Labafile Bangabasita Yini Labaphilako?

TAMBA, lijaha laseNshonalanga ye-Afrika, abesatawubhala sivivinyo sesikolwa. a Make wakhe abemphocelela kutsi afune lusito lwetihlobo tabo lesetafa kute aphumelele. Tivakashi takulamanye emave tefika ePalermo eSicily, kute titewubona emathuna langephansi kwemhlaba endzaweni yekubeka tidvumbu letonyisiwe. Labanye bakholwa kutsi letidvumbu letonyisiwe tiyabavikela labaphilako. Umnyaka nemnyaka bantfu bavakashela eLily Dale, lidolobha lelisenshonalanga yeNew York State, U.S.A., lelatiwa ngekutsi linetangoma letinyenti letihlala kulo. Tivakashi tifika tinelitsemba lekutsi tingahle tihlangane netihlobo tato nobe bangani labafa kute titfole lusito lolutsite.

Emhlabeni wonkhe, banyenti bantfu labakholwa kutsi labafile bangabasita labaphilako. Ucabangani wena ngaloko? Mhlawumbe nawe wafundziswa yona lenkholelo futsi kukhona bantfu losondzelene nabo labawutsandzako lombono. Kuyintfo leyetayelekile kubakhumbula bantfu lesibatsandzako lasebafa. Tangoma tetsembisa kusenetisa lesifiso sekukhuluma nabo. I-Time magazine yacaphuna emavi lashiwo ngulesinye sangoma nasitsi indzawo yemoya “ihlale ikulungele kuniketa lusito.” Kuliciniso yini loko? Vele labafile bangabasita yini labaphilako? Imphendvulo yeliBhayibheli lecacile yalombuto, ingakumangalisa kakhulu.

Labafile, Kukhona Yini Indzawo Labaphila Kuyo?

LiBhayibheli lisichaza ngendlela lemelula nangemavi lacondzakalako simo salabafile. Ase unake kutsi Umshumayeli 9:5 utsini ngaso: “Labaphilako bayati kutsi batakufa, kodvwa labafile abati lutfo.” Kungenteka yini kutsi labafile babe nemiva? Livesi laka-6 liyaphendvula: “Kubo lutsandvo, nenzondo, nemona sekwaphela, bangeke baphindze babe nesabelo kuko konkhe lokwentiwako lapha emhlabeni.” Livesi laka-10 laso lesehluko lize litsi “ethuneni lapho uya khona, kute kusebenta nekucabanga nelwati kanye nekuhlakanipha.” Leligama lelitsi “lithuna” lihunyushwe lisuselwa egameni lesiHebheru lelitsi “Sheol.” Lokujabulisako kutsi lelinye ligama lesiGriki lelifanana naleli ngulelitsi “Hades,” emiBhalweni lisetjentiswe ngenjongo yekubonisa indzawo Jesu laya kuyo ngemuva kwekufa kwakhe.—Imisebenti 2:31.

Jesu wasita bantfu labanyenti ngalesikhatsi asaphila lapha emhlabeni, kepha bekati kutsi ngalelinye lilanga abetawufa. Abecabanga kutsi utawukwati yini kubasita bantfu nasekangene ethuneni? Cha. Kufa kwakhe lobekutawufika ngekushesha, wakufananisa nesikhatsi sasebusuku bantfu labangasebenti ngaso. (Johane 9:4) Jesu bekati kahle kutsi ngalesikhatsi bantfu bangasaphili, ‘abasenawo emandla ekufeni.’—Isaya 26:14, catsanisa ne-NW.

Jesu naye wenta sifananiso lesichaza liphuzu lelifananako ngekufa. Ngalesikhatsi umngani wakhe Lazaro afile, wafananisa kufa nekulala. (Johane 11:11-13) Singakulindzela yini kutsi umuntfu lolele asisite? Umuntfu lolele akati lutfo, kute langakwentela umuntfu lotsite.

Ikhona yini incenye yemuntfu Lesindzako Nakafa?

Labanyenti bafundziswe kutsi umphefumulo uyincenye yabo letsite lengabonakali, lesindzako ngalesikhatsi kufa umtimba. LiBhayibheli lifundzisa lokwehlukile kuloku. Incwadzi yekucala yeliBhayibheli, Genesisi, isichazela kahle kutsi uyini umphefumulo. Genesisi 2:7 (NW) ukubeka kucace kutsi ngalesikhatsi kudalwa umuntfu  wekucala, waba ‘ngumphefumulo lophilako.’ Umuntfu wonkhe aphelele ungumphefumulo; tilwane nato tingimiphefumulo. (Genesisi 1:20-25, NW.) Ngako-ke, liciniso likutsi ngalesikhatsi nje umuntfu nome silwane kufa, umphefumulo uyafa. LiBhayibheli liyakucinisekisa loko.—Tihlabelelo 78:50.

Nobe kunjalo, labanye bangabuta, ‘Kodvwa kutsiwani ngaletindzaba letinyenti letishiwo bantfu mayelana nebantfu labatsite labakhuluma nalabafile, labeva emavi abo, nobe baze bababone?’ Tindzaba letinjalo tivamile etindzaweni letinyenti emhlabeni. Letindzaba tibaniketa litsemba labo labafelwe tihlobo tabo, nobe bangani labasedvute, tenta labanyenti bafune sangoma lesitsite lesitsi siyakwati kuchumana nalabafile.

Tiliciniso yini letindzaba? Nangabe kunjalo, angeke yini loko kuphikisane nalamaciniso eliBhayibheli lesikhulume ngawo lapha ngenhla? Jesu watsi liVi laNkulunkulu liliciniso. (Johane 17:17) Liciniso alitiphikisi. Ecinisweni kuneticondziso leticacile eBhayibhelini mayelana nendlela lokufanele sikutsatse ngayo loko lokushiwo ngulabo labacabanga kutsi bangasitwa ngulabafile. LiBhayibheli lisitjela ngalotsite lowetama kutfola lusito kulabafile. Njengobe ufundzisisa lendzaba utawutfola liciniso.

INkhosi Icela Lusito Kulofile

Loku kwenteka ngalesikhatsi kuliwa imphi enyakatfo yaka-Israyeli. INkhosi Sawula nemabutfo ayo bebalwa nelibutfo lelesatjwako lemaFilisti. Ngalesikhatsi Sawula abona inkambu yemaFilisti, “wesaba kakhulu, watfutfumela.” Ngaleso sikhatsi sekubusa kwakhe, Sawula abesakushiyile kukhonta kweliciniso. Umphumela waloko waba kutsi Jehova akazange amphendvule nakacela lusito kuye. Abetalutfola kuphi lusito Sawula? Umphrofethi waNkulunkulu Samuweli abesafile.—1 Samuweli 28:3, 5, 6.

Sawula wafuna sicondziso esangomeni lesise-Eni Dori. Wancenga lesangoma kutsi ‘simkhuphulele Samuweli’ kulabafile. Lesangoma samkhuphulela sitfunti lesifanana naSamuweli. Lo “Samuweli” watjela Sawula kutsi emaFilisti atameyisa futsi yena nemadvodzana akhe batawubulawa kulemphi. (1 Samuweli 28:7-19) KwakunguSamuweli lovuswe ekufeni mbamba yini loyo?

Ase ucabangisise ngaloko. LiBhayibheli likubeka kucace kutsi umuntfu nakafa “ubuyela emhlabatsini” nekutsi ‘tinhloso netifiso takhe tiphela ngalelo langa.’ (Tihlabelelo 146:4) Sawula kanye naSamuweli bobabili bebati kamhlophe kutsi Nkulunkulu uyakulahla kuchumana netangoma. Phela ngembi kwaloko, Sawula abetsetse sinyatselo sekucosha bantfu lebebasebentelana nemimoya.—Levithikhusi 19:31.

Cabangisisa ngalendzaba. Kube Samuweli lowetsembekile abesaphila, abetawuphula yini umtsetfo waNkulunkulu futsi abambisane netangoma kute nje ahlangane naSawula? Jehova wala kukhuluma naSawula. Sangoma besingakwati yini kwenta Nkulunkulu Somandla kutsi akhulume naSawula asebentisa Samuweli lobekafile? Cha, besingeke. Kuyacaca-ke, kutsi lo “Samuweli” abengesuye nani umphrofethi waNkulunkulu lowetsembekile. Kwakungumoya, kodvwa hhayi waSamuweli—kwakulidimoni lelibi lelalitenta shengatsi linguSamuweli lofile.

Emadimoni tingilosi letavukela ligunya laNkulunkulu ekucaleni kwemlandvo webantfu. (Genesisi 6:1-4; Juda 6) Lamadimoni ayakwati kubona bantfu basaphila; ati kamhlophe kutsi umuntfu  nemuntfu ukhuluma njani, ubukeka njani, futsi ayayati nendlela yakhe yekwenta tintfo. Anelisasa lekwandzisa umbono lotsi loko lokufundziswa liBhayibheli akusilo liciniso. Kungako liBhayibheli lisecwayisa ngekutsi siyibalekele imimoya lemibi! (Dutheronomi 18:10-12) Imimoya lemibi ngisho nalamuhla solo ikhona.

Nyalo sesiyati kutsi kungani bantfu labanyenti bakhuluma ngekutsi “beve” nobe “babone” labo lababatsandzako. Ngalesinye sikhatsi, emadimoni lalingisa labafile angabonakala angasisita, lemimoya lemibi ecinisweni itimisele kudukisa bantfu. b (Efesu 6:12) Ase uphindze ucabange ngaloku: Jehova nguNkulunkulu lonelutsandvo nalosikhatsalelako. Nangabe labo labafile bebaphila endzaweni letsite kute basite bangani nemindeni yabo, uMdali lonelutsandvo abengakulahla yini kutsintsana nabo aze atsi “kusinengiso”? Ecinisweni abengeke! (1 Phetro 5:7) Ukhona yini umtfombo lowetsembekile lesingatfola kuwo lusito?

Lusito Lokungulona Lona Lwalabo Labaphilako Nalabafile

Sesiyacondza nyalo kutsi labafile abanawo emandla ekusita labaphilako. Ngako-ke, imetamo yetfu yekufuna lusito kulabafile ayisiti ngalutfo, kunaloko iyingoti ngobe yephula umtsetfo waNkulunkulu futsi isifaka engotini yekuhlaselwa ngemadimoni.

LiBhayibheli lisikhombisa Umtfombo loncono kakhulu lesingatfola kuwo lusito—uMdali wetfu, Jehova. Angasisindzisa ngisho nasekufeni. (Tihlabelelo 33:19, 20) Nalamuhla ukulungele kusisita. Ngalokungafanani nematsemba emanga lesiwatjelwa tangoma, Nkulunkulu usinika litsemba lokungilo sibili.

Tamba lokukhulunywe ngaye ekucaleni kwalesihloko, wafundza ngemehluko losekhatsi kwematsemba emanga tangoma letisetsembisa wona kanye neliciniso Jehova lasiphatsele lona. Tangoma tamtjela kutsi nakangenteli bokhokho bakhe labafile umhlatjelo abengeke aphumelele esivivinyweni sakhe. Tamba nabamtjela konkhe loko abesacale kufundza liBhayibheli naboFakazi BaJehova. Abesafundzile ngesimo salabafile kanye nangalabo labatenta bantfu labafile. Nanobe make wakhe abemcindzetela kutsi ahambe ayocela lusito esangomeni, kodvwa Tamba wala kukwenta loko, watsi kumake wakhe, “Nangingeke ngiphumelele ngitawetama kakhudlwana kulomnyaka lolandzelako.”

Waba yini umphumela? Tamba waphumelela kubendlula bonkhe! Make wakhe wamangala, ngako kusukela ngaleso sikhatsi akazange aphindze akholelwe etangomeni nobe akhulume ngekuhlabela bokhokho. Tamba wafundza kutsi Jehova usecwayisa ngekutsi sibalekele ‘kufuna indlela kulabafile egameni lalabaphilako.’ (Isaya 8:19) Sifundvo seliBhayibheli sanika Tamba litsemba lekutsi nangabe ajabula ngemtsetfo waNkulunkulu, utawuphumelela.—Tihlabelelo 1:1-3.

Kutsiwani ngalabo lesibatsandzako labafile? Alikho yini litsemba ngabo? Ngetulu kwekusita tsine labaphilako, Jehova wetsembise kubasita labo labasemathuneni. Ngemuva kwekuchaza kutsi labafile bete emandla, naka loko umphrofethi Isaya lakubiketela esehlukweni 26, livesi 19: “Kodvwa labafile bakho bayawuphila; . . . Nine lenihleti elutfulini lwemhlaba, vukani nimemete ngenjabulo.” Umphrofethi Isaya waphindze watsi labo ‘lasebete emadla ekufeni’ batawuphindze baphile.

Akusijabulisi yini loko! Tigidzigidzi tebantfu labalele emathuneni titawuphindze tivuswe. Ecinisweni, liBhayibheli libonisa kutsi Jehova ‘ufisa’ kuvusa labafile. (Jobe 14:14, 15) Ucabanga kutsi lesetsembiso sitawukwenteka yini? Jesu Khristu abeciniseka ngalelitsemba ngobe waze watsi labafile kakadze sebayaphila emehlweni aJehova.—Lukha 20:37, 38.

Ungatsandza yini kuba nalelitsemba? c Chubeka ufundza emaciniso lanembile eliBhayibheli. Njengobe ufundza, utawuciniseka kutsi Jehova angakwati kusita labaphilako nalabafile nekutsi tetsembiso takhe ‘tetsembekile futsi ticinisile.’—Sembulo 21:4, 5.

[Imibhalo lengentasi]

[Emavi lacashuniwe lasekhasini 11]

Kuyintfo leyetayelekile kutsi sitive sinenkhaphunkhaphu yekubona labo lesibatsandzako labafile

[Sitfombe ekhasini 12]

Umphrofethi Samuweli wavuka yini kulabafile waphindze wakhuluma neNkhosi Sawula?