EMINYAKENI lengetulu kwa-200 leyendlulile, bantfu bebangayikholelwa yonkhe intfo lebhalwe emaphephandzabeni. Nalamuhla ngeke siyikholelwe yonkhe intfo lesiyifundzako nobe lesiyibona ku-Internet. Kunetindzaba letinyenti letitfolakala ku-Internet, futsi tebuchwephesha talamuhla tenta kube melula kutitfola. Linyenti laletindzaba tiliciniso, tilusito futsi tiphephile, kodvwa letinyenti tato tingemanga, atinamsebenti futsi tiyingoti. Kungako kufanele sikukhetse kahle loko lesikufundzako. Nakangena ku-Internet, umuntfu angacabanga kutsi indzaba letsite layifundzako iliciniso ngobe iku-Internet nobe ngesizatfu sekutsi uyitfunyelelwe ngumngani wakhe nge-e-mail. Angase ayikholelwe leyo ndzaba ngisho nobe ingenangcondvo. Kodvwa liBhayibheli liyasecwayisa litsi: “Umuntfu lonengcondvo lencane wetsemba yonkhe intfo; kodvwa lohlakaniphile indlela yakhe uyayibukisisa angakacali kuhamba ngayo.”—Taga 14:15.

Kuhlakanipha ligama leliphikisa kuba nengcondvo lencane nobe kukholelwa yonkhe intfo lesiyivako. Nangabe sihlakaniphile, siyacaphelisisa futsi sigcina ngekwetsemba loko lesikwatiko kutsi kuliciniso. Ngeke sikhohliswe futsi setsembe indzaba lengemanga lesiyifundza ku-Internet, ngisho nobe idvumile. Yini lengakusita kutsi uhlakaniphe? Cala ngekutibuta kutsi: ‘Lendzaba lengiyifundzako ivela ku-website lesemtsetfweni nalengingayetsemba yini? Lendzaba ivela ku-website lapho wonkhe umuntfu avumelekile yini kuveta umbono wakhe khona nobe umtfombo wayo awatiwa? I-website lengingayetsemba seyivetile yini kutsi lendzaba ingemanga?’ * (Fundza umbhalo longentansi.) Ngemuva kwaloko, sebentisa ‘lwati.’ (Taga 7:7) Nangabe indzaba letsite ibonakala ingemanga, manyenti ematfuba ekutsi vele kunjalo. Nangabe ufundza tindzaba letinyundzela labanye, cabanga ngekutsi ngubani lotawuzuza nangabe lendzaba idvuma nekutsi kungani umuntfu lotsite akhetse kuyidvumisa.

Labanye bantfu bangase bendlulisele tindzaba kubo  bonkhe bantfu lababhalelana nabo ema-e-mail, bangakahloli kutsi lendzaba iliciniso yini nobe bangakacabangi kutsi kungase kwentekeni nasebayitfumele. Mhlawumbe kungobe bafuna kunakwa nekutsi bafuna kube ngibo labasakata tindzaba kucala. (2 Samuweli 13:28-33) Kodvwa umuntfu lohlakaniphile uyacabanga ngemonakalo loko lokungawubangela. Sibonelo saloko kutsi kungalimata lidvumela lemuntfu nobe lenhlangano letsite.

Umuntfu lotfumela indzaba angase angayihloli kutsi iliciniso yini ngobe loko kungamcitsela sikhatsi nemandla akhe. Umane acabange kutsi labo labafundza lendzaba layitfumele ngibo labatayihlola. Kodvwa nesabo sikhatsi siligugu kubo. (Efesu 5:15, 16) Ngako-ke, esikhundleni sekutsi sitfumele lokutsite lesingaciniseki ngako, kungaba kuhle kutsi sicabange ngalendlela: “Nangabe ngiyingabata lendzaba, kungabancono ngingayitfumeli!”

Tibute: ‘Ngihlale ngendlulisela ema-e-mail kulabanye yini? Kuke kwenteka yini kwadzingeka kutsi ngicolise kubantfu lengibhalelana nabo ema-e-mail ngekubatfumelela indzaba lengasiyo nobe lengemanga? Ukhona yini loke wangicela kutsi ngingasamtfumeleli ema-e-mail?’ Khumbula kutsi nangabe bangani bakho banayo i-e-mail, bangakhona kusebentisa i-Internet futsi abaludzingi lusito lwakho kute babuke tintfo labatitsandzako. Abafuni kutfunyelelwa ema-e-mail lamanyenti lafaka ekhatsi tindzaba letihlekisako, ema-video nobe titfombe. Akusiko kuhlakanipha nekutsi wendlulisele kulomunye tintfo letitsetjuliwe nobe emaphuzu lowabhalile nakuchubeka tinkhulumo. * (Fundza umbhalo longentansi.) Khumbula nekutsi nangabe umuntfu atincwaningela indzaba letsite, abuka emavesi eliBhayibheli nobe atidadishela imihlangano, utawuzuza kakhulu kunangesikhatsi umtfumelela.

Yini longayenta nangabe ubona lokutsite ku-Internet lokungemanga laluhlata mayelana nenhlangano yaJehova? Kuvale ngaleso sikhatsi! Ungakwetsembi. Ngeke kube kuhlakanipha kukutfumelela labanye nobe kucela umbono wabo ngalendzaba ngobe loko kungase kuyandzise kakhulu. Nangabe ubone intfo letsite ku-Internet lekukhatsatako, cela kuhlakanipha kuJehova futsi ukhulume nebazalwane labavutsiwe. (Jakobe 1:5, 6; Juda 22, 23) Akukafaneli simangale nangabe bantfu basicambela emanga. Bebawakhuluma nangaJesu, futsi wecwayisa bafundzi bakhe kutsi titsa tabo  betitabaphatsa kabi futsi ‘tibacalele emanga.’ (Matewu 5:11; 11:19; Johane 10:19-21) Ngako nangabe uhlakaniphile futsi ucabangasisa, utawukhona kwehlukanisa nangabe umuntfu lotsite akhuluma emanga nobe etama kukhohlisa labanye.—Taga 2:10-16.

Kufanele sicaphele nangekusakata tindzaba lesitivile ngebazalwane betfu nobe tintfo letentekile kubo. Kunetikhatsi lapho kungeke kube kuhlakanipha khona kusakata indzaba ngisho nobe iliciniso. (Matewu 7:12) Nasi sibonelo: Akusikuhle kutfumela umlayeto lokhuluma kabi ngalabanye. (2 Thesalonika 3:11; 1 Thimothi 5:13) Kungenteka kutsi letinye tindzaba tiyimfihlo. Labanye bantfu bangase batsandze kutiveta ngekuhamba kwesikhatsi nobe ngesikhatsi lesitsite. Ngako kufanele silihloniphe lilungelo labo lekutikhetsela kutsi batayikhuluma nini nekutsi kanjani lendzaba. Ecinisweni nangabe sitjela labanye leyo ndzaba ngaphambi kwesikhatsi lokuhlelwe kutsi ikhulunywe ngaso, kungonakala tintfo letinyenti.

Lamuhla tindzaba tisakateka ngekushesha, ngisho nobe tiliciniso nobe tingemanga, takha nobe tingakhi, tiyingoti nobe tingasiyo ingoti. Ngisho nobe utfumele umlayeto kumuntfu munye, loyo muntfu angawendlulisela kubantfu labanyenti emhlabeni ngekucwabita kweliso. Ngako-ke, tibambe futsi ungawendluliseli ngekushesha umlayeto lotsite kulabanye. Ngisho nobe lutsandvo “lukholwa ngito tonkhe tintfo” futsi lungangabati, akukafaneli sibe nengcondvo lencane futsi setsembe yonkhe indzaba lesisandza kuyiva nalesijabulisako. (1 Khorinte 13:7) Ngeke setsembe emanga nobe tintfo letimbi ngenhlangano yaJehova nangebazalwane betfu lesibatsandzako. Khumbula kutsi labo labacamba emanga futsi bawasakate bajabulisa Sathane Develi, ‘longuyise wemanga.’ (Johane 8:44) Ngako-ke, shengatsi singahlakanipha futsi ngaso sonkhe sikhatsi sicabangisise ngendlela lokufanale sikusebentise ngayo kwatiswa lokunyenti lokugcwele lamuhla. Njengobe liBhayibheli lisho, “labanengcondvo lencane bazuza bulima; kodvwa labahlakaniphile banemchele welwati.”—Taga 14:18.