1, 2. Jehova usifundzise njani kutsi simtsandze?

INDLELA lencono kakhulu babe langafundzisa ngayo bantfwana bakhe kutsi ababekele sibonelo lesihle. Nakabakhombisa lutsandvo, usuke abafundzisa indlela yekutsandza labanye. Kute loke wasitsandza ngendlela Babe wetfu Jehova lasitsandza ngayo. Ngako, sifundza kutsandza labanye “ngobe yena wasitsandza kucala.”—1 Johane 4:19.

² Jehova ukhombise njani kutsi “wasitsandza kucala”? LiBhayibheli litsi: “Ngesikhatsi sisetoni, Khristu wasifela.” (Roma 5:8) Babe wetfu lonelutsandvo, Jehova, wanikela ngeNdvodzana yakhe kutsi ibe yinhlawulo kute asisindzise esonweni nasekufeni. Lesipho lesiligugu senta kutsi sisondzelane naJehova futsi sikwati kumkhombisa kutsi siyamtsandza. Ngekunikela ngendvodzana yakhe, Jehova wasibekela sibonelo lesihle. Wasifundzisa kutsi kufanele sibe nelutsandvo lolute bugovu futsi sibe nemusa.—1 Johane 4:10.

3, 4. Sikhombisa njani kutsi siyamtsandza Nkulunkulu?

³ Jehova ulutsandvo. Ngako loko kusenta sisicondze sizatfu lesenta Jesu watsi umyalo lobalulekile ngulona lotsi: “Kufanele utsandze Jehova Nkulunkulu wakho ngayo yonkhe inhlitiyo yakho, nangawo wonkhe umphefumulo wakho, nangayo  yonkhe ingcondvo yakho, nangawo onkhe emandla akho.” (Makho 12:30) Jehova ufuna kutsi simtsandze “ngayo yonkhe inhlitiyo” yetfu. Kungamvisa buhlungu nangabe sitsandza umuntfu lotsite nobe intfo letsite kwendlula yena. Kodvwa indlela lesimtsandza ngayo akukafaneli ichutjwe yindlela lesitiva ngayo nje kuphela. Jehova ulindzele kutsi simtsandze ‘ngayo yonkhe ingcondvo’ yetfu “nangawo onkhe emandla” etfu. Loko kusho kutsi indlela lesimtsandza ngayo Jehova ifaka ekhatsi loko lesikucabangako naloko lesikwentako.—Fundza Mikha 6:8.

⁴ Ngako-ke kufanele sitsandze Jehova ngalokusuka enhlitiyweni. Nasimenta ete kucala ekuphileni kwetfu, sisuke sikhombisa kutsi simtsandza mbamba. Esihlokweni lesendlulile, sifundze ngetindlela letine Jehova lakhombisa ngato kutsi uyabatsandza bantfwana bakhe. Nyalo sitawufundza ngendlela lesingakhombisa ngayo kutsi siyamtsandza Jehova nekutsi singayikhulisa njani indlela lesimtsandza ngayo.

5. Nasicabanga ngako konkhe Jehova lasentele kona, yini lesifuna kuyenta?

⁵ Nangabe lotsite akupha sipho, uvame kumbonga loyo muntfu. Ngesizatfu sekutsi usitsatsa njengalesibalulekile, uyasisebentisa. Jakobe wabhala watsi: “Tonkhe tipho letinhle naletiphelele tivela etulu, tichamuka kuYise wetibane tasesibhakabhakeni, longagucuki nobe ashintje njengesitfunti.” (Jakobe 1:17) Sibonga kakhulu ngekutsi Jehova usiniketa konkhe lesikudzingako kute siphile futsi sijabule. Siyabona kutsi uyasitsandza, futsi natsi sifuna kumkhombisa kutsi siyamtsandza. Utiva ngeloyo ndlela yini nawe?

6. Yini lobekufanele yentiwe ngema-Israyeli nangabe afuna kutsi Jehova achubeke awabusisa?

⁶ Ema-Israyeli atfola tintfo letinyenti letinhle kuJehova. Kwaphela iminyaka leminyenti awacondzisa ngemitsetfo yakhe futsi awanika konkhe labekakudzinga kute aphile. (Dutheronomi 4:7, 8) Abengakhombisa kutsi ayambonga Jehova ngekulalela imitsetfo yakhe. Sibonelo saloko kutsi nakanikela imihlatjelo kuJehova, bekufanele amnike ‘tilimo letinhle tekwendvulelisa.’ (Eksodusi 23:19) Ema-Israyeli bekati kutsi Jehova utawuchubeka awabusisa nakamlalela futsi amnika lokuncono labekanako.—Fundza Dutheronomi 8:7-11.

7. Singatisebentisa njani tintfo tetfu ‘letinhle’ kute sikhombise Jehova kutsi siyamtsandza?

⁷ Natsi singamkhombisa Jehova kutsi siyamtsandza ngekutsi simnike ‘lokuhle’ lesinako. (Taga 3:9) Loko sikwenta ngekutsi sisebentise lesinako kute simdvumise. Sibonelo saloko kutsi singanikela kute sisekele umsebenti weMbuso ebandleni lesikulo, nasemhlabeni wonkhe. Ngisho sinalokunyenti nobe lokuncane, sonkhe singakusebentisa loko lesinako kute sikhombise kutsi siyamtsandza Jehova. (2 Khorinte 8:12) Kodvwa kunaletinye tindlela lesingakhombisa ngato kutsi siyamtsandza.

8, 9. Nguyiphi lenye indlela lesikhombisa ngayo kutsi siyamtsandza Jehova? Yini leyentiwa nguMike nemndeni wakhe?

⁸ Jesu wasifundzisa kutsi sichubeke sifuna kucala uMbuso futsi singakhatsateki ngekudla nekwekwembatsa. Babe wetfu wetsembisa kusinika lesikudzingako.  (Matewu 6:31-33) Siyametsemba Jehova futsi siyati kutsi utasigcina lesetsembiso sakhe. Nangabe umtsandza mbamba umuntfu lotsite, uyametsemba. Ecinisweni, nasichubeka simetsemba Jehova, sichubeka simkhombisa kutsi siyamtsandza. (Tihlabelelo 143:8) Ngako singase sitibute: ‘Imigomo yami nendlela lengisebentisa ngayo sikhatsi kanye nemandla ami kuyakhombisa yini kutsi ngimtsandza mbamba Jehova? Ngetsembela kuJehova onkhe emalanga yini kute anekekele tidzingo tami?’

⁹ Mike nemndeni wakhe betsembela kuJehova. Ngesikhatsi Mike asemusha, abefuna kuyoshumayela kulelinye live. Ngisho nangesikhatsi sekashadile futsi anebantfwana lababili, abesolo anaso lesifiso. Ngesikhatsi yena nemndeni wakhe bafundza ngebazalwane nabodzadze labakhonta lapho kunesidzingo lesikhulu sebamemeteli, bancuma kwenta kuphila kwabo kube melula. Batsengisa indlu yabo futsi batfutsela kulencane. Mike waphindze wanciphisa nelinani lemakhasimende lanawo kulelibhizinisi lekuhlanta, futsi watfola nendlela yekulichuba asebentisa i-Internet abe ahlala kulelinye live. Umphumela waloko waba kutsi Mike nemndeni wakhe bakhone kutfutsela kulelinye live, futsi bawujabulela kakhulu umsebenti wekushumayela labawenta kulelo live. Mike utsi: “Siyakubona kugcwaliseka kwemavi aJesu lakuMatewu 6:33!”

10. NjengeNkhosi Davide, kungani kukuhle kutsi sizindle ngaloko lesikufundza ngaJehova?

¹⁰ INkhosi Davide yake yabhala yatsi: “Emazulu ababata bukhosi baNkulunkulu, nemkhatsi wembula likhono lakhe.” Yengeta yatsi: “Imfundziso [yaJehova] iphelele, ihlumelelisa umphefumulo; bufakazi [baJehova] buliciniso, buyabahlakaniphisa labate lwati.” Njengobe Davide abezindla ngemitsetfo yaJehova nangetintfo letinhle latidalile, wasondzelana kakhulu naye futsi abefuna kumkhombisa kutsi uyamtsandza. Davide watsi: “Emavi emlomo wami netizindlo tenhlitiyo yami atemukeleke kuwe, [Jehova], Dvwala lami, neMkhululi wami.”—Tihlabelelo 19:1, 7, 14.

11. Singalusebentisa njani lwati Jehova lasiniketa lona kute sikhombise kutsi siyamtsandza? (Buka sitfombe lesisekucaleni kwalesihloko.)

¹¹ Lamuhla, Jehova usifundzisa lokunyenti ngaye, lokufaka ekhatsi injongo yakhe, indalo yakhe neliVi laKhe. Lelive likhutsata bantfu kutsi babe tifundziswa, kodvwa ngalokuvamile imfundvo lephakeme ibenta bangamtsandzi Nkulunkulu. Ngalokwehlukile, Jehova akafuni nje kuphela kutsi sifundze ngaye kodvwa uphindze asisite kutsi sihlakaniphe. Ufuna sikusebentise loko lesikufundzako kute kusizuzise futsi sisite labanye. (Taga 4:5-7) Sibonelo saloko kutsi ufuna sicoce nalabanye ‘ngelwati lolungulonalona lweliciniso,’ futsi sibasite kute basindziswe. (1 Thimothi 2:4) Sikhombisa kutsi  siyamtsandza Jehova kanye nebantfu ngekutsi sifundzise labanyenti ngeMbuso wakhe nangaloko lotabentela kona.—Fundza Tihlabelelo 66:16, 17.

12. Yini leyashiwo ngulomunye dzadze losemusha ngesipho lasitfola kuJehova?

¹² Bantfu labasebasha nabo bangazindla ngako konkhe Jehova labanike kona nalabafundzise kona. Shannon usayikhumbula indlela lativa ngayo emhlanganweni laya kuwo ngesikhatsi aneminyaka lengu-11 budzala futsi dzadzewakhe aneminyaka lengu-10. Ngesikhatsi kuchubeka luhlelo lweMhlangano weSifundza lonesihloko lesitsi ‘Kwesaba Nkulunkulu,’ bonkhe labasebasha lokufaka ekhatsi Shannon nadzadzewakhe, bacelwa kutsi bahlale endzaweni lekhetsekile. Ekucaleni abetfukile. Kodvwa wamangala ngesikhatsi bonkhe labasha baniketwa incwadzi letsi: “Intsha Iyabuza—Izimpendulo Ezisebenzayo.” Lesipho lesihle samenta wativa njani ngaJehova? Utsi: “Kulapho ngabona khona kutsi Jehova ukhona mbamba nekutsi ungitsandza kakhulu. Sijabula kakhulu ngekutsi Nkulunkulu wetfu lomkhulu Jehova usipha ngesihle tipho letinhle!”

13, 14. Yini lokufanele siyente nangabe Jehova asiyala, futsi ngani?

¹³ LiBhayibheli liyasikhumbuta, litsi: ‘Ngobe Jehova uyamcondzisa lowo lamtsandzako, njengobe neyise enta endvodzaneni yakhe lajabula ngayo.’ (Taga 3:12) Nasemukela siyalo saJehova  futsi sivuma kuceceshwa nguye, sifundza kwenta lokulungile futsi siba nekuthula. Kuliciniso kutsi “kute siyalo lesibonakala sijabulisa ngaleso sikhatsi, kodvwa sibuhlungu.” (Hebheru 12:11) Nobe kunjalo, yini lokufanele siyente nangabe Jehova asiyala? Akukafaneli sibhonce tindlebe nobe sicansuke nasingasitsandzi siyalo lesiniketwa sona. Siyamtsandza Jehova, ngako siyamlalela futsi sente lushintjo loludzingekako.

¹⁴ Ngesikhatsi saMalakhi, emaJuda lamanyenti akamlalelanga Jehova. Abenganadzaba nekutsi imihlatjelo labekayinikela kuye beyingamjabulisi. Ngako-ke, Jehova wawanika siyalo lesinemandla ngaloko. (Fundza Malakhi 1:12, 13.) Ecinisweni, Jehova wawayala emahlandla kodvwa achubeka abhonca tindlebe. Ngako watsi kuwo: “Ngitanitfumelela sicalekiso, netibusiso tenu ngiticalekise.” (Malakhi 2:1, 2) Kuyacaca kutsi nangabe sichubeka singasilaleli seluleko Jehova lasinika sona nobe sicabange kutsi asikabaluleki, ngeke sibe bangani bakhe.

15. Nguyiphi indlela yekucabanga lokufanele siyibalekele?

¹⁵ Live laSathane likhutsata bantfu kutsi batikhukhumete futsi baticabangele bona kuphela. Labanyenti abakutsandzi kuniketwa seluleko nobe kutjelwa kutsi benteni. Labanye balalela seluleko ngenca nje yekutsi kufanele bente kanjalo. Tsine akukafaneli sibe njalo. LiBhayibheli lisitjela kutsi kufanele ‘siyekele kwentiwa sifane nalelive.’ Esikhundleni saloko kudzingeka sikucondze loko Jehova lakulindzele kitsi futsi sente lokumjabulisako. (Roma 12:2) Usebentisa inhlangano yakhe kute isinikete seluleko ngesikhatsi lesifanele. Sibonelo saloko kutsi siyakhunjutwa mayelana nendlela lokufanele sitiphatse ngayo nasinebantfu bebulili lobehlukile, indlela lokufanele sikhetse ngayo bangani nendlela lokufanele sente ngayo nasingcebelekile. Nangabe sisemukela ngalokukhululekile siyalo  saJehova futsi senta lushintjo kute simjabulise, sikhombisa kutsi siyasijabulela sicondziso sakhe nekutsi simtsandza mbamba.—Johane 14:31; Roma 6:17.

16, 17. (a) Kungani kufanele sati kutsi Jehova ucabangani ngendzaba letsite ngaphambi kwekutsi sitsatse tincumo? (b) Yini ema-Israyeli layenta esikhundleni sekwetsembela kuJehova?

¹⁶ Bantfwana labancane betsembela kubatali babo kute babasite futsi babavikele. Ngisho nalasebakhulile bangalucela lusito kubatali babo. Bayacondza kutsi nanobe bangatitsatsela bona tincumo, batali babo bangabaniketa seluleko lesincono. Babe wetfu, Jehova, uyasivumela kutsi sititsatsele tincumo. Kodvwa ngenca yekutsi simetsemba mbamba futsi siyamtsandza, sihlale silucela lusito lwakhe futsi sente konkhe lesingakwenta kute sitfole kutsi ucabangani ngendzaba letsite ngaphambi kwekutsi sitsatse sincumo. Nangabe setsembela kuJehova, utasiniketa umoya wakhe longcwele lotasisita kutsi sente lokulungile.—Filiphi 2:13.

¹⁷ Ngesikhatsi saSamuweli, ema-Israyeli ehlulwa ngemaFilisti emphini. Esikhundleni sekutsi abute Jehova kutsi enteni, atsi: “Asilandze libhokisi lesivumelwane saSimakadze eShilo, kuze litewuhamba kanye natsi lisephule etandleni tetitsa tetfu.” Waba yini umphumela waleso sincumo? ‘Kwaba nekubulawa lokukhulu, kwafa emabutfo ema-Israyeli labengu-30 000. Libhokisi lesivumelwane saNkulunkulu latfunjwa.’ (1 Samuweli 4:2-4, 10, 11) Ema-Israyeli bekacabanga kutsi nakatsatsa lelibhokisi, Jehova utawasita futsi awavikele. Kodvwa awamcelanga Jehova kutsi awasite nome atfole kutsi ucabangani ngalendzaba. Esikhundleni saloko, enta labekacabanga kutsi kulungile futsi emvakwaloko ahlupheka kakhulu.—Fundza Taga 14:12.

18. Likufundzisani liBhayibheli mayelana nekwetsemba Jehova?

¹⁸ Umhlabeli lobekamtsandza kakhulu Jehova futsi ametsemba, wabhala watsi: ‘Lindza Nkulunkulu, ngobe ngisetawumdvumisa uMsindzisi wami naNkulunkulu wami. Umphefumulo wami udzabukile ngekhatsi kwami, ngako-ke ngiyawukukhumbula.’ (Tihlabelelo 42:5, 6) Nguleyo yini indlela lotiva ngayo ngaJehova? Utiva usondzelene naye yini futsi umetsemba? Ungakwati kumetsemba kakhulu. LiBhayibheli liyasitjela litsi: “Tsemba [Jehova] ngayo yonkhe inhlitiyo yakho, ungeyami ekwatini kwakho. Matise kuko konkhe lokwentako, yena uyakucondzisa tindlela takho.”—Taga 3:5, 6.

19. Ungamkhombisa njani Jehova kutsi uyamtsandza?

¹⁹ Ngekusitsandza kucala Jehova bekasifundzisa indlela yekumtsandza. Shengatsi ngaso sonkhe sikhatsi singacabanga ngetintfo lasentele tona nangendlela lasitsandza ngayo. Shengatsi futsi singakhombisa kutsi simtsandza ngenhlitiyo yetfu yonkhe, umphefumulo, ingcondvo nangemandla etfu onkhe.—Makho 12:30.