1, 2. (a) Ngukuphi kuhlangana lokukhona emkhatsini wekwetsembeka kuJehova nekungatingeneli timphi talelive? (Buka sitfombe lesisekucaleni kwalesihloko.) (b) Yini bantfu labanyenti labetsembeke kuyo, futsi ubeyini umphumela?

TINCEKU taJehova atitingeneli tindzaba talelive futsi atibi nencenye etintfweni letehlukanisa bantfu letifaka ekhatsi buve, luhlanga nobe emasiko. Kungani? Kungobe siyamtsandza Jehova, setsembekile kuye futsi siyamlalela. (1 Johane 5:3) Ngisho nobe sihlala kuphi nobe sisuka kuyiphi indzawo, silalela timiso taNkulunkulu. Kwetsembeka kuJehova naseMbusweni wakhe kubaluleke kakhulu kwendlula nobe ngabe yini lenye. (Matewu 6:33) Kungako singasho sitsi ‘asisiyo incenye yelive.’—Fundza Johane 17:11, 15, 16; Isaya 2:4.

² Bantfu labanyenti emhlabeni betsembekile emaveni abo, etinhlangeni, emasikweni abo ngisho nasemacenjini abo etemidlalo. Lokubuhlungu kutsi loku kubente bancintisana, batondzana futsi ngalesinye sikhatsi babulala labo labasekela lelelinye licembu. Nanobe singatingeneli letimphikiswano, kodvwa tiyasitsintsa tsine kanye nemindeni yetfu futsi singahle  siphatfwe kabi. Kungaba melula ngatsi kutsi singenele tindzaba talelive nangabe bohulumende benta tincumo letikhombisa kungacabangeli, ngobe Nkulunkulu wasidala saba nelikhono lekubona lokulungile nalokungakalungi. (Genesisi 1:27; Dutheronomi 32:4) Utiva njani nangabe kwenteka lokutsite lokungakalungi? Uyakhona yini kungatingeneli tindzaba talelive?

3, 4. (a) Kungani singatingeneli timphi? (b) Sitawucoca ngani kulesihloko?

³ Bantfu labanyenti bangenela timphi ngobe hulumende ubatjela kutsi nguloko takhamuti sibili lokufanele tikwente. Kodvwa tsine silingisa Jesu. Ngako-ke, asibi nencenye kutepolitiki futsi asiyi emphini. (Matewu 26:52) EmaKhristu eliciniso awacabangi kutsi lenye incenye yelive laSathane incono kunalenye. (2 Khorinte 2:11) Asifuni kutihlanganisa netimphi talelive.—Fundza Johane 15:18, 19.

⁴ Ngesizatfu sekutsi sinesono, kungenteka labanye betfu basanesimo sengcondvo lesingakalungi ngebantfu labangafani nabo. (Jeremiya 17:9; Efesu 4:22-24) Kulesihloko, sitawufundza ngetimiso letitasisita silwisane nemiva leyehlukanisa bantfu siphindze siyincobe. Sitawuphindze sifundze ngekutsi singetsembeka njani eMbusweni ngekuticecesha kutsi sicabange ngendlela Jehova naJesu labacabanga ngayo.

5, 6. Ngesikhatsi Jesu alapha emhlabeni, abewatsatsa njani emacembu lehlukahlukene ebantfu, futsi leni?

⁵ Nangabe ukutfola kumatima kungatingeneli tindzaba talelive, tibute: ‘Yini Jesu labekangayenta?’ Ngesikhatsi Jesu alapha emhlabeni, bekunekungevani emkhatsini webantfu baseJudiya, baseGalile nebaseSamariya. Cabanga nganati tibonelo. EmaJuda nemaSamariya abengakhulumisani. (Johane 4:9) BaFarisi nebaSadusi bebangavumelani etintfweni lentinyenti. (Imisebenti 23:6-9) EmaJuda labekafundze uMtsetfo abetikhandza ancono kunalabangakawufundzi. (Johane 7:49) Lamanyenti abebatondza batselisi nemaRoma. (Matewu 9:11) Kodvwa Jesu akazange abe yincenye yalokungevani. Nanobe abehlale alisekela liciniso lelimayelana naJehova futsi ati kutsi ema-Israyeli asive saNkulunkulu labesikhetsile, Jesu akazange afundzise bafundzi bakhe kutsi bancono kunalabanye. (Johane 4:22) Esikhundleni saloko, wabafundzisa kutsi batsandze bonkhe bantfu.—Lukha 10:27.

⁶ Kungani Jesu angazange atsatse lelinye licembu lebantfu njengalelincono kunalelinye? Loko kubangelwa yindlela yena neYise labativa ngayo ngebantfu. Jehova wadala bantfu kute bagcwalise umhlaba ngetinhlobo letehlukahlukene tebuve. (Genesisi 1:27, 28) Ngako-ke, Jehova naJesu abacabangi kutsi kunesive, lulwimi nobe luhlanga loluncono  kunalolunye. (Imisebenti 10:34, 35; Sembulo 7:9, 13, 14) Kufanele silandzele sibonelo sabo lesihle.—Matewu 5:43-48.

7, 8. (a) Ngubani lesimsekelako, futsi kungani? (b) Yini lokufanele siyikhumbule mayelana nesisombululo setinkinga tebantfu?

⁷ Kungani singabasekeli babusi lababantfu nobe bohulumende? Kungobe sisekela Jehova. Nguye uMbusi wetfu. E-Edeni, Sathane watsi Jehova akasuye umbusi lokahle webantfu. Abefuna bantfu bakholelwe kutsi indlela yakhe yekwenta tintfo incono kuneyaNkulunkulu. Jehova uyasivumela kutsi sikhetse kutsi sifuna kuba seluhlangotsini lwabani. Kodvwa kutsiwani ngawe? Jehova umlalela ngobe ukholelwa yini kutsi indlela yakhe yekwenta tintfo incono kuneyakho? Uyaciniseka yini kutsi nguMbuso wakhe kuphela longacatulula tinkinga tetfu? Nobe ucabanga kutsi bantfu bangatibusa yini ngemphumelelo ngaphandle kwaNkulunkulu?—Genesisi 3:4, 5.

⁸ Nasi sibonelo: Ungamphendvula njani umuntfu nakakubuta kutsi ucabangani ngelicembu lelitsite lepolitiki nobe lenye inhlangano lefanana nalo? Lamanye kulamacembu angaba cotfo futsi abe nesifiso sekusita bantfu. Kodvwa siyati kutsi nguMbuso waJehova kuphela longacatulula tinkinga tebantfu futsi ususe konkhe kungalungi. Esikhundleni sekutsi umuntfu ngamunye ente loko lacabanga kutsi kukahle, silandzela sicondziso saJehova lesisitfola ebandleni. Kungako libandla linebunye.

9. Nguyiphi inkinga lamanye emaKhristu angelikhulu lekucala labekanayo, futsi yini lobekufanele ayente?

⁹ Ngelikhulu lekucala, lamanye emaKhristu aseKhorinte abephikisana, atsi: ‘“Mine ngiwaPawula,” lomunye atsi: “Mine ngiwa-Apholosi,” lomunye atsi: “Mine ngiwaKhefase,” lomunye yena atsi: “Mine ngiwaKhristu.”’ Ngesikhatsi Pawula eva ngaloku, wetfuka kakhulu. Lena bekuyinkinga lenkhulu kakhulu ngobe kuthula kwelibandla bekusengotini. Ngako wabuta bazalwane nabodzadze, watsi: ‘Khristu wehlukene ekhatsi yini?’ Pawula wabeluleka watsi: “Ngiyanincenga bazalwane ngelibito leNkhosi yetfu Jesu Khristu, kutsi nonkhe nikhulume ngekuvumelana futsi kube bete kwehlukana emkhatsini wenu, kodvwa nibe munye ngalokuphelele emcondvweni munye nasekucabangeni lokufanako.” Solo kuyafana nalamuhla. Akukafaneli kube nekwehlukana ebandleni.—1 Khorinte 1:10-13; fundza Roma 16:17, 18.

10. Yini Pawula layikhumbuta emaKhristu, futsi sifundzani kuloko?

¹⁰ Pawula wakhumbuta emaKhristu lagcotjiwe kutsi atakhamuti tasezulwini, nekutsi akukafaneli anake ‘tintfo talapha emhlabeni.’ (Filiphi 3:17-20) * (Fundza umbhalo longentansi.) Labagcotjiwe bangemancusa lamelela Nkulunkulu naKhristu. Nangabe lincusa likulelinye  live, alitihlanganisi netinkinga kanye netindzaba tepolitiki talelolive. Ngendlela lefanako, akukafaneli kutsi labagcotjiwe batihlanganise netinkinga kanye netindzaba tepolitiki talelive. (2 Khorinte 5:20) Nalabo labanelitsemba lekuphila phakadze emhlabeni betsembekile eMbusweni futsi abatingeneli tindzaba talelive.

11, 12. (a) Ngusiphi simo sengcondvo lokufanele sisibalekele nangabe sifuna kuhlale setsembekile eMbusweni waNkulunkulu? (b) Lomunye dzadze abetiva njani ngebantfu labatsite, futsi yini leyamsita kute ashintje?

¹¹ Etincenyeni letinyenti temhlaba, bantfu baba nebudlelwane lobuhle nalabo labanemlandvo lofana newabo, emasiko kanye nalabo labakhuluma lulwimi lolufanana nelwabo. Bavame kutigcabha kakhulu ngendzawo labasuka kuyo. Kodvwa akukafaneli sisivumele lesimo sengcondvo kutsi sisingene. Esikhundleni saloko, kufanele sishintje indlela lesicabanga ngayo futsi kufanele siceceshe bonembeza betfu kute singatingeneli tindzaba talelive kunobe ngutiphi timo. Singakwenta njani loko?

¹² Nasi sibonelo: Mirjeta * (fundza umbhalo longentansi) watalelwa eveni lebelibitwa ngekutsi yiYugoslavia. Endzaweni lakhulela kuyo, bebabenyanya bantfu baseSerbia. Ngesikhatsi afundza ngaJehova, wabona kutsi kute sive lasitsatsa njengalesincono kunalesinye nekutsi Sathane ufuna bantfu batondzane. Ngako wetama ngekutimisela kushintja indlela labetiva ngayo. Kodvwa ngesikhatsi kucala imphi emacenjini etinhlanga letehlukene endzaweni labehlala kuyo, Mirjeta waphindze waba nemiva lengakalungi ngebantfu baseSerbia. Abengasafuni nekubashumayela. Bekati kutsi loku akukalungi, ngako wacela Jehova kutsi amsite kute ayekele kutiva ngalendlela. Waphindze wamcela kutsi amsite kuze abe lihlahlandlela. Mirjeta utsi: “Ngitfole kutsi kunaka umsebenti wekushumayela kulusito loluncono kakhulu. Nangisensimini, ngetama kulingisa lutsandvo lwaJehova, futsi ngisibonile simo sami sengcondvo sishintja.”

13. (a) Yini leyenteka kuZoila, futsi yini layenta? (b) Singafundzani kulokwenteka kuye?

¹³ Zoila ngudzadze waseMexico lowatfutsela eYurophu. Ebandleni lakulo, kunebazalwane nabodzadze labasuka kulenye incenye yeLatin America. Zoila utsi labanye babo bebahlekisa ngelive labesuka kulo, ngemasiko nangemculo wakhona. Abetfukutsele, ngako wathantaza kuJehova wamcela kutsi amsite kuze angaphatseki kabi. Besitawenta njani kube besisesimeni sakhe? Labanye bazalwane betfu nabodzadze basalwa kamatima kute balawule imiva yabo nabeva kukhulunywa kabi ngendzawo labasuka kuyo. Ngako ngeke sisho nobe sente lokutsite lokutawenta lelinye licembu lebantfu litive lincono kunalelinye. Asifuni kubangela kwehlukana ebandleni nobe kulenye indzawo.—Roma 14:19; 2 Khorinte 6:3.

14. Yini lengakusita kutsi utsatse bantfu ngendlela Jehova labatsatsa ngayo?

¹⁴ Sonkhe siyati kutsi tinceku taJehova tinebunye, ngako akukafaneli sicabange kutsi lenye indzawo nobe live lincono kunalelinye. Kodvwa umndeni wakho nebantfu  lokhule nabo bangakwenta utsandze indzawo losuka kuyo. Ngako kungenteka kutsi ngaletinye tikhatsi uba nembono longakafaneli ngebantfu labasuka kulelinye live, emasiko, lulwimi nobe luhlanga. Yini lengakusita kute ushintje? Zindla ngendlela Jehova lativa ngayo ngebantfu labatigcabha ngelive labo nobe labacabanga kutsi bancono kunalabanye. Cwaninga ngalesihloko esifundvweni lotichubela sona nobe ekukhonteni kwemndeni. Ngemuva kwaloko, cela Jehova akusite kutsi utive ngendlela naye lativa ngayo ngebantfu.—Fundza Roma 12:2.

15, 16. (a) Labanye bangativa njani ngenca yekutsi sehlukile? (b) Batali bangabasita njani bantfwana babo kutsi bahlale betsembekile kuJehova?

¹⁵ Sifuna kukhonta Jehova nganembeza lohlantekile, ngako ngaletinye tikhatsi sitawehluka kakhulu kubantfu lesisebenta nabo, lesifundza nabo, kubomakhelwane betfu nobe tihlobo tetfu. (1 Phetro 2:19) Jesu wasecwayisa ngekutsi labanye batasenyanya ngobe sehlukile. Khumbula kutsi linyenti lalabo labasiphikisako alati ngeMbuso waNkulunkulu. Ngako abacondzi kutsi kungani kubalulekile ngatsi kutsi setsembeke eMbusweni kunakubohulumende bebantfu.

¹⁶ Kute setsembeke kuJehova, kufanele simlalele ngisho nobe labanye bantfu bangasentani nobe batsini. (Danyela 3:16-18) Bantfu labasebasha bangase bakutfole kulukhuni kakhulu kutsi behluke kulabanye. Batali, sitani bantfwana benu kutsi  babe nesibindzi esikolweni. Kungenteka bantfwana bakho bayesaba kwala kushayela ifulegi indesheni nobe bayesaba kwala kuhlanganyela kuleminye imikhosi yelive. Ekukhonteni kwemndeni, ningafundza kutsi Jehova utiva njani ngaletintfo. Bafundzise kutsi bangatichaza njani tinkholelo tabo ngendlela lecacile nalenenhlonipho. (Roma 1:16) Nangabe kunesidzingo, sita bantfwana bakho ngekutsi ukhulume nabothishela babo futsi ubachazele loko lesikukholelwako.

17. Ngusiphi simo sengcondvo lokufanele sisibalekele, futsi kungani?

¹⁷ Sivame kukujabulela kudla kwendzawo lesikhulele kuyo, lulwimi, kubukeka kwayo kanye nemasiko ayo. Kodvwa sicabanga kutsi loko lesikutsandzako kuhlale kuncono yini kunaloko lokutsandvwa ngulabanye? Jehova ufuna sitijabulele tinhlobonhlobo tetintfo latidalile. (Tihlabelelo 104:24; Sembulo 4:11) Ngako-ke, yini lesibangela kutsi siphikelele sitsi indlela letsite yekwenta tintfo incono kunalenye?

18. Kungani kukuhle kutsi sitsatse labanye ngendlela Jehova labatsatsa ngayo?

¹⁸ Jehova ufuna kutsi tonkhe tinhlobo tebantfu tifundze ngaye, timkhonte futsi tiphile phakadze. (Johane 3:16; 1 Thimothi 2:3, 4) Ngako-ke, nangabe bazalwane banemibono leyehlukile kuneyetfu, siyabalalela, yingci nje nangabe imibono yabo yemukeleka kuJehova. Nasenta njalo, kuphila kwetfu kutawuba mnandzi, kujabulise futsi sitawuhlale sinebunye nebazalwane betfu nabodzadze. Njengobe sesifundzile, asitingeneli timphi talelive ngobe setsembekile kuJehova naseMbusweni wakhe. Siyakwenyanya kutigcabha kanye nekuncintisana lokukulelive laSathane. Sibonga kakhulu ngekutsi Jehova usifundzise kutsi sitsandze kuthula futsi sitfobeke! Sitiva ngendlela umhlabeli lativa ngayo nakatsi: “Maye, kuhle kumnandzi kuhlalisana kwebazalwane ngekuvana.”—Tihlabelelo 133:1.