1, 2. Ngubani lowasidala saba nabonembeza, futsi kungani simbonga ngaloko?

JEHOVA NKULUNKULU wadala bantfu baba nenkhululeko yekutikhetsela. Kuze asisite sitsatse tincumo letikahle, Jehova wasidala saba nalokutsite lokutasicondzisa. Loko lokusicondzisako ngunembeza, futsi usenta sehlukanise lokulungile nalokungakalungi. Nasibasebentisa kahle bonembeza betfu, bangasisita kutsi sente lokulungile futsi sibalekele kwenta lokubi. Bonembeza betfu babufakazi bekutsi Jehova uyasitsandza futsi ufuna siphumelele.

² Labanye bantfu lamuhla benta tintfo letikahle futsi benyanye lokubi nanobe bangatati timiso teliBhayibheli. (Fundza Roma 2:14, 15.) Kungani kunjalo? Kungenca yabonembeza babo. Bonembeza bavikela bantfu labanyenti kutsi bangenti tintfo letimbi. Cabanga nje kutsi lelive belitawuba libi kangakanani kube sonkhe site bonembeza! Kungenteka besingeva kukhulunywa ngetintfo letimbi kakhulu kwendlula loko lesikuvako nyalo. Simbonga kakhulu Jehova ngekutsi wasidala saba nabonembeza!

3. Nembeza wetfu ungasisita njani ebandleni lebuKhristu?

 ³ Bantfu labanyenti abakucabangi kucecesha bonembeza babo. Nanobe kunjalo, bantfu baJehova bafuna kutsi bonembeza babo basebente kahle ngobe bangaba lusito lolukhulu ekutfutfukiseni bunye belibandla. Sifuna bonembeza betfu basikhumbute timiso teliBhayibheli letimayelana nalokuhle nalokubi. Kodvwa kuze siceceshe bonembeza betfu futsi sibasebentise, kufanele sente lokungetulu nje kwekumane sati loko lokushiwo liBhayibheli. Kufanele sititsandze timiso taNkulunkulu futsi sikholelwe kutsi tiyasizuzisa. Pawula wabhala watsi: “Ecinisweni injongo yalomyalo kutsi kube nelutsandvo loluvela enhlitiyweni lemhlophe, kunembeza lomsulwa nasekukholweni lokute kutentisa.” (1 Thimothi 1:5) Nasicecesha bonembeza betfu futsi sibalalela, lutsandvo lwetfu ngaJehova kanye nekukholwa kwetfu kutawukhula. Indlela lesimlalela ngayo nembeza wetfu ikhombisa kutsi bucine kangakanani buhlobo betfu naJehova, nekutsi sifuna kumjabulisa kangakanani. Bonembeza betfu baphindze bavete kutsi siluhlobo luni lwebantfu.

4. Singabacecesha njani bonembeza betfu?

⁴ Singabacecesha njani bonembeza betfu? Kufanele sifundze liBhayibheli onkhe emalanga, sizindle ngaloko lesikufundzako futsi sicele Jehova asisite kutsi sikusebentise loko lesikufundzile. Loko kusho kutsi kufanele sente lokungetulu nje kwekufundza liciniso leliseBhayibheli kanye nemiyalo lekulo. Nasilifundza, sisuke sifuna kumati kancono Jehova. Siphindze sati kutsi uluhlobo luni lweMuntfu, kutsi utsandzani nekutsi yini langayitsandzi. Njengobe sifundza lokunyenti ngaJehova, nembeza wetfu utawusheshe ukhone kukwehlukanisa loko yena lakutsatsa njengalokulungile nalokungakalungi. Nasichubeka sicecesha bonembeza betfu, sibese sicala kucabanga njengaJehova.

5. Sitawucoca ngani kulesihloko?

⁵ Singase sitibute: Ungasisita njani nembeza locecesheke kahle nangabe kudzingeka kutsi sitsatse tincumo? Singawuhlonipha njani nembeza walomunye umKhristu? Nembeza wetfu ungasikhutsata njani kutsi sente lokuhle? Ase sihlole tici letintsatfu lapho sidzinga kuto nembeza locecesheke kahle: (1) tindlela tekwelapha, (2) kutijabulisa kanye (3) nemsebenti wekushumayela.

6. Ngutiphi tincumo lesititsatsako mayelana nemphilo yetfu?

⁶ LiBhayibheli lisitjela kutsi sitibalekele tintfo letitasilimata futsi sicabange ngetintfo lesitentako, letifaka ekhatsi kudla nekunatsa. (Taga 23:20; 2 Khorinte 7:1) Nasilalela seluleko seliBhayibheli, loko kungasisita kutsi sivikele imphilo yetfu. Kodvwa solo siyagula futsi siyaguga. Ngutiphi tincumo lokungase kudzingeke kutsi sititsatse? Kulamanye emave kusetjentiswa imitsi yasesibhedlela neyesintfu. Emahhovisi eligatja avamise kutfola tincwadzi letivela kubazalwane nabodzadze lababuta mayelana netindlela letehlukahlukene  tekwelashwa. Labanye babuta kutsi, “Inceku yaJehova ingayemukela yini indlela letsite yekwelashwa?”

7. Singatitsatsa njani tincumo mayelana nekusebentisa ingati?

⁷ Lihhovisi leligatja nobe labadzala belibandla bete ligunya lekuncumela umKhristu mayelana nendlela yekwelashwa, ngisho nome abuta kutsi ente njani. (Galathiya 6:5) Nobe kunjalo, labadzala belibandla bangabonisana nalomKhristu ngaloko lokushiwo nguJehova kute atsatse sincumo lesihlakaniphile. Sibonelo saloko kutsi Nkulunkulu usiyale kutsi singayidli ingati. (Imisebenti 15:29) Lomyalo usita umKhristu kute acondze kutsi akukafaneli emukele indlela yekwelashwa lefaka ekhatsi kumpontjelwa ingati nobe tincenye tayo letine. Lendzaba ingase itsintse ngisho nanembeza wemKhristu nakakhetsa kutsi utatemukela yini tinhlayiya letincane letiphuma etincenyeni letine tengati. * (Fundza umbhalo longentansi.) Ngusiphi lesinye seluleko lesiseBhayibhelini lesingasisita kutsi sitsatse tincumo letikahle mayelana netindlela tekwelashwa?

8. Filiphi 4:5 angasisita njani kutsi sitsatse tincumo letihlakaniphile mayelana netindlela tekwelashwa?

⁸ Taga 14:15 titsi: “Umuntfu lonengcondvo lencane wetsemba yonkhe intfo; kodvwa lohlakaniphile indlela yakhe uyayibukisisa.” Lamuhla, kungenteka kutsi kute likhambi laletinye tifo. Ngako kufanele sitinakisise tindlela tekwelapha lokutsiwa tiyakucedza kugula lokutsite kodvwa kube kute bufakazi baloko. Pawula wabhala watsi: “Kucabangela kwenu akwatiwe ngibo bonkhe bantfu.” (Filiphi 4:5) Kucabangela kutasisita kutsi sinake kukhonta Jehova kunekuhlale sinake imphilo yetfu. Nangabe imphilo yetfu iyintfo lebaluleke kakhulu kitsi, singase siticabangele tsine. (Filiphi 2:4) Siyati kutsi ngeke siphile saka kulelive laSathane. Ngako-ke, yenta konkhe lokusemandleni akho kute kukhonta Jehova kube ngiko lokubaluleke kakhulu ekuphileni kwakho.—Fundza Filiphi 1:10.

9. Roma 14:13, 19 utitsintsa njani tincumo tetfu mayelana nemphilo, futsi bunye betfu bungaba njani sengotini?

 ⁹ UmKhristu locabangelako ngeke etame kucindzetela labanye kutsi bente intfo lacabanga kutsi ilungile kuye. Kulelinye live, lamanye emaKhristu lashadile bekakhutsata labanye kutsi badle kudla lokutsite futsi balandzele indlela letsite yekudla. Bebacindzetela labazalwane kutsi bente loko, kodvwa labanye bala. Ngesikhatsi loko lebebabakhutsata kutsi bakwente kungabi nemiphumela lemihle, bazalwane labanyenti nabodzadze bacansuka. LamaKhristu lebekakhutsata labanye abenenkhululeko yekutikhetsela kutsi atakudla yini lokudla lokutsite nobe alandzele indlela letsite yekudla. Nobe kunjalo, kwakunengcondvo yini kufaka bunye belibandla engotini ngenca yendlela yekwelapha? ERoma yasendvulo, lamanye emaKhristu abenemibono lengafani mayelana nekudla lokutsite kanye nemadzili latsite. Ngusiphi seluleko Pawula lawanika sona? Watsi: “Lomunye umuntfu utsatsa lilanga lelitsite njengalelibalulekile kunalelinye; lomunye ulitsatsa njengalelifana nawo onkhe lamanye emalanga.” Shengatsi singacaphela kutsi singabakhubi labanye.—Fundza Roma 14:5, 13, 15, 19, 20.

10. Kungani kufanele sitihloniphe tincumo talabanye bantfu? (Buka sitfombe lesisekucaleni kwalesihloko.)

¹⁰ Ngaletinye tikhatsi, singahle singacondzi kutsi kungani lomunye ebandleni atsetse sincumo lesitsite lesiphatselene nekuphila kwakhe. Yini lesingayenta ngaloko? Akukafaneli sijake kumehlulela nobe simphocelele kutsi ashintje sincumo sakhe. Mhlawumbe lomKhristu udzinga kucecesha nembeza wakhe kakhudlwana nobe lonembeza wakhe usheshe utsintseke. (1 Khorinte 8:11, 12) Kungenteka nekutsi ngulowetfu nembeza longakaceceshwa kahle. Mayelana netindlela tekwelashwa kanye nalokunye, ngamunye wetfu kufanele atentele tincumo futsi abhekane nemiphumela yato.

11, 12. LiBhayibheli lisisita njani kutsi sikhetse loko lesingatijabulisa ngako?

¹¹ Jehova wasidala ngendlela yekutsi sikujabulele kutijabulisa futsi sizuze kuko. Solomoni wabhala watsi ‘kunesikhatsi sekuhleka’ “nesikhatsi sekugidza.” (Umshumayeli 3:4) Nobe kunjalo, akusiko konkhe kutijabulisa lokuzuzisako, lokwenta umuntfu aphumule nobe acabuleke. Kufanele sikubalekele nekucitsa sikhatsi lesinyenti ekutijabuliseni. Nembeza wetfu ungasisita njani kutsi sikujabulele kutijabulisa lokwemukelwa nguJehova futsi sizuze kuko?

¹² LiBhayibheli lisecwayisa ‘ngemisebenti yenyama.’ Lemisebenti ifaka ekhatsi “budlundlulu, kungcola, kutiphatsa lokubi kwekweyisa, kukhonta titfombe, kusebentelana nemimoya, inzondo, kucabana, umona, intfukutselo lengalawuleki, imibango, kwehlukana, emahlelo, kuhawukela,  kudzakwa, imicimbi lengalawulwa, naletinye tintfo letifana naleti.” Pawula wabhala watsi, “labo labenta tintfo letinjena ngeke bawutfole uMbuso waNkulunkulu.” (Galathiya 5:19-21) Ngako kufanele sitibute: ‘Nembeza wami uyangisita yini kutsi ngibalekele imidlalo lenebudlova, lenekuncintisana nobe lenelubandlululo? Nembeza wami uyangekhuta yini nangabe ngilingeka kutsi ngibukele emafilimu lakhombisa kungcola, lakhutsata kutiphatsa lokubi, kudzakwa nobe kusebentisa emadimoni?’

13. Seluleko lesiku-1 Thimothi 4:8 nakuTaga 13:20, singasisita njani endzabeni yekutijabulisa?

¹³ Timiso teliBhayibheli tingasisita kutsi siceceshe bonembeza betfu mayelana nekutijabulisa. LiBhayibheli litsi “kucecesha umtimba kuzuzisa kancane.” (1 Thimothi 4:8) Bantfu labanyenti beva shengatsi kuhlale baticecesha kubenta bacabuleke futsi babe nemphilo lenhle. Kodvwa kutsiwani nangabe sifuna kuticecesha nelicembu? Kunendzaba yini kutsi siticecesha nabobani? Taga 13:20 titsi: “Lohambisana nebantfu labahlakaniphile naye ugcina asahlakaniphile; kodvwa umngani wetilima uyawuhlupheka.” Kuyacaca-ke kutsi kubalulekile kusebentisa nembeza wetfu loceceshwe ngeliBhayibheli nasikhetsa kutijabulisa.

14. Lomunye umndeni wawusebentisa njani umbhalo waRoma 14:2-4?

¹⁴ BoChristian naDaniela banemadvodzakati lamabili laseminyakeni yekutfomba. Christian utsi: “Ngesikhatsi seKukhonta Kwemndeni, sacoca ngendzaba yekutijabulisa. Savumelana ngekutsi letinye tindlela tekutijabulisa tiyemukeleka kantsi letinye atemukeleki. Sacoca nangekutsi ngubani lesingamtsatsa njengemngani lokahle. Lenye yemadvodzakati etfu yakhala ngekutsi ngesikhatsi selikhefu esikolweni, labanye labasha labaBoFakazi batiphatsa ngendlela lengakalungi. Itiva icindzetelekile kutsi nayo itiphatse ngaleyo ndlela. Sayichazela kutsi sonkhe sinabonembeza, ngako kufanele sicondziswe ngibo nasikhetsa kutsi yini lesitayenta futsi siyente nabani.”—Fundza Roma 14:2-4.

15. Matewu 6:33 ungasisita njani nasikhetsa lesingatijabulisa ngako?

 ¹⁵ Singakanani sikhatsi losicitsa utijabulisa? Kuta kucala yini ekuphileni kwakho kuya emihlanganweni, ensimini kanye nekufundza liBhayibheli, nobe kutijabulisa lokuta kucala? Yini lebaluleke kakhulu kuwe? Jesu watsi: “Ngako-ke chubekani nifuna kucala uMbuso waNkulunkulu nekulunga kwakhe, tonkhe leletinye tintfo nitawengetelwa tona.” (Matewu 6:33) Nawukhetsa kutsi utasisebentisa njani sikhatsi sakho, nembeza wakho uyakukhumbuta yini ngeseluleko saJesu?

16. Bonembeza betfu basikhutsata njani kutsi sishumayele?

¹⁶ Nembeza loceceshiwe awugcini nje ngekusekhuta nasenta tintfo letimbi, kodvwa uphindze usikhutsate kutsi sente tintfo letinhle. Loko kufaka ekhatsi kushumayele emtini ngemuti nekushumayela singakahleli. Nguloko Pawula lakwenta. Wabhala watsi: “Loku kufanele ngikwente. Ecinisweni, maye kimi nangabe ngingazange ngitimemetele letindzaba letimnandzi!” (1 Khorinte 9:16) Njengobe silingisa Pawula sitawuba nanembeza lomsulwa, sati kutsi senta lokulungile. Nasishumayela tindzaba letimnandzi kulabanye, siba sibonelo kubonembeza babo. Pawula watsi: “Ngekwenta liciniso libonakale siba sibonelo kubo bonkhe bonembeza bebantfu emehlweni aNkulunkulu.”—2 Khorinte 4:2.

17. Lomunye dzadze losemusha wawulalela njani nembeza wakhe loceceshwe ngeliBhayibheli?

¹⁷ Ngesikhatsi Jacqueline aneminyaka lengu-16 budzala, abefundza i-biology esikolweni. Bebafundza ngekutigucukela kwemvelo. Watsi: “Nembeza wami bewungangivumeli kutsi ngihlanganyele ekilasini ngendlela lengivame kuhlanganyela ngayo. Bengingayisekeli imfundziso yekutigucukela kwemvelo. Ngaya kuthishela futsi ngamchazela simo sami. Ngamangala kutsi waba nebungani futsi wanginika nelitfuba lekukhuluma ekilasini ngendzaba yekudalwa kwetintfo.” Jacqueline wativa enetisekile ngekulalela nembeza wakhe loceceshwe ngeliBhayibheli futsi awulandzele. Nembeza wakho ukukhutsata kutsi wente lokulungile yini?

18. Kungani sifuna kuba nabonembeza labakahle futsi lesingabetsemba?

¹⁸ Umgomo wetfu kutsi siphile ngekuvumelana netimiso taJehova. Nembeza wetfu ungasisita kutsi siwufinyelele lomgomo. Nangabe silidadisha njalo liVi laNkulunkulu, sizindle ngalo futsi sikusebentise loko lesikufundzako, sitawube sicecesha bonembeza betfu. Nasenta njalo, lesipho lesiligugu sitawuba sicondziso lesingasetsemba ekuphileni kwetfu!