1, 2. Tinceku taJehova tinasiphi simo sengcondvo?

TIKHONTI taJehova betisolo tikulindzele ngekubeketela kugcwaliseka kwetiphrofetho. Sibonelo saloko kutsi Jeremiya abelindzele kutsi baseBhabhulona babhubhise sive sakaJuda, futsi nguloko lokwenteka nga-607 B.C.E. (Jeremiya 25:8-11) Isaya waphrofetha kutsi Jehova utawabuyisela eveni lawo emaJuda labekatfuntjiwe futsi watsi: “Babusisiwe bonkhe labalindzela yena.” (Isaya 30:18) NaMikha abelindzele kutsi tetsembiso taJehova titawugcwaliseka, watsi: “Ngitakwetsembela [kuJehova].” (Mikha 7:7) Kwaphela emakhulu eminyaka tinceku taNkulunkulu ticiniseka kutsi Mesiya lowetsenjisiwe nobe Khristu utawufika.—Lukha 3:15; 1 Phetro 1:10-12. * (Fundza umbhalo longentansi.)

² Lamuhla natsi silindzele kugcwaliseka kwetiphrofetho letimayelana neMbuso waJehova. Njengobe ayiNkhosi yaloMbuso, Jesu utawusindzisa tinceku taNkulunkulu kulelive lelibi. Utawubhubhisa bantfu lababi futsi acedze konkhe  kuhlupheka. (1 Johane 5:19) Ngako kufanele sichubeke silindzele kutsi lilanga laJehova lingafika nobe kunini futsi sente konkhe lokusemandleni etfu kute sikulungele kufika kwalo.

3. Yini lesingase sitibute yona nangabe sekuphele sikhatsi lesidze silindzele kuphela kutsi kufike?

³ Sisibuke ngalabovu sikhatsi lapho intsandvo yaNkulunkulu itawentiwa emhlabeni. (Matewu 6:10) Kodvwa nangabe sekuphele iminyaka leminyenti solo silindzele kuphela kutsi kufike, singase sitibute kutsi ‘Kungani kufanele sichubeke silindzele kuphela kutsi kufike ngekushesha?’

4. Kungani kubalulekile kutsi ‘sihlale silindzile’?

⁴ Jesu wayala balandzeli bakhe kutsi ‘bahlale balindzile’ futsi ‘bahlale baphapheme.’ Kungako kubalulekile ngatsi kuhlala silindze kuphela kutsi kufike masinyane. (Matewu 24:42; Lukha 21:34-36) Inhlangano yaJehova ihlale isikhumbuta kutsi ‘silindze futsi sihlale sikhumbula kuba khona kwelilanga laJehova’ futsi sinake setsembiso sakhe selive lelisha.—Fundza 2 Phetro3:11-13.

5. Ngusiphi lesinye sizatfu lesinaso sekuchubeka silindzele lilanga laJehova?

⁵ Nangabe balandzeli baJesu bangelikhulu lekucala bekufanele bachubeke balindzele lilanga laJehova, natsi lamuhla kubaluleke kakhulu kutsi sihlale silindzile. Kungani? Kungobe sibonakaliso lesashiwo nguJesu sifakazela kutsi abesolo ayiNkhosi yeMbuso waNkulunkulu kusukela nga-1914 nekutsi siphila emalangeni ekugcina nobe ‘ekupheleni kwalelive.’ Sibonelo saloko kutsi njengobe Jesu aphrofetha, timo talelive tiya ngekuba timbi futsi tindzaba letimnandzi teMbuso tishunyayelwa emhlabeni wonkhe. (Matewu 24:3, 7-14) Jesu akazange asho kutsi emalanga ekugcina atawutsatsa sikhatsi lesingakanani, ngako kufanele sikulungele kutsi kuphela kungefika nobe kunini.

6. Sati njani kutsi timo talelive titawuba timbi kakhulu njengobe sisondzela ekupheleni kwalo?

⁶ Kungenteka yini kutsi ‘kuphela kwalelive’ kusho sikhatsi lesitako lapho live litawube selilibi kakhulu? LiBhayibheli litsi bantfu batawuba babi kakhulu “emalangeni ekugcina.” (2 Thimothi 3:1, 13; Matewu 24:21; Sembulo 12:12) Nanobe tintfo titimbi nyalo, siyati kutsi titawuchubeka tiba timbi kakhulu.

7. Usifundzisani Matewu 24:37-39 mayelana netimo talelive emalangeni ekugcina?

⁷ Labanye bacabanga kutsi ngaphambi ‘kwekuhlupheka lokukhulu,’ kutawuba netimphi kuwo onkhe emave futsi bantfu labanyenti batawugula nobe balambe. (Sembulo 7:14) Kodvwa nangabe loko bekungenteka, bekutawucaca kunobe ngubani kutsi kugcwaliseka tiphrofetho teliBhayibheli. Bekutawucaca ngisho nakubantfu labangenandzaba naloko lokushiwo liBhayibheli. Jesu washo kutsi emalangeni ekugcina bantfu labanyenti ‘bebangeke banake.’ Bebatawuchubeka nekuphila kwabo lokuvamile futsi bebatawumangala nakufika lilanga laJehova. (Fundza Matewu 24:37-39.) Kuyacaca-ke kutsi akukafaneli silindzele kutsi timo talelive titawuba timbi kakhulu ngaphambi ‘kwekuhlupheka lokukhulu,’ kangangekutsi bantfu baze bakholelwe kutsi kuphela sekusondzele.—Lukha 17:20; 2 Phetro 3:3, 4.

8. Ngesizatfu sekutsi sisiphaphamele sibonakaliso saJesu, yini lesiciniseka ngayo?

 ⁸ Injongo yesibonakaliso lesashiwo nguJesu kubalandzeli bakhe bekukubecwayisa ngesikhatsi labebatawuphila ngaso. Balandzeli bakhe bebasolo balindzile. (Matewu 24:27, 42) Kusukela nga-1914, tincenye letehlukene tesibonakaliso saJesu betisolo tigcwaliseka. Siyaciniseka kutsi siphila emalangeni ekugcina, lasho ‘kuphela kwalelive.’ Jehova sewuvele usitsetse sincumo sekutsi utalibhubhisa nini lelive lelibi laSathane.

9. Kungani kufanele sichubeke silindzele kutsi kuphela kufike ngekushesha?

⁹ Kungani kufanele sichubeke silindzele kuphela kutsi kufike ngekushesha? Kungobe silalela Jesu Khristu. Sibona ngalokucacile kutsi sibonakaliso Jesu lasisho lesimayelana nemalanga ekugcina siyagcwaliseka. Siyakholelwa kutsi kuphela sekusedvute hhayi ngobe setsemba konkhe lesikuvako, kodvwa ngobe siciniseka kutsi siphrofetho seliBhayibheli siyagcwaliseka. Kufanele sihlale siphapheme futsi sikulungele kufika kwekuphela.

10, 11. (a) Kungani Jesu atjela bafundzi bakhe kutsi ‘bahlale balindzile’? (b) Yini Jesu latsi balandzeli bakhe kufanele bayente nangabe kuphela kungefiki ngesikhatsi lebebasicabanga? (Buka sitfombe lesisekucaleni kwalesihloko.)

¹⁰ Labanyenti kitsi bebasolo bakhonta Jehova ngekwetsembeka futsi sekuphele iminyaka leminyenti bakubuke ngalabovu kufika kwelilanga lakhe. Nanobe sesilindze sikhatsi lesingakanani, kufanele sichubeke silindze kufika kwalelilanga. Kufanele sibe silungele nakefika Jesu atewubhubhisa live laSathane. Khumbula loko Jesu lakutjela balandzeli bakhe kutsi bakwente, watsi: “Hlalani nicaphele futsi nihlale nilindzile, ngobe anati kutsi sinini sikhatsi lesibekiwe. Kunjengalapho umuntfu ahamba aya khashane bese ushiya indlu yakhe netisebenti takhe, atibeke etikhundleni, nguleso naleso asinike umsebenti waso, futsi atjele umgcini welisango kutsi ahlale alindzile. Ngako-ke hlalani nilindzile, ngobe anati kutsi uMnikati wendlu utawufika nini, kungaba kunasekuhwalala, ekhatsi nebusuku, nakudzabuka kusa, nobe ekuseni, kuze kutsi nakefika ningakamlindzeli, anganitfoli nilele. Loku lengikusho kini ngikusho kubo bonkhe: Hlalani nilindzile.”—Makho 13:33-37.

¹¹ Ngesikhatsi balandzeli baJesu bacondza kutsi wacala kubusa nga-1914, babona kutsi kuphela kungefika nobe kunini. Ngako bakulungiselela ngekutsi bente lokunyenti emsebentini wekushumayela. Jesu washo kutsi angase abuye kamuva, “nakudzabuka kusa, nobe ekuseni.” Nangabe loko kwenteka, yini bafundzi bakhe lebekutawudzingeka kutsi bayente? Jesu watsi: “Hlalani nilindzile.” Nobe siva shengatsi sesilindze sikhatsi lesidze, loko akusho kutsi kuphela kukhashane nobe ngeke kufike esikhatsini setfu.

12. Yini Habakhuki layicela kuJehova, futsi wamphendvula njani?

¹² Umphrofethi Habakhuki walindza  ngekubeketela njengobe bakashumayela ngekubhujiswa kweliJerusalema. Ngaphambi kwakhe, labanye baphrofethi bebashumayele iminyaka leminyenti ngalomlayeto. Habakhuki abebona kutsi bubi kanye nekungalungi besekwandze kakhulu. Wacela lusito kuJehova, watsi: “Awu [Jehova], kuyawudzimate kube ngunini solo ngikhala ngicela lusito?” Nanobe Jehova angashongo kutsi kuphela kutawufika nini, wetsembisa Habakhuki, watsi: ‘Ngeke kwephute!’ Waphindze wamtjela kutsi ‘alindze.’—Fundza Habakhuki 1:1-4; 2:3.

13. Yini lokungenteka beyingacatjangwa nguHabakhuki, futsi kungani loko bekungaba yingoti?

¹³ Ase ucabange, kube Habakhuki wadzinwa kulindza kutsi kufike kuphela, mhlawumbe aze atsi: ‘Sekuphele iminyaka leminyenti ngilindze kubhujiswa kweliJerusalema. Kusetawutsatsa sikhatsi lesidze ngaphambi kwekutsi kufike kuphela. Asikho sidzingo sekutsi ngichubeke ngishumayela. Labanye bangawenta lomsebenti.’ Yini lebeyingenteka kube wacabanga ngaleyo ndlela? Abengeke achubeke angumngani waJehova. Bekatawufa kube bekangakakulungeli kufika kwekuphela.

14. Kungani sitawubonga Jehova ngekusecwayisa kutsi sichubeke silindzele kuphela?

¹⁴ Ticabange useveni lelisha. Tonkhe tintfo letaphrofethwa mayelana nemalanga ekugcina tenteke njengobe Jehova abeshito. Wetsembela kakhulu kuJehova kunasesikhatsini lesendlulile, futsi sewuciniseka kakhulu kutsi utawenta konkhe lakwetsembisile. (Fundza Joshuwa 23:14.) Umbonga kakhulu Jehova ngekutsi ukhetse sikhatsi lesikahle sekufika kwekuphela, nekutsi wecwayise bantfu bakhe kutsi bahlale bakulindzile.—Imisebenti 1:7; 1 Phetro 4:7.

15, 16. Kungani kufanele sitimisele kwenta konkhe lokusemandleni etfu emsebentini wekushumayela kulesikhatsi sekuphela?

¹⁵ Inhlangano yaJehova itawuchubeka isikhumbuta kutsi sinake kukhonta Jehova. Letikhumbuto atigcini nje ngekusisita kutsi sibe matasatasa sikhonta Nkulunkulu, kodvwa tiphindze tisente sibone ngalokucacile kutsi umlayeto lesiwushumayelako uyaphutfuma. Siyaciniseka kutsi sibonakaliso lesashiwo nguJesu sigcwaliseka nyalo nangekutsi kuphela kutawufika ngekushesha. Ngako sibeka Jehova kucala ekuphileni kwetfu futsi  sichubeka sishumayela tindzaba letimnandzi teMbuso.—Matewu 6:33; Makho 13:10.

¹⁶ Nasishumayela tindzaba letimnandzi kulabanye, sisuke sibasita kutsi basindze nakubhujiswa lelive laSathane, lokutawenteka ngekushesha. Lenye inhlekelele lenkhulu yaselwandle yenteka nga-1945 ngesikhatsi umkhumbi lokutsiwa yi-Wilhelm Gustloff ucwila. Tinkhulungwane tebantfu tafa. Lomunye dzadze kanye nendvodza yakhe babatakula kulomkhumbi. Lodzadze uyakhumbula kutsi nanobe umkhumbi bewucwila, umfati lotsite abekhala atsi: “Emaputumende ami! Emaputumende ami! Bucwebe bami! Bonkhe bucwebe bami bukulelikamelo lelilapha kulomkhumbi. Ngilahlekelwe ngiko konkhe lenginako!” Labanye labebagibele bacondza kutsi yini lebeyibaluleke kakhulu futsi basebenta ngekutimisela kute basindzise kuphila kwalabanye. Lamuhla, kuphila kwebantfu kusengotini. Natsi sifuna kulingisa labantfu lebebagibele lomkhumbi labangazange batigodle, futsi sinake kuphutfuma kwemsebenti wekushumayela. Sifuna kwenta konkhe lokusemandleni etfu kute sisite bantfu basindze ekupheleni kwalelive.

17. Kungani kufanele setsembe kutsi kuphela kungafika nobe kunini?

¹⁷ Sibona ngalokucacile kutsi  tiphrofetho teliBhayibheli tiyagcwaliseka nekutsi kuphela kwalelive lelibi sekusedvute kakhulu. Silindzele kutsi ‘timphondvo letilishumi’ kanye ‘nesilo sasendle’ timelane nenkholo yemanga, lokuyiBhabhulona Lenkhulu. (Sembulo 17:16) Akukafaneli sicabange kutsi kusetawutsatsa sikhatsi lesidze kute kwenteke loko. Kufanele ukhumbule kutsi Nkulunkulu ‘utakufaka etinhlitiyweni tato’ kutsi tihlasele inkholo yemanga futsi loko kutawenteka ngekushesha. (Sembulo 17:17) Kuphela kwalelive laSathane sekusedvute. Ngako-ke, kufanele silalele secwayiso saJesu lesitsi: “Ticapheleni kute tinhlitiyo tenu tingasindvwa kumita, kudzakwa kanye netinkhatsato tekuphila, bese lelo langa linifikela ngekushesha, linitfole ningakalindzeli.” (Lukha 21:34, 35; Sembulo 16:15) Shengatsi singachubeka siphapheme futsi simatasatasa emsebentini waJehova, siciniseka kutsi ‘uyabamelela labo labalindzele yena.’—Isaya 64:4.

18. Ngumuphi umbuto lotawuphendvulwa esihlokweni lesilandzelako?

¹⁸ Njengobe silindzele kuphela kwalelive lelibi, kufanele silalele seluleko semfundzi Juda lesitsi: “Bazalwane labatsandzekako, takheni ekukholweni kwenu lokungcwele, nithantaze ngemoya longcwele, kuze nitigcine elutsandvweni lwaNkulunkulu, njengobe nilindzele sihawu seNkhosi yetfu Jesu Khristu, ninembono wekuphila lokuphakadze.” (Juda 20, 21) Kodvwa singakhombisa njani kutsi sililindzele live lelisha laNkulunkulu kutsi lifike ngekushesha nekutsi sibuke phambili kulo? Sitawucoca ngaloku esihlokweni lesilandzelako.