1. Nasishumayela, singawusebentisa njani umthantazo waJesu lokuMatewu 6:9-13?

BANTFU labanyenti bayawati emavi emthantazo lakuMatewu 6:9-13. Nasishumayela, sisebentisa emavi alomthantazo kute sifundzise bantfu kutsi uMbuso unguhulumende waNkulunkulu sibili lotawushintja lomhlaba ube lipharadisi. Siphindze sisebentise emavi latsi “alingcweliswe libito lakho” kute sikhombise kutsi Nkulunkulu unelibito futsi kufanele silitsatse njengalelingcwele.—Matewu 6:9.

2. Sati ngani kutsi Jesu abengafuni siphindzaphindze emavi lafanako ngaso sonkhe sikhatsi nasithantaza?

² Jesu abefuna siphindzaphindze lamavi lawasebentisa yini ngaso sonkhe sikhatsi nasithantaza, njengobe labanyenti benta? Cha. Jesu watsi: “Nawuthantaza, ungaphindzaphindzi intfo yinye.” (Matewu 6:7) Ngalesinye sikhatsi, nakafundzisa bafundzi bakhe indlela yekuthantaza, wawuphindza lomthantazo kodvwa akasebentisanga emavi lafanako. (Lukha 11:1-4) Ngako Jesu wasiniketa umthantazo losibonelo kute asifundzise kutsi ngutiphi tintfo lokufanele sitithantazele.

3. Ngumiphi imibuto longatibuta yona njengobe ufundza ngemthantazo losibonelo?

 ³ Kulesihloko nakulelesilandzelako, sitawufundza kabanti ngalomthantazo losibonelo. Njengobe sifundza, tibute: ‘Lomthantazo ungangisita njani kute ngithantaze ngendlela lekahle? Lokubaluleke kakhulu, ngiphila ngekuvumelana nemthantazo losibonelo yini?’

4. Asikhumbutani emavi latsi “Babe wetfu,” futsi Jehova unguBabe wetfu ngayiphi indlela?

⁴ Jesu wacalisa lomthantazo ngekutsi atsi: “Babe wetfu.” Loku kusikhumbuta kutsi Jehova unguBabe wawo onkhe emaKhristu emhlabeni. (1 Phetro 2:17) Labo labakhetfwe nguJehova kutsi bayophila ezulwini bangemadvodzana akhe, ngako unguYise wabo ngendlela lekhetsekile. (Roma 8:15-17) Labo labatawuphila phakadze emhlabeni nabo bangambita ngekutsi “Babe.” Jehova ubanika kuphila futsi asekele tidzingo tabo ngelutsandvo. Batawubitwa ngekutsi ‘bantfwana baNkulunkulu’ nasebete sono futsi nabachubeka betsembekile kuJehova ngesikhatsi sekuvivinywa kwekugcina.—Roma 8:21; Sembulo 20:7, 8.

5, 6. Ngusiphi sipho lesihle batali labangasinika bantfwana babo, futsi umntfwana ngamunye yini langayenta ngalesipho? (Buka sitfombe lesisekucaleni kwalesihloko.)

⁵ Batali baniketa bantfwana babo sipho nababasita bacondze kutsi Jehova unguBabe wabo wasezulwini nalapho babafundzisa kutsi bathantaze kuye. Lomunye umbonisi wesigodzi eNingizimu Afrika watsi: “Kusukela emadvodzakati etfu etalwa, ngangithantaza nawo onkhe malanga ngaphandle kwalapho ngingekho ekhaya. Emadvodzakati etfu avamise kutsi akawakhumbuli ngalokucondzile emavi emithantazo yami. Nobe kunjalo, akhumbula simo lebesiba khona, kubaluleka kwekukhuluma naBabe wetfu Jehova, nekutiva anekuthula futsi avikelekile. Nase akwati kuthantaza, bengiwakhutsata kutsi athantaze ngalokuvakaloko kute ngive indlela laveta ngayo imicabango nemiva yawo kuJehova. Leli kwabalitfuba lelikahle lekutfola loko lokusetinhlitiyweni tawo. Bengibese ngiyawasita kutsi afake letinye tintfo letibalulekile letikulomthantazo losibonelo kute ente imithantazo yawo ibe nesisindvo.”

⁶ Emadvodzakati akhe achubeka asondzelana naJehova ngisho sekakhulile. Nyalo sekashadile futsi akhonta Jehova sikhatsi sonkhe akanye nemadvodza awo. Sipho lesihle kakhulu batali labangasinika bantfwana babo, kubafundzisa kutsi Jehova unguMuntfu mbamba nekutsi bangaba bangani bakhe labasedvute. Kodvwa umntfwana ngamunye kudzingeka agcine bungani bakhe naJehova bubuhle.—Tihlabelelo 5:11, 12; 91:14.

7. Nguliphi lilungelo lesinalo, futsi yini lokufanele siyente?

⁷ Sinelilungelo lekwati libito laNkulunkulu nelekuba “bantfu labatawubitwa ngelibito lakhe.” (Imisebenti 15:14; Isaya 43:10) Sithantaza sitsi: “Alingcweliswe libito lakho.” Siphindze sicele Jehova kutsi asisite singenti nobe sisho intfo letsite lengase imhlambalate. Akukafaneli sibe njengalabanye bangelikhulu lekucala leminyaka labangazange bente loko lebebakufundzisa. Pawula wababhalela watsi: “Libito laNkulunkulu liyahlanjalatwa kubantfu betive ngenca yenu.”—Roma 2:21-24.

8, 9. Shano sibonelo lesikhombisa indlela Jehova labasita ngayo labo labangcwelisa libito lakhe.

 ⁸ Senta konkhe lokusemandleni kute sidvumise libito laJehova. Lomunye dzadze eNorway lowasala nedvodzana yakhe leneminyaka lemibili budzala ngemuva kwekushonelwa yindvodza yakhe, utsi: “Kwakusikhatsi lesimatima kakhulu ekuphileni kwami. Ngangithantaza onkhe emalanga, cishe li-awa ngeli-awa, ngicela emandla ekuchubeka nginesimo lesikahle. Loko ngangikwenta kute ngingamniki Sathane sizatfu sekuhlambalata Jehova ngenca yesincumo sami lesingakahlakaniphi nobe kungetsembeki. Ngangifuna kungcwelisa libito laJehova futsi ngifuna indvodzana yami iphindze ibone uyise ePharadisi.”—Taga 27:11.

⁹ Jehova wayiphendvula yini imithantazo yakhe? Yebo. Lodzadze wakhutsateka njengobe abehlala anebazalwane nabodzadze. Ngemuva kweminyaka lesihlanu, washada nalomdzala welibandla. Indvodzana yakhe nyalo leniminyaka lengu-20 budzala ibhajatisiwe. Lodzadze utsi: “Ngijabula kakhulu ngekutsi indvodza yami yangisita ngakhona kumkhulisa lomfana.”

10. Nkulunkulu utalingcwelisa njani libito lakhe ngalokuphelele?

¹⁰ Jehova utawungcwelisa libito lakhe ngalokuphelele nakabhubhisa bonkhe labamhlambalatako nalabangafuni kutsi abe nguMbusi wabo. (Fundza Hezekeli 38:22, 23.) Ngaleso sikhatsi, bantfu batawuba bete sono futsi bonkhe labasezulwini nasemhlabeni batawukhonta Jehova baphindze badvumise libito lakhe lelingcwele. Ekugcineni, Babe wetfu lonelutsandvo ‘utawuba nguko konkhe kubo bonkhe.’—1 Khorinte 15:28.

11, 12. Nga-1876 yini Jehova lasita bantfu bakhe kutsi bayicondze?

¹¹ Ngaphambi kwekutsi Jesu abuyele ezulwini, bafundzi bakhe bambuta batsi: “Nkhosi, sengiso yini lesi sikhatsi lotawubuyisela ngaso uMbuso ku-Israyeli?” Jesu wabaphendvula watsi sasingakefiki sikhatsi sekutsi bati kutsi uMbuso waNkulunkulu utawucala nini kubusa. Watjela bafundzi bakhe kutsi banake umsebenti lobalulekile wekushumayela. (Fundza Imisebenti 1:6-8.) Kodvwa waphindze wabafundzisa kutsi bathantazele uMbuso waNkulunkulu kutsi ute, baphindze basibuke ngalabovu leso sikhatsi. Kungako nanyalo sithantazela uMbuso kutsi ufike.

¹² Nasesisondzele sikhatsi sekutsi Jesu acale kubusa ezulwini, Jehova wasita bantfu bacondza kutsi loko bekutawenteka ngamuphi umnyaka. Nga-1876, Charles Taze Russell wabhala indzaba lenesihloko lesitsi: “Tikhatsi Tebetive: Tiphela Nini?” Wachaza kutsi “tikhatsi letisikhombisa” lokukhulunywa ngato esiphrofethweni saDanyela, tiyafanana ‘nesikhatsi lesibekiwe setive’ esiphrofethweni saJesu. Lesihloko sachaza kutsi letikhatsi titawuphela nga-1914. * (Fundza umbhalo longentansi.)—Danyela 4:16; Lukha 21:24.

13. Yini leyenteka nga-1914, futsi tintfo letenteka emhlabeni kusukela ngaloyo mnyaka tifakazelani?

¹³ Nga-1914, imphi yacala eYurophu futsi ngekushesha lokukhulu yagcwala umhlaba wonkhe. Ngenca yalemphi, kwaba nendlala lenkhulu. Ngasekupheleni kwa-1918, umkhuhlane lobulalako  wabulala bantfu labanyenti emhlabeni kunalabo lababulawa yimphi. Konkhe loku kwakuyincenye ‘yesibonakaliso’ lesashiwo nguJesu. Lesibonakaliso safakazela kutsi Jesu waba yiNkhosi ezulwini nga-1914. (Matewu 24:3-8; Lukha 21:10, 11) Ngaloyo mnyaka, “wahamba ancoba, ayocedzela nekuncoba kwakhe.” (Sembulo 6:2) Jesu wacosha Sathane nemadimoni akhe ezulwini wabajikijela emhlabeni. Ngemuva kwaloko kwagcwaliseka siphrofetho lesitsi: “Maye ngemhlaba nangelwandle, ngobe Develi wehlele kini atfukutsele kakhulu, ati kutsi unesikhatsi lesincane.”—Sembulo 12:7-12.

14. (a) Kungani solo sithantazela kutsi uMbuso waNkulunkulu ute? (b) Ngumuphi umsebenti lobalulekile lokufanele siwente?

¹⁴ Siphrofetho lesikuSembulo sehluko 12, sisisita sicodze kutsi kungani tintfo letimbi tacala kwenteka emhlabeni ngesikhatsi Jesu aba yiNkhosi yeMbuso waNkulunkulu. Ngisho nobe Jesu abusa ezulwini, Sathane solo uyabusa emhlabeni. Kodvwa ngekushesha Jesu ‘utawucedzela kuncoba kwakhe’ ngekutsi asuse bonkhe bubi emhlabeni. Kudzimate kube nguleso sikhatsi, sitawuchubeka sithantazela kutsi uMbuso waNkulunkulu ufike futsi sibe matasatasa sishumayela ngawo. Umsebenti wetfu ugcwalisa siphrofetho saJesu lesitsi: “Letindzaba letimnandzi teMbuso tiyawushunyayelwa emhlabeni wonkhe, kuze kube bufakazi etiveni tonkhe, bese-ke kuphela kuyefika.”—Matewu 24:14.

15, 16. Kwenele yini kuthantazela kutsi intsandvo yaNkulunkulu yenteke emhlabeni? Chaza.

¹⁵ Eminyakeni lengetulu kwa-6 000 leyendlulile, intsandvo yaNkulunkulu beyentiwa emhlabeni. Kungako Jehova atsi konkhe ‘kwakukuhle kakhulu.’ (Genesisi 1:31) Ngemuva kwaloko, Sathane wavukela futsi kusukela ngaleso sikhatsi  bantfu labanyenti abayenti intsandvo yaNkulunkulu. Kodvwa lamuhla kunebantfu labacishe babe tigidzi letisiphohlongo labakhonta Jehova. Bathantazela kutsi intsandvo yaNkulunkulu yentiwe emhlabeni, futsi nabo bayayenta. Baphila ngendlela lejabulisa Nkulunkulu futsi ngenkhutsalo bafundzisa labanye ngeMbuso wakhe.

¹⁶ Nasi sibonelo: Lomunye dzadze loneminyaka lengu-80 budzala lositfunywa selivangeli e-Afrika, lowabhajatiswa nga-1948 utsi: “Ngivame kuthantazela kutsi bonkhe bantfu labanjengetimvu batfolakale futsi basitwe kutsi bati Jehova kungakephuti. Ngaphambi kwekutsi ngishumayele umuntfu, ngicela kuhlakanipha kute ngikwati kumfinyelela inhlitiyo. Ngalokuphatselene nalabanjengetimvu labatfolakele, ngithantazela kutsi Jehova abusise imetamo yetfu njengobe sibanakekela.” Lodzadze losakhulile usite bantfu labanyenti kutsi bafundze ngaJehova. Bakhona yini lobacabangako lasebakhulile labenta intsandvo yaJehova ngenkhutsalo?—Fundza Filiphi 2:17.

17. Utiva njani ngaloko Jehova latakwentela bantfu nemhlaba esikhatsini lesitako?

¹⁷ Kuze kube ngulapho Jehova asasuse tonkhe titsa takhe emhlabeni, sitawuchubeka sithantazela kutsi intsandvo yakhe yenteke. Ngemuva kwaloko, umhlaba utawentiwa lipharadisi futsi tigidzigidzi tebantfu titawuvuswa. Jesu watsi “sikhatsi siyeta lapho bonkhe labasemathuneni batawuliva livi layo futsi baphume.” (Johane 5:28, 29) Cabanga nje kutsi sitawube sijabule kangakanani nasemukela tihlobo tetfu lesititsandzako! Nkulunkulu “utawesula tonkhe tinyembeti” emehlweni etfu. (Sembulo 21:4) Linyenti lebantfu labatawuvuswa kutawuba ‘ngulabangakalungi,’ labo labangazange balifundze liciniso ngaJehova naJesu. Sitawujabulela kubafundzisa intsandvo yaNkulunkulu kuze nabo batfole ‘kuphila lokuphakadze.’—Imisebenti 24:15; Johane 17:3.

18. Yini bantfu labayidzinga kakhulu?

¹⁸ Nawufika uMbuso waNkulunkulu, utawungcwelisa libito lakhe, futsi bonkhe bantfu endzaweni yonkhe batawukhonta Jehova ngebunye. Nkulunkulu utawunika bantfu tintfo labatidzinga kakhulu nakaphendvula ticelo letintsatfu tekucala letikulomthantazo losibonelo. Esihlokweni lesilandzelako, sitawucoca ngekutsi ngutiphi letinye tintfo letibalulekile Jesu lasifundzisa kutsi sitithantazele.