucondza indlela labanye labativa ngayo ngekutsi siticabange sisesimeni sabo.—Tihlabelelo 103:13, 14.

3. Jesu abetiva njani ngebantfu?

³ Jesu abeyicondza indlela bantfu labebativa ngayo nabahlupheka, nanobe yena abengakake waba sesimeni sabo. Sibonelo saloko kutsi bekati kutsi bantfu labanyenti bebaphila kamatima. Baholi benkholo bebabayenga futsi bashaya imitsetfo leminyenti lebeyingaveli kuNkulunkulu. Bantfu bebabesaba labaholi. (Matewu 23:4; Makho 7:1-5; Johane 7:13) Nanobe Jesu abengabesabi futsi abengawakholwa emanga abo, kodvwa bekayicondza indlela bantfu lebebativa ngayo. Kwamvisa buhlungu kubona indlela bantfu lebebaphatfwa kabi ngayo. Bekute longabasita, bafana ‘netimvu letite umelusi.’ (Matewu 9:36) Jesu wakufundza kuYise kutsandza bantfu, kuba ‘nesihawu futsi andze ngemusa.’—Tihlabelelo 103:8.

4. Yini Jesu layenta ngesikhatsi abona bantfu bahlupheka?

⁴ Ngesikhatsi Jesu abona kutsi bantfu bayahlupheka, wabasita ngobe bekabatsandza. Bekafana ncamashi neYise. Nasi sibonelo: Ngalelinye lilanga ngesikhatsi Jesu nebaphostoli bakhe bahambe indlela lendze emsebentini wekushumayela, bebadziniwe futsi badzinga indzawo lethulile kute baphumule. Kodvwa Jesu wabona bantfu labanyenti lebebamlindzile. Nanobe bekadziniwe, wabona kutsi badzinga lusito lwakhe ‘wase ubafundzisa tintfo letinyenti.’—Makho 6:30, 31, 34.

5, 6. Yini lokufanele siyente nangabe sifuna kuba nelutsandvo njengaJehova? Shano sibonelo. (Buka sitfombe lesisekucaleni kwalesihloko.)

⁵ Yini lokufanele siyente nangabe sifuna kuba nelutsandvo njengaJehova? Cabanga nganasi simo. Asesitsi kunemzalwane losemusha lokutsiwa ngu-Alan. Alan ucabanga ngemzalwane losakhulile longakhoni kuhamba kahle futsi longaboni kahle emehlweni. Ucabanga ngemavi aJesu latsi: “Njengobe nifuna bantfu bente kini, yentani kanjalo nani kubo.” (Lukha 6:31) Ngako uyatibuta: ‘Yini lengifuna bantfu bayente kimi?’ Utsi: ‘Ngifuna badlale nami ibhola!’ Kodvwa lomzalwane losakhulile ngeke akhone kugijima nobe kudlala ibhola. Ngako Alan kufanele atibute nangu umbuto: ‘Kube bengingulomzalwane, yini lebengitawufuna bantfu bayente kimi?’

⁶ Nanobe Alan asemusha, wetama kucabanga kutsi abetawutiva njani kube semdzala. Ucitsa sikhatsi nalomzalwane losakhulile futsi amlalelisise njengobe akhuluma. Ngako ucala kucondza kutsi kumatima kulomzalwane kufundza liBhayibheli nekuhamba nakaya emsebentini wekushumayela emtini ngemuti. Alan uyayibona indlela langamsita ngayo futsi  ufuna kwenta konkhe langakhona kukwenta kute amsite. Nasiyicondza indlela labanye bantfu labativa ngayo futsi sibakhombise lutsandvo, sitawube silingisa Jehova.—1 Khorinte 12:26.

7. Singakucondza njani loko lokwenteka kubazalwane betfu?

⁷ Akusimelula ngaso sonkhe sikhatsi kukucondza loko lokwenteka kulabanye bantfu, ikakhulukati nangabe singakake saba sesimeni sabo. Nasi sibonelo: Bazalwane betfu labanyenti beva buhlungu ngesizatfu sekugula, ingoti nobe kuguga. Labanye bahlushwa kucindzeteleka, kukhatsateka kakhulu nobe kuphatfwa kabi kwangesikhatsi lesendlulile. Labanye bakhulisa bantfwana babodvwa kantsi labanye banemalunga emndeni langamkhonti Jehova. Bonkhe bantfu banetinkinga, futsi linyenti lato lehlukile etinkingeni lesinato. Kodvwa sifuna kukhombisa labanye lutsandvo futsi sibasite. Yini lesingayenta? Umuntfu ngamunye angadzinga lusito lolwehlukile. Ngako nasilalelisisa futsi sichubeke setama kuyicondza indlela lativa ngayo, sitawutfola indlela lencono yekumsita. Mhlawumbe singamkhumbuta indlela Jehova lativa ngayo ngenkinga yakhe. Nobe singase simsite ngaletinye tindlela. Nasenta njalo, sitawube silingisa Jehova.—Fundza Roma 12:15; 1 Phetro 3:8.

8. Yini leyasita Jesu kutsi abe nemusa?

⁸ Jehova unemusa kubo bonkhe bantfu. (Lukha 6:35) Jesu ufana ncamashi neYise. Yini leyasita Jesu kutsi abe nemusa kubantfu ngesikhatsi asemhlabeni? Abecabanga ngendlela lebebatawutiva ngayo ngaloko labekatakusho nobe akwente kubo. Nasi sibonelo: Lomunye umfati lobekente tintfo letinyenti letimbi weta kuJesu. Bekadzindza sililo kangangekutsi tinyembeti takhe tawela etinyaweni taJesu. Jesu wabona kutsi lomfati bekatisola kakhulu ngetintfo letimbi labetentile nekutsi abesaphendvukile. Wabona kutsi nakangeke amkhombise umusa, utawuva buhlungu kakhulu. Ngako wamdvumisa ngalokuhle labesakwentile futsi wamcolela. Jesu waphindze wakhuluma ngemusa nemFarisi lobekangakucondzi loko labekwentile kulomfati.—Lukha 7:36-48.

9. Yini lengasisita kutsi sibe nemusa njengaJehova? Shano sibonelo.

⁹ Singaba njani nemusa njengaJehova? Kufanele sicabange ngaphambi kwekutsi sikhulume nobe sente lokutsite  kulabanye kuze sitewuba nemusa futsi singabavisi buhlungu. Pawula wabhala kutsi umKhristu ‘akukafaneli alwe, kodvwa kufanele abe nemusa kubo bonkhe.’ (2 Thimothi 2:24) Nasi sibonelo: Cabanga kutsi ungawukhombisa njani umusa kunati timo: Yini longayenta nangabe umcashi wakho angawenti kahle umsebenti wakhe? Yini longayisho nangabe eHholweni leMbuso ubona umzalwane losekuphele tinyanga letinyenti angeti esifundvweni? Ungawukhombisa njani umusa nangabe umuntfu lomshumayelako atsi umatasatasa kakhulu kutsi angakhuluma nawe? Ungamkhulumisa kahle yini umfati wakho nangabe akubuta kutsi kungani ungakamtjeli ngetinhlelo lotentile? Kufanele sicabange ngendlela labanye labativa ngayo nangekutsi emavi etfu angabatsintsa njani. Ngaleyo ndlela sitawukwati loko lokufanele sikusho nobe sikwente kuze sibe nemusa njengaJehova.—Fundza Taga 15:28.

10, 11. Singamlingisa njani Jehova futsi sihlakaniphe? Shano sibonelo.

¹⁰ Jehova uhlakaniphe kakhulu, futsi uyakhona kukubona loko lokutawenteka esikhatsini lesitako. Nanobe singalati likusasa, singakhona kuhlakanipha. Singakwenta njani loko? Ngaphambi kwekutsi sente sincumo, singacabanga ngekutsi sitasitsintsa njani tsine nobe labanye. Akukafaneli silingise ema-Israyeli. Awazange acabange ngaloko lobekutawenteka kuwo nakangamlaleli Jehova. Awazange acabange nangebuhlobo bawo naye nangako konkhe labekawentele kona. Njengobe Mosi bekakubona loko, bekati kutsi ema-Israyeli abetawenta tintfo letimbi. Watsi: “Basive lesite ingcondvo, kute kubo kwehlukanisa lokubi nalokuhle. Kube mane bebangahlakanipha, bakucondze loku, bakhanyelwe kutsi siphetfo sabo sitakuba yini!”—Dutheronomi 31:29, 30; 32:28, 29.

¹¹ Nasi sibonelo: Nangabe unemuntfu lotsandzana naye, khumbula kutsi kungahle kube matima kulawula imiva yakho nenkhanuko. Ngako ungacali wente intfo lengalimata buhlobo bakho lobuligugu naJehova! Esikhundleni saloko, hlakanipha futsi ubalekele ingoti. Lalela seluleko saJehova lesihlakaniphile lesitsi: “Umuntfu lohlakaniphile ingoti uyibona iseta, bese uyayibalekela; kantsi longenangcondvo ucondza ngco kuyo, bese utisola emvakwesikhatsi.”—Taga 22:3.

12. Imicabango yetfu ingasilimata njani?

¹² Umuntfu lohlakaniphile uyayilawula imicabango yakhe. Imicabango yetfu ingasisita nobe isilimate, njengobe  nje nemlilo ungasisita nobe usilimate. Nangabe siwusebentisa kahle umlilo, singakwati kupheka kudla ngawo. Kodvwa nasingakagadzi, umlilo ungasishisela indlu futsi usibulale. Kuyafanana nangemicabango yetfu. Nasicabanga ngetintfo lesitifundza kuJehova, sitawuzuza. Kodvwa nangabe sihlale sicabanga ngekutiphatsa kabi ngekwelicansi futsi siticabange senta tintfo letimbi, sitawutifisa size sigcine sitenta. Loko kungabucedza buhlobo betfu naJehova.—Fundza Jakobe 1:14, 15.

13. Yini Eva layicabanga ngekuphila kwakhe?

¹³ Singafundza esibonelweni sa-Eva, umfati wekucala. Jehova abeyale bo-Adamu na-Eva kutsi bangasidli sitselo “sesihlahla sekwati lokulungile nalokungakalungi.” (Genesisi 2:16, 17) Kodvwa Sathane watsi ku-Eva: “Ningeke nife, kepha Nkulunkulu uyati kutsi mhlazana nisidla, emehlo enu ayawuvuleka, bese nifanana naNkulunkulu nikwati lokuhle nalokubi.” Eva wacabanga ngendlela kuphila kwakhe lobekutawuba ncono ngayo kube bekangakhona kutincumela emkhatsini walokuhle nalokubi. Wachubeka acabanga ngaloku futsi ‘wabona kutsi lesihlahla sasifanelwe kudliwa, nekutsi sasibukeka sisihle.’ Kwabese kwentekani? “Wakha kulesihlahla wadla. Wanika nendvodza yakhe, nayo yadla.” (Genesisi 3:1-6) Ngaleyo ndlela “sono sangena eveni, nekufa kwangena ngesono.” (Roma 5:12) Eva kwakungakafaneli achubeke acabanga ngekwenta lokubi!

14. Ngutiphi tecwayiso liBhayibheli lelisinika tona mayelana nekutiphatsa kabi ngekwelicansi?

¹⁴ Kuliciniso kutsi sono sa-Eva besingasiko kutiphatsa kabi ngekwelicansi. Kodvwa liBhayibheli lisecwayisa ngalokucacile kutsi singahlali sicabanga imicabango yekutiphatsa kabi ngekwelicansi. Jesu watsi: “Wonkhe umuntfu lochubeka abuka lomsikati ate amkhanuke sewuvele uphingile naye enhlitiyweni.” (Matewu 5:28) Ngetulu kwaloko, Pawula wecwayisa watsi: “Ningakuhleli kusengaphambili kwenelisa tifiso tenyama.”—Roma 13:14.

15. Ngumuphi umcebo lokufanele sitibekele wona, futsi ngani?

¹⁵ LiBhayibheli liphindze lisitjele kutsi kufanele sinake kujabulisa Jehova futsi singahlali sicabanga ngebunjinga. Ngisho nobe umuntfu anjingile, imali yakhe ngeke ikhone kumvikela. (Taga 18:11) Jesu watsi umuntfu usuke angakahlakaniphi nangabe atibekela umcebo lomnyenti kodvwa angamenti Jehova ete kucala ekuphileni kwakhe. Usuke “angakacebi emehlweni aNkulunkulu.” (Lukha 12:16-21) Nasitibekela “umcebo ezulwini” ngekutsi sente loko Jehova lakutsandzako, sitamenta ajabule natsi sijabule. (Matewu 6:20; Taga 27:11) Buhlobo lobuhle naJehova bubaluleke kakhulu kwendlula tonkhe letinye tintfo.

16. Yini lengasisita nangabe sikhatsatekile?

¹⁶ Nangabe silwela kunjinga kulelive, sitawukhatsateka kakhulu. (Matewu 6:19) Jesu watsi labo labahlale bakhatsateke ngemali, batakutfola  kumatima kubeka uMbuso waNkulunkulu kucala ekuphileni kwabo. (Matewu 13:18, 19, 22) Labanye bantfu bahlale bakhatsateke ngetintfo letimbi letingase tenteke kubo. Kodvwa kuhlale sikhatsatekile kungasibangela kugula nobe kusente siphelelwe kukholwa kuJehova. Esikhundleni saloko, kufanele setsembe kutsi Jehova utasisita. LiBhayibheli litsi: “Kukhatsateka kuyamondzisa umuntfu; kodvwa livi lemusa limenta ajabule.” (Taga 12:25) Ngako-ke, nangabe kukhona lokukukhatsatako, khuluma nemuntfu lokhonta Jehova futsi lokwati kahle. Umtali wakho, umuntfu loshade naye nobe umngani lometsembako angakukhutsata kutsi wetsembele kuJehova futsi akusite kuze utive uncono.

17. Jehova angasisita njani nasikhatsatekile?

¹⁷ Jehova uyicondza kancono indlela lesitiva ngayo futsi angasisita kutsi sitive sincono nangabe kukhona lokusikhatsatako. Pawula wabhala watsi: “Ningakhatsateki ngalutfo, kodvwa kuko konkhe ticelo tenu atatiwe nguNkulunkulu ngekuthantaza, ngekuncusa nangekubonga; kuthula kwaNkulunkulu lokwendlula konkhe kucondza kutawulondza tinhlitiyo netingcondvo tenu ngaKhristu Jesu.” (Filiphi 4:6, 7) Ngako-ke nawukhatsatekile cabanga ngelusito Jehova lakunika lona kute ugcine buhlobo bakho naye bucinile, njengalelo lolutfola kubazalwane nabodzadze wenu, kulabadzala belibandla, esisebentini lesetsembekile, etingilosini nakuJesu.

18. Likhono letfu lekucabanga lingasisita njani?

¹⁸ Njengobe sesifundzile, sisuke silingisa Jehova nangabe sisebentisa likhono letfu lekucondza indlela labanye bantfu labativa ngayo. (1 Thimothi 1:11; 1 Johane 4:8) Sitawujabula nangabe sikhombisa lutsandvo nemusa kulabanye, nasicabanga ngemiphumela yetento tetfu futsi singahlali sikhatsatekile. Ngako-ke, asicabange ngekutsi kuphila kutawuba njani nasekubusa uMbuso waNkulunkulu, futsi sente konkhe lokusemandleni etfu kute silingise Jehova.—Roma 12:12.