1-3. Yini leyenta lomunye dzadze waciniseka kutsi Jehova uyakwati loko lakudzingako?

LANA, lolihlahlandlela lelivamile ngeke akukhohlwe lokwenteka ngesikhatsi avakashele eJalimane nga-2012. Ucabanga kutsi Jehova wayiphendvula imithantazo yakhe lemibili. Ngesikhatsi asesitimeleni aya esikhumulweni setindiza, wacela Jehova amsite atfole umuntfu latamshumayela. Nakefika lapho, watfola kutsi indiza yakhe itawufika ngelilanga lelilandzelako. Lana wacela Jehova kutsi amsite ngobe imali yakhe abesayisebentise cishe yonkhe futsi abedzinga indzawo yekulala.

² Nakacedza nje kuthantaza, Lana weva umuntfu atsi: “Sawubona Lana, ubekwa yini kulendzawo?” Kwakulijaha labekafundze nalo esikolweni. Belinamake walo nagogo walo labebete kutolivalelisa njengobe beliya eNingizimu Afrika. Ngesikhatsi Lana abachazela ngenkinga labekuyo, lomake nalogogo bammema kutsi ayolala emtini wabo. Bambuta imibuto leminyenti mayelana netinkholelo takhe  nangemsebenti wakhe wekuba lihlahlandlela.

³ Ngelilanga lelilandzelako ngemuva kwekudla kwasekuseni, Lana wabaphendvula imibuto leminyenti lebebanayo lemayelana neliBhayibheli. Lana wacela iminingwane yabo yekuchumana kute lotsite atewuta aphendvule imibuto yabo. Wabuyela ekhaya aphephile futsi usachubeka nekuba lihlahlandlela. Ucabanga kutsi Jehova wayiva imithantazo yakhe, wakubona loko labekudzinga futsi wamsita.—Tihlabelelo 65:2.

4. Ngutiphi tintfo lesitawucoca ngato?

⁴ Nasiba netinkinga singakalindzeli, kumelula kuthantaza sicele lusito kuJehova futsi uyakujabulela kulalela imithantazo yetfu. (Tihlabelelo 34:15; Taga 15:8) Kodvwa umthantazo waJesu losibonelo usifundzisa kutsi tinyenti tintfo letibalulekile lokufanele sitithantazele. Kulesihloko, sitawucoca ngendlela ticelo letine letisemthantazweni losibonelo letingasisita ngayo kuze setsembele kuJehova.—Fundza Matewu 6:11-13.

5, 6. Kungani Jesu asifundzisa kutsi sicele “sinkhwa setfu” ngisho nobe sinekudla lokunyenti?

⁵ Jesu wasifundzisa kutsi sicele “sinkhwa setfu” hhayi nje “sinkhwa sami.” Victor, longumbonisi wesigodzi e-Afrika uyachaza: “Ngivame kumbonga ngalokusuka enhlitiyweni Jehova kutsi mine nemkami asikhatsateki kakhulu ngekutsi sitakutsatsaphi kudla nobe ngekutsi ngubani lotasibhadalela imali yekucasha. Bazalwane betfu basinakekela ngemusa onkhe emalanga. Kodvwa ngithantazela kutsi labo labasisitako bakhone kuhlangabetana netinkinga temnotfo lababhekene nato.”

⁶ Kungenteka sinenala yekudla, kodvwa bazalwane betfu labanyenti baphuyile. Labanye bahlaselwe tehlakalo. Ngeke nje sigcine ngekubathantazela, kodvwa singenta lokutsite kute sibasite. Sibonelo saloku kutsi singabapha tintfo lesinato. Singaphindze sikhutsale ekunikeleleni umsebenti wemhlaba wonkhe webantfu baJehova. Siyati kutsi iminikelo yetfu isita bazalwane labahluphekile.—1 Johane 3:17.

7. Jesu wasifundzisa njani kutsi ‘singacali sikhatsateke ngelilanga lelilandzelako’?

⁷ Ngemuva kwekusifundzisa umthantazo losibonelo, Jesu wasifundzisa kutsi akukafaneli sinake umcebo. Watsi nangabe Jehova anakekela timbhali, “ngeke yini anembatsise kakhulu nine leninekukholwa lokungakacini? Ngako-ke ningacali nikhatsateke nitsi, . . . ‘sitawembatsani?’” Waphindze watsi: “Ningacali nikhatsateke ngelilanga lelilandzelako.” (Matewu 6:30-34) Akukafaneli sikhatsateke ngetintfo lesitatidzinga ngesikhatsi lesitako. Esikhundleni saloko, kufanele sinake tidzingo telilanga ngalinye. Nasi sibonelo: Singathantazela kutfola indzawo yekuhlala, kutfola umsebenti kute sinakekele imindeni yetfu kanye nekuhlakanipha kute sente tincumo letikahle mayelana nemphilo yetfu. Kodvwa kunalokutsite lokubaluleke kakhulu lokufanele sikuthantazele.

8. Asikhumbutani emavi aJesu lamayelana nesinkhwa setfu salamuhla? (Buka sitfombe lesisekucaleni kwalesihloko.)

 ⁸ Emavi aJesu lamayelana nesinkhwa setfu salamuhla asikhumbuta ngalokunye lakusho nakatsi: “Umuntfu ngeke aphile ngesinkhwa sodvwa, kodvwa ngawo onkhe emavi laphuma emlonyeni waJehova.” (Matewu 4:4) Ngako kufanele sithantazele kutsi Jehova achubeke asifundzisa futsi asinike lesikudzingako kute sitohlala sosondzelene naye.

9. Kungani tono tetfu tifanana nemacala?

⁹ Jesu watsi: “Usitsetselele emacala etfu.” Kulesinye sikhatsi watsi: “Usitsetselele tono tetfu.” (Matewu 6:12, NW-ZU; Lukha 11:4) Loku wakusho ngobe tono tetfu tifanana nemacala. Nga-1951, Sicongosekulindza sachaza kutsi nasona kuba shengatsi siba nelicala kuJehova. Sikweleta Jehova lutsandvo nekumlalela. Ngako nasona kuNkulunkulu, asimniki loko lesimkweleta kona. Le-Sicongosekulindza satsi kube Jehova abefuna, abengayekela kuba ngumngani wetfu. Sengeta satsi: “Kwenta sono kukhombisa kungamtsandzi Nkulunkulu.”—1 Johane 5:3.

10. Kungani Jehova angasicolela tono tetfu, futsi kufanele sitive njani ngaloko?

¹⁰ Sijabula kakhulu ngekutsi Jehova wasilungiselela umhlatjelo waJesu loyinhlawulo  kute asitsetselele tono tetfu. Sidzinga kutsetselelwa nguJehova onkhe emalanga. Sekuphele iminyaka lecishe ibe ngu-2 000 Jesu asifela kodvwa nalamuhla siyazuza enhlawulweni yakhe. Kufanele simbonge ngaso sonkhe sikhatsi Jehova ngalesipho lesiligugu. Kute kitsi lobekangakhona kukhokha inhlawulo lebeyidzingeka kute sikhululwe esonweni nasekufeni. (Fundza Tihlabelelo 49:7-9; 1 Phetro 1:18, 19.) Lamavi lakulomthantazo losibonelo latsi “usitsetselele tono tetfu” asikhumbuta kutsi njengobe sidzinga inhlawulo, bazalwane betfu nabodzadze nabo bayayidzinga. Jehova ufuna sicabange ngabo nangebudlelwane babo naye. Loko kufaka ekhatsi kusheshe sibacolele nabasona. Esikhatsini lesinyenti kuvama kuba ngemaphutsa lamancane labawenta kitsi kodvwa nasibacolela bazalwene betfu, sikhombisa kutsi siyabatsandza. Siphindze sikhombise kutsi siyabonga ngekutsi Jehova uyasicolela.—Kholose 3:13.

11. Kungani kubalulekile kucolela labanye?

¹¹ Ngesizatfu sekutsi sinesono, kungaba matima ngalesinye sikhatsi kucolela labasonile. (Levithikhusi 19:18) Nasicocela bantfu ngaloko labanye labakwente kitsi, labanye ebandleni bangasivuna futsi loko kungaphatamisa bunye belibandla. Nasikuvumela loko kutsi kuchubeke, kutawukhombisa kutsi asisijabuleli sipho saNkulunkulu senhlawulo futsi ngeke sititfole tinzuzo taso. (Matewu 18:35) Nangabe singabacoleli labanye, naJehova ngeke asicolele. (Fundza Matewu 6:14, 15.) Nasifuna kutsi Jehova asicolele, akukafaneli sichubeke senta tintfo latenyanyako.—1 Johane 3:4, 6.

12, 13. (a) Yini leyenteka kuJesu ngemuva kwekubhajatiswa kwakhe? (b) Kungani kungakafaneli sisole labanye nangabe siwela esonweni? (c) Yini Jesu layikhombisa ngekwetsembeka kwakhe kute kube sekufeni?

¹² Emavi lasemthantazweni losibonelo latsi “ungasingenisi ekulingweni,” asikhumbuta ngaloko lokwenteka kuJesu ngemuva nje kwekubhajatiswa kwakhe. Umoya waNkulunkulu wamholela ehlane lapho efika “walingwa khona nguDeveli.” (Matewu 4:1; 6:13) Kungani Jehova avumela loku kutsi kwenteke? Jehova watfuma Jesu emhlabeni kute atolungisa insayeya leyaphakama ngesikhatsi bo-Adamu na-Eva bala kubuswa nguye. Kuvukela kwabo kwaphakamisa imibuto lobekutawutsatsa sikhatsi lesitsite kutsi iphendvulwe. Nasi sibonelo: Kwakukhona yini lokungakalungi endleleni Jehova labedale ngayo bantfu? Bekungenteka yini kutsi umuntfu lote sono ahlale etsembekile kuJehova nakalingwa ‘ngulomubi’? Bekutabalungela yini bantfu kube batibusa bona? (Genesisi 3:4, 5) Esikhatsini lesitako, naseyiphendvuleke yonkhe lemibuto ngendlela leyenetisa Jehova, bonkhe bantfu ezulwini nasemhlabeni batawukwati kutsi indlela yaJehova yekubusa ngiyo lencono kakhulu.

¹³ Jehova ungcwele, ngako akalingi muntfu ngetintfo letimbi. NguSathane  “umlingi.” (Matewu 4:3, liBhayibheli leSiSwati lelivamile) Sathane wetama kusilinga ngetindlela letinyenti. Kodvwa ngamunye wetfu angancuma kutsi utawumelana yini nesilingo nome cha. (Fundza Jakobe 1:13-15.) Ngesikhatsi alingwa nguSathane, Jesu wacaphuna liVi laNkulunkulu ngekushesha. Jesu abetsembekile kuNkulunkulu. Nobe kunjalo, Sathane akazange aphele emandla. Walindza “lelinye litfuba lelikahle” kute amlinge. (Lukha 4:13) Ngetulu kwaloko Sathane lakwenta, Jesu wachubeka alalela Nkulunkulu njengeMbusi wakhe. Wakhombisa kutsi umuntfu lote sono angetsembeka kuJehova nangetulu kwebumatima lobukhulu. Nanobe kunjalo, Sathane wetama kulinga balandzeli baJesu lokufaka ekhatsi nawe, kutsi ungamlaleli Jehova.

14. Yini lokufanele siyente kute simelane nesilingo?

¹⁴ Imibuto leyaphakanyiswa mayelana nekubusa kwaJehova, isadzinga kuphendvulwa. Ngako kwanyalo Jehova uyamvumela Sathane kutsi asilinge. Jehova ‘akasingenisi ekulingweni.’ Ecinisweni uyetsemba kutsi singahlala setsembekile kuye futsi ufuna kusisita. Kodvwa akasiphoceleli kutsi sente lokulungile. Uyayihlonipha inkhululeko yetfu yekutikhetsela. Ngako uyasivumela kutsi sikhetse kwetsembeka kuye nobe cha. Kute sikubalekele kuwela esilingweni, kufanele sente tintfo letimbili: sihlale sisondzelene naJehova futsi sichubeke sithantazela lusito lwakhe.  Jehova uyiphendvula njani imithantazo yetfu yekutsi simelane nesilingo?

15, 16. (a) Ngutiphi letinye tilingo lokufanele simelane nato? (b) Ngubani lokufanele simsole nangabe siwela esilingweni?

¹⁵ Jehova usinika umoya wakhe longcwele lonemandla kute usisite silwisane netilingo taSathane. Jehova uphindze asebentise liBhayibheli nelibandla kute lisecwayise ngetingoti. Sibonelo saloko kutsi usecwayisa kutsi singacitsi sikhatsi setfu lesinyenti, imali kanye nemandla etintfweni lesingatidzingi. Espen naJanne bahlala eveni lelinjingile eYurophu. Kwaphela iminyaka leminyenti bangemahlahlandlela lavamile encenyeni yalelo live lapho bekunesidzingo khona sebamemeteli. Ngesikhatsi batfola umntfwana, kwadzingeka bayekele kuba ngemahlahlandlela futsi nyalo banebantfwana lababili. Espen utsi: “Sivame kuthantaza kuJehova simcele kutsi singaweli esilingweni njengobe singakhoni kucitsa sikhatsi lesinyenti emsebentini wakhe njengasesikhatsini lesendlulile. Sicela Jehova kutsi asisite silondvolote buhlobo betfu naye kanye nenkhutsalo emsebentini wekushumayela.”

¹⁶ Lesinye silingo lokufanele simelane naso kubuka titfombe letikhombisa kungcola. Nangabe sincotjwa ngulesilingo, ngeke simsole Sathane. Kungani? Kungobe Sathane nelive lakhe ngeke basiphocelele kutsi sente intfo lengakalungi. Labanye babuka titfombe letikhombisa kungcola ngesizatfu sekutsi abayibalekeli imicabango lemibi. Kodvwa bazalwane betfu labanyenti kanye nabodzadze bakhonile kumelana nalesilingo, futsi natsi singakhona kumelana naso.—1 Khorinte 10:12, 13.

17. (a) Singakhombisa njani kutsi sifuna Jehova ‘asikhulule kulomubi’? (b) Ngukuphi kukhululwa lokusedvute?

¹⁷ Singakhombisa njani kutsi sifuna Jehova ‘asikhulule kulomubi’? Kufanele ‘singabi yincenye yelive’ futsi ‘singalitsandzi live nobe tintfo letikulo.’ (Johane 15:19; 1 Johane 2:15-17) Cabanga nje kutsi sitawukhululeka kangakanani ngesikhatsi Jehova abhubhisa Sathane nalelive lelibi! Kundzimate kube nguleso sikhatsi, kufanele sikhumbule kutsi Sathane ‘utfukutsele kakhulu, uyati kutsi unesikhatsi lesincane.’ Utawenta konkhe langakwenta kute asiyekelise kukhonta Jehova. Ngako-ke, kufanele sichubeke sithantazela kutsi Jehova asivikele kuSathane.—Sembulo 12:12, 17.

18. Yini lokufanele siyente nangabe sifuna kusindza kulelive laSathane?

¹⁸ Uyafuna yini kuphila emhlabeni ngesikhatsi Sathane angasekho? Ngako chubeka uthantazela uMbuso waNkulunkulu kutsi ute, libito laKhe lingcweliswe nentsandvo yakhe kutsi yentiwe emhlabeni. Hlala wetsembela kuJehova kutsi akunakekele futsi akunike konkhe lokudzingako kute uhlale wetsembekile kuye. Yenta konkhe lokusemandleni akho kute uphile ngekuvumelana nemthantazo losibonelo.