1, 2. Yini leyenta bantfu behluke etilwaneni?

INGCONDVO yemuntfu yehluke kakhulu. Sibonelo saloko kutsi bantfu banelikhono lekufundza lulwimi. Lulwimi lusisita kutsi sikhone kufundza, kubhala, kukhuluma nekucondza loko lesikuvako. Luphindze lusisite kute sikhone kuthantaza futsi sihlabelele Jehova. Konkhe loku kusenta sehluke etilwaneni. Bososayensi abakhoni kucondzisisa kutsi ingcondvo yetfu itenta njani letintfo letimangalisako.

² Likhono letfu lekusebentisa lulwimi lisipho lesivela kuJehova. (Tihlabelelo 139:14; Sembulo 4:11) Usinikete nalesinye sipho lesisenta sehluke etilwaneni. Bantfu badalwa ‘ngemfanekiso waNkulunkulu.’ Sinenkhululeko yekutikhetsela, lokusho kutsi sinelilungelo lekutitsatsela tincumo. Singaphindze sikhetse kusebentisa lulwimi kute sikhonte Jehova futsi simdvumise.—Genesisi 1:27.

3. Yini Jehova lasiphe yona lesenta sihlakaniphe?

³ Jehova usiphe liBhayibheli kute asikhombise indlela lokufanele simkhonte futsi simdvumise ngayo. LiBhayibheli liphelele nobe liyincenye litfolakala ngetilwimi letingetulu  kwa-2 800. Nasizindla ngaloko lelikushoko, singacala kucabanga njengaNkulunkulu. (Tihlabelelo 40:5; 92:5; 139:17) Imicabango yaJehova isenta sihlakaniphe futsi isiholele ekuphileni lokuphakadze.—Fundza 2 Thimothi 3:14-17.

4. Kusho kutsini kuzindla, futsi ngumiphi imibuto lesitawucoca ngayo?

⁴ Kuzindla kusho kunaka intfo letsite futsi ucabangisise ngayo. (Tihlabelelo 77:12; Taga 24:1, 2) Sizuza kakhulu nangabe sizindla ngaloko lesikufundza ngaJehova nangaJesu. (Johane 17:3) Kulesihloko sitawuphendvula nayi imibuto lelandzelako: Singafundza njani ngendlela letawenta kutsi sikhone kuzindla? Singazindla ngani? Yini letasisita kutsi sihlale sizindla futsi sikujabulele?

5, 6. Yini lengakusita kute ukhumbule futsi ukuvisise loko lokufundzako?

⁵ Uke wanaka yini kutsi kunaletinye tintfo longatenta ngaphandle kwekutsi ucabange ngato, letifaka ekhatsi kuphefumula, kuhamba nobe kugibela libhayisikili? Kuyadzabukisa kutsi ngaletinye tikhatsi ungase ufundze lokutsite ube ungacabangi ngako. Njengobe usafundza, mhlawumbe ungacabanga ngaletinye tintfo. Ungenta njani kuze kungenteki loku? Kubalulekile kutsi unake loko lokufundzako futsi ucabange ngekutsi kusho kutsini. Nawucedza kufundza sigaba nobe sihlokwana, mani kancane futsi uzindle ngaloko losandza kukufundza. Cabanga ngaloko lokufundzile futsi uciniseke kutsi ukuvisise kahle.

⁶ Bososayensi batfole kutsi kumelula kukhumbula intfo nangabe siyifundza ngelivi lelivakalako. UMdali wetfu uyakwati loko, kungako atjela Joshuwa kutsi abofundza incwadzi yeMtsetfo ‘acabangisise ajule’ ngayo, lokusho kuyifundza ngendlela letamzuzisa. (Fundza Joshuwa 1:8.) Kufundza liBhayibheli ngalokuvakalako kutawuphindze kukusite kutsi ukunakisise futsi ukukhumbule loko lokufundzile.

7. Ngusiphi sikhatsi lesikahle sekuzindla ngeliBhayibheli? (Buka sitfombe lesisekucaleni kwalesihloko.)

⁷ Kudzingeka sitimisele nasizindla futsi sikunakisise loko lesikudadishako. Kungako kukuhle kuzindla nawungakadzinwa, endzaweni lethulile, futsi lapho kute khona tintfo letinyenti letingakuphatamisa. Umhlabeli Davide wazindla acambalele embhedzeni wakhe ebusuku. (Tihlabelelo 63:6) Jesu, umuntfu lobekete sono, wakhetsa tindzawo letithululi kute azindle futsi athantaze.—Lukha 6:12.

8. (a) Yini lesingazindla ngayo? (b) Jehova utiva njani nasikhuluma ngaye kulabanye?

⁸ Ngetulu kwaloko lokufundza eBhayibhelini,  kunaletinye tintfo longazindla ngato. Nasi sibonelo: Nangabe ubona indalo yaJehova lemangalisako, mani kancane futsi utibute: ‘Loku lengikubonako kungifundzisani ngaJehova?’ Kucabanga ngetintfo letinjengaleti kutakwenta kutsi umbonge Jehova ngemthantazo. Nangabe unalabanye, utawubacocela indlela lotiva ngayo. (Tihlabelelo 104:24; Imisebenti 14:17) Jehova uyasilalela futsi uyajabula nangabe sizindla, sithantaza futsi sikhuluma ngaye kulabanye. LiBhayibheli liyasicinisekisa litsi: ‘Incwadzi legocotwako yesikhumbuto yabhalwa embikwakhe macondzana nalabo labesaba Jehova bazindle ngeLibito lakhe.’—Malakhi 3:16.

9. (a) Pawula watjela Thimothi kutsi azindle ngani? (b) Singazindla ngani nasilungiselela kuya ensimini?

⁹ Umphostoli Pawula watjela Thimothi kutsi azindle ngekutsi ibatsintsa njani labanye indlela lakhuluma ngayo, latiphatsa ngayo nalafundzisa ngayo. (Fundza 1 Thimothi 4:12-16.) Nawe ungazindla ngaletintfo. Sibonelo saloku kutsi uyasidzinga sikhatsi sekuzindla nawulungiselela kuchuba sifundvo seliBhayibheli. Cabanga ngemuntfu lomfundzelako futsi wetame kutfola umbuto nome umfanekiso lotamsita kutsi atfutfuke. Nangabe usilungiselela ngalendlela lesifundvo, kukholwa kwakho kutawucina futsi utawuba ngumfundzisi lokahle nalokhutsele. Kuzindla kutawuphindze  kukusite nawukwenta ngaphambi kwekutsi uye ensimini. (Fundza Ezra 7:10) Mhlawumbe ungafundza sehluko lesisencwadzini yeMisebenti kute sikusite ukhutsale nawusensimini. Ungaphindze uzindle nangemavesi eliBhayibheli lohlele kuwasebentisa ngalelolanga nangabomagazini lotabahambisa. (2 Thimothi 1:6) Cabanga ngebantfu labasensimini lokuyo naloko lotakusho lokutabajabulisa. Nangabe ulungiselela ngalendlela, utawukhona kusebentisa liBhayibheli ngendlela lephumelelako kute ufakaze kulabanye.—1 Khorinte 2:4.

10. Ngutiphi letinye tintfo letinhle lesingazindla ngato?

¹⁰ Yini lenye longazindla ngayo? Nangabe ubhala emaphuzu nakuchubeka inkhulumo yelinyenti, emihlanganweni yesigodzi neyesifundza, tinike sikhatsi sekuphindze uwabukete. Njengobe wenta njalo, tibute: ‘Yini lengiyifundze eVini laNkulunkulu nasenhlanganweni yakhe?’ Ungaphindze uzindle nangaloko lokufundze ku-Sicongosekulindza naku-“Phaphama!” yenyanga nenyanga, nangaloko lokukhululwe emhlanganweni wesifundza. Nawufundza INcwadzi Yemnyaka, mani kancane ngemuva kwekufundza indzaba letsite, ucabange ngayo futsi uyivumele ikutsintse inhlitiyo. Nangabe ufundza tincwadzi tenhlangano, ungadvwebela emaphuzu lagcamile nobe ubhalabhale emaceleni. Loko kutakusita nangabe ulungiselela kubuyela kulococe naye, nawuvakashele labatsite uyobelusa nobe nangabe unenkhulumo. Lokubaluleke kakhulu kutsi nawuhlaba likhefu futsi uzindle ngaloko lokufundzako, wenta kutsi kukufinyelele inhlitiyo, futsi utfole nelitfuba lekuthantaza ubonge Jehova ngetintfo letinhle lotifundzako.

11. Nguyiphi incwadzi lebaluleke kakhulu lokufanele sizindle ngayo, futsi kuzindla ngayo kutakusita njani? (Fundza umbhalo longentansi.)

¹¹ Kuliciniso kutsi liBhayibheli liyincwadzi lebaluleke kakhulu lokufanele sizindle ngayo. Kodvwa kutsiwani nangabe ngalelinye lilanga kungenteka ungavunyelwa kutsi ube neliBhayibheli? * (Fundza umbhalo longentansi.) Kute umuntfu longakuvimbela kutsi uzindle ngetintfo letisengcondvweni yakho letifaka ekhatsi imibhalo loyitsandzako, nobe tingoma teMbuso. (Imisebenti 16:25) Umoya longcwele waNkulunkulu utakusita kutsi ukhumbule tintfo lotifundzile, letitakusita uhlale wetsembekile.—Johane 14:26.

12. Ungakuhlela njani kufundza liBhayibheli onkhe malanga?

¹² Ungakuhlela njani kufundza liBhayibheli  onkhe malanga? Ngalamanye emalanga evikini ungase ufundze futsi uzindle ngekufundvwa kweliBhayibheli kwamaviki onkhe kweSikolwa Semsebenti WemaKhristu. Ngalamanye emalanga ungafundza liVangeli laMatewu, laMakho, laLukha nelaJohane futsi uzindle ngaloko Jesu lakusho nalakwenta. (Roma 10:17; Hebheru 12:2; 1 Phetro 2:21) Siphindze sibe nencwadzi lechaza tintfo letenteka ekuphileni kwaJesu ngekulandzelana kwato. Lencwadzi ingakusita kute uzuze kakhulu nawufundza lamaVangeli.—Johane 14:6.

13, 14. Kungani kubalulekile kuchubeka sizindla ngaJehova nangaJesu, futsi loko kutasikhutsata kutsi senteni?

¹³ Kuzindla ngaJehova nangaJesu kungasita umuntfu kutsi abe ngumKhristu lovutsiwe futsi alondvolote kukholwa lokucinile. (Hebheru 5:14; 6:1) Umuntfu lonesikhatsi lesincane sekucabanga ngaNkulunkulu, kancane kancane utawulahlekelwa buhlobo bakhe naJehova nobe bugcine buphelile. (Hebheru 2:1; 3:12) Jesu wasecwayisa kutsi nangabe liVi laNkulunkulu singaliva nobe singalemukeli “ngenhlitiyo lenhle,” ngeke ‘siligcine.’ Esikhundleni saloko singahle sitsatfwe kamelula ‘ngumcebo kanye nenjabulo yalelive.’—Lukha 8:14, 15.

¹⁴ Ngako shengatsi singachubeka sizindla ngaloko lokuseBhayibhelini futsi simati kancono Jehova. Loko kutasikhutsata kutsi silingise bunguye bakhe nebuntfu bakhe kakhudlwana. (2 Khorinte 3:18) Singachubeka sifundza lokunyenti ngaBabe wetfu losezulwini futsi simlingise kuze kube phakadze. Leli lilungelo lelikhulu kakhulu!—Umshumayeli 3:11.

15, 16. (a) Uzuze njani ngekuzindla ngaJehova nangaJesu? (b) Kungani kungase kube lukhuni ngaletinye tikhatsi kuzindla, kodvwa kungani kufanele sichubeke sikwenta?

¹⁵ Kuzindla ngaJehova nangaJesu kukusita kutsi uhlale ulitsandza liciniso. Loko kutawukhutsata bazalwane kanye nebantfu lohlangana nabo emsebentini wekushumayela. Nangabe uzindla ngaloko Jehova lakwentele kona ngekunikela ngaJesu kutsi abe ngumhlatjelo loyinhlawulo, utawuchubeka ujabulela budlelwane lobusedvute naNkulunkulu. (Roma 3:24; Jakobe 4:8) Mark, umzalwane waseNingizimu Afrika lowacitsa iminyaka lemitsatfu ejele ngenca yekukholwa kwakhe, watsi: “Kuzindla kungacatsaniswa neluhambo lolujabulisako. Nasizindla ngetintfo letiphatselene naNkulunkulu wetfu Jehova, sifundza tintfo letinsha ngaye. Ngaletinye tikhatsi nangitiva ngidvumatekile nobe ngikhatsatekile ngelikusasa, ngifundza liBhayibheli futsi ngizindle ngaloko lengikufundzile. Loko kungenta ngitive ngincono.”

¹⁶ Kuphila kulelive kugcwele tintfo letisiphatamisako kangangekutsi kumatima kutfola sikhatsi sekuzindla  ngeliBhayibheli. Patrick, longumzalwane wase-Afrika watsi: “Ingcondvo yami injengelibhokisi laseposini leligcwele imininingwane leyehlukahlukene lefaka ekhatsi lebalulekile nalengakabaluleki, ledzinga kuhlelenjiswa onkhe malanga. Njengobe ngetama kutfola kutsi ingcondvo yami icuketseni, ngitfola tintfo letingikhatsatako, ngako kubese kudzingeka kutsi ngithantaze kuJehova ngato ngaphambi kwekutsi ngizindle. Nanobe loko kungase kutsatse sikhashana ngaphambi kwekutsi ngizindle ngetintfo letiphatselene naNkulunkulu, ngibese ngitiva ngisondzelene naye. Loko kuvula ingcondvo yami kute ilicondze kancono liciniso.” (Tihlabelelo 94:19) Sizuza ngetindlela letehlukahlukene nasifundza futsi sizindla ngeliBhayibheli onkhe malanga.—Imisebenti 17:11.

17. Usitfola njani sikhatsi sekuzindla?

¹⁷ Labanye bavuka ekuseni ngeluvivi kute bafundze, bazindle futsi bathantaze. Kantsi labanye bakwenta loko ngesikhatsi selikhefu. Kungenteka kutsi sikhatsi lesincono kuwe sekufundza liBhayibheli kuntsambama nobe ngaphambi kwekutsi uyolala. Labanye batsandza kulifundza ekuseni futsi baphindze balifunde nasebayolala. (Joshuwa 1:8) Lokubaluleke kakhulu kutsi ‘sisisebentise kahle sikhatsi,’ lokusho kusebentisa sikhatsi lesisicitsa senta tintfo letingakabaluleki kakhulu kute sisisebentisele kuzindla ngeliVi laNkulunkulu onkhe malanga.—Efesu 5:15, 16.

18. Yini liBhayibheli leliyetsembisa labo labazindla ngeliVi laNkulunkulu onkhe malanga futsi bakusebentise loko labakufundzako?

¹⁸ LiBhayibheli letsembisa kutsi Jehova utawubusisa bonkhe labazindla ngeliVi lakhe futsi betame ngekutimisela kukusebentisa loko labakufundzako. (Fundza Tihlabelelo 1:1-3.) Jesu watsi: “Bayajabula labo labeva livi laNkulunkulu futsi baligcine!” (Lukha 11:28) Kuzindla ngeliVi laJehova onkhe malanga kutasisita kutsi sente tintfo ngendlela letawuletsa ludvumo kuye. Nasenta njalo, Jehova utasenta sijabule nyalo futsi asinike kuphila lokuphakadze eveni lelisha.—Jakobe 1:25; Sembulo 1:3.