1. (a) Yini leyenteka kuPhetro ngesikhatsi kunesiphepho elwandle lwaseGalile? (Buka sitfombe lesisekucaleni kwalesihloko.) (b) Kungani Phetro acwila?

NGALOBUNYE busuku, umphostoli Phetro nalabanye bafundzi bakutfola kumatima kwewela Lwandle lwaseGalile ngesikhatsi kunesiphepho. Kwatsi kusenjalo, babona Jesu ahamba etikwelwandle. Phetro wamemeta Jesu, wambuta kutsi angeta yini kuye ahamba etikwemanti. Ngesikhatsi Jesu amtjela kutsi ete, Phetro wehla esikebheni waya kuye. Asahamba etikwemanti, wacala kucwila. Kungani? Kungobe wabuka lesiphepho nalamagagasi futsi wacala kwesaba. Wamemeta wacela lusito, ngekushesha Jesu wamhadvula watsi kuye: “Wena lonekukholwa lokuncane, yini lekwenta ungabate?”—Matewu 14:24-32.

2. Yini lesitawucoca ngayo?

² Ase sicoce ngetintfo letintsatfu letimayelana nekukholwa lesingatifundza kulokwenteka kuPhetro: (1) indlela Phetro letsemba ngayo ekucaleni kutsi Jehova angamsita, (2) lokwenta  Phetro waphelelwa kukholwa, (3) naloko lokwamsita kutsi aphindze abe nekukholwa. Kuhlola lamaphuzu kungasisita sibone kutsi yini lesingayenta kute ‘sicine ekukholweni.’—1 Khorinte 16:13.

3. Kungani Phetro ehla esikebheni, futsi tsine sikwente njani lokufanana naloko lokwentiwa nguye?

³ Phetro abenekukholwa lokucinile. Kungani singasho njalo? Ngesikhatsi Jesu ambita, Phetro wehla esikebheni futsi wahamba etikwemanti. Abetsemba kutsi emandla aNkulunkulu atamsekela njengobe abesekele Jesu. Ngendlela lefanako, ngesikhatsi Jesu atsi asimlandzele, sanikela kuphila kwetfu kuJehova ngemuva kwaloko sabhajatiswa. Kungani senta njalo? Kungobe sinekukholwa kuJehova naJesu futsi siyetsemba kutsi batasisita.—Johane 14:1; fundza 1 Phetro 2:21.

4, 5. Kungani kukholwa kuyintfo leligugu?

⁴ Kukholwa kuyintfo leligugu. Kukholwa kwaPhetro kwamenta wahamba etikwemanti, intfo lebeyibonakala ingeke yentiwe ngumuntfu. Kungasisita natsi kutsi sente lokutsite lokubonakala kungeke kwenteke. (Matewu 21:21, 22) Labanye betfu bashintje simo sengcondvo nendlela yekwenta tintfo kangangekutsi bantfu lebebasati ngaphambili nyalo abasasiboni. Salwenta lolushintjo ngobe sitsandza Jehova, nangekutsi wasisita kute silwente. (Fundza Kholose 3:5-10.) Kukholwa kusikhutsate kutsi sitinikele kuJehova futsi sibe bangani bakhe, intfo lebesingeke sikhone kuyenta ngaphandle kwelusito lwakhe.—Efesu 2:8.

⁵ Kukholwa kusenta sicine. Sibonelo saloko kutsi kusisita silwisane nekuhlaselwa nguDeveli, lositsa setfu lesinemandla. (Efesu 6:16) Ngesizatfu sekutsi setsembele kuJehova, asikho sidzingo sekutsi sikhatsateke kakhulu nangabe sinetinkinga. Usetsembise kutsi utasiniketa lesikudzingako nangabe sikhombisa kukholwa kuye futsi sibeka kucala uMbuso wakhe. (Matewu 6:30-34) Ngetulu kwaloko, Jehova utasiniketa sipho lesimangalisako sekuphila lokuphakadze ngenca yekukholwa kwetfu.—Johane 3:16.

6, 7. (a) Singasifananisa nani siphepho nemagagasi labangela Phetro kutsi esabe? (b) Kungani kufanele sati kutsi kuyintfo lengenteka kulahlekelwa kukholwa kwetfu?

⁶ Njengobe Phetro abehamba etikweLwandle lwaseGalile, wefikelwa kwesaba. Kungani? Kungenca yalesiphepho nemagagasi. Loku kungafananiswa nekuvivinywa kanye nekulingwa lokunyenti emaKhristu labhekana nako lamuhla. Ngisho nobe letinkinga tingaba matima kangakanani, singakwati kuba nemandla ngelusito lwaJehova. Kodvwa khumbula loko lokwenteka kuPhetro. Akazange acwiliswe ngulomoya nemagagasi labekamshaya. Esikhundleni saloko, liBhayibheli litsi: “Nakabona lesiphepho wefikelwa kwesaba.”  (Matewu 14:30) Phetro wayekela kubuka Jesu wabese unaka emandla alesiphepho. Loko kwabangela kutsi kukholwa kwakhe kube butsakatsaka. Ngendlela lefanako, nasinaka kakhulu tinkinga tetfu, singacala kungabata kutsi Jehova utasisita.

⁷ Kufanele sati kutsi kuyintfo lengenteka kulahlekelwa kukholwa kwetfu. Kungani kunjalo? Kungobe liBhayibheli litsi kulahlekelwa kukholwa ‘kusono lesisigigela kamelula.’ (Hebheru 12:1) NjengaPhetro, nasinake tintfo letingakalungi, ngekushesha kukholwa kwetfu kungaba butsakatsaka. Ngako-ke, singabona njani nangabe kukholwa kwetfu kusengotini? Lemibuto lelandzelako itasisita kutsi sitihlole.

8. Kungenteka njani kutsi tetsembiso taNkulunkulu tibonakale tingasafani nasesikhatsini lesendlulile?

⁸ Tetsembiso taNkulunkulu tiseyintfo mbamba yini kimi njengobe tatinjalo ekucaleni? Nasi sibonelo: Nkulunkulu wetsembise kulibhubhisa lelive lelibuswa nguSathane. Nobe kunjalo, tiyasiphatamisa yini tinhlobo letinyenti tekutijabulisa letikulelive? Nangabe kunjalo, singase sicale kungabata kutsi kuphela kusemnyango. (Habakhuki 2:3) Nasi lesinye sibonelo: Jehova wabangela kutsi kube nenhlawulo futsi wetsembisa kutsi utasitsetselela emaphutsa etfu. Kodvwa nangabe sichubeka sinake emaphutsa lesawenta kadzeni, singase sicale kungabata kutsi Jehova usitsetselele mbamba. (Imisebenti 3:19) Loko kungasenta singasajabuli emsebentini waNkulunkulu futsi siyekele kushumayela.

9. Yini lengenteka nasinganaka tintfo letitsandvwa ngitsi?

⁹ Ngisamniketa lokuncono kakhulu yini Jehova? Nasimsebentela ngekutimisela Jehova, loko kusisita kutsi sinake tetsembiso takhe ngelikusasa. Ngako-ke, kutsiwani nangabe sesicale kunaka kakhulu loko lokutsandvwa ngitsi? Sibonelo saloko kutsi singase semukele umsebenti loholela imali lenyenti kodvwa losenta sibe nesikhatsi lesincane sekukhonta Jehova. Loko kungenta kukholwa kwetfu kube butsakatsaka futsi ‘sivilaphe,’ simentele lokuncane kunaloko lesingakhona kukwenta.—Hebheru 6:10-12.

10. Sikukhombisa njani kukholwa kuJehova nasitsetselela labanye?

¹⁰ Kulukhuni yini ngami kucolela labanye? Nangabe labanye basiphatsa kabi, siyatfukutsela yini nobe siyekele kubakhulumisa? Nasenta njalo, loko kungasho kutsi sinaka kakhulu indlela lesitiva ngayo. Nasitsetselela labanye, sikhombisa kutsi sinekukholwa kuJehova. Ngayiphi indlela? Nangabe lotsite asiphatsa kabi, kuba shengatsi uyasikweleta. Nasona kuJehova, kufana nekutsi siyamkweleta.  (Lukha 11:4) Ngako nasitsetselela labanye, sikhombisa kutsi siyametsemba Jehova. Siyetsemba kutsi utawubusisa simo setfu sengcondvo futsi sibusiso sakhe sibaluleke kakhulu kwendlula loko umuntfu losonile langasentela kona. Bafundzi baJesu bafundza kutsi kuba nekukholwa kuyintfo ledzingekile kute utsetselele labanye. Ngesikhatsi Jesu abatjela kutsi bacolele ngisho nalabo lababone tikhatsi letinyenti, bafundzi bakhe bamncenga batsi: “Cinisa kukholwa kwetfu.”—Lukha 17:1-5.

11. Yini lengasenta sehluleke kufundza eselulekweni lesinikwa sona?

¹¹ Ngiyacansuka yini nangelulekwa? Cabanga ngetindlela longafundza ngato kuleseluleko esikhundleni sekutsi ubuke emaphutsa kuso nobe ubuke butsakatsaka balona lokunikete sona. (Taga 19:20) Lingakulahlekeli litfuba lekufundza kucabanga njengaJehova!

12. Yini lengabe ayisahambi kahle ngemuntfu nangabe ahlale akhonona ngalabaholako ebandleni?

¹² Ngiyakhonona yini ngalabo labaholako ebandleni? Ngesikhatsi ema-Israyeli anake kakhulu umbiko lomubi wetinhloli letilishumi, akhonona ngaMosi na-Aroni. Ngako Jehova wabuta Mosi watsi: “Batakwala kukholwa ngimi kuze kube ngunini?” (Numeri 14:2-4, 11) Jehova bekati kutsi ema-Israyeli abengametsembi ngobe bekakhonona ngaMosi na-Aroni, emadvodza labekabekwe nguye. Ngendlela lefanako, nasihlale sikhonona ngalabo Jehova labasebentisako kute bahole bantfu bakhe lamuhla, loko kungakhombisa kutsi kukholwa kwetfu kuNkulunkulu sekubutsakatsaka.

13. Kungani kungakafaneli sidvumateke nasibona kutsi sekunalokutsite lokwenta kukholwa kwetfu kube butsakatsaka?

¹³ Nase uhlole lemibuto, ungadvumateki  nangabe ubona kutsi kukholwa kwakho sekubutsakatsaka. Khumbula kutsi ngisho nemphostoli Phetro wesaba futsi wacala kungabata. Ngaletinye tikhatsi, Jesu abeluleka bonkhe baphostoli ngekuba ‘nekukholwa lokuncane.’ (Matewu 16:8) Nobe kunjalo, singafundza sifundvo lesibalulekile kuloko lokwenteka kuPhetro. Naka loko lakwenta ngemuva kwekutsi acale kungabata futsi acwila.

14, 15. (a) Yini Phetro layenta nakacala kucwila? (b) ‘Singamnakisisa’ njani Jesu?

¹⁴ Yini Phetro layenta nakacala kucwila? Phetro abeyinhlambi lenelikhono, ngako abengahlamba abuyele esikebheni. (Johane 21:7) Kodvwa kungani angahlambanga? Kungobe abengatetsembi. Waphindze wetsembela kuJesu futsi walemukela lusito lwakhe. Nangabe sibona kutsi kukholwa kwetfu sekubutsakatsaka, kufanele silingise Phetro. Singamlingisa njani?

¹⁵ Njengobe Phetro aphindze wetsembela kuJesu kute atfole lusito, natsi kufanele ‘simnakisise’ Jesu. (Fundza Hebheru 12:2, 3.) Kodvwa tsine ngeke simbone ngemehlo enyama njengaPhetro. Ngako-ke, ‘singamnakisisa’ njani Jesu? Singafundza ngetintfo latifundzisa futsi watenta bese silandzela sibonelo sakhe edvute. Nasenta njalo, sitalutfola lusito lesiludzingako kute sicinise kukholwa kwetfu. Ase sicoce ngaletinye tindlela lesingamlingisa ngato Jesu.

16. LiBhayibheli lingasisita njani kutsi sicinise kukholwa kwetfu?

¹⁶ Cinisa indlela loletsemba ngayo liBhayibheli. Jesu abeciniseka kutsi liBhayibheli liliVi laNkulunkulu nekutsi lisiniketa seluleko lesincono kakhulu. (Johane 17:17) Kute silingise Jesu, kufanele silifundze liBhayibheli onkhe emalanga futsi sizindle ngaloko lesikufundzako. Singaphindze sifune timphendvulo temibuto lokungenteka sinayo. Nasi sibonelo: Wetsemba mbamba yini kutsi siphila emalangeni ekugcina? Cinisa kukholwa kwakho mayelana nekutsi kuphela sekusedvute ngekufundza tiphrofetho letiseBhayibhelini letifakazela kutsi siphila emalangeni ekugcina. Uyafuna yini kucinisa kukholwa kwakho mayelana netetsembiso taNkulunkulu tesikhatsi lesitako? Nangabe kunjalo, fundza tiphrofetho teliBhayibheli lesetigcwalisekile. Wetsemba mbamba yini kutsi liBhayibheli liyasebenta lamuhla? Ungafundza ngebazalwane nabodzadze labashintja kuphila kwabo kwaba ncono ngelusito loluvela eBhayibhelini. * (Fundza umbhalo longentansi.)—1 Thesalonika 2:13.

17. Kungani Jesu akwati kubeketelela kuphatfwa kabi lokumatima, futsi ungamlingisa njani?

¹⁷ Tinake tibusiso Jehova lasetsembise tona. Jesu watinaka tetsembiso tesikhatsi lesitako, futsi loko kwamsita wakwati kubeketelela kuphatfwa kabi lokumatima. (Hebheru 12:2) Akazange aphatanyiswe tintfo lebetetsenjiswa ngulelive. (Matewu 4:8-10) Singasilingisa njani sibonelo sakhe? Ngekutsi sizindle ngetetsembiso letimangalisako Jehova lasetsembise tona. Tibone ngeliso lengcondvo sewuseveni lelisha. Bhala nobe udvwebe tintfo lotatenta ePharadisi. Ungabhala neluhla lwebantfu longatsandza kukhuluma nabo nasebavusiwe, naloko lotakusho kubo. Tsatsa letetsembiso taNkulunkulu  njengalatatentela wena hhayi nje bantfu bonkhe.

18. Umthantazo ungakusita njani kute ucinise kukholwa kwakho?

¹⁸ Thantazela kukholwa lokucinile. Jesu wafundzisa bafundzi bakhe kutsi bacele umoya longcwele kuJehova. (Lukha 11:9, 13) Njengobe nawe uwucela, thantazela kutsi ube nekukholwa lokucinile. Kukholwa kuyincenye yetitselo temoya longcwele. Emithantazweni yakho, ungacela tintfo letitsite ngalokucondzile. Nasi sibonelo: Nangabe ubona kutsi kulukhuni ngawe kutsetselela, cela Jehova acinise kukholwa kwakho futsi akusite utsetselele labanye.

19. Singabakhetsa njani bangani labakahle?

¹⁹ Khetsa bangani labanekukholwa lokucinile. Jesu wabakhetsa ngekuhlakanipha bangani bakhe labasedvute. Bangani bakhe, lobekubaphostoli, bebatsembekile, bacotfo futsi bamlalela. (Fundza Johane 15:14, 15.) Lingisa Jesu futsi ukhetse bangani ngekuhlakanipha. Kufanele kube bantfu labanekukholwa lokucinile futsi labalalela Jesu. Bangani sibili betsembekile kulomunye nalomunye, ngisho nobe kufanele belulekane.—Taga 27:9.

20. Yini letawenteka nasisita labanye kutsi bacinise kukholwa kwabo?

²⁰ Sita labanye kutsi bakhe kukholwa kwabo. Jesu wasita bafundzi bakhe kutsi bacinise kukholwa kwabo ngaloko lakusho nalakwenta. (Makho 11:20-24) Kufanele silingise sibonelo sakhe. Nasenta njalo, sitawucinisa kukholwa kwetfu nekwalabanye. (Taga 11:25) Ungabasita njani bantfu lobashumayelako? Nawufundzisa labanye ngeliBhayibheli, gcizelela bufakazi bekutsi Nkulunkulu ukhona, uyasikhatsalela nekutsi liBhayibheli liliVi laKhe. Ungawasita njani lamanye emaKhristu kutsi acinise kukholwa kwawo? Nangabe ucaphela kutsi lotsite ukhonona ngebazalwane labaholako, ungasheshi utehlukanise naye. Sebentisa kuhlakanipha kute wetame kumsita avusetele kukholwa kwakhe. (Juda 22, 23) Nangabe usafundza sikolwa futsi thishela wakho akhuluma ngekutigucukela kwemvelo, bani nesibindzi futsi uvikele kukholwa kwakho mayelana nekutsi tintfo tadalwa. Ingakumangalisa indlela thishela wakho nalofundza nabo labangatsintseka ngayo.

21. Yini Jehova lasetsembise yona?

²¹ Jehova naJesu basita Phetro kutsi ancobe kungabata nekwesaba. Ngekuhamba kwesikhatsi, Phetro waba sibonelo lesihle kulabanye sekuba nekukholwa. Ngendlela lefanako, Jehova usita ngamunye wetfu kutsi acine ekukholweni. (Fundza 1 Phetro 5:9, 10.) Kudzingeka kutsi sitimisele kute sakhe kukholwa lokucinile, futsi nasenta njalo Jehova utasibusisa.