JEHOVA unguNkulunkulu lowephanako. (Jakobe 1:17) Loko sikubona kuko konkhe lakudalile. Ugcwalise sibhakabhaka ngetinkhanyeti, futsi wambonya umhlaba ngetitjalo letinhle.—Tihlabelelo 65:12, 13; 147:7, 8; 148:3, 4.

Umbhali weTihlabelelo 104 abebonga ngako konkhe Jehova lakudalile, ngako wabhala ingoma kute amdvumise. Nawufundza lengoma, utiva ngendlela umhlabeli lativa ngayo yini? Watsi: “Simakadze ngiyawumhlabelela, yingci nangisaphila. Ngiyawudvumisa Nkulunkulu wami, ngisaphila.” (Tihlabelelo 104:33) Nawe ufuna kwenta lokufanako yini?

Jehova ufuna simlingise ngekwephana. Usinika tizatfu letivakalako tekupha. Waphefumulela umphostoli Pawula kutsi abhale atsi: “Yala labo labanjingile kulelive kutsi bangatikhukhumeti, futsi bangabeki litsemba labo emcebeni longatsembakali, kodvwa balibeke kuNkulunkulu, losinika ngalokuphuphumako tonkhe tintfo lesitijabulelako. Batjele kutsi bente lokuhle, banjinge emisebentini lemihle, bephane, bakulungele nekwabelana, futsi ngaloko batibekele sisekelo lesihle sesikhatsi lesitako, kuze batewubambisisa kuphila lokungukonakona.”—1 Thimothi 6:17-19.

Encwadzini yakhe yesibili layibhalela baseKhorinte, Pawula wachaza loko lokufanele kube sisusa setfu nasipha labanye. Watsi: “Nguloyo naloyo akente njengobe ancumile enhlitiyweni yakhe, hhayi ngekutitila nobe ngekucindzetelwa, ngobe Nkulunkulu utsandza umuntfu lopha ajabulile.” (2 Khorinte 9:7) Ngubani lesimsitako nasipha? Pawula watsi sisita labanye ngekubapha loko labakudzingako, kodvwa siphindze sitisite tsine ngobe Jehova utasibusisa.—2 Khorinte 9:11-14.

Pawula wabese ukhuluma ngebufakazi lobukhulu bekupha kwaNkulunkulu ngalesikhatsi atsi: “Akabongwe Nkulunkulu ngalesipho sakhe lesingachazeki.” (2 Khorinte 9:15) ‘Sipho’ saJehova sihlanganisa tonkhe tintfo letinhle lasinika tona ngaJesu Khristu. Emavi ngeke akhone kuchaza indlela lesiligugu ngayo lesipho.

Singakhombisa njani kutsi siyabonga ngako konkhe Jehova naJesu labasentele kona nangaloko labasetasentela kona? Lenye indlela kutsi siphane ngesikhatsi setfu, emandla nangemcebo wetfu kute sikhonte Jehova futsi sisite labanye bafundze ngaye. Loku singakwenta ngisho nobe sinetintfo letinyenti nobe letincane.—1 Tikhronike 22:14; 29:3-5; Lukha 21:1-4.