NGAJUNE 1970, ngalaliswa esibhedlela ePennsylvania eMelika. Ngangilisotja lelineminyaka lengu-20 budzala futsi bengigula kamatima. Njalo ngemuva kwesigamu seli-awa, linesi lelidvuna belihlola umfutfo wengati yami. Lelinesi lebelingishiya ngeminyaka lembalwa, lalibukeka likhatsatekile. Njengobe umfutfo wengati yami wawehla, ngatsi kulo: “Awukake wambona yini umuntfu afa?” Buso balo bashintja, futsi langiphendvula latsi: “Yebo angikake ngambona.” Bekubonakala shengatsi ngeke ngilulame, kodvwa ngelulama. Ase ngikucocele umlandvo wami wekuphila.

Kugula kwangicala ngesikhatsi ngingunjinyela endzaweni lekwakuhlindzelwa kuyo bantfu ngesikhatsi semphi eVietnam. Ngangikujabulela kusita bantfu labagulako nalabalimele futsi benginemgomo wekuba ngudokotela lohlindzako. Ngefika eVietnam ngaJuly 1969. Njengawo onkhe emasotja, nganiketwa liviki linye kute ngetayelane nesikhatsi sakhona nekushisa kwaleyo ndzawo.

Ngatjelwa kutsi ngiyosebenta esibhedlela leselapha bantfu labalimele emphini lesiseMekong Delta. Emasotja lalimele emphini abeletfwa tindiza letinyenti letinabophephela emhlane kulesibhedlela. Bengilitsandza live lakitsi futsi bengikutsandza nekusebenta, ngako bengifuna kubasita ngekushesha bantfu bakitsi. Emasotja lalimele lobekufanele ahlindvwe, abevele aphutfunyiswe endlini lencane lenemshini lokhipha umoya lebeyisetjentiselwa kuhlindza bantfu. Dokotela lohlindzako, nadokotela lobulala imiva kanye nemanesi lamabili, bebenta konkhe lokusemndleni kute basindzise kuphila kwebantfu. Nangibuka kuletindiza, ngabona emapulasitiki lamakhulu lamnyama labekangakehliswa. Ngatjelwa kutsi lamapulasitiki anetitfo temtimba temasotja labulewe emphini. Loko kwaba kwekucala lengahlangabetana nako ngesikhatsi ngisemphini.

Liciniso ngacala kuliva kuBoFakazi BaJehova ngesikhatsi ngisemncane. Make abefundza liBhayibheli naBoFakazi, kodvwa akabhajatiswanga. Ngangikujabulela kuba khona nakuchutjwa sifundvo sakhe. Ngalelinye lilanga sihamba nababe lowangikhulisa sendlula eceleni kweliHholwa leMbuso. Ngambuta ngatsi: “Yini leya?” Wangiphendvula watsi:  “Ungacali usondzele kulabantfu laba!” Ngenca yekutsi bengimtsandza futsi ngimetsemba, ngamlalela ngangasayi kuBoFakazi BaJehova.

Nobe kunjalo, nangibuya eVietnam, nganginemicabango leminyenti lebuhlungu. Ngenca yetintfo lengangitibone nangisemphini, besengite imiva. Kubonakala shengatsi bekute bantfu lebebakucondza loko lobekwenteka eVietnam. Ngiyakhumbula ngiva emavukela mbuso abita emasotja aseMelika ngekutsi ababulali bebantfwana ngenca yemibiko yekutsi abebulele bantfwana labangenacala. Konkhe loku kwangenta ngabona kutsi ngidzinga kwakha buhlobo naNkulunkulu.

Ekufuneni kwami Nkulunkulu, ngacala kuya emasontfweni lamanyenti. Ngangimtsandza Nkulunkulu, kodvwa ngangingakutsandzi lengangikubona kulamasontfo. Ngekuhamba kwesikhatsi, ngaya eHholweni leMbuso leliseDelray Beach, eFlorida. Umhlangano wekucala lengaya kuwo wawungeLisontfo ngaFebruary 1971.

Nangingena eHholweni leMbuso, ngakhandza inkhulumo yelinyenti seyiphela, ngako ngahlala ngalalela Sifundvo se-Sicongosekulindza. Angisasikhumbuli sihloko saso, kodvwa ngiyakhumbula ngibona bantfwana baphenya emavesi emaBhayibhelini abo. Kwangijabulisa kakhulu loko. Ngahlala ngalalela futsi ngababuka. Nasengihamba, umzalwane locishe abe neminyaka lengu-80 budzala weta kimi. Libito lakhe bekunguJim Gardner. Wanginika incwadzi letsi “The Truth That Leads to Eternal Life” wangibuta watsi: “Ungayijabulela yini?” Ngatsi ngingayijabulela, futsi savumelana kutsi sitawuhlangana ngaLesine ekuseni kute angichubele sifundvo seliBhayibheli.

Ngemuva kwemhlangano ngeLisontfo, kwakufanele ngibuyele emsebentini. Kwakunemsebenti lobekufanele ngiyowenta esibhedlela saseBoca Raton, eFlorida, futsi bekufanele ngicale kusebenta nga-11 ebusuku ngishayise nga-7 ekuseni. Betitincane tigulane ngalobo busuku, ngako ngakhona kufundza lencwadzi yami. Linesi lelitsite layihlutfula, layibuka langaphandle lase lifuna kwati kutsi ngifuna kuba ngulomunye waBoFakazi BaJehova yini. Nami ngayihlutfula lencwadzi kulo ngalitjela kutsi ngisefundze incenye yalencwadzi, futsi ngicabanga kuba nguFakazi. Langishiya futsi ngayifundza yonkhe ngalobo busuku.

Nasicala kufundza neMzalwane Gardner ngambuta ngatsi: “Sitawufundzani?” Watsi: “Lencwadzi lengakunika yona.” Ngatsi kuye: “Sengiyifundzile.” Ngemusa Mzalwane Gardner watsi: “Ase sibuke lesihloko sekucala.” Ngamangala nangibona kutsi kunyenti lebengingakakuboni. Wangicela kutsi ngibuke imibhalo leminyenti eBhayibhelini lami i-“King James Version.” Besengifundza ngaJehova, longuNkulunkulu weliciniso. Safundza tehluko letintsatfu talencwadzi ngalelolanga ekuseni naJim. Ngemuva kwaloko, sasesifundza tehluko letintsatfu njalo ngaLesine ekuseni. Ngangitijabulela kakhulu letifundvo. Kwakulilungelo ngami kufundziswa nguloMzalwane logcotjiwe lobekamati Charles T. Russell!

 Nasesifundze emaviki lambalwa, ngavunyelwa kutsi ngiyoshumayela tindzaba letimnandzi. Kwakungasimelula kimi kushumayela emtini ngemuti, kodvwa Jim wangisita ngancoba kwesaba lebenginako. (Imisebenti 20:20) Ngenca yalolusito lwakhe, ngakutsandza kushumayela. Ngicabanga kutsi umsebenti wekushumayela ulilungelo lelikhulu lenginalo. Ngiyajabula ngekutsi ngisisebenti lesikanye naNkulunkulu!—1 Khorinte 3:9.

Ase ngikucocele ngentfo lekhetseke kakhulu ekuphileni kwami, lokulutsandvo lwami lwekucala ngaJehova. (Sembulo 2:4) Lutsandvo lwami ngaJehova lungisite ngakhona kubeketelela imicabango lebuhlungu lenganginayo kusukela emphini kanye naletinye tinkinga.—Isaya 65:17.

Nga-1971, batali bami bangicosha kulendlu lebebatsite ngihlale kuyo. Kungani bangicosha? Kungobe babe lowangikhulisa abengafuni kuhlale BoFakazi BaJehova kulendlu. Ngaleso sikhatsi bengite imali lenyenti. Esibhedlela lebengisebenta kuso bebangiholela ngemuva kwemaviki lamabili, futsi leyo mali besengitsenge ngayo timphahla lengitatigcoka ensimini ngobe bengifuna kummelela kahle Jehova. Nganginayo imali, kodvwa beyisebhange lelisedolobheni lasekhaya eMichigan. Ngako kwadzingeka kutsi ngihlale emotweni yami emalanga lambalwa. Ngangigeza ngiphindze ngishefe emithoyi yasemagalaji ekwetsa timoto.

Ngalelinye lilanga ngisahlala emotweni yami, ngashayisa esibhedlela ngaya eHholweni leMbuso kusesele ema-awa lambalwa kutsi kucale umhlangano wangaphambi kwekuya ensimini. Njengobe ngangihleti ngemuva kweliHholwa leMbuso lapho bengingabonakali khona, ngakhumbula loko lobekwenteka eVietnam. Kwaba shengatsi ngitawuva liphunga  lebantfu labashako futsi ngibone kugcwele ingati, loko kwangenta ngacala kwesaba. Kwaba shengatsi ngitawuva futsi ngibone emabhungu angibuta atsi: “Ngitawusindza yini?” Bengati kutsi atawufa, kodvwa ngangetama kuwadvudvuta ngenta shengatsi konkhe kutawuhamba kahle. Njengobe bengihleti lapho eHholweni, ngeva buhlungu kakhulu.

Ngasidzindza sililo futsi ngathantaza kuJehova. (Tihlabelelo 56:8) Ngacala kucabangisisa ngeluvuko. Ngulapho ngabona khona kutsi kubalulekile kuba nalelo tsemba! Jehova utawavusa lamabhungu futsi utawaniketa litfuba lekufundza ngaye. Luvuko lutawucedza bonkhe buhlungu nekuhlupheka lesibhekene nako. (Imisebenti 24:15) Ngesikhatsi ngikucondza loku, lutsandvo lwami ngaJehova lwacina kakhulu kunakucala. Lelo langa solo libalulekile kimi. Kusukela ngaleso sikhatsi, nangibhekene netinkinga ekuphileni, ngivele ngikhumbule lutsandvo lwami lwekucala ngaJehova.

Bantfu benta tintfo letimbi ngesikhatsi semphi, futsi nami ngangitenta. Kodvwa ngidvudvutwe kuzindla ngemibhalo lemibili lengiyitsandzako. Wekucala ngumbhalo weSembulo 12:10, 11, lotsi siyamncoba Develi hhayi nje kuphela ngekushumayela kodvwa nangengati yaJesu. Wesibili nguGalathiya 2:20, longikhumbuta kutsi Jesu wangifela. Ngiyabonga ngemhlatjelo waKhristu, ngobe Jehova ungitsetselele kuko konkhe lengakwenta. Nyalo nginanembeza lohlantekile futsi ngifuna kutjela labanye ngaNkulunkulu lonemusa, Jehova!—Hebheru 9:14.

Nangicabanga ngaloko lokwentekile ekuphileni kwami, kuyangicacela kutsi Jehova abesolo anginakekela. Sibonelo saloko kutsi kusukela ngelilanga Jim lati ngalo kutsi ngihlala emotweni, wangimikisa kulomunye dzadze lobekanetindlu tekucashisa kakhe. Ngiyaciniseka kutsi Jehova wasebentisa Jim nalodzadze kute ngitfole indlu lekahle yekuhlala. Jehova unemusa! Uyatinakekela tinceku takhe letetsembekile.

NgaMay 1971, kwakufanele ngiye eMichigan. Ngaphambi kwekutsi ngihambe eFlorida, ngagcwalisa tincwadzi emotweni yami, ngase ngilibhekisa enyakatfo. Nase ngitawuhamba eGeorgia, ngase ngitihambise tonkhe letincwadzi. Ngangitishumayela ngenkhutsalo tindzaba letimnandzi teMbuso kuto tonkhe tindzawo lebengitihamba. Ngangishumayela emajele futsi nginiketa nemadvodza lasemthoyi emapheshana. Nanyalo ngiyatibuta kutsi bakhona yini kulabantfu lebengibashumayela labalifundza liciniso.—1 Khorinte 3:6, 7.

Ngiyavuma kutsi nangicala kufundza emaciniso, bengingakusebentisi ngaso sonkhe sikhatsi kuhlakanipha ikakhulukati nangikhuluma nemalunga emndeni wami. Ngalesinye sikhatsi bengikhuluma ngicondze ngco! Ngibatsandza kakhulu bomnaketfu, lokunguJohn naRon, futsi nangibashumayela ngangetama kubacindzetela kutsi bemukele tinkholelo tami letinsha. Ngemuva kwesikhatsi bekudzingeka ngicolise. Kodvwa ngiyachubeka ngithantazela kutsi balemukele liciniso. Kusukela ngaleso sikhatsi, Jehova ungisitile kutsi ngisebentise kuhlakanipha nangishumayela nalapho ngifundzisa.—Kholose 4:6.

Buhlobo bami naJehova butawuhlale buhamba embili ekuphileni kwami. Nobe kunjalo, bakhona labanye bantfu lengibatsandza kakhulu, ikakhulukati Susan umfati wami loligugu. Ngangifuna umfati lotangisita kutsi ngichubeke ngikhonta Jehova. Susan ngumfati lotimisele futsi lomtsandza kakhulu Jehova. Ngalelinye lilanga sisalungiselela kushada, ngamvakashela ekhaya kubo eSihlengeni saseRhode. Ngamkhandza ahleti kuvurandi, afundza Sicongosekulindza  aphetse neliBhayibheli. Lokwangijabulisa kutsi abefundza yonkhe imibhalo, ngisho nobe abengafundzi sihloko lesifundvwako. Ngabona kutsi ubutsatsa njengalobubalulekile buhlobo bakhe naJehova. Sashada ngaDecember 1971. Ngibonga kakhulu ngekuba nemfati longisekelako. Lokungijabulisa kakhulu kutsi nanobe angitsandza, kodvwa umtsandza kakhulu Jehova.

Jehova usibusise ngemadvodzana lamabili, boJesse naPaul. Njengobe bakhula, Jehova abebacondzisa. (1 Samuweli 3:19) Batakhele buhlobo naye, futsi loku kusijabulisa kakhulu. Bobabili sebakhonte Jehova emsebentini wasikhatsi sonkhe iminyaka lengetulu kwalengu-20. Bayachubeka bamkhonta ngobe nabo bakhumbula lutsandvo lwekucala lababa nalo ngaye. Ngiyatigcabha ngabomalukatane bami labahle, boStephanie naRacquel futsi ngibatsatsa njengemadvodzakati ami. Ngijabula kakhulu ngekutsi emadvodzana ami ashade nebantfu labatsandza Jehova ngenhlitiyo yabo yonkhe, futsi labasebentise kuphila kwabo kute bamkhonte.—Efesu 6:6.

Ngakhonta eSihlengeni saseRhode iminyaka lengu-16, lapho ngaba nebangani labanyenti khona. Ngisabakhumbula bazalwane labadzala labakahle lengangikhonta nabo. Ngibonga nebabonisi labajikeletako labanyenti labangisita. Kube lilungelo kukhonta Jehova nemadvodza lagcine lutsandvo labekanalo ekucaleni ngaye. Nga-1987, satfutsela  eNyakatfo yeCarolina endzaweni leyayinesidzingo lesikhulu sebamemeteli, nalapho satfola bangani labanyenti labakahle. *—Fundza umbhalo longentansi.

Nga-August 2002, mine naSusan semukela simemo sekuyoba ngemalunga emndeni waseBethel ePatterson eMelika. Ngangisebenta eHhovisini Lemsebenti, Susan abesebenta endzaweni yekuwasha, futsi abekutsandza! Nga-August 2005, ngaba nelilungelo lekuba lilunga leSigungu Lesibusako. Ngangitiva ungangifaneli lomsebenti. NaSusan wamangala kakhulu ngalomsebenti, nangekutsi kwakufanele sihlale sihamba. Akakutsandzi kuhamba ngendiza; nobe kunjalo, sihamba kakhulu ngayo. Simsite kakhulu seluleko selutsandvo lasitfole kulabanye bafati bemalunga eSigungu Lesibusako. Simenta atimisele kakhulu kungisekela futsi ngiyamtsandza ngenca yaloko!

Ehhovisini lami nginetitfombe letinyenti letinhle letingikhumbuta ngemphilo lemnandzi lengiyijabulele. Ngitfole tibusiso letinyenti ngenca yekutsi ngikhumbule lutsandvo lenganginalo ekucaleni ngaJehova!