1, 2. (a) Yini labanye batali labanebantfwana labaseminyakeni yekutfomba labakhatsateka ngayo? (b) Bantfwana bangazuza njani eminyakeni yabo yekutfomba?

LESINYE sikhatsi lesijabulisako kubatali, kulapho bantfwana babo babhajatiswa. Bantfwana labane baBerenice babhajatiswa ngaphambi nje kwekutsi babe neminyaka lengu-14 budzala. Berenice utsi: “Satsintseka kakhulu etinhlitiyweni tetfu. Sasijabule kakhulu ngekutsi bantfwana betfu bafuna kukhonta Jehova. Kodvwa sasati kutsi njengobe bebaseminyakeni yekutfomba, bebatawubhekana netinsayeya letinyenti.” Nawe kungase kukukhatsate loku nangabe indvodzana nobe indvodzakati yakho iseminyakeni yekutfomba nobe seyitawufika kuyo.

² Lesinye sati sengcondvo yemntfwana sitsi iminyaka yekutfomba ingaba matima kubatali nakubantfwana, kodvwa batali akukafaneli bacabange kutsi bantfwana babo basangene nobe bagcwele buntfwana. Esikhundleni saloko sitsi bantfwana labaseminyakeni yekutfomba banengcondvo levulekile, banemivelo lejulile futsi bayakudzinga kucitsa sikhatsi nebangani babo. Ngako bantfwana bakho nabaseminyakeni yekutfomba, bangaba  nebungani lobusedvute naJehova njengobe naJesu enta ngesikhatsi asemusha. (Fundza Lukha 2:52.) Bangaphindze batfutfukise emakhono abo nabashumayela futsi babe nesifiso lesikhulu sekwenta lokunyenti emsebentini waNkulunkulu. Bangatitsatsela tincumo, njengesekunikela kuphila kwabo kuJehova futsi bamhloniphe. Kodvwa yini longayenta njengobe ungumtali kute ufundzise umntfwana wakho loseminyakeni yekutfomba kutsi akhonte Jehova? Ungafundza endleleni Jesu lacecesha ngayo bafundzi bakhe ngelutsandvo, ngekutfobeka nangekucondzisisa.

3. Yini leyenta baphostoli babona kutsi Jesu ungumngani wabo?

³ Jesu abengasiyo nje kuphela iNkhosi kubaphostoli bakhe. Abephindze abe ngumngani wabo. (Fundza Johane 15:15.) Ngetikhatsi tekubhalwa kweliBhayibheli, ngalokuvamile iNkhosi beyingakhulumi netisebenti tayo ngaloko lekucabangako nangendlela letiva ngayo. Kodvwa Jesu akabaphatsanga baphostoli bakhe njengetigcili. Abebatsandza futsi acitsa sikhatsi nabo. Abekujabulela kubatjela loko lakucabangako nendlela lativa ngayo, futsi abebalalelisisa nabasho loko labakucabangako nendlela labativa ngayo. (Makho 6:30-32) Kukhulumisana lobekukhona emkhatsini waJesu nebaphostoli bakhe, kwabenta baba ngematse nelulwimi futsi bawulungela umsebenti lebebatawenta esikhatsini lesitako.

4. Batali, yini leningayenta kute nibe bangani bebantfwana benu? (Buka sitfombe lesisekucaleni kwalesihloko.)

⁴ Nanobe uneligunya kubantfwana bakho, ungaba ngumngani wabo. Bangani bacitsa sikhatsi ndzawonye. Mhlawumbe ungacitsa sikhashana usebenta nobe wenta letinye tintfo kute utewuba nesikhatsi lesinyenti nebantfwana bakho. Kufanele uthantaze ngaloku futsi ucabangisise ngako. Bangani batsandza tintfo letifanako. Ngako-ke, tfola kutsi yini umntfwana wakho loseminyakeni yekutfomba layitsandzako, lokufaka ekhatsi umculo lawutsandzako, ema-movie nobe temidlalo. Ngemuva kwaloko yetama kutsandza loko lakutsandzako. Ilaria, lohlala eTaliyane utsi: “Batali bami bayawutsandza umculo lengiwulalelako. Ecinisweni, babe waba ngumngani wami lomkhulu, futsi bengitiva ngikhululekile ngisho nekumtjela tindzaba tami letiyimfihlo.” Nawuba ngumngani webantfwana bakho futsi ubasita kutsi babe bangani baJehova, loko akukwenti ulahlekelwe ligunya lekuba ngumtali. (Tihlabelelo 25:14) Bantfwana bakho batawubona kutsi uyabatsandza nekutsi uyabahlonipha, futsi kutawuba melula ngabo kutsi bakutfululele sifuba.

5. Yini lebeyingenta bafundzi baJesu kutsi babe nekuphila lokujabulisako nabenta umsebenti waJehova?

⁵ Jesu bekati kutsi nangabe bafundzi bakhe bakutsandza kukhonta Jehova futsi bahlale bamatasatasa bashumayela tindzaba letimnandzi, bebatawujabula sibili. Ngako wabakhutsata kutsi bawente ngekutimisela umsebenti wekushumayela, futsi wabetsembisa kutsi utabasita.—Matewu 28:19, 20.

6, 7. Ukhombisa njani kutsi bantfwana bakho uyabatsandza nawubafundzisa kutsi babe neluhlelo lwamalanga onkhe lwekukhonta Jehova?

⁶ Uyafuna kutsi bantfwana bakho babe nebuhlobo lobusedvute naJehova. Jehova ufuna kutsi ubafundzise futsi ubayale. Ukunikete ligunya lekwenta loko. (Efesu 6:4) Ngako-ke, kufanele wente konkhe lokusemandleni kute ubafundzise njalo bantfwana bakho. Cabanga ngaloku: Wenta konkhe lokusemandleni akho kute bantfwana bakho baye esikolweni ngobe uyati kutsi imfundvo ibalulekile kubo futsi ufuna bakujabulele  kufundza tintfo letinsha. Ngendlela lefanako, uyaciniseka kutsi bayaya esifundvweni nasemihlanganweni futsi babakhona nasekukhonteni kwemndeni. Ngetulu kwako konkhe, imfundvo labayitfola kuJehova ingasindzisa kuphila kwabo. Ngako-ke, basite kutsi bakujabulele kufundza ngaJehova futsi babone kutsi angabasita bahlakaniphe mbamba. (Taga 24:14) Kufanele uphindze ubafundzise kutsi baye njalo emsebentini wekushumayela. Lingisa sibonelo saJesu ngekutsi ubasite bakujabulele kufundzisa labanye ngeliVi laNkulunkulu.

⁷ Luhlelo lwamalanga onkhe lwekukhonta Jehova, lolufaka ekhatsi kudadisha, kuya emihlanganweni nasemsebentini wekushumayela, lubasita njani bantfwana labaseminyakeni yekutfomba? Erin lohlala eNingizimu Afrika utsi: “Ngalokuvamile besititila siphindze sikhonone ngekuchutjelwa sifundvo seliBhayibheli, kuya emihlanganweni nasensimini. Ngaletinye tikhatsi sasisiphatamisa ngemabomu sifundvo semndeni kute nje singasachubeki. Kodvwa batali betfu bebangaphelelwa ngemandla.” Erin ubabonga kakhulu batali bakhe ngobe bamsita wabona kutsi tibaluleke kangakanani letintfo. Nyalo nakwentekile walova esifundvweni nobe wangakhoni kuya ensimini, wenta konkhe lokusemandleni akhe kute abuyele eluhlelweni lwakhe ngekushesha.

8. (a) Jesu wakhombisa njani kutsi utfobekile? (b) Kutfobeka kwakhe kwabasita njani bafundzi bakhe?

⁸ Ngisho nobe Jesu abete sono, abetfobekile futsi watjela bafundzi bakhe kutsi uyaludzinga lusito lwaJehova. (Fundza Johane 5:19.) Loko kwenta bafundzi bakhe bangamhloniphi yini? Cha. Nababona kutsi wetsembela kakhulu kuJehova, nabo bametsemba kakhulu Jesu. Ngekuhamba kwesikhatsi, basilingisa sibonelo sakhe sekutfobeka.—Imisebenti 3:12, 13, 16.

9. Nangabe uwavuma emaphutsa akho futsi ucolisa, loko kungabasita njani bantfwana bakho labaseminyakeni yekutfomba?

⁹ Ngekungafani naJesu, tsine sinesono futsi senta emaphutsa. Ngako kufanele utfobeke. Vuma kutsi kunetintfo letinyenti longeke ukhone kutenta, futsi uwavume nemaphutsa akho. (1 Johane 1:8) Nemntfwana wakho loseminyakeni yekutfomba utawufundza kuwavuma emaphutsa akhe futsi akuhloniphe kakhulu. Ngetulu kwaloko, ngubani lomhlonipha kakhulu? Ngumphatsi lowavumako yini emaphutsa akhe nobe ngulongawavumi? Rosemary lonebantfwana labatsatfu utsi yena nemyeni wakhe bebawavuma emaphutsa abo. Uyachaza utsi: “Loko kwabangela kutsi bantfwana betfu babhobokelane natsi nabanetinkinga.” Uyengeta utsi: “Sabafundzisa kutsi bangatitfola kuphi tisombululo letincono kakhulu tetinkinga tabo. Nabadzinga lusito, besihlale sibatjela kutsi bafundze tincwadzi tetfu letisekelwe eBhayibhelini futsi sithantaza nabo.”

10. Jesu wakukhombisa njani kutfobeka ngisho nalapho atjela bafundzi bakhe loko lokufanele bakwente?

¹⁰ Jesu bekaneligunya lekutjela bafundzi bakhe loko lobekufanele bakwente. Kodvwa ngenca yekutsi bekatfobekile, abevame kubachazela kutsi kungani kufanele bente intfo letsite. Nasi sibonelo: Akazange  nje agcine ngekubatjela kutsi bafune kucala uMbuso nekulunga kwaNkulunkulu. Waphindze watsi: “Tonkhe leletinye tintfo nitawengetelwa tona.” Ngesikhatsi abatjela kutsi bangehlulelani, wachaza watsi: “Kute nani ningetukwehlulelwa, ngobe ngendlela lenehlulela ngayo labanye, nani nitakwehlulelwa ngayo.”—Matewu 6:31–7:2.

11. Ungamsita njani umntfwana wakho loseminyakeni yekutfomba ngekumchazela sizatfu lesikwente washaya umtsetfo nobe watsatsa sincumo lesitsite?

¹¹ Tfola sikhatsi lesikahle kute uchazele umntfwana wakho loseminyakeni yekutfomba kutsi kungani ushaye umtsetfo lotsite nobe utsetse sincumo lesitsite. Nakasicondza sizatfu sekwenta loko, utakuhlonipha. Barry lowakhulisa bantfwana labane utsi: “Nawutjela bantfwana bakho labaseminyakeni yekutfomba tizatfu tekwenta intfo letsite, kuyabasita kutsi bakwetsembe.” Batawubona kutsi awukashayi umtsetfo nobe wabatsatsela sincumo ngobe nje uneligunya lekwenta njalo kodvwa loko ukwente ngesizatfu lesihle. Kufanele ukhumbule nekutsi bantfwana labaseminyakeni yekutfomba abasesibo bokhewana. Basafundza indlela yekuticabangela futsi bafuna kutentela tincumo. (Roma 12:1) Barry uchubeka atsi: “Bantfwana labaseminyakeni yekutfomba kufanele bafundze kutsatsa tincumo letibhadlile letinetizatfu, kunekutsi tisekelwe endleleni labativa ngayo.” (Tihlabelelo 119:34) Ngako-ke, kufanele utfobeke futsi umchazele kutsi kungani utsetse sincumo lesitsite. Nawenta kanjalo, lomntfwana ufundza kutitsatsela tincumo futsi utawubona kutsi uyamhlonipha nekutsi uyambona kutsi semdzala.

12. Ngenca yekutsi Jesu bekanekucondzisisa, wamsita njani Phetro?

¹² Jesu bekanekucondzisisa futsi ati kutsi nguluphi lusito bafundzi bakhe labebaludzinga. Nasi sibonelo: Ngalesikhatsi atjela bafundzi bakhe kutsi utawubulawa, Phetro watjela Jesu kutsi abe nemusa kuye. Jesu bekati kutsi Phetro uyamtsandza, kodvwa bekati nekutsi indlela Phetro labecabanga ngayo beyingakalungi. Jesu wamsita njani Phetro kanye nalalabanye bafundzi? Wacala ngekumyala. Ngemuva kwaloko wachaza kutsi kutawentekani kulabo labangafuni kwenta intsandvo yaJehova ngobe kumatima kuyenta. Waphindze watsi Jehova utawubanika umvuzo labo labatidzelako. (Matewu 16:21-27) Phetro wafundza sifundvo kuloko.—1 Phetro 2:20, 21.

13, 14. (a) Yini lengase ikhombise kutsi umntfwana wakho loseminyakeni yekutfomba udzinga kucinisa kukholwa kwakhe? (b) Ungabona njani kutsi nguluphi lusito laludzinga mbamba umntfwana wakho?

¹³ Thantazela kucondzisisa kuJehova kute ubone kutsi umntfwana wakho loseminyakeni yekutfomba udzinga luphi lusito. (Tihlabelelo 32:8) Mhlawumbe uyambona kutsi akakajabuli ngendlela lavame kujabula ngayo nobe ukhuluma kabi ngebazalwane. Kungenteka uyabona nekutsi kukhona lakufihlela kona. Ungasheshi ucabange kutsi kunentfo lembi layentako emasitseleni. * (Fundza umbhalo longentansi.) Kodvwa ungenti shengatsi awuyiboni lenkinga nobe ucabange kutsi itatiphelela. Kungenteka kutsi kufanele umsite acinise kukholwa kwakhe.

¹⁴ Kute ubone kutsi ungamsita njani umntfwawana wakho loseminyakeni yekutfomba, mbute imibuto ngemusa nangenhlonipho. Loko kunjengekukha emanti emtfontjeni. Nangabe uwavacula, ngeke ukhone kukha lawo lowafunako. Ngendlela  lefanako, nangabe ute sineke nawubuta imibuto nobe uphocelela umntfwana wakho kutsi akhulume, ngeke akutjele loko lakucabangako nendlela lativa ngayo. (Fundza Taga 20:5.) Ilaria nakakhumbula ngesikhatsi aseminyakeni yekutfomba utsi bekafuna kucitsa sikhatsi lesinyenti nalafundza nabo kodvwa bekati kutsi loko akukalungi. Batali bakhe babona kutsi kukhona lokumkhatsatako. Ilaria utsi: “Ngalelinye lilanga bavele nje bangitjela kutsi ngibukeka ngikhatsatekile futsi bangibuta kutsi yini inkinga. Ngadzindza sililo, ngabachazela lenkinga futsi ngabacela kutsi bangisite. Bangigaca bangitjela kutsi bayakucondza loko lengikushoko, betsembisa kutsi batangisita.” Ngekushesha batali ba-Ilaria bacala kumsita kutsi akhe bangani labakahle ebandleni.

15. Nguyiphi lenye indlela Jesu lakhombisa ngayo kutsi unekucondzisisa?

¹⁵ Jesu bekanekucondzisisa nangesikhatsi abona buntfu lobuhle bebafundzi bakhe. Sibonelo saloko kutsi ngesikhatsi Nathanayeli eva kutsi Jesu ubuya eNazaretha, watsi: “Kukhona yini lokuhle lokungavela eNazaretha?” (Johane 1:46) Kube bewulapho, bewungacabanga yini kutsi Nathanayeli ukhuluma kabi, nekutsi unelubandlululo nobe ute kukholwa? Jesu bekangacabangi ngaleyo ndlela. Esikhundleni saloko, waba nekucondzisisa futsi wabona kutsi Nathanayeli abetsembekile, ngako watsi: “Lona ngumIsrayeli lokute bucili kuye.” (Johane 1:47) Jesu bekakwati kufundza loko lokusenhlitiyweni futsi wasebentisa lelo khono kute abuke buntfu lobuhle kubantfu.

16. Ungamkhutsata njani umntfwana wakho loseminyakeni yekutfomba kutsi atfutfuke?

¹⁶ Ngisho nobe ungeke ukhone kufundza inhlitiyo njengaJesu, kodvwa ungaba nekucondzisisa. Jehova angakusita kutsi ubone buntfu lobuhle emntfwaneni wakho loseminyakeni yekutfomba. Ngisho nobe angakudvumata, ungacali utsi ungumutfu lomubi nobe utsi utsandza kudala tinkinga. Ungayicabangi nekuyicabanga intfo lenjalo. Esikhundleni saloko, mtjele kutsi uyabubona buntfu bakhe lobuhle nekutsi uyaciniseka kutsi ufuna kwenta lokulungile. Kunake loko lakwentako kute atfutfuke futsi  umncome ngako. Msite atfutfukise buntfu bakhe lobuhle ngekumnika imisebenti leminyenti nangabe kuvela litfuba. Jesu wakwenta loku kubafundzi bakhe. Ngemuva kwemnyaka nesigamu ahlangene naNathanayeli (lophindze abitwe ngekutsi nguBhatalomewu), Jesu wamniketa umsebenti lobalulekile. Wamenta umphostoli futsi Nathanayeli wawufeza ngekwetsembeka lomsebenti lebekanikwe wona. (Lukha 6:13, 14; Imisebenti 1:13, 14) Esikhundleni sekwenta umntfwana wakho loseminyakeni yekutfomba ative shengatsi loko lakwentako akukabaluleki kangako, mncome futsi umkhutsate. Mente abone kutsi angakwenta wena kanye naJehova nitive nijabulile futsi angawasebentisa emakhono akhe kute akhonte Jehova.

17, 18. Ungaba yini umphumela nangabe uchubeka ufundzisa umntfwana wakho loseminyakeni yekutfomba kutsi akhonte Jehova?

¹⁷ Ungase utive njengemphostoli Pawula. Bekakhatsateke kakhulu ngebantfu lebekabatsatsa njengebantfwana bakhe. Labantfu ngulaba labasita kutsi bafundze ngaJehova futsi bekabatsandza kakhulu. Ngako bekumvisa buhlungu kucabanga kutsi labanye babo bangahle bangachubeki nekukhonta Jehova. (1 Khorinte 4:15; 2 Khorinte 2:4) Victor, lowakhulisa bantfwana labatsatfu utsi: “Iminyaka yabo yekutfomba yayingasimelula. Nobe kunjalo tikhatsi letimnandzi lesibe nato nabo, titendlula khashane tinsayeya lesabhekana nato. Ngelusito lwaJehova, sajabulela budlelwane lobuhle nebantfwana betfu.”

¹⁸ Batali, nisebenta ngekutimisela kute nifundzise bantfwana benu ngesizatfu sekutsi nibatsandza kakhulu. Ningapheli emandla. Cabangani nje kutsi nitawujabula kangakanani nangabe bantfwana benu batsatsa sincumo sekukhonta Nkulunkulu futsi bachubeke bamkhonta ngekwetsembeka.—3 Johane 4.