1, 2. (a) Kungani uciniseka kutsi Jehova uyabatsandza bantfu bakhe? (b) Bantfu badalwa banasiphi sidzingo?

YINI lekwenta uciniseke kutsi Jehova uyabatsandza bantfu bakhe? Ngaphambi kwekutsi uphendvule lombuto, cabanga nganati tibonelo: Kwaphela iminyaka leminyenti labanye bazalwane nabodzadze bakhutsata dzadze lobitwa ngekutsi nguTaylene. Bamtjela kutsi angalindzeli lokungetulu kwemandla akhe. Taylene utsi: “Kube Jehova abengangitsandzi, bengingeke ngichubeke ngitfola seluleko sakhe.” Brigitte lowakhulisa bantfwana lababili ayedvwa ngemuva kwekushonelwa yindvodza yakhe, utsi: “Kumatima kakhulu kukhulisa bantfwana kulelive laSathane ikakhulukati nawungumtali loyedvwa. Ngiyaciniseka ngelutsandvo lwaJehova ngobe ungicondzisile nanobe bengikhala futsi ngiva buhlungu kakhulu, akazange avumele kutsi ngihlangabetane nalokungetulu kwalengingakhona kukubeketelela.” (1 Khorinte 10:13) Sandra unesifo lesingelapheki. Kulomunye umhlangano, lomunye dzadze wakhombisa kutsi  unendzaba naye. Indvodza yaSandra itsi: “Nanobe besingamati lodzadze, kukhatsalela kwakhe kwasijabulisa kakhulu. Ngisho netindlela letincane tekukhombisa lutsandvo letentiwa bazalwane nabodzadzewetfu tingikhombisa indlela Jehova lasitsandza ngayo.”

² Jehova wadala bantfu babanesidzingo sekutsandvwa nesekutiva batsandvwa. Nanobe kunjalo, kumelula kuphelelwa ngemandla ngenca yekugula, tinkinga temali nobe kungatfoli imiphumela lemihle nasishumayela. Nasicala kuva shengatsi Jehova akasasitsandzi, kufanele sikhumbule kutsi siligugu kuye, nekutsi ukhona, usibambe ngesandla sangesekudla futsi uyasisita. Ngeke asikhohlwe nangabe setsembekile kuye.—Isaya 41:13; 49:15.

3. Yini lengakhulisa kuciniseka kwetfu kutsi lutsandvo Jehova lanalo ngatsi alupheli?

³ LaBoFakazi lokukhulunywe ngabo ekucaleni bebaciniseka kutsi Nkulunkulu akabashiyi ngetikhatsi letimatima. Natsi singaciniseka kutsi useluhlangotsini lwetfu. (Tihlabelelo 118:6, 7) Kulesihloko, sitawucoca ngetipho letine lesitiphiwe nguJehova letikhombisa kutsi uyasitsandza. Letipho ngunati: (1) Yindalo yakhe, (2) liBhayibheli, (3) ngumthantazo, (4) kanye nenhlawulo. Kuzindla ngetintfo letinhle letentiwe nguJehova, kungasisita kutsi silujabulele kakhulu lutsandvo lwakhe lolungapheli.—Fundza Tihlabelelo 77:11, 12.

4. Yini lesiyifundza ngaJehova endalweni yakhe?

⁴ Nasibuka indalo yaJehova, sibona indlela lasitsandza ngayo. (Roma 1:20) Sibonelo saloko kutsi Jehova udale umhlaba kuze singagcini nje ngekuhlala kuwo. Usinikete konkhe lesikudzingako kute sijabulele kuphila. Sidzinga kudla, futsi Jehova usinikete tinhlobonhlobo tekudla kute sikujabulele. (Umshumayeli 9:7) Lomunye dzadze lokutsiwa nguCatherine uyakujabulela loko lakubona endalweni, ikakhulukati entfwasahlobo eCanada. Utsi: “Imangalisa mbamba indlela tonkhe tintfo letiba nemphilo ngayo—lokufaka ekhatsi timbali lokufanele timile emhlabatsini kanye netinyoni letibuya eluhambweni lwato, letifaka ekhatsi i-hummingbird lefike idle esitjeni sekudlela tinyoni lesingephandle kwelifasitelo lami lasekhishini. Jehova usinikete letintfo letinhle ngobe uyasitsandza.” Babe wetfu uyayitsandza indalo yakhe, futsi ufuna natsi siyijabulele.—Imisebenti 14:16, 17.

5. Lutsandvo lwaJehova lubonakala njani endleleni bantfu labadalwe ngayo?

⁵ Jehova wasidala saba nelikhono lekwenta umsebenti lonenjongo futsi siwujabulele. (Umshumayeli 2:24) Wanika bantfu umsebenti wekugcwalisa umhlaba, bawulime futsi banakekele tinhlanti, tinyoni kanye nato tonkhe tintfo letiphilako. (Genesisi 1:26-28) Natsi wasidala saba nebuntfu lobuhle kute simlingise!—Efesu 5:1.

6. Kungani kufanele silijabulele kakhulu liVi laNkulunkulu?

⁶ Jehova wasinika liBhayibheli ngenca yekutsi usitsandza kakhulu. Lisitjela loko lokufanele sikwati ngaye nangendlela lativa ngayo ngebantfu. Nasi sibonelo: LiBhayibheli lisitjela indlela Jehova lativa ngayo ngema-Israyeli labevame kungamlaleli. Tihlabelelo 78:38 titsi: “Waba nesihawu, watisibekela tono tabo, akazange ababhubhise abacedze. Kanyenti watibamba ekutfukutseleni kwakhe, akaluvusanga lonkhe lulaka lwakhe.” Kuzindla ngalelivesi kungakusita ubone indlela Jehova lakutsandza ngayo nalakukhatsalela ngayo. Singaciniseka kutsi Jehova usikhatsalela ngalokujulile.—Fundza 1 Phetro 5:6, 7.

7. Kungani liBhayibheli kufanele libe ligugu kitsi?

 ⁷ LiBhayibheli kufanele libe ligugu kakhulu kitsi. Kungani? Kungobe Jehova ukhuluma natsi asebentisa liVi lakhe. Nangabe umtali nemntfwanakhe babhobokelana, lutsandvo lwabo ngalomunye nalomunye kanye nekwetsembana kwabo kuyacina. Jehova nguBabe wetfu lonelutsandvo. Nanobe singakake sambona nobe seva livi lakhe, kuba shengatsi ukhulumisana natsi ngalokucondzile asebentisa liBhayibheli. Kufanele sichubeke simlalela! (Isaya 30:20, 21) Nasifundza liVi laNkulunkulu, sicala kumati Jehova futsi simetsembe, njengobe asicondzisa futsi asivikela.—Fundza Tihlabelelo 19:7-11; Taga 1:33.

8, 9. Yini Jehova lafuna kutsi siyati? Shano sibonelo lesiseBhayibhelini.

⁸ Jehova ufuna sati kutsi uyasitsandza nekutsi akabuki nje kuphela tono tetfu, kodvwa ubuka nalokuhle kitsi. (2 Tikhronike 16:9) Ase sibone indlela Jehova lakubona ngayo lokuhle eNkhosini Jehoshafati yakaJuda. Jehoshafati watsatsa sincumo lesibi ngekulekelela iNkhosi Ahabi yaka-Israyeli ngesikhatsi ilwa nemaSiriya eRamothi Gileyadi. Nanobe baphrofethi bemanga labangu-400 batjela Ahabi iNkhosi lembi kutsi utawuncoba, Mikhaya umphrofethi waJehova weliciniso, watjela Jehoshafati na-Ahabi kutsi nabatawuya kulemphi batawuncotjwa. Nguloko kanye lokwenteka. Ahabi wafa emphini futsi Jehoshafati wasindza ngekulambisa. Ngemuva kwalemphi, Jehova wasebentisa Jehu kute eluleke Jehoshafati ngeliphutsa lakhe. Nanobe kunjalo, Jehu waphindze wamtjela, watsi: “Kukhona lokuhle kuwe.”—2 Tikhronike 18:4, 5, 18-22, 33, 34; 19:1-3.

⁹ Ekucaleni kwekubusa kwakhe, Jehoshafati abetjele tindvuna, emaLevi kanye nebaphristi kutsi baye kuwo onkhe emadolobha akaJuda kute bafundzise bantfu ngeMtsetfo waJehova. Baphumelela kakhulu kangangekutsi bantfu baletinye tive bamati Jehova. (2 Tikhronike 17:3-10) Ngekuhamba kwesikhatsi Jehoshafati watsatsa sincumo lesibi, kodvwa Jehova akazange atikhohlwe tintfo letinhle labetentile. Lesibonelo sisidvudvuta kakhulu ngobe natsi siyawenta emaphutsa ngaletinye tikhatsi. Kodvwa nasenta konkhe lokusemandleni etfu kute sikhonte Jehova, utawuchubeka asitsandza futsi ngeke atikhohlwe tintfo letinhle lesitentile.

10, 11. (a) Kungani umthantazo usipho lesikhetsekile lesivela kuJehova? (b) Nkulunkulu angayiphendvula njani imithantazo yetfu? (Buka sitfombe lesisekucaleni kwalesihloko.)

¹⁰ Babe lonelutsandvo utinika sikhatsi sekulalela bantfwabakhe nabafuna kukhuluma naye. Uyafuna kwati kutsi bativa njani ngobe ubakhatsalela mbamba. Jehova longuBabe wetfu lonelutsandvo wenta lokufanako. Uyasilalela nasithantaza kuye. Kukhuluma naBabe wetfu kulilungelo leliligugu!

¹¹ Singathantaza nobe kunini kuJehova. UnguMngani wetfu, futsi uhlale akulungele kulalela imithantazo yetfu. Taylene lokukhulunywe ngaye ekucaleni utsi: “Ungakhuluma nobe yini futsi umtjele konkhe.” Nasitjela Jehova ngemicabango yetfu lejulile, angasiphendvula asebentisa umbhalo, sihloko lesisetincwadzini tetfu nobe sikhutsato lesivela kumzalwane nobe dzadze. Jehova ulalela ticelo tetfu leticotfo, futsi uyasicondza ngisho nalapho  kute losicondzako. Indlela laphendvula ngayo imithantazo yetfu ikhombisa kutsi lutsandvo lanalo ngatsi alupheli.

12. Kungani kufanele sifundze imithantazo leseBhayibhelini? Shano sibonelo.

¹² Singafundza tifundvo letibalulekile emithantazweni leseBhayibhelini. Ngaletinye tikhatsi, kuyasisita kudadisha leminye yalemithantazo ekukhonteni kwemndeni. Indlela lesithantaza ngayo itawutfutfuka nasisizindla ngalemithantazo lecotfo yetinceku taNkulunkulu tasendvulo. Nasi sibonelo: Fundza umthantazo locotfo lowentiwa nguJona ngesikhatsi asesiswini senhlanti lenkhulu. (Jona 1:17–2:10) Fundza ngemthantazo losuka enhlitiyweni lowentiwa nguSolomoni ngesikhatsi kuniketelwa lithempeli. (1 Emakhosi 8:22-53) Phindze uzindle ngemthantazo waJesu losibonelo. (Matewu 6:9-13) Lokubaluleke kakhulu kutsi ngaso sonkhe sikhatsi ‘ticelo takho tatatiwe nguNkulunkulu.’ Umphumela waloko kutsi “kuthula kwaNkulunkulu lokwendlula konkhe kucondza kutawulondza tinhlitiyo netingcondvo tenu.” Kubonga kwetfu ngelutsandvo lwaJehova lolungapheli kutawuchubeka kukhula.—Filiphi 4:6, 7.

13. Nguliphi litfuba lelisivulekele ngenca yenhlawulo?

¹³ Jehova wasipha sipho senhlawulo kute “sitfole kuphila.” (1 Johane 4:9) Nakachaza lesento saNkulunkulu selutsandvo, umphostoli Pawula wabhala watsi: “Khristu wafela bantfu labangamesabi Nkulunkulu. Loku kwenteka ngesikhatsi lesifanele. Kulukhuni kutsi lotsite afele umuntfu lomsulwa; mhlawumbe lotsite angamfela umuntfu lolungile. Nkulunkulu ukhombisa lutsandvo lwakhe kitsi, ngobe ngesikhatsi sisetoni, Khristu wasifela.” (Roma 5:6-8) Inhlawulo isibonelo lesihamba embili selutsandvo Nkulunkulu lanalo ngatsi, futsi inika bantfu litfuba lekuba nebudlelwane lobusedvute naye.

14, 15. Isho kutsini inhlawulo (a) kumaKhristu lagcotjiwe? (b) kulabo labanelitsemba lekuphila emhlabeni?

¹⁴ Licembu lelincane lemaKhristu libona lutsandvo lolungapheli lwaJehova ngendlela lekhetsekile. (Johane 1:12, 13; 3:5-7) Nkulunkulu ugcobe lamaKhristu ngemoya longcwele, futsi ngaleso sizatfu sekabantfwana bakhe. (Roma 8:15, 16) Njengobe lamanye kuwo aselamhlabeni, kungani Pawula atsi ahleti ‘kanye kanye etindzaweni tasezulwini amunye naKhristu Jesu’? (Efesu 2:6) Kungobe Jehova uwanike litsemba lekuphila phakadze ezulwini.—Efesu 1:13, 14; Kholose 1:5.

¹⁵ Bonkhe labangakagcotjwa bangaba bangani baNkulunkulu nabakhombisa kukholwa enhlawulweni. Nabo basetfubeni lekufakwa esiswini njengebantfwana baNkulunkulu futsi baphile phakadze emhlabeni lolipharadisi. Inhlawulo ikhombisa lutsandvo Jehova lanalo ngabo bonkhe bantfu. (Johane 3:16) Kujabulisa  kakhulu kwati kutsi nasikhonta Nkulunkulu ngekwetsembeka, utasiniketa kuphila lokuncono eveni lelisha! Ngako-ke, asikhombise kutsi siyayijabulela inhlawulo, lokuyindlela lehamba embili lekhombisa lutsandvo lolungapheli Nkulunkulu lanalo ngatsi.

16. Yini lesitayenta nasesizindle ngelutsandvo Nkulunkulu lanalo ngatsi?

¹⁶ Ngeke sikhone kubala tonkhe tindlela Jehova lasikhombise ngato kutsi uyasitsandza. INkhosi Davide yahlabela yatsi: “Imicabango yakho [iligugu kimi], Nkulunkulu! Maye, bukhulu bunyenti bayo! Nangingayibala, ingaba minyenti kwendlula tinhlavu tesihlabatsi.” (Tihlabelelo 139:17, 18) Kuzindla ngetindlela letinyenti Jehova lakhombise ngato kutsi uyasitsandza, kutasikhutsata kutsi simtsandze futsi simentele lokuncono kakhulu.

17, 18. Ngutiphi letinye tindlela lesingakhombisa ngato lutsandvo lesinalo ngaNkulunkulu?

¹⁷ Tinyenti tindlela lesingamkhombisa ngato kutsi siyamtsandza Jehova. Nasi sibonelo: Singakhombisa kutsi siyamtsandza Jehova ngekutjela labanye bantfu ngenkhutsalo tindzaba letimnandzi teMbuso. (Matewu 24:14; 28:19, 20) Singaphindze sikhombise kutsi siyamtsandza Nkulunkulu ngekutibeketelela ngekwetsembeka tilingo letivivinya kukholwa kwetfu. (Fundza Tihlabelelo 84:11; Jakobe 1:2-5.) Nanobe tilingo lesihlangabetana nato tingaba matima, singaciniseka kutsi Jehova uyakubona kuhlupheka kwetfu futsi utasisita, ngobe siligugu kuye.—Tihlabelelo 56:8.

¹⁸ Lutsandvo lesinalo ngaJehova lusikhutsata kutsi sizindle ngato tonkhe tintfo letinhle latidalile. Sikhombisa kutsi siyamtsandza Jehova neliVi lakhe ngekutsi sibe bafundzi labakhutsele beliBhayibheli. Sithantaza kuJehova ngaso sonkhe sikhatsi ngobe siyamtsandza futsi sifuna kucinisa budlelwane betfu naye. Lutsandvo lesinalo ngaye lukhula kakhulu nasizindla ngenhlawulo, lesipho sakhe lesiligugu. (1 Johane 2:1, 2) Leti nguletinye tetindlela lesikhombisa ngato Jehova kutsi siyalujabulela lutsandvo lwakhe lolungapheli.