NGESIKHATSI ngineminyaka leyimfica budzala, ngabese angisakhuli. Njengobe nyalo sengineminyaka lengu-43 budzala, budze bami bungangelimitha nje kuphela. Batali bami batsi nababona kutsi ngeke ngisakhula, bangikhutsata kutsi ngisebente ngekutimisela kute ngingacabangi kakhulu ngesimo lengikuso. Kute ngihlale ngimatasatasa, ngatibekela litafula letitselo lebengititsengisa embikwendlu yakitsi futsi bengilideka kahle. Loku bekudvonsa emakhasimende lamanyenti.

Kute lokungako lokwashintjwa kukhutsala kwami. Bengisolo ngimfishane futsi ngisokoliswa natintfo letincane ekuphileni kwami, njengekufikela emashelufini asetitolo. Yonkhe intfo beyibonakala shengatsi yentelwe bantfu labadze kunami. Loko bekungivisa buhlungu, kodvwa kwashintja ngesikhatsi ngineminyaka lengu-14 budzala.

Ngalelinye lilanga, bomake lababili labaBoFakazi BaJehova batsenga titselo etafuleni lami futsi bacela kungichubela sifundvo seliBhayibheli. Ngekushesha ngabona kutsi kwati Jehova nenjongo yakhe bekubaluleke kakhulu kwendlula budze bami. Loko kwangisita kakhulu. Tihlabelelo 73:28 taba ngumbhalo lengiwutsandza kakhulu. Incenye yekucala yalelivesi itsi: “Kungilungele kusondzela kuNkulunkulu.”

Kungakalindzeleki, umndeni wami watfutsa eCôte d’Ivoire waya eBurkina Faso, futsi kuphila kwami kwashintja kakhulu. Bomakhelwane bami baseCôte d’Ivoire bebakwetayele kungibona kulelitafula lami lekutsengisa titselo. Kodvwa bomakhelwane bami labasha bebangangati futsi labanyenti babo bebamangala nabangibona. Bantfu bebangibukisisa, ngako ngahlala endlini emaviki lamanyenti. Ngabese ngiyakhumbula kutsi bekukuhle kangakanani kimi kusondzelana naJehova. Ngabhalela ehhovisini leligatja laBoFakazi BaJehova, futsi bangitfumelela umuntfu lokahle lotangifundzela. Ngavakashelwa nguNani lositfunywa selivangeli lobekahamba ngesidududu.

Imigwaco legcwele sihlabatsi lesendzaweni yangakitsi beyihlale ishelela futsi ngesikhatsi semvula beyiba neludzaka. Nanobe Nani bekawa tikhatsi letinyenti endleleni nakagibele lesidududu sakhe, kodvwa bekangapheli emandla ekuta atongifundzela. Ngalelinye lilanga wacela kuhamba nami nakaya esifundvweni. Ngabona kutsi kufanele ngiphume endlini futsi ngibeketelele kubukwa bantfu. Ngetulu kwaloko, kungigibelisa esidududwini sakhe bekutawengeta umtfwalo kuso kantsi bekuvele kumatima kusicondzisa.  Nobe kunjalo, ngavuma ngobe ngangikhumbula incenye yesibili yalombhalo lengiwutsandzako letsi: Jehova iNkhosi lenguMbusi “ngimente waba siphephelo sami.”

Ngaletinye tikhatsi sasiwela eludzakeni sinaNani, kodvwa ngenca yekutsi besiyitsandza imihlangano, besingenandzaba naloko. Ngamangala nangibona umehluko lokhona kubantfu lengabakhandza eHholweni leMbuso lebebanelutsandvo kunabomakhelwane bami labebangibukisisa. Ngemuva kwetinyanga letiyimfica, ngabhajatiswa.

Incenye yekugcina yalombhalo lengiwutsandzako itsi: “Kuze ngishumayele ngako konkhe lakwentile.” Bengati kutsi umsebenti wekushumayela bewutawuba yinsayeya lenkhulu kimi. Ngiyakhumbula nje ngelilanga lami lekucala ngishumayela emtini ngemuti. Bantfu labadzala nebantfwana bebasolo bangibuka, bangilandzela futsi bahlekisa ngendlela lengihamba ngayo. Loko bekungivisa buhlungu kakhulu, kodvwa lobekungisita ngibeketele kukhumbula kutsi sonkhe siyalidzinga liPharadisi.

Kuze tintfo tibe melula kimi, ngatsenga libhayisikili lesinemasondvo lamatsatfu. Umuntfu lebengisebenta naye ensimini bekangifuca nakwenyukela agibele kanye nami nakwehlela. Ngisho nobe lomsebenti wekushumayela bewunetinkinga ekucaleni, kepha ngekuhamba kwesikhatsi wangijabulisa kakhulu kangangekutsi nga-1998 ngaba lihlahlandlela lelivamile.

Ngachuba tifundvo teliBhayibheli letinyenti, futsi letine tato tabhajatiswa. Ngetulu kwaloko, lomunye wabodzadzewetfu waba nguFakazi. Kubona indlela labanye lebebatfutfuka ngayo bekunginika sikhutsato ngesikhatsi lengisidzinga ngaso. Ngalelinye lilanga ngiphetfwe ngumalaleveva, ngatfola incwadzi lebuya eCôte d’Ivoire. Bengicale sifundvo seliBhayibheli lebengisichuba emnyango nalomunye umfundzi wasenyuvesi leseBurkina Faso. Lesifundvo ngasendlulisela kulomunye umzalwane. Ngekuhamba kwesikhatsi lomfundzi watfutsela eCôte d’Ivoire. Ngajabula kakhulu nangiva kutsi abesangummemeteli longakabhajatiswa!

Yini lengitiphilisa ngayo? Lenye inhlangano lesita bantfu labakhubatekile beyingifundzisa kutfunga. Kodvwa lomunye wabothishela bami wabona indlela lebengikhutsele ngayo, watsi: “Kufanele sikufundzise kwakha insipho.” Nembala bangifundzisa. Nyalo sengakha insipho yekuwasha neyasendlini. Bantfu bebayitsandza lensipho yami futsi bebakhuluma kahle ngayo kulabanye. Bengibamikisela yona matfupha ngihamba ngesidududu sami lesinemasondvo lamatsatfu.

Nga-2004, ngeva buhlungu kakhulu nasekufanele ngiyekele kuba lihlahlandlela ngenca yetinhlungu emgogodleni. Kodvwa ngisaya njalo ensimini.

Bantfu labanyenti batsi bangati ngekumoyitela. Tinyenti tizatfu lenginato tekujabula ngobe kusondzela kuNkulunkulu kube kuhle kimi.—Ilandziswa nguSarah Maiga.