Indlela YaSathane Yekubusa Angeke Iphumelele
Indlela YaSathane Yekubusa Angeke Iphumelele
“Kungeke kubahambele kahle lababi.”—SHU. 8:13.
1. Kungani sahlulelo salababi kuyindzaba ledvudvutako?
NGEKUSHESHA lokukhulu lababi batawehlulelwa. Kutawudzingeka baphendvule ngaloko labakwentile. (Taga 5:22; Shu. 8:12, 13) Leto tindzaba letimnandzi ikakhulukati kulabo labatsandza kulunga labaphatfwa kabi bantfu lababi. Lokubaluleke kakhulu, emkhatsini walabo lababi labayotfola sahlulelo kutawube kunababe webubi, Sathane Develi.—Joh. 8:44.
2. Kungani kwadzingeka sikhatsi lesanele kute kulungiswe lendzaba leyaphakama e-Edeni?
2 Emuva le e-Edeni, Sathane agcwele umoya wekucabanga kutsi uncono kunaletinye tidalwa, wenta kutsi bantfu bayilahle indlela yaJehova yekubusa. Umphumela waba kutsi batali betfu bekucala babambisana naSathane ekuvukeleni ligunya laJehova futsi baba toni emehlweni akhe. (Rom. 5:12-14) Ecinisweni, Jehova bekawati umphumela lobewutawuletfwa kungamhloniphi nekuvukela kwabo. Leso sehlulelo lebesitawenteka nobe kanjani, kwadzingeka kutsi tonkhe tidalwa letibantfu tisati. Ngako-ke, kwakudzingeka sikhatsi lesenele kute kulungiswe lendzaba futsi kwentiwe kucace kutsi letihlubuki tatente lokubi kakhulu.
3. Kufanele sibabheke njani bohulumende bebantfu?
3 Njengobe bantfu bala kucondziswa nguJehova, kwadzingeka kutsi batibekele bohulumende babo. Umphostoli Pawula abhalela emaKhristu aseRoma, wakhuluma ngabohulumende bebantfu njengalabo ‘labatiphatsimandla tembuso.’ Ngesikhatsi saPawula, tiphatsimandla tembuso ngalokuyinhloko kwakunguhulumende waseRoma ngephasi kweMbusi Nero, lowabusa kusukela nga-54-68 C.E. Pawula watsi letiphatsimandla tembuso “tibekwe nguNkulunkulu.” (Fundza Roma 13:1, 2.) Pawula abesho kutsi kubusa kwebantfu kuncono yini kunekwa Nkulunkulu? Cha, abengasho njalo. Kunaloko, kalula nje abesho kutsi njengobe Jehova asevumele bohulumende bebantfu kutsi babe khona, emaKhristu kufanele ahloniphe loko ‘lokumiswe nguNkulunkulu’ futsi abemukele labo babusi.
Indlela Leholela Ebubini
4. Ase uchaze kutsi kungani kubusa kwebantfu kungeke kuphumelele.
4 Nobe kunjalo, kubusa kwebantfu lokonakaliswe nguSathane angeke kuphumelele. Ngani? Ngobe akukasekelwa ekuhlakanipheni kwasezulwini. NguJehova kuphela lohlakaniphe ngalokuphelele. Ngako-ke, nguye kuphela lesingametsemba futsi longasicondzisa mayelana nekubusa lokuphumelelako. (Jer. 8:9; Rom. 16:27) Ngalokungafanani nebantfu labafundza emaphutseni abo, Jehova ngaso sonkhe sikhatsi uyayati indlela lenhle kakhulu yekwenta tintfo. Nobe ngabe ngumuphi hulumende longalandzeli ticondziso takhe, nakanjani angeke uphumelele. Ngaleso sizatfu—sesingabali nje bubi lobubangelwa kubusa kwaSathane—indlela yaSathane yekubusa ngabohulumende bebantfu yavele nje yabonakala ekucaleni kutsi angeke iphumelele.
5, 6. Yini leyenta Sathane wahlubuka kuJehova?
5 Umuntfu locabangisisa kahle, ngalokuvamile uyala kutimbandzakanya nentfo labona kamhlophe kutsi angeke iphumelele. Nakangachubeka ngenkhani ayente leyontfo, angavele abone kutsi wente liphutsa. Umlandvo ukufakazele tikhatsi letinyenti kutsi akusiti kumelana neMdali lophakeme. (Fundza Taga 21:30.) Nobe kunjalo, ngekutsi Sathane watibona ancono kunaletinye tidalwa futsi watatisa, wavele wahlubuka kuJehova. Ngekwenta kanjalo, Develi wakhetsa indlela leholela ekufeni.
6 Indlela lembi yaSathane yekubusa kamuva yaboniswa ngulomunye umbusi waseBhabhulona lowatsi: “Ngiyawenyukela etulu ezulwini. Ngiyawuphakamisa sihlalo sami sebukhosi, sibe ngetulu kwetinkhanyeti taNkulunkulu. Ngiyawuhlala esihlalweni sebukhosi etikwentsaba yenhlanganiso yabonkulunkulu, esicongweni sentsaba lengcwele. Ngiyakwenyukela ngetulu kweticongo temafu. Ngiyawutenta ngifanane naNkulunkulu Losetikwako Konkhe.” (Isa. 14:13-15) Loyo mkhankaso waloyo mbusi awuphumelelanga, futsi kuyadzabukisa kutsi umbuso waseBhabhulona waphela. Ngendlela lefananako, Sathane kanye nelive lakhe batawubhujiswa baphele nya.
Kungani Nkulunkulu Avumele Kutsi Lesimo Sichubeke?
7, 8. Ngutiphi letinye tinzuzo letibe khona ngekutsi Jehova avumele kuhlupheka kuchubeke sikhashana?
7 Labanye bangatibuta: Kungani Jehova angazange abavimbele bantfu kutsi babe seluhlangotsini lwaSathane? Kungani angabavimbelanga nekutsi balandzele indlela yaSathane yekubusa lesati kahle kutsi angeke iphumelele? NjengaNkulunkulu Somandla, bekangakwenta loko. (Eks. 6:3) Kodvwa akazange akwente. Kuhlakanipha kwakhe kwamenta wati kutsi nakangema nje sikhashana angangeneli ekuhlubukeni kwemuntfu, kwenta kwakhe kanjalo esikhatsini lesitako kutawuletsa imiphumela lemihle. Ngekuhamba kwesikhatsi, kutawubonakala kutsi Jehova ulungile nekutsi unguMbusi lonelutsandvo. Tinceku takhe letetsembekile titawuzuza ngesincumo sakhe.
8 Kube bantfu bala kucondziswa nguSathane, futsi bala nekutibusa ngaphandle kwaNkulunkulu, lusizi lolwehlela umndeni webantfu lamuhla, belungeke lube khona. Nobe kunjalo, kuvumela kwaJehova kutsi bantfu batibuse sikhashana kube netinzuzo letitsite. Kwente labo labanetinhlitiyo leticotfo bakubona kuhlakanipha kwekulalela Nkulunkulu nekumetsemba. Emakhulwini eminyaka leyendlulile, bantfu betame tinhlobo letinyenti letehlukehlukene tabo hulumende, kodvwa kute namunye kulabohulumende lophumelele. Loko kucinise tikhonti taNkulunkulu, kwatenta tetsemba nakakhulu kutsi indlela yaJehova yekubusa ngiyo kuphela lencono kakhulu. Kuliciniso kutsi kuvumela kwaJehova kubusa kwaSathane lokubi, kuletsele bantfu kuphila lokumatima, lokufaka ekhatsi ngisho nato tinceku takhe letetsembekile. Kodvwa kuvumela kwaNkulunkulu kutsi bubi buchubeke sikhashana, kuphindze kwatizuzisa tinceku takhe letetsembekile.
Kuhlubuka Lokwasita Ekudvumiseni Jehova
9, 10. Chaza kutsi indlela yaSathane yekubusa iholele njani ekudvumiseni Jehova.
9 Kuvumela kwaJehova kutsi bantfu badukiswe nguSathane futsi batibuse, akukakwenti kubusa kwakhe kwalahlekelwa sitfunti. Ngalokwehlukile, umlandvo ukhombisa kutsi emavi aJeremiya lamayelana nekwehluleka kwebantfu kutibusa, abe liciniso. (Fundza Jeremiya 10:23.) Ngetulu kwaloko, kuvukela kwaSathane kunikete Jehova litfuba lekukhombisa timfanelo Takhe letinhle ngalokucacile. Njani?
10 Njengobe sesibone umonakalo lomubi longumphumela wekubusa kwaSathane, timfanelo taJehova letiphelele sekuyacaca kutsi ngutiphi. Ngaleyo ndlela, Jehova ube ngulobalulekile kulabo labamtsandzako. Kungahle kubadide labanye kutsi indlela yaSathane yekubusa isitile ekudvumiseni Nkulunkulu. Ivete indlela emandla aJehova lasebenta ngayo ekuhlaselweni kwebukhosi bakhe. Kute sicacise leliciniso, ase sifundze kafishane ngaletinye tetimfanelo taJehova futsi sibone kutsi indlela yaSathane lembi yekubusa imente njani Jehova wabonisa letimfanelo ngetindlela letinyenti.
11. Jehova ulubonise njani lutsandvo lwakhe?
11 Lutsandvo. ImiBhalo isitjela kutsi “Nkulunkulu ulutsandvo.” (1 Joh. 4:8) Kudalwa kwebantfu kubonisa lutsandvo lwaNkulunkulu. Ngetulu kwaloko, indlela lenhle lesidalwe ngayo iniketa bufakazi belutsandvo lwaNkulunkulu. Jehova waphindze wanika bantfu likhaya lelihle lelinato tonkhe tintfo letibajabulisako. (Gen. 1:29-31; 2:8, 9; Hla. 139:14-16) Kodvwa kwatsi nakucala bubi kulelikhaya lebantfu, Jehova wabonisa lutsandvo lwakhe ngendlela lehlukile. Walubonisa njani? Umphostoli Johane wabhala nankha emavi macondzana naJesu: “Nkulunkulu walitsandza live kakhulu kangangekutsi wadzimate wanikela ngeNdvodzana yakhe lekukuphela kwayo, kuze kutsi nome ngubani lokholwa ngiyo angabhubhi, kodvwa abe nekuphila lokuphakadze.” (Joh. 3:16) Jehova akazange yini abonise lutsandvo lwakhe ngebantfu ngendlela lemanalisako ngalesikhatsi atfumela iNdvodzana yakhe lekukuphela kwayo emhlabeni kutsi itewuhlenga toni? (Joh. 15:13) Lesi sibonelo lesikhulu kakhulu selutsandvo futsi sisibonelo kubantfu, sibaniketa litfuba lekubonisa lutsandvo lwaNkulunkulu lekutidzela ekuphileni kwabo kwamalanga onkhe, njengobe naJesu enta.—Joh. 17:25, 26.
12. Emandla aJehova abonakale ngayiphi indlela?
12 Emandla. ‘NguNkulunkulu, Somandla,’ kuphela lodala tintfo tiphile. (Semb. 11:17; Hla. 36:9) Umuntfu nakatalwa ucala imphilo lensha. Usuke afanana neliphepha lelingakabhalwa lutfo. Nakafa, kuba shengatsi leliphepha sewuligcwalise ngalokutsite ngobe usuke sekente tincumo, atsetse tinyatselo letitsite futsi ahlangabetane netintfo letitsite ekuphileni letikuvete ebaleni loko langiko nobe buntfu bakhe. Leyo mininingwane ihlala enkhumbulweni yaJehova. Ngekuhamba kwesikhatsi, Jehova angaphindze amvuse loyo muntfu aphile, aphelele ngendlela yakhe lehlukile. (Joh. 5:28, 29) Kodvwa bekungasiyo injongo yaNkulunkulu kutsi bantfu bafe, kodvwa loko kunikete Jehova litfuba lekubonisa kutsi unawo emandla ekuvusa labafile. Nembala, Jehova ‘nguNkulunkulu, Somandla.’
13. Umhlatjelo waJesu wakubonisa njani kulunga kwaJehova lokuphelele?
13 Kulunga. Jehova akawacali emanga, futsi akenti ngendlela lengakalungi. (Dut. 32:4; Thit. 1:2) Ngaso sonkhe sikhatsi ukhuluma liciniso futsi ubonisa kulunga, ngisho nobe loko kungamzuzisi yena. (Rom. 8:32) Jehova weva buhlungu ngalesikhatsi abona iNdvodzana yakhe ifa elugodvweni shengatsi ingumuntfu longaketsembeki. Nobe kunjalo, ngekutsi unelutsandvo ngebantfu labangakapheleli, Jehova wasivumela lesentakalo lesibuhlungu kutsi senteke kute abonise kulunga kwakhe lokuphelele. (Fundza Roma 5:18-21.) Lelive leligcwele kungalungi laniketa Jehova litfuba lekubonisa kulunga kwakhe ngendlela lesezingeni lelisetulu.
14, 15. Kuhlakanipha kwaJehova lokunemandla kanye nekubeketela kwakhe kubonakale ngatiphi tindlela?
14 Kuhlakanipha. Ngemuva kwekuba bo-Adamu na-Eva bonile, Jehova waveta indlela langalungisa ngayo wonkhe lomonakalo lowabangelwa tihlubuki. (Gen. 3:15) Sento lesinjalo sekusheshe atsatse sinyatselo senta kuhlakanipha kwaJehova kwaba ngulokujulile. (Rom. 11:33) Akukho lebekungavimba likhono laNkulunkulu lekutsi alungise lenkinga ngendlela lephumelelako. Eveni leligcwele kutiphatsa lokubi, timphi, kungacabangeli, kungalaleli, kungabi namusa kanye nekutentisa, Jehova unematfuba lamanyenti ekubonisa indalo yakhe kutsi kuyini kuhlakanipha lokunguko sibili. Umfundzi longu Jakobe watsi: “Kodvwa kuhlakanipha lokuchamuka ngetulu kwekucala kumsulwa, bese kuba nekuthula, nekutfobeka, nekulalela, kugcwele bubele netitselo letihle; akunalo lubandlululo nekutentisa.”—Jak. 3:17.
15 Kubeketela Neluvelo. Timfanelo taJehova letifanana nekubeketela neluvelo tibaluleke kakhulu ngobe ngaphandle kwato abengeke akwati kusebentelana nebantfu labangakapheleli, labanesono futsi nalabenta emaphutsa. Sifiso sakhe Jehova ngiso lesamenta wafuna kuveta letimfanelo letimangalisako ngelizinga lelisetulu iminyaka letinkhulungwane, ngaleso sizatfu kufanele sijabule kakhulu. Umphostoli Phetro watsi ‘kubeketela kweNkhosi sibokutsatsa ngobe kusentela ematfuba ekusindziswa.’—2 Phet. 3:9, 15.
16. Kungani kulungela kwaJehova kutsetselela kusiletsela injabulo lenkhulu?
16 Ukulungele Kutsetselela. Sonkhe sitoni, futsi siphosisa ngetindlela letinyenti. (Jak. 3:2; 1 Joh. 1:8, 9) Ngako kufanele sijabule ngekutsi Jehova ufuna kusitsetselela “ngalokukhululekile.” (Isa. 55:7) Ase sicabange nganali liciniso: Ngesizatfu sekutsi sitalwe sitoni letingakapheleli, sijabula kakhulu ngalesikhatsi Nkulunkulu asitsetselela tiphosiso tetfu. (Hla. 51:5, 9, 17) Kuboniswa lutsandvo nguJehova kukhulisa lutsandvo lwetfu ngaye futsi kusikhutsata kutsi silandzele sibonelo sakhe ekusebenteni nalabanye.—Fundza Kholose 3:13.
Lokwenta Lelive Ligule
17, 18. Ngutiphi tindlela letikhombisa kutsi indlela yaSathane yekubusa angeke iphumelele?
17 Sonkhe simiso selive laSathane—singumphumela wekubusa kwakhe—sehluleke ngalokuphindziwe kubusa kulamakhulu eminyaka lendlulile. Nga-1991, liphepha i-The European latsi: “Lelive liyagula yini? Yebo liyagula, kodvwa aliguliswa nguNkulunkulu—kugula kwalelive kubangelwe bantfu labakulo.” Nembala loku kuliciniso, Sathane wahuha batali betfu bekucala kutsi bakhetse kubuswa ngumuntfu kunekutsi babuswe nguJehova. Ngekwenta loko, bakhetsa umbusi longeke aphumelele. Buhlungu kanye nekuhlupheka bantfu lababhekana nako emhlabeni wonkhe, kutimphawu letikhombisa kutsi kubusa kwemuntfu ngiko lokuyimbangela yabo bonkhe bubi kanye nekugula.
18 Indlela yaSathane yekubusa inebugovu. Nobe kunjalo, bugovu angeke buncobe lutsandvo lolusisekelo sekubusa kwaJehova. Indlela yaSathane yekubusa yehlulekile kuletsa injabulo nome kulondzeka. Kepha indlela yaJehova yekubusa ngaso sonkhe sikhatsi ngiyo lefanele! Sinabo yini bufakazi baloko lamuhla? Yebo sinabo, sitawufundza ngabo esehlukweni setfu lesilandzelako.
Yini Lesiyifundzile Mayelana Nekubusa Embhalweni Wa . . .
• Roma 13:1, 2?
• Taga 21:30?
• Kholose 3:13?
[Imibuto Yesihloko Lesifundvwako]
[Titfombe ekhasini 25]
Indlela yaSathane yekubusa ayizange ibazuzise bantfu bonkhe
[Emavi laveta Umtfombo walentfo]
U.S. Army photo
WHO photo by P. Almasy
[Sitfombe ekhasini 26]
Emandla aJehova ayakwati kuvusa ngisho nalabafile
[Sitfombe ekhasini 27]
Lutsandvo lwaJehova kanye nekulunga kuye kwabonakala emhlatjelweni weNdvodzana yakhe