Indlela YaJehova Yekubusa Ngiyo Lefanele!
Indlela YaJehova Yekubusa Ngiyo Lefanele!
“Longetulu Kwako Konkhe wengamele yonkhe imibuso yebantfu.”—DAN. 4:17.
1, 2. Ngutiphi letinye tizatfu letenta kubusa kwebantfu kungaphumeleli?
KUBUSA kwemuntfu kwehlulekile, futsi asikungabati loko. Sizatfu lesihamba embili lesenta kutsi bantfu behluleke kubusa, kungobe bete kuhlakanipha lokungabenta kutsi babuse ngendlela lephumelelako. Kuhluleka kwebantfu kubusa kubufakazi bekutsi babusi labanyenti batibonakalisa ‘bangulabatitsandzako, batsandza imali, batigcabha, batigabisa, balulata Nkulunkulu ngenhlamba, abalaleli, abatsetselelani, batinyoka, abatitsibi, banebulwane, batondza lokuhle, batsengisa labanye bantfu, futsi bakhukhumukiswa kutatisa.’—2 Thim. 3:2-4.
2 Endvulo, batali betfu bekucala bala kubuswa nguNkulunkulu. Kusenekwenteka ngekwenta kanjalo bebacabanga kutsi bakhetsa inkhululeko. Ecinisweni, bebakhetsa kubuswa nguSathane. Kuleminyaka letinkhulungwane letisitfupha yekubusa kwebantfu ngendlela lengakalungi, bantfu baye bahuhwa ‘ngumbusi walelive’ longuSathane, loku kubaletsele tinkinga emlandvweni wekuphila kwabo. (Joh. 12:31) I-The Oxford History of the Twentieth Century isho nakha emavi nayikhuluma ngebantfu lamuhla: Akusiti ngalutfo “kufuna live leliphelele.” Ichubeka ichaze itsi: “Akusiko nje kutsi angeke silitfole, kodvwa imetamo yekuliletsa iholela enhlekeleleni, ekubuseni lokucindzetelako kanye nasemphini lematima.” Loku kukhombisa ngalokusebaleni kutsi kubusa kwemuntfu angeke kuphumelele.
3. Yini lesingayisho ngendlela Nkulunkulu abetawubusa ngayo kube bo-Adamu na-Eva abazange bone?
3 Kungemukeli kwebatali betfu kubuswa ngumbusi loncono—Nkulunkulu, kwabangela inhlekelele lenkhulu! Ecinisweni asati kutsi Jehova abetayihlela kanjani indlela yakhe yekubusa umhlaba kube bo-Adamu na-Eva bachubeka bacotfo kuye. Nobe kunjalo, singaciniseka kutsi kube bantfu bebakhetse kubuswa nguNkulunkulu, bekutawuba nelutsandvo nekungakhetsi emhlabeni. (Imis. 10:34; 1 Joh. 4:8) Ngekwembono waNkulunkulu wekuhlakanipha longeke ucatsaniswe, singaciniseka ngekutsi nangabe sintfu besitigcine ngephasi kwekubusa kwaJehova, onkhe emaphutsa labangelwe kukhetsa kwebantfu kabi, besingawabalekela. Kubusa kwaNkulunkulu kanye nemsebenti wakhe, ‘bekutawusutsisa tonkhe tifiso talophilako.’ (Hla. 145:16) Kalula nje, abetawuba ngumbusi loncono kakhulu. (Dut. 32:4) Kuyadzabukisa kutsi bantfu bala kubuswa nguye.
4. Sathane abevunyelwe kutsi abuse ngelizinga lelingakanani?
4 Nobe kunjalo, kubalulekile kukhumbula kutsi nobe Jehova avumela bantfu kutsi batibuse, akusho kutsi waliyekela lilungelo lakhe lekubusa tidalwa takhe. Ngisho nenkhosi yaseBhabhulona lenemandla, ekugcineni yacaphele kutsi, “Longetulu Kwako Konkhe wengamele yonkhe imibuso yebantfu.” (Dan. 4:17) Ngekuhamba kwesikhatsi, uMbuso waNkulunkulu uyawubangela kutsi intsandvo yaNkulunkulu yentiwe. (Mat. 6:10) Kulesikhatsi lesincane lesisele, Jehova uvumele Sathane kutsi abuse ‘njengankulunkulu walomhlaba’ kute anikete imphendvulo lecacile yalendzaba leyavetwa ngulommangaleli. (2 Khor. 4:4; 1 Joh. 5:19) Nobe kunjalo, Sathane uyehluleka kwenta lokungetulu kwaloko Jehova lamvumele kutsi akwente. (2 Khro. 20:6; catsanisa naJobe 1:11, 12; 2:3-6.) Kusukela endvulo, bekusolo kunebantfu labakhetsa kuba seluhlangotsini lwaNkulunkulu, ngisho nobe baphila eveni lelibuswa sitsa saNkulunkulu lesikhulu.
Kubusa KwaNkulunkulu Ema-Israyeli
5. Ngukuphi kutinikela ema-Israyeli lakwenta kuNkulunkulu?
5 Kusukela esikhatsini sa-Abela kuze kube sesikhatsini sema-Israyeli, bantfu labanyenti bebakhonta Jehova futsi balalela imitsetfo yakhe. (Heb. 11:4-22) Ngesikhatsi saMosi, Jehova wenta sivumelwane nesitukulwane saJakobe futsi ekugcineni saba sive sema-Israyeli. Nga-1513 ema-Israyeli atinikela futsi atitfoba ngekwemukela Jehova njengeMbusi wawo, aze atsi: “Konkhe lokushiwo nguSimakadze [Jehova] siyawukwenta.”—Eks. 19:8.
6, 7. Kubusa kwaNkulunkulu ema-Israyeli kuchazwe ngatiphi tindlela?
6 Jehova abe nenjongo ngekukhetsa ema-Israyeli kutsi abe bantfu bakhe. (Fundza Dutheronomi 7:7, 8.) Kuwakhetsa kwakhe kwakusho lokungetulu nje kwekunakekela inhlalakahle yawo. Kwakuhlanganisa libito laNkulunkulu kanye nebukhosi bakhe, futsi loku kokubili kwakubaluleke kakhulu. Ema-Israyeli bekudzingeka afakazele kutsi Jehova nguye yedvwa Nkulunkulu weliciniso. (Isa. 43:10; 44:6-8) Ngetulu kwaloko Jehova watsi kulesive: “Kuto tonkhe tive letisebusweni bemhlaba, Simakadze [Jehova] ukhetse nine kutsi nibe sive lesiligugu lakhe.”—Dut. 14:2.
7 Indlela Jehova labebusa ngayo ema-Israyeli, yayikhombisa kutsi uyakucaphela kungapheleli kwawo. Ngesikhatsi lesifananako, imitsetfo yakhe beyiphelele futsi iveta timfanelo teMuphi wayo. Imiyalo yaJehova leyaniketwa ngaMosi, yaveta bungcwele baNkulunkulu, lutsandvo lwakhe ngekulunga, sifiso sakhe sekutsetselela kanye nekubeketela kwakhe. Kamuva, esikhatsini saJoshuwa kanye nesitukulwane sakhe, lesive sawulalela umtsetfo waJehova sajabulela kuthula kanye netibusiso takamoya. (Josh. 24:21, 22, 31) Lomlandvo wema-Israyeli ubonisa kuphumelela kwekubusa kwaJehova.
Kubusa Kwebantfu Kuba Nemiphumela Lemibi
8, 9. Ngusiphi sicelo lesingakahlakaniphi lesentiwa ngema-Israyeli, futsi saba namuphi umphumela?
8 Ngaletinye tikhatsi ema-Israyeli abemshiya Nkulunkulu futsi abelahlekelwa sivikelo sakhe. Ekugcineni, atjela umphrofethi Samuweli kutsi afuna inkhosi lengumuntfu. Ngako Jehova watjela umphrofethi Samuweli kutsi asilalele sicelo sawo. Waphindze watsi: “Akusiwe labamlahlile, kodvwa sebalahle mine kutsi ngibe yinkhosi yabo.” (1 Sam. 8:7) Nobe Jehova avumela ema-Israyeli kutsi abe nenkhosi lengumuntfu, wawecwayisa ngekutsi kubuswa ngumuntfu kutawuba nemiphumela lemibi.—Fundza 1 Samuweli 8:9-18.
9 Umalandvo wakhombisa kuba liciniso kwalesecwayiso saJehova. Kubuswa yinkhosi lengumuntfu kwaholela ema-Israyeli etinkingeni letimatima, ikakhulukati nangalesikhatsi lenkhosi ikhombisa kungetsembeki. Nasicabanga ngalesibonelo sema-Israyeli, akusimangalisi kutsi kusukela endvulo kubusa kwebantfu labangamati Jehova akuzange kuyiletse imiphumela lemihle nalengapheli. Kuliciniso kutsi labanye bantfu betembusave bacela tibusiso taNkulunkulu kute bakwati kuletsa kuthula nekulondzeka. Kodvwa Nkulunkulu angababusisa njani bantfu labangafuni kubuswa nguye?—Hla. 2:10-12.
Sive Lesisha Lesibuswa NguNkulunkulu
10. Yini Nkulunkulu layikhetsa esikhundleni sa-Israyeli lobekasive sakhe?
10 Sive saka-Israyeli sasingakatimiseli kukhonta Jehova ngekwetsembeka. Ngaleso sizatfu, samala Mesiya lokhetfwe nguNkulunkulu, ngako Jehova naye wasala lesive futsi abefuna kutsi sitsatselwe sikhundla licembu lebantfu labakha sive lesisha. Umphumela waba kutsi ngemnyaka wanga-33 C.E. libandla lebuKhristu letikhonti taJehova letigcotjiwe lakhiwa. Ecinisweni lelobandla lalisive lesisha ngephansi kweligunya laJehova lekubusa. Pawula wakhuluma ngalo ‘njengema-Israyeli aNkulunkulu.’—Gal. 6:16.
11, 12. Mayelana nekuhola, ngukuphi kufanana lokukhona emkhatsini wa-Israyeli wasendvulo kanye ‘na-Israyeli waNkulunkulu’?
11 Emkhatsini wesive saka-Israyeli kanye ‘na-Israyeli waNkulunkulu,’ kunemehluko lotsite kanye nekufanana lokutsite. Ngendlela lengafanani nema-Israyeli asendvulo, libandla lebuKhristu lite inkhosi lengumuntfu futsi kulo kute sidzingo sekunikela ngetilwane kute utsetselelwe tono. Kufanana lokukhona emkhatsini wesive sema-Israyeli kanye nelibandla lebuKhristu, lilungiselelo lemadvodza lamadzala. (Eks. 19:3-8) Labadzala labangemaKhristu abawucindzeteli umhlambi. Esikhundleni saloko, belusa libandla futsi ngekutitsandzela bayahola emsebentini webuKhristu. Basebentelana ngelutsandvo nabo bonkhe bantfu ebandleni, babaniketa ludvumo kanye nenhlonipho.—2 Khor. 1:24; 1 Phet. 5:2, 3.
12 Emalunga ‘a-Israyeli waNkulunkulu’ kanye nebangani bawo ‘letinye timvu’ bayakhula ekumatiseni Jehova kanye nendlela yakhe yekubusa, ngekutsi bachubeka bazindla ngendlela Nkulunkulu lasebentelana ngayo nema-Israyeli. (Joh. 10:16) Nasi sibonelo: Umlandvo ukhombisa kutsi labaholi lababantfu ka-Israyeli bebahuha bantfu lebangephasi kwabo, ngalokuhle nobe ngalokubi. Leliciniso likhombisa kutsi labo labaholako emabandleni ebuKhristu, nobe nje bangasibo babusi njengalamakhosi asendvulo, kufanele babeke sibonelo lesihle sekukholwa.—Heb. 13:7.
Indlela Jehova Labusa Ngayo Lamuhla
13. Ngusiphi sentakalo lesibalulekile lesenteka nga-1914?
13 EmaKhristu lamuhla emhlabeni wonkhe amemetela kutsi kubusa kwebantfu kutawuphela masinyane. Ngemnyaka wanga-1914, Jehova wamisa uMbuso wakhe ezulwini loholwa yiNkhosi yakhe layikhetsile, Jesu Khristu. Ngaleso sikhatsi, waniketa Jesu ligunya ‘lekuhamba ancoba futsi acedzele kuncoba kwakhe.’ (Semb. 6:2) INkhosi lensha lemisiwe yatjelwa: “Busa wena emkhatsini wetitsa takho.” (Hla. 110:2) Kuyadzabukisa kutsi tive tichubekile nekwala kutitfoba ekubuseni kwaJehova. Tichubeke ngemandla tenta shengatsi ‘akekho Jehova.’—Hla. 14:1.
14, 15. (a) Nguyiphi indlela uMbuso waNkulunkulu losibusa ngayo lamuhla, futsi ngaleso sizatfu, ngimiphi imibuto lokufanele sitibute yona? (b) Lamuhla, indlela yaNkulunkulu yekubusa ibonakala ngani kutsi ngiyo lefanele?
14 Labambalwa kulabo labagcotjiwe labangemalunga ‘a-Israyeli waNkulunkulu’ solo bakhona lapha emhlabeni. Njengobe babomnakaboJesu, bachubeka batibonakalisa ‘njengemancusa aKhristu.’ (2 Khor. 5:20) Basisebenti lesetsembekile nalesihlakaniphile lesiniketa labo labagcotjiwe kudla kwakamoya kanye nesicumbi lesikhulu semaKhristu lesesifinyelela etigidzini, lesinelitsemba lekuphila phakadze emhlabeni. (Mat. 24:45-47; Semb. 7:9-15) Sibusiso saJehova kulelo lungiselelo siyabonakala endleleni tikhonti takhe leteneliseke ngayo ngakamoya lamuhla.
15 Umuntfu nemuntfu kufanele atibute: ‘Ngiyawubona yini umsebenti lokufanele ngiwente ebandleni lebuKhristu? Ngiyayisekela yini indlela yaJehova yekubusa? Ngiyajabula yini ngekuba ngulomunye walabo labayawubuswa nguMbuso waJehova? Ngitimisele yini kuchubeka ngitjela labanye ngeMbuso waNkulunkulu ngelizinga lengingakhona ngalo?’ Njengelicembu, sitimisele kutitfoba esicondzisweni lesiniketwa sona Sigungu Lesibusako futsi sitimisele kubambisana nalabadzala labamisiwe emabandleni. Ngekwenta kwetfu kanjalo, siyobe sibonisa kutsi siyayemukela indlela yaNkulunkulu yekubusa. (Fundza Hebheru 13:17.) Kutitfoba kwekutitsandzela ekugcineni kutawuphumela emhlabeni lonebunye lowehlukile kulelive lelite kuthula. Kuphindze kubangele kuthula nekulunga futsi kuletse ludvumo kuJehova. Konkhe loku kubufakazi bekutsi indlela yakhe yekubusa ngiyo kuphela lefanele.
Kubusa KwaJehova Kuyaphumelela
16. Ngukuphi kukhetsa lokufanele kwentiwe bantfu bonkhe lamuhla?
16 Sikhatsi sesisondzele lapho timphikiswano letaphakama e-Edeni titawucatululwa khona. Nyalo sikhatsi sekutsi bantfu bakhetse. Ngamunye wetfu kufanele akhetse kutsi utawemukela kubusa kwaJehova yini nobe utawuchubeka abambelele ekubuseni kwemuntfu. Kulilungelo letfu kusita labo labatfobekile kutsi bakhetse kahle. Ngekushesha, e-Amagedoni, indlela yaJehova yekubusa itawutsatsela bohulumende bebantfu labahungwa nguSathane sikhundla, bese yona ibusa ngalokuphelele. (Dan. 2:44; Semb. 16:16) Kubusa kwebantfu kuyawuphela nya, futsi uMbuso waNkulunkulu utawubusa umhlaba wonkhe. Emhlabeni wonkhe, indlela yaJehova yekubusa kuyawubonakala kutsi ngiyo lefanele.—Fundza Sembulo 21:3-5.
17. Nguwaphi emaciniso lenta labo labatfobekile kutsi bakhetse kahle mayelana nekubusa?
17 Labo labasolo bangakakhetsi kukhonta Jehova, kufanele ngemthandazo bacabangisise ngetinzuzo letitawuletfwa yindlela yaNkulunkulu yekubusa. Kubusa kwebantfu kwehlulekile kucatulula inkinga yebugebengu, kanye nebuphekula. Kubusa kwaNkulunkulu kutawususa bonkhe bubi emhlabeni. (Hla. 37:1, 2, 9) Kubusa kwebantfu kwente kwaba netimphi letingapheli, kodvwa kubusa kwaNkulunkulu kutawenta kutsi ‘kubete timphi emhlabeni wonkhe jikelele.’ (Hla. 46:9) Phela kubusa kwaNkulunkulu kutawuphindze kwente kutsi kube nekuthula emkhatsini webantfu netilwane. (Isa. 11:6-9) Kuhlupheka nendlala tintfo letisihluphako njengobe sibuswa bantfu, kodvwa kubusa kwaNkulunkulu kutayisusa indlala nekuhlupheka kungaphindze kube khona. (Isa. 65:21) Ngisho kubusa kwebantfu lokunetinhloso letinhle kwehlulekile kususa kugula kanye nekufa, kodvwa nasekubusa umbuso waNkulunkulu, labo labagulako nalabo labagugile batawuphila saka futsi babuyele ebusheni. (Jobe 33:25; Isa. 35:5, 6) Ngako-ke, umhlaba utawuba lipharadisi futsi ngaleso sikhatsi ngisho nalabafile batawuvuswa.—Luk. 23:43; Imis. 24:15.
18. Singakhombisa njani kutsi siyakholelwa kutsi indlela yaNkulunkulu yekubusa ngiyo lefanele?
18 Yebo, kubusa kwaNkulunkulu kutawususa bonkhe bubi Sathane labenta nakadvonsela batali betfu bekucala kutsi bahlubuke kuMdali wabo. Sathane abeloku abangela bubi iminyaka lengu-6 000, kodvwa Nkulunkulu ngaKhristu, utawulungisa loyo monakalo ngeminyaka lengu-1 000 nje kuphela. Lobu bufakazi lobucacile lobukhombisako kutsi indlela yaNkulunkulu yekubusa ngiyo lefanele! NjengaboFakazi baNkulunkulu wetfu, simemukela njengeMbusi wetfu. Ngako-ke, ngaso sonkhe sikhatsi asikhombise kutsi sitikhonti taJehova futsi sifuna kubuswa nguMbuso wakhe, siphindze sijabule ngekuba boFakazi bakhe. Shengatsi singasebentisa sonkhe sikhatsi lesinaso sitjele bonkhe labo labanesifiso sekulalela kutsi indlela yaJehova yekubusa, ngiyo lefanele.
Mayelana Nendlela yaNkulunkulu YekuBusa, Sifundzeni Kulemibhalo . . .
[Imibuto Yesihloko Lesifundvwako]
[Titfombe ekhasini 29]
Kubusa kwaJehova akukashintji
[Sitfombe ekhasini 31]
Kutitfoba ngekutitsandzela endleleni yaJehova yekubusa, kwenta sibe nekuthula emhlabeni wonkhe