1. Ngubuphi bunguye baNkulunkulu lobuhamba embili, futsi kubati kukwenta utive njani ngaye?

LIBHAYIBHELI lisitjela kutsi “Nkulunkulu ulutsandvo.” (1 Johane 4:8) Kusho kutsini loko? Lutsandvo alusibo nje lobunye bunguye baJehova lobuhle. Lubunguye bakhe lobuyinhloko. Akagcini nje ngekuba nelutsandvo, kodvwa ulutsandvo. Yonkhe intfo layentako ilawulwa ngilo. Sibonga kakhulu ngekutsi lutsandvo lwenta Jehova wadala umhlaba nako konkhe lokuphilako!

2. Lutsandvo lwaNkulunkulu lusicinisekisa ngani? (Buka sitfombe lesisekucaleni kwalesihloko.)

² Jehova unemusa futsi uyitsandza kakhulu indalo yakhe. Indlela lasitsandza ngayo iyasicinisekisa kutsi injongo yakhe ngatsi itawufezeka nakanjani. Umphumela waloko utawuba kutsi bantfu labamlalelako batawutfola injabulo lenkhulu. Nasi sibonelo: Ngenca yelutsandvo lwakhe, Jehova “ubeke lilanga latakwehlulela ngalo umhlaba ngekulunga asebentisa loyo lamkhetsa,”  Jesu Khristu. (Imisebenti 17:31) Siyaciniseka kutsi lelo langa litawufika. Labo labamlalelako batawuba nelikusasa lelihle kakhulu lelitawuhlala kuze kube phakadze.

3. Bekutawuba njani kuphila kube Nkulunkulu akasitsandzi?

³ Belitawuba njani likusasa lebantfu kube Nkulunkulu ute lutsandvo? Bantfu bebatawuchubeka batibusa futsi bachubeke bayengwa ngunkulunkulu lote lutsandvo nalonenzondo, longuSathane. (2 Khorinte 4:4; 1 Johane 5:19; fundza Sembulo 12:9, 12.) Kube Jehova akasitsandzi, likusasa letfu belitawuba libi kakhulu!

4. Kungani Jehova avuma kutsi kubusa kwakhe kuvukelwe?

⁴ Ngalesikhatsi Sathane avukela kubusa kwaNkulunkulu, wabese uyenga nebatali betfu bekucala kutsi nabo bavukele. Walibukela phansi lilungelo laNkulunkulu lekuba nguMbusi Wendalo Yonkhe. Sathane abetitjela kutsi kubusa kwakhe kutawuba ncono kunekwaNkulunkulu. (Genesisi 3:1-5) Ngekuhlakanipha, Jehova wavumela Sathane kutsi abuse sikhatsi lesincane kuze akhombise bufakazi baloko. Kodvwa imiphumela iveta ngalokucacile kutsi Sathane kanye nebantfu bayehluleka kubusa.

5. Yini umlandvo webantfu loyiveta ngalokucacile?

⁵ Lamuhla live lichubeka liba libi kakhulu. Kuleminyaka lelikhulu leyendlulile, kufe bantfu labangetulu kwetigidzi letingu-100 etimphini. LiBhayibheli litsi ‘ngemalanga ekugcina’: “Bantfu lababi nebakhohlisi batawudlanga ngebubi.” (2 Thimothi 3:1, 13) Liphindze litsi: “Awu, Simakadze [Jehova], ngiyati kutsi kute umuntfu lotiphatsele yena imphilo yakhe. Akusiko kwemuntfu kutsi aticondzisele yena tinyatselo takhe.” (Jeremiya 10:23) Umlandvo uveta ngalokucacile kutsi lamavi aliciniso. Jehova akazange adale bantfu baba nelikhono lekutibusa ngaphandle kwesicondziso sakhe.

6. Kungani Nkulunkulu avumele bubi?

⁶ Ngekuvumela bubi kutsi buchubeke sikhatsi lesitsite, Jehova uvete nekutsi kubusa kwakhe kuphela lokungaba nemiphumela lemihle. Esikhatsini lesitako, Nkulunkulu utababhubhisa bonkhe bantfu lababi. Ngemuva kwaloko, Nkulunkulu utamtsatsela sinyatselo ngaleso sikhatsi nobe ngubani lolingabatako lilungelo lakhe lekubusa ngelutsandvo. Utawusebentisa umlandvo webantfu njengebufakazi bekutsi labo labavukelako kufanele basuswe ngekushesha. Bubi ngeke buphindze buvunyelwe.

7, 8. Jehova ulukhombise njani lutsandvo lwakhe?

⁷ Jehova usikhombise ngetindlela letinyenti kutsi uyasitsandza. Ase ucabange ngebuhle nebukhulu bemhlaba. Umhlaba unetigidzigidzi teticheme tetinkhanyeti futsi sicheme ngasinye siphindze sibe netigidzigidzi tetinkhanyeti nemaplanethi. Kulesicheme setinkhanyeti lokutsiwa yi-Milky Way kutfolakala nalenye inkhanyeti lokutsiwa  lilanga. Kube lilanga alikho, kute lobekungaphila emhlabeni. Konkhe loku kukhombisa kutsi Jehova unguMdali wetfu, kuphindze kukhombise nalobunye bunguye bakhe lobufaka ekhatsi emandla, kuhlakanipha nelutsandvo. Kuyacaca-ke kutsi “bunguye bakhe lobungabonakali buvetwe ngalokucacile kusukela ekudalweni kwelive kuchubeke, ngobe bubonakala etintfweni letidaliwe, futsi emandla akhe langapheli nebuNkulunkulu bakhe buyabonakala.”—Roma 1:20.

⁸ Jehova wadala umhlaba kute kuphilwe kuwo. Konkhe lokusemhlabeni kwenta bantfu netilwane kuphile. Nkulunkulu wenta insimu lenhle kute bantfu bahlale kuyo, futsi wabanika nengcondvo lephelele nemitimba lephelele, lobekwentelwe kutsi baphile phakadze. (Fundza Sembulo 4:11.) Ngetulu kwaloko, “nguye lowondla bonkhe bantfu netilwane tonkhe, ngobe umusa wakhe ume kuze kube phakadze.”—Tihlabelelo 136:25.

9. Nanobe Jehova anguNkulunkulu welutsandvo, yini langayitsandzi?

⁹ Jehova unguNkulunkulu lonelutsandvo, kodvwa uyakutondza lokubi. Sibonelo saloko kutsi Tihlabelelo 5:4-6 titsi ngaJehova: “UnguNkulunkulu longakutsandzi lokubi . . . Uyabatondza bonkhe labenta lokubi.” Uyabutondza ‘budlova kanye nebantfu labanemacebo lamabi.’

10, 11. (a) Yini letawenteka ngebantfu lababi? (b) Jehova utababusisa ngani bantfu labalalelako?

¹⁰ Ngesikhatsi lesifanele, Jehova utabususa bonkhe bubi emhlabeni ngobe unguNkulunkulu lonelutsandvo futsi uyabutondza bubi. LiVi laKhe liyasetsembisa litsi: “Benti balokubi batawushabalaliswa; kodvwa labalindzela Simakadze bayakudla lifa lemhlaba. Emvakwesikhashana benti balokubi bayawunyamalala.” Titsa taJehova ‘titawunyamalala tiphele njengentfutfu.’—Tihlabelelo 37:9, 10, 20.

¹¹ LiVi laNkulunkulu liphindze lisetsembise litsi: “Labalungile bayawudla lifa lemhlaba, bahlale kuwo kuze kube phakadze.” (Tihlabelelo 37:29, NW.) Bantfu labetsembekile ‘batawuhlala kahle, batijabulise ngekuthula lokukhulu.’ (Tihlabelelo 37:11) Kungani? Kungobe Nkulunkulu wetfu lonelutsandvo uhlale atentela lokuncono kakhulu tinceku takhe letetsembekile. LiBhayibheli litsi: “Utawesula tonkhe tinyembeti emehlweni abo, kufa ngeke kusaba khona, nekulila, nekukhala kanye nebuhlungu, ngeke kusaba khona. Tintfo letindzala setendlulile.” (Sembulo 21:4) Lelo kutawuba likusasa lelihle kakhulu lebantfu labalalelako nalabalujabulelako lutsandvo lwaNkulunkulu!

12. Ngumuntfu lonjani ‘lolungile’?

¹² LiBhayibheli litsi: “Ubombekisa lolungile, umcaphelisise locotfo, ngobe umuntfu wekuthula unelikusasa lelihle; kodvwa lababi bayawubhujiswa nya, nebantfwababo bate likusasa.” (Tihlabelelo 37:37, 38) Umuntfu “lolungile” ngulowati Jehova neNdvodzana yakhe futsi ente intsandvo yaNkulunkulu. (Fundza Johane 17:3.) Wetsemba mbamba kutsi “live liyendlula kanye  nesifiso salo, kodvwa loyo lowenta intsandvo yaNkulunkulu uhlala kuze kube phakadze.” (1 Johane 2:17) Ngesizatfu sekutsi kuphela kwalelive sekusedvute, kuyaphutfuma kutsi ‘setsembe Jehova, sigcine indlela yakhe.’—Tihlabelelo 37:34.

13. Ngusiphi sento lesikhulu lesakhombisa kutsi Nkulunkulu uyasitsandza?

¹³ Ngisho nobe sinesono, singamlalela Nkulunkulu. Singaphindze sibe nebungani lobuhle naye ngenca yemhlatjelo loyinhlawulo waJesu, loyindlela lehamba embili Nkulunkulu lakhombisa ngayo kutsi uyasitsandza. Jehova wenta kutsi kube nenhlawulo kuze bantfu labalalelako babe nelitfuba lekukhululwa esonweni nasekufeni. (Fundza Roma 5:12; 6:23.) Ngalesikhatsi asezulwini Jesu watsembeka sikhatsi lesidze kuNkulunkulu, ngako Jehova bekaciniseka kutsi iNdvodzana yakhe beyitawuhlala yetsembekile nasemhlabeni. NjengaBabe lonelutsandvo, Jehova weva buhlungu kakhulu ngesikhatsi abona indlela bantfu lebebayiphatsa ngayo iNdvodzana yakhe. Nanobe kunjalo, Jesu walisekela ngekwetsembeka lilungelo laNkulunkulu lekubusa futsi wakhombisa kutsi umuntfu lote sono angahlala etsembekile ngisho nasetimeni letimatima kakhulu.

14, 15. Kufa kwaJesu kubasita njani bantfu?

¹⁴ Nanobe bekaphatfwa kabi, Jesu wachubeka etsembekile futsi wasekela lilungelo laJehova lekubusa. Kufanele sijabule ngekutsi ngekufa kwakhe, Jesu waba yinhlawulo ngobe loko kuniketa bantfu litfuba lekuphila phakadze eveni lelisha laNkulunkulu! Umphostoli Pawula wachaza lutsandvo lolwakhontjiswa nguJehova naJesu ngekunikela ngenhlawulo. Watsi: “Ngobe ngesikhatsi sisebutsakatsaka, Khristu wafela bantfu labangamesabi Nkulunkulu. Loku kwenteka ngesikhatsi lesifanele. Kulukhuni kutsi lotsite afele umuntfu lomsulwa; mhlawumbe lotsite angamfela umuntfu lolungile. Nkulunkulu ukhombisa lutsandvo lwakhe kitsi, ngobe ngesikhatsi sisetoni, Khristu wasifela.” (Roma 5:6-8) Umphostoli Johane wabhala watsi: “Lutsandvo lwaNkulunkulu  lwavetwa ngaloku kitsi, ngobe Nkulunkulu wayitfumela eveni iNdvodzana yakhe lekuphela kwayo kuze sitfole kuphila ngayo. Ngulolo-ke lutsandvo, hhayi kutsi ngitsi lesitsandze Nkulunkulu, kodvwa nguye lowasitsandza, watfumela iNdvodzana yakhe kutsi ibe ngumhlatjelo wekuhlawulela tono tetfu.”—1 Johane 4:9, 10.

¹⁵ Jesu washo kutsi “Nkulunkulu walitsandza kakhulu live kangangekutsi waze wanikela ngeNdvodzana yakhe lekuphela kwayo, kuze wonkhe umuntfu lokholwa ngiyo angabhubhi, kodvwa atfole kuphila lokuphakadze.” (Johane 3:16) Ngisho nobe loko kwamvisa buhlungu kakhulu Jehova, kodvwa wanikela ngeNdvodzana yakhe kutsi ibe yinhlawulo. Loko kukhombisa indlela labatsandza ngayo bantfu. Utawuhlala abatsandza kuze kube phakadze. Pawula wabhala watsi: “Ngiyaciniseka kutsi ngisho nekufa, kuphila, tingilosi, babusi, tintfo letikhona nyalo naleto letitako, emandla, kuphakama, kujula, ngisho nanobe nguyiphi indalo, ngeke kukwati kusehlukanisa nelutsandvo lwaNkulunkulu lolukuKhristu Jesu iNkhosi yetfu.”—Roma 8:38, 39.

16. Uyini uMbuso waNkulunkulu lobuswa nguMesiya futsi ngubani Jehova lambeke kutsi abe yiNkhosi yawo?

¹⁶ Hulumende waNkulunkulu, longuMbuso waKhe lobuswa nguMesiya, nawo ubufakazi bekutsi Jehova uyabatsandza bantfu. Kanjani? Jehova sewuvele umkhetsile uMbusi lotsandza bantfu nalokumfanelako kubusa, lokunguJesu Khristu. (Taga 8:31) Nkulunkulu ukhetse nebantfu labangu-144 000 kutsi babuse naKhristu ezulwini. Nabavuswa ekufeni banyukela ezulwini, bahamba bati kutsi kunjani kuba ngumuntfu. (Sembulo 14:1) Ngalesikhatsi Jesu asemhlabeni, abefundzisa ngeMbuso waNkulunkulu futsi wafundzisa bafundzi bakhe kutsi bathantaze batsi: “Babe wetfu losezulwini, alingcweliswe libito lakho. UMbuso wakho awute. Intsandvo yakho ayentiwe emhlabeni njengasezulwini.” (Matewu 6:9, 10) Sikubuke ngalabovu kugcwaliseka kwemithantazo lefanana nalena, ngesikhatsi uMbuso waNkulunkulu uletsela bantfu tibusiso letinyenti!

17. Uyini umehluko emkhatsini wekubusa kwaJesu nekwebantfu?

¹⁷ Kunemehluko lomkhulu emkhatsini kwekubusa kwaJesu lokunelutsandvo kanye nekubusa kwebantfu. Kubusa kwebantfu kubangele timphi letibulele tigidzi tebantfu. Kodvwa uMbusi wetfu Jesu, usitsandza mbamba futsi ulingisa bunguye baNkulunkulu lobuhle kakhulu, ikakhulukati lutsandvo. (Sembulo 7:10, 16, 17) Jesu watsi: “Kotani kimi nonkhe nine lenikhatsele nalenisindvwako, ngitaniphumuta. Bekani lijoka lami kini, nifundze kimi, ngobe nginemoya lomuhle futsi nginenhlitiyo letfobekile, nitawutfolela imiphefumulo yenu kuphumula. Ngobe lijoka lami lilula, kantsi nemtfwalo wami awusindzi.” (Matewu 11:28-30) Lesi setsembiso selutsandvo sibili!

18. (a) Yini lebeyisolo yenteka kusukela nga-1914? (b) Sitawucoca ngani esihlokweni lesilandzelako?

¹⁸ LiBhayibheli likhombisa kutsi uMbuso waNkulunkulu wacala kubusa ezulwini nga-1914. Kusukela ngaleso sikhatsi, bekusolo kubutfwa emalunga lasele lamhlabeni alabo labatawubusa naJesu ezulwini, futsi kubutfwa ‘nesicumbi lesikhulu’ lesitawusindza nakubhujiswa lelive lelibi futsi singene eveni lelisha. (Sembulo 7:9, 13, 14) Sikhulu kangakanani lesicumbi lokukhulunywa ngaso? Yini Nkulunkulu layilindzele kuso? Sihloko lesilandelako sitawucoca ngalemibuto.