1. Yini Manowa layenta nakeva kutsi besekatawuba ngubabe?

MANOWA nemkakhe besebalahle litsemba lekutsi bayoke babe nebantfwana. Ngalelinye lilanga ingilosi yaJehova yatjela umfati waManowa kutsi utawutfola indvodzana. Leto kwaba tindzaba letimnandzi sibili! Watsi nakatjela Manowa loku, naye wajabula kakhulu. Kodvwa Manowa waphindze wacabangisisa ngaloko Jehova lakulindzele kuye njengobe abetawuba ngubabe walomntfwana. Bebatayifundzisa njani indvodzana yabo kutsi itsandze Jehova futsi imkhonte kantsi bantfu labanyenti ka-Israyeli bebenta tintfo letimbi? Manowa wancenga Jehova kutsi aphindze atfumele lengilosi yakhe, watsi: “Ngiyakuncenga kutsi mane lowo muntfu waNkulunkulu lomtfumele lapha kitsi aphindze abuye atesifundzisa kutsi lomfana lotawutalwa sitamkhulisa kanjani.”—Tikhulu 13:1-8.

2. Yini lokufanele uyifundzise bantfwana bakho, futsi ungakwenta njani loko? (Fundza libhokisi lelitsi “ Sifundvo Sakho SeliBhayibheli Lesibaluleke Kakhulu.”)

² Nangabe ungumtali, kungenteka uyayicondza indlela Manowa labetiva ngayo. Nawe unemsebenti wekusita bantfwana bakho kutsi bamati Jehova futsi bamtsandze. (Taga 1:8) Ngesikhatsi  sekukhonta kwemndeni, ungabasita kutsi bachubeke bafundza ngaJehova nangemiBhalo. Kufanele wente lokungetulu kwekumane nje ufundze liBhayibheli maviki onkhe nebantfwana bakho. (Fundza Dutheronomi 6:6-9.) Yini lenye lengakusita ubafundzise kutsi batsandze Jehova futsi bamkhonte? Kulesihloko sitawucoca ngesibonelo saJesu. Nanobe bekete umntfwana, kodvwa ungafundza endleleni lebekafundzisa ngayo bafundzi bakhe futsi abacecesha. Jesu abebatsandza futsi atfobekile. Bekanekucondzisisa, lokusho kutsi bekayati indlela lebebativa ngayo futsi ati nekutsi angabasita njani. Ase sibone kutsi singamlingisa njani Jesu.

3. Bafundzi baJesu bebati ngani kutsi uyabatsandza?

³ Jesu abevame kubatjela bafundzi bakhe kutsi uyabatsandza. (Fundza Johane 15:9.) Abephindze acitse sikhatsi lesinyenti anabo. (Makho 6:31, 32; Johane 2:2; 21:12, 13) Bekangasuye umfundzisi wabo nje kuphela, kodvwa abephindze abengumngani wabo. Ngako bebangangabati kutsi uyabatsandza. Yini longayifundza kuJesu?

4. Ungabakhombisa njani bantfwana bakho kutsi uyabatsandza? (Buka sitfombe lesisekucaleni kwalesihloko.)

⁴ Batjele bantfwana bakho kutsi uyabatsandza futsi ubakhombise kutsi babaluleke kakhulu kuwe. (Taga 4:3; Thithusi 2:4) Samuel wase-Australia utsi: “Ngalesikhatsi ngisemncane, njalo entsambama Babe abavame kungifundzela INcwadzi Yami Yetindzaba TeliBhayibheli. Abeyiphendvula nemibuto lenganginayo, angigace futsi angicabuze bese utsi ngilale kahle. Ngekuhamba kwesikhatsi, ngamangala kakhulu nangiva kutsi Babe akazange akhuliswe ngekugacwa nangekucatjuzwa! Nanobe kunjalo, abenta konkhe lokusemandleni akhe kute angikhombise kutsi uyangitsandza. Ngenca yaloko, nami ngamtsandza kakhulu  futsi bengitiva ngivikelekile nanginaye.” Nawe sita bantfwana bakho kutsi bative ngendlela lefanako ngekuhlale utsi, “Ngiyanitsandza.” Bagace futsi ubacabuze. Citsa sikhatsi ukhuluma nabo, udla nabo futsi udlala nabo.

5, 6. (a) Ngenca yekutsi bekabatsandza bafundzi bakhe, yini Jesu layenta? (b) Kufanele ubayale njani bantfwana bakho?

⁵ Jesu watsi: “Bonkhe lengibatsandzako ngiyabakhalimela ngiphindze ngibayale.” * (Fundza umbhalo longentansi.) (Sembulo 3:19) Nasi sibonelo: Bafundzi bakhe bebaphikisana tikhatsi letinyenti ngekutsi ngubani lomkhulu emkhatsini wabo. Jesu akazange ente shengatsi akayiboni lenkinga. Esikhundleni saloko, wabayala ngesineke tikhatsi letinyenti. Abehlale anemusa futsi alindza kutsi kube sikhatsi lesikahle nasendzaweni lekahle kute abayale.—Makho 9:33-37.

⁶ Ngesizatfu sekutsi uyabatsandza bantfwana bakho, uyati kutsi kufanele ubayale. Ngalesinye sikhatsi kudzingeka nje ubachazele kutsi kungani intfo letsite ilungile nobe ingakalungi. Kodvwa utawenta njani nangabe bachubeka bangakulaleli? (Taga 22:15) Fundza esibonelweni saJesu. Chubeka ubayala ngemusa, ubacondzisa futsi ubacecesha. Khetsa sikhatsi lesikahle nendzawo lekahle yekubayala, futsi loko ukwente ngemusa. Lomunye dzadze waseNingizimu Afrika lobitwa ngekutsi ngu-Elaine, ukhumbula indlela batali bakhe lebebayisebentisa nabamyala. Ngaso sonkhe sikhatsi bebahlala bamchazela kutsi yini labayilindzele kuye. Nangabe bamtjela kutsi batamjezisa ngekungalaleli, nguloko kanye lebebakwenta. Utsi: “Abakase bangijezise batfukutsele nobe bangakangichazeli kutsi bangijeziselani.” Ngenca yaloku, bekahlale ati kutsi batali bakhe bayamtsandza.

7, 8. (a) Yini bafundzi baJesu labayifundza emithantazweni yakhe? (b) Imithantazo yakho ingabafundzisa njani bantfwana bakho kwetsembela kuNkulunkulu?

⁷ Ngalesikhatsi Jesu sekatawuboshwa futsi abulawe, wacela Babe wakhe watsi: “Abha, Babe, tonkhe tintfo tiyenteka kuwe; ngako yendlulise lendzebe kimi. Kodvwa akwenteke intsandvo yakho, hhayi yami.” * (Fundza umbhalo longentansi.) (Makho 14:36) Cabanga ngendlela bafundzi baJesu labativa ngayo nabeva ngalomthantazo nobe nabafundza ngawo. Babona kutsi ngisho nobe abete sono, kodvwa abelucela lusito kuBabe wakhe. Ngako bafundza kutsi nabo kufanele batfobeke futsi betsembele kuJehova.

⁸ Bantfwana bakho bangafundza lokunyenti emithantazweni yakho. Nanobe ungathantazeli nje kufundzisa bantfwana bakho, kodvwa nabakuva uthantaza, bangafundza kwetsembela kuJehova.  Nawuthantaza, ungagcini nje ngekucela Jehova kutsi asite bantfwana bakho, kodvwa mcele kutsi nawe akusite. Ana, lohlala eBrazil utsi: “Nangabe kunetinkinga ekhaya, njengalapho kugula bogogo namkhulu, batali bami bebacela Jehova kutsi abanikete emandla ekubhekana nalesimo futsi abaphe nekuhlakanipha kute batsatse tincumo letikahle. Ngisho nalapho bacindzeteleke kakhulu, bebashiyela tinkinga tabo kuJehova. Loko kwangenta ngafundza kwetsembela kuJehova.” Nangabe bantfwana bakho bakuva ucela Jehova kutsi akuphe emandla ekushumayela makhelwane nobe ekucela umcashi wakho kutsi akuphe emalanga ekuya emhlanganweni wesifundza, bayabona kutsi wetsembela kuJehova kute akusite futsi bafundza kwenta lokufanako.

9. (a) Jesu wabafundzisa njani bafundzi bakhe kutsi batfobeke futsi bangabi nebugovu? (b) Yini bantfwana bakho labatayifundza nangabe utfobekile futsi ute bugovu?

⁹ Jesu watjela bafundzi bakhe kutsi batfobeke futsi bangabi nebugovu, waphindze wababekela sibonelo kuloko. (Fundza Lukha 22:27.) Baphostoli bakhe babona kutsi bekatidzela kute akhonte Jehova futsi asite labanye, ngako nabo bafundza kwenta lokufanako. Nawe ungabafundzisa bantfwana bakho ngekubabekela sibonelo. Debbie lonebantfwana lababili utsi: “Angikase ngibe nemona ngenca yesikhatsi umyeni wami lasicitsa asita labanye njengobe angulomdzala ebandleni. Bengati kutsi nobe kunini nangabe sidzinga sikhatsi nemyeni wami, abetawuba naso.” (1 Thimothi 3:4, 5) Sibonelo saDebbie nemyeni wakhe Pranas, sawutsintsa njani umndeni wabo? Pranas utsi ngaso sonkhe sikhatsi bantfwana babo bebahlale bafuna  kusita emihlanganweni yesigodzi. Bebahlala bajabulile, banebangani labakahle futsi bafuna kuba nebazalwane nabodzadze. Nyalo bonkhe kulomndeni bangenele umsebenti wasikhatsi sonkhe. Nangabe utfobekile futsi ute bugovu, ufundzisa bantfwana bakho kutsi babe nesifiso sekusita labanye.

10. Jesu wakusebentisa njani kucondzisisa ngalesikhatsi sicumbi sebantfu sitemfuna eGalile?

¹⁰ Jesu bekanekucondzisisa. Bekanganaki kuphela loko bantfu labebakwenta, kodvwa bekanaka nesizatfu lebesibabangela kutsi bakwente. Abefundza tinhlitiyo tabo. Nasi sibonelo: Ngalelinye lilanga, ngesikhatsi Jesu aseGalile, sicumbi sebantfu seta sitemfuna. (Johane 6:22-24) Wabona kutsi sizatfu lebesibenta bete kuye labantfu bekungasiko kutsi bafuna kumlalela nakafundzisa kodvwa bebafuna kudla. (Johane 2:25) Jesu bekayati kahle indlela lebebativa ngayo. Ngako wabayala ngesineke futsi wabachazela kutsi nguluphi lushintjo lobekufanele balwente.—Fundza Johane 6:25-27.

11. (a) Ungetama njani kucondza indlela bantfwana bakho labativa ngayo ngekushumayela? (b) Ungabasita njani bantfwana bakho kutsi bawujabulele umsebenti wekushumayela?

¹¹ Ngisho nobe ungakwati kufundza inhlitiyo yemuntfu, kodvwa nawe ungaba nako kucondzisisa. Nasi sibonelo: Yetama kucondza indlela bantfwana bakho labativa ngayo ngemsebenti wekushumayela. Ungase utibute, ‘Kungenteka yini kutsi nasisensimini bajabulela nje kuphela kuphumula, kudla nobe kunatsa sinatfo lesitsite?’ Nangabe ubona kutsi bantfwana bakho abawutsandzi kahle umsebenti wekushumayela, yetama kuwenta ujabulise kakhudlwana. Babele incenye lencane labangayenta nanisensimini kute bative babalulekile.

12. (a) Jesu wabecwayisa ngani bafundzi bakhe? (b) Yini leyenta bafundzi baJesu basidzinga kakhulu secwayiso sakhe?

¹² Nguyiphi lenye indlela Jesu lakusebentisa ngayo kucondzisisa? Bekati kutsi liphutsa linye lingaholela kulelinye kanye nasekwenteni sono lesikhulu, ngako wecwayisa bafundzi bakhe ngaloko. Sibonelo saloko kutsi bafundzi bakhe bebati kutsi akukalungi kutiphatsa kabi ngekwelicansi. Kodvwa Jesu wabecwayisa ngaloko lobekungaholela ekutiphatseni kabi. Watsi: “Wonkhe umuntfu lochubeka abuka lomsikati ate amkhanuke sewuvele uphingile naye enhlitiyweni. Nangabe liso lakho langesekudla likuhlupha, likhiphe ulilahle.” (Matewu 5:27-29) Bafundzi baJesu bebaphila nebantfu baseRoma lebebatiphatsa kabi futsi babukela imidlalo lebeyigcwele kutiphatsa kabi ngekwelicansi nelulwimi lolubi. Ngako Jesu wabecwayisa ngelutsandvo bafundzi bakhe kutsi babalekele nobe yini lebeyitawubangela kutsi kubematima ngabo kwenta lokulungile.

13, 14. Ungabasita njani bantfwana bakho kutsi babalekele kutijabulisa ngetintfo letingcolile?

¹³ Njengobe ungumtali, ungasebentisa kucondzisisa kute uvikele bantfwana bakho kutsi bangayenti intfo letamvisa buhlungu Jehova. Lokubuhlungu kutsi lamuhla ngisho nebantfwana labancane sebatikhandza basenkingeni yekubona tintfo letikhombisa kungcola kanye naletinye letikhombisa kutiphatsa kabi. Kuliciniso kutsi kufanele ubatjele bantfwana bakho kutsi akukalungi kubuka tintfo letikhombisa kungcola. Kodvwa kunyenti longakwenta kute ubavikele. Tibute: ‘Bantfwana bami bayati yini kutsi tiyingoti ngani titfombe letikhombisa kungcola? Yini lengabenta  babe nesifiso sekubuka letitfombe? Ngikwenta kube melula yini ngabo kutsi bakhulume nami nganobe yini, kute bakhone kucela lusito lwami nangabe balingeka kutsi babuke titfombe letikhombisa kungcola?’ Ngisho nobe bantfwana bakho babancane kakhulu, ungatsi kubo: “Nakungenteka nje ubone intfo letsite ku-Internet lekwenta ube nesifiso sekwati ngetindzaba temacansi futsi ufune kuyibuka, ngicela ute kimi utongitjela ngayo. Ungesabi futsi ungabi nemahloni ekucela lusito lwami. Ngiyafuna kukusita.”

¹⁴ Nangabe ukhetsa intfo longatijabulisa ngayo, cabanga ngekutsi ungaba njani sibonelo lesihle kubantfwana bakho. Pranas lesikhulume ngaye ekucaleni utsi: “Ungakhuluma kakhulu ngetintfo letinyenti, kodvwa bantfwana bakho batawubuka wena kutsi wentani futsi bakulingise.” Nangabe uhlale uyinaka indlela lokhetsa ngayo umculo, tincwadzi kanye nema-movie lahlantekile kute utijabulise, ungasita bantfwana bakho kutsi bente lokufanako.—Roma 2:21-24.

15, 16. (a) Yini lenganenta niciniseke kutsi Jehova utanisita nifundzise bantfwana benu? (b) Yini lesitawucoca ngayo esihlokweni lesilandzelako?

¹⁵ Yini leyenteka ngalesikhatsi Manowa acela Jehova kutsi amsite abe ngumtali lokahle? “Nkulunkulu [weliciniso] wamuva Manowa.” (Tikhulu 13:9) Batali, Jehova utayilalela imithantazo yenu. Utanisita kutsi nifundzise bantfwana benu. Utanisita nekutsi nibakhombise indlela lenibatsandza ngayo, nitfobeke futsi nibe nekucondzisisa.

¹⁶ Njengobe Jehova atanisita kutsi nifundzise bantfwana benu nabasebancane, anganisita nekutsi nibafundzise nasebaseminyakeni yekutfomba. Esihlokweni lesilandzelako, sitawucoca ngendlela sibonelo saJesu sekuba nelutsandvo, kutfobeka kanye nekucondzisisa lesinganisita ngayo kute nifundzise bantfwana benu labaseminyakeni yekutfomba kutsi bakhonte Jehova.