‘Khuluma LiVi LaNkulunkulu Ngesibindzi’

‘Bagcwaliswa ngemoya longcwele, bacala kukhuluma liVi laNkulunkulu ngesibindzi.’—IMIS. 4:31.

1, 2. Kungani kufanele silwele kutimisela emsebentini wetfu wekushumayela?

 ETINSUKWINI letintsatfu tangembikwekufa kwakhe, Jesu watjela bafundzi bakhe: “LeliVangeli ngembuso liyawushunyayelwa emhlabeni wonkhe, kuze kube bufakazi etiveni tonkhe, bese-ke kuyefika kuphela.” Asengakenyukeli ezulwini, Jesu lovusiwe wayala bafundzi bakhe kutsi ‘bente bantfu bato tonkhe tive kutsi babe bafundzi, babafundzise kugcina tonkhe tintfo yena abebayale ngato.’ Wabetsembisa kutsi uyawuba nabo “onkhe emalanga, kuze kube ngusekupheleni kwetikhatsi.”—Mat. 24:14; 26:1, 2; 28:19, 20.

² Njengobe siboFakazi BaJehova, sihlanganyela ngenkhutsalo emsebentini lowacala kwentiwa ngelikhulu lekucala leminyaka. Kute lomunye umsebenti lobaluleke kwendlula lomsebenti losindzisa kuphila wekushumayela ngeMbuso, newekwenta bantfu babe bafundzi. Cabanga-ke kutsi kubaluleke kangakanani kutsi sitimisele kulomsebenti wetfu wekushumayela! Kulesihloko, sitawubona kutsi kucondziswa ngumoya longcwele kusisita njani kutsi sikhulume ngesibindzi nasisemsebentini wekushumayela. Tihloko letimbili letilandzelako titawusibonisa indlela umoya waJehova longasicondzisa ngayo kute sibe nelikhono lekufundzisa futsi singayekeli.

Siyasidzinga Sibindzi

3. Kungani kudzingeka kutsi sibe nesibindzi kute sishumayele ngeMbuso?

³ Kute lesingakufananisa nelilungelo lekushumayela ngeMbuso lesilinikwe nguNkulunkulu wetfu. Nobe kunjalo, ungumsebenti lonetinsayeya letinyenti. Njengobe labanye batemukela letindzaba letinhle teMbuso waNkulunkulu, labanye bafanana nebantfu bangetinsuku taNowa. Jesu watsi: “Abazange bati, kwaze kwefika zamcolo wabacedza.” (Mat. 24:38, 39) Nalamuhla, kunalabasedzelelako nobe labasiphikisako. (2 Phet. 3:3) Singaphikiswa ngulabo labanemagunya laphakeme, lesifundza nabo esikolweni, lesisebenta nabo, nobe emalunga emindeni yetfu imbala. Ngetulu kwekuphikiswa, natsi sinebutsakatsaka betfu lobunjengekuba nemahloni, nekwesaba kutsi angeke basemukele. Tinyenti tintfo letingasenta singakhululeki kukhuluma livi laNkulunkulu “ngesibindzi.” (Ef. 6:19, 20) Kudzingeka sibindzi kute sikhulume livi laNkulunkulu singayekeli. Yini lengasisita kutsi sibe naso?

4. (a) Kuyini kuba nesibindzi? (b) Pawula wasitfolaphi sibindzi sekukhuluma nebantfu baseThesalonika?

⁴ Ligama lesiGriki lelihunyushwe ngekutsi “sibindzi” lisho “kukhuluma ungesabi, naloko lokukhulumako kucace.” Leligama linemcondvo ‘wekungesabi nekutetsemba.’ Kuba nesibindzi akusho kungamcabangeli lomunye nome kuba luhlata. (Khol. 4:6) Njengobe sinesibindzi, sifuna kuba nekuthula nabo bonkhe bantfu. (Rom. 12:18) Ngetulu kwaloko, njengobe sishumayela ngeMbuso waNkulunkulu, sidzinga nekulinganisela ekubeni kwetfu nesibindzi kanye nekuba nekuhlakanipha  kute sibalekele kukhuba bantfu lesibashumayelako singakacondzi. Ecinisweni, kuba nesibindzi kuphindze kusho kutsi silwele kuba naletinye timfanelo letinhle. Kuba nesibindzi lokunjalo akuveli emandleni etfu nobe ekutetsembeni kwetfu. Ngemuva kwekuhlushwa kwaPawula nebangani bakhe eFiliphi, basitfolaphi sibindzi sekukhuluma nebantfu baseThesalonika? Pawula wabhala watsi: “Saba nesibindzi kuNkulunkulu wetfu.” (Fundza 1 Thesalonika 2:2) Nkulunkulu Jehova angakucedza kwesaba kwetfu, natsi asiphe sibindzi lesifananako.

5. Jehova wabapha njani sibindzi boPhetro, Johane kanye nalabanye bafundzi?

⁵ Ngalesikhatsi ‘asembikwebabusi bebantfu nemadvodza lamadzala kanye nebabhali,’ umphostoli Phetro naJohane batsi: “Nine ngekwenu ake senisho kutsi ngukuphi lokulungile ebusweni baNkulunkulu, kulalela nine yini nobe kulalela Nkulunkulu? Ngako singeke tsine siyekele kukhuluma ngaloko lesikubonile nalesikuvile.” Kunekutsi bathandaze kuNkulunkulu kutsi acedze kushushiswa, bona nalamanye emakholwa bacela batsi: ‘Jehova, ake ubukisise lokusesabisa kwabo bese uyasivumela, tsine tinceku takho, kutsi sikhulume livi lakho ngaso sonkhe sibindzi.’ (Imis. 4:5, 19, 20, 29, NW) Yini Jehova layenta ngalesicelo sabo? (Fundza Imisebenti 4:31.) Jehova wabasita ngemoya longcwele kutsi babe nesibindzi. Nguloko umoya waNkulunkulu longakwenta nakitsi. Singawutfola njani umoya waNkulunkulu futsi sicondziswe nguwo emsebentini wetfu wekushumayela?

Indlela Lesingatfola Ngayo Sibindzi

6, 7. Nguyiphi indlela lecondzile yekutfola umoya longcwele waNkulunkulu? Niketa tibonelo.

⁶ Lekukuphela kwendlela lecondzile yekutfola umoya waNkulunkulu, kutsi siwucele. Jesu watjela labo labebamlalele watsi: “Nome ningakalungi kodvwa niyakwati kupha bantfwabenu tintfo letinhle, kakhulu kangakanani-ke, Babe losezulwini uyawubanika [umoya] longcwele labo labamcelako.” (Luk. 11:13) Kufanele sihlale siwucela njalo umoya longcwele. Nangabe umsebenti wetfu wekushumayela usesabisa—kungaba ngulona wekushumayela emigwacweni, kushumayela lokungakahlelwa, nobe kusebenta insimu yemabhizinisi, kufanele sithandaze kuJehova sicele umoya wakhe kutsi usisite sikwati kuba nesibindzi.—1 Thes. 5:17.

⁷ Nguloko lokwentiwa ngulomunye dzadze libito lakhe lokunguRosa. a Ngalelinye lilanga Rosa asemsebentini, lomunye thishela lasebenta naye abefundza umbiko walesinye sikolwa lowawumayelana nekuhlukunyetwa kwebantfwana. Lothishela waphatanyiswa kakhulu nguloko labekakufundza, amangele watsi: “Kantsi vele kwentekani kulelive lesiphila kulo?” Rosa akaliyekelanga litfuba lekufakaza. Yini layenta kute atfole sibindzi sekucoca nalothishela lasebenta naye? Utsi: “Ngathandaza kuJehova ngacela umoya wakhe kutsi ungisite.” Wakwati kufakaza kulothishela futsi wenta nemalungiselelo ekubuyela kuye esikhatsini lesitako. Ase uphindze ucabange ngesibonelo saMilane intfombatana lehlala edolobheni lase-New York. Milane utsi: “Ngembikwekuba ngiye esikolweni, mine namake sithandaza njalo kuJehova.” Yini lebayithandazelako kuJehova? Bathandazela kutsi Milane abe nesibindzi sekumelela Nkulunkulu futsi akhulume ngaye. Make wakhe utsi: “Loko kumsitile Milane kutsi akwati kutichaza kahle tinkholelo takhe mayelana nekugubha emaholidi kanye netinsuku tekutalwa nekutsi kungani angahlanganyeli emikhosini lenjalo.” Letibonelo letimbili atibonisi yini kutsi umthandazo uyasebenta kute sibe nesibindzi?

8. Yini lesingayifundza kumphrofethi Jeremiya ngekuba nesibindzi?

⁸ Ase ucabange futsi nangaloko lokwasita umphrofethi Jeremiya kutsi abe nesibindzi. Ngalesikhatsi Jehova ambeka kutsi abe  ngumphrofethi, Jeremiya waphendvula watsi: “Awu, Nkhosi Simakadze [Jehova], mine angikwati kukhuluma; ngisengumtfwana.” (Jer. 1:4-6) Jeremiya wachubeka ashumayela njalo kangangekutsi bantfu labanyenti besebamtsatsa njengemuntfu lobiketela tinhlekelele nje kuphela. (Jer. 38:4) Jeremiya wamemetela tehlulelo taJehova ngesibindzi iminyaka lengetulu kwalengu-65. Ka-Israyeli watiwa njengemshumayeli longesabi futsi lonesibindzi, kangangekutsi ngemva kweminyaka lengu-600 ngalesikhatsi Jesu akhuluma ngesibindzi, labanye badzimate bakholelwa kutsi unguJeremiya lovusiwe. (Mat. 16:13, 14) Umphrofethi Jeremiya lobekanemahloni ekucaleni, wakhona njani kulwisana nemahloni labenawo? Utsi: “Livi lakhe[Nkulunkulu] lisenhlitiyweni yami lishisa njengemlilo lovalelwe ematsanjeni ami. Sengidziniwe kulibandzetela ngekhatsi kimi.” (Jer. 20:9) Nembala, livi laJehova lamnika emandla Jeremiya futsi lamenta wakhuluma.

9. Kungani livi laNkulunkulu kufanele lisitsintse ngendlela lelatsintsa ngayo Jeremiya?

⁹ Encwadzini yakhe lebeyiya kumaHebheru umphostoli Pawula wabhala: “Livi laNkulunkulu liphilile, linemandla; likhalipha kwengca inkemba lesika ngetinhlangotsi totimbili. Lisika lidzimate lehlukanise umphefumulo nemoya, emalunga nemkantja, lehlulele imicabango netifiso tenhlitiyo.” (Heb. 4:12) Umlayeto nobe livi laNkulunkulu ungasitsintsa ngendlela lowatsintsa ngayo Jeremiya. Khumbula kutsi nobe lamadvodza abetayele kubhala liBhayibheli, lakubhala kwakungaveli ekuhlakanipheni kwemuntfu, kepha kwakuphefumulelwe nguNkulunkulu. Encwadzini ya-2 Phetro 1:21, siyafundza: “Kute siphrofetho lesake seta ngentsandvo yemuntfu; kodvwa bantfu bakhuluma lokukwaNkulunkulu, bachutjwa ngumoya longcwele.” Nangabe sitinika sikhatsi sekutichubela sifundvo seliBhayibheli, tingcondvo tetfu tigcwala umlayeto lophefumulelwe ngemoya longcwele. (Fundza 1 Khorinte 2:10.) Lomlayeto ‘ungashisa njengemlilo lovutsako’ ekhatsi kitsi, kangangekutsi sehluleke kuwugcina kitsi kuphela.

10, 11. (a) Kufanele silitadishe njani liBhayibheli nangabe sifuna kuba nesibindzi nasishumayela? (b) Shano lokungenani yinye indlela longatfutfukisa ngayo sifundvo lotichubela sona.

¹⁰ Kute sifundvo seliBhayibheli lesitichubela sona sibe nendzima lebalulekile ekuphileni kwetfu, kudzingeka sisente ngendlela yekutsi umlayeto weliBhayibheli usitsintse ekujuleni kwetinhlitiyo tetfu. Nasi sibonelo: Umphrofethi Hezekeli waboniswa umbono ngalesikhatsi kutsiwa akadle incwadzi legocwako leyayicuketse emavi emlayeto lobalulekile lowawuya kubantfu labanetinhlitiyo letilukhuni. Hezekeli kwakudzingeka awucondze kahle lomlayeto futsi awente ube yincenye yekuphila  kwakhe. Kwenta njalo kwakuyobangela kutsi lomsebenti wekwendlulisa lomlayeto ube mnandzi—ufanane nekunambitseka kweluju.—Fundza Hezekeli 2:8–3:4, 7-9.

¹¹ Natsi sisesimeni lesifanana nesaHezekeli. Lamuhla, bantfu labanyenti abafuni kuva loko lokushiwo liBhayibheli. Kute sichubeke sikhuluma ngelivi laNkulunkulu, kubalulekile kutsi sitadishe imiBhalo ngendlela letawusenta siyicondze futsi sikukholelwe loko lekushoko. Kufanele sitadishe liBhayibheli ngaso sonkhe sikhatsi hhayi ngetikhatsi letitsite nje kuphela. Sifiso setfu kufanele sifanane nesemhlabeleli lowahlabela: “Emavi emlomo wami netizindlo tenhlitiyo yami atemukeleke kuwe, Simakadze [Jehova], Dvwala lami, neMkhululi wami.” (Hla. 19:14) Kubaluleke kakhulu kutsi sibe nesikhatsi sekuzindla ngaloko lesikufundzako, kute emaciniso eBhayibheli angene ajule etinhlitiyweni tetfu! Ngako-ke, kufanele silwele kutfutfukisa indlela lesitichubela ngayo sifundvo setfu. b

12. Imihlangano yebuKhristu isisita njani kutsi sicondziswe ngumoya longcwele?

¹² Lenye indlela umoya longcwele waJehova longasizuzisa ngayo kutsi “sinakane, sisitane ngekukhutsatana elutsandvweni nasemisebentini lemihle. Singakuyekeli kuhlangana ndzawonye.” (Heb. 10:24, 25) Kubakhona njalo emihlanganweni yebuKhristu, nekulalelisisa loko lokufundziswako kuyo kanye nekukusebentisa ekuphileni kwetfu, kutindlela letinhle tekucondziswa ngumoya. Angitsi vele nguwo umoya longcwele locondzisa emabandla.—Fundza Sembulo 3:6.

Tinzuzo Tekuba Nesibindzi

13. Yini lesingayifundza kuloko lokwentiwa ngemaKhristu elikhulu lekucala leminyaka emsebentini wekushumayela?

¹³ Emhlabeni wonkhe umoya longcwele nguwo kuphela emandla lamakhulu, futsi ungenta bantfu bakwati kwenta intsandvo yaJehova. Ekhulwini lekucala leminyaka umoya longcwele wabangela emaKhristu kutsi ente umsebenti wekushumayela ngendlela lemangalisako. Abeshumayela tindzaba letinhle “emhlabeni wonkhe jikelele.” (Khol. 1:23) Nangabe sicabanga ngekutsi linyenti lawo ‘belibantfukatana nje labangakafundzi,’ kuvele kucace kutsi abesekelwa ngemandla lamakhulu.—Imis. 4:13.

14. Yini lengasisita kutsi ‘sivutse emoyeni’?

¹⁴ Nangabe siphila ngendlela levumela umoya longcwele kutsi usicondzise, singakwati kwenta umsebenti wetfu wekushumayela ngesibindzi. Tonkhe tinzuzo tekuhlala njalo sithandazela umoya longcwele, kukhutsalela  sifundvo lesitichubela sona, kuzindla ngaloko lesikufundzako ngelusito lwemthandazo kanye nekubakhona emihlanganweni yebuKhristu, kungasisita kutsi ‘sivutse emoyeni.’ (Rom. 12:11) Mayelana ‘nemJuda lowafika e-Efesu, libito lakhe lokungu-Apolosi, lodzabuka e-Alekzandriya,’ liBhayibheli litsi: ‘Abegcwele inshiseko emoyeni wakhe; wafundzisa wachaza kahle emaciniso macondzana naJesu.’ (Imis. 18:24, 25) ‘Ngekuvutsa emoyeni,’ singaba nesibindzi emsebentini wetfu wekushumayela emtini ngemuti nobe ekufakazeni lokungakahlelwa.—Rom. 12:11.

15. Kusizuzisa ngani kuchubeka sishumayela ngesibindzi?

¹⁵ Kuchubeka siba nesibindzi nasishumayela, kuba nemiphumela lemihle kitsi. Simo setfu sengcondvo siyatfutfuka ngobe sesikucondza kahle kubaluleka kwemsebenti wetfu kanye netinzuzo tawo. Umdlandla wetfu uyakhula ngobe sitfola injabulo lenyenti nasitimisela emsebentini wetfu wekushumayela. Inkhutsalo yetfu iyacina ngobe siyacaphela kutsi umsebenti wetfu wekushumayela uyaphutfuma.

16. Yini lokudzingeka siyente nangabe inkhutsalo yetfu ngemsebenti wekushumayela incipha?

¹⁶ Kutsiwani nangabe sesite inkhutsalo nobe umndlandla lebesinawo ekucaleni ngemsebenti wetfu? Kudzingeka sitihlolisise ngekwetsembeka. Pawula wabhala: “Tihlolisiseni nine ngekwenu nitibone kutsi nibambelele yini ekukholweni kwenu. Tivivinyeni nine.” (2 Khor. 13:5) Ase utibute: ‘Ngisavutsa yini emoyeni? Ngiyathandaza yini kuJehova ngicele umoya wakhe? Imithandazo yami iyakhombisa yini kutsi ngetsembele kuJehova kute ngente intsandvo yakhe? Inawo yini emagama ekubonga lomsebenti lasiphatsise wona? Lunjani luhlelo lwami lwesifundvo lengitichubela sona? Singakanani sikhatsi lengisisebentisela kuzindla ngaloko lengikufundzako nalengikuvako? Ngihlanganyela ngelizinga lelingakanani emihlanganweni yelibandla?’ Kutihlola usebentisa imibuto lefanana nalena, kungakusita ubone kutsi nguyiphi indzawo lokudzingeka utfutfukise kuyo.

Vumela Umoya WaNkulunkulu Ukwente Ube Nesibindzi

17, 18. (a) Umsebenti wekushumayela wentiwa ngelizinga lelingakanani lamuhla? (b) Nasimemetela tindzaba letinhle teMbuso waNkulunkulu, singakhombisa njani kutsi ‘sikhuluma ngesibindzi nangekukhululeka lokukhulu’?

¹⁷ Ngalesikhatsi Jesu asavusiwe, naku lakutjela bafundzi bakhe: ‘Kodvwa nine nitawugcwaliswa ngemandla, nasekufikile kini umoya longcwele, niyawuba bofakazi bami eJerusalema, naseJudiya lonkhe, naseSamariya, kuze kube ngusekugcineni kwemhlaba.’ (Imis. 1:8) Lomsebenti lowacalwa ngaleso sikhatsi, wentiwa ngelizinga lelisetulu lamuhla. Cishe tigidzi letisikhombisa taboFakazi BaJehova timemetela umlayeto weMbuso emaveni langetulu kwalangu-230, futsi tenta ema-awa lacishe abe tigidzigidzi letingu-1.5 emsebentini wekushumayela umnyaka nemnyaka. Kujabulisa kakhulu kuba nencenye kulomsebenti longeke uphindze wentiwe!

¹⁸ Njengasekhulwini lekucala leminyaka, umsebenti wekushumayela lamuhla ucondziswa ngumoya waNkulunkulu. Nangabe sivumela kucondziswa nguwo, ‘sitawukhuluma ngesibindzi nangekukhululeka lokukhulu’ emsebentini wetfu wekushumayela. (Imis. 28:31) Ngaso sonkhe sikhatsi, asivumele umoya usicondzise njengobe simemetela letindzaba letinhle teMbuso waNkulunkulu!

[Imibhalo lengentasi]

Ufundzeni?

• Kungani sidzinga sibindzi nasishumayela ngelivi laNkulunkulu?

• Yini leyasita bafundzi bekucala kutsi bashumayele ngesibindzi?

• Singasitfola njani sibindzi?

• Kuba nesibindzi kusizuzisa ngani?

[Imibuto Yesihloko Lesifundvwako]

[Sitfombe ekhasini 16]

Batali bangabasita njani bantfwana babo kutsi babe nesibindzi?

[Titfombe ekhasini 17]

Umthandazo ungakusita kutsi ube nesibindzi emsebentini wekushumayela