Niyemukelwa Endleleni Lencono Kakhulu Yekuphila!
Niyemukelwa Endleleni Lencono Kakhulu Yekuphila!
‘Nome siphila nome sifa sibaJehova.’—ROM. 14:8, NW.
1. Yini Jesu layifundzisa mayelana nendlela lencono kakhulu yekuphila?
JEHOVA ufuna sijabulele indlela lencono kakhulu yekuphila. Bantfu bangaphila ngetindlela letehlukahlukene, kodvwa nome kunjalo, kunayinye kuphela indlela lencono kakhulu yekuphila. Kute lokunye lokuncono lesingakwenta ngekuphila kwetfu ngephandle kwekutsi sikuvumelanise neliVi laNkulunkulu futsi sifundze naseNdvodzaneni yakhe, Jesu Khristu. Jesu wafundzisa balandzeli bakhe kutsi bakhonte Nkulunkulu ngemoya nangeliciniso, futsi wabatjela kutsi abente bantfu babe bafundzi. (Mat. 28:19, 20; Joh. 4:24) Ngekuphila ngekuvumelana neticondziso taJesu, singajabulisa Jehova futsi sijabulele tibusiso takhe.
2. Ekhulwini lekucala leminyaka yini labanye labayenta nasebawuvile umlayeto weMbuso, futsi bekusho kutsini kuba ‘kuleNdlela’?
2 Ngalesikhatsi ‘labo labakhetselwe kuphila lokuphakadze’ bakholwa futsi babhajatiswa, sinetizatfu letivakalako tekutsi kubo, “Niyemukelwa endleleni lencono kakhulu yekuphila!” (Imis. 13:48) Ekhulwini lekucala leminyaka, bantfu labatinkhulungwane labaphuma etiveni letehlukahlukene bemukela liciniso futsi banikela kuphila kwabo kuNkulunkulu ngekubhajatiswa. (Imis. 2:41) Bafundzi basendvulo bebakuyo ‘leNdlela.’ (Imis. 9:2; 19:23) Lenkhulumo yayifaneleka ngobe labo lababa balandzeli baKhristu bebanamatsele endleleni yekuphila lesekelwe ekukholweni kuJesu Khristu kanye nasekulingiseni sibonelo sakhe.—1 Phet. 2:21.
3. Kungani bantfu baJehova babhajatiswa, futsi bangakhi lababhajatisiwe kuleminyaka lelishumi leyendlulile?
3 Umsebenti wekwenta bafundzi utfutfuke ngelizinga lelisetulu kulamalanga ekugcina, futsi wentiwa emaveni langetulu kwalangu-230. Eminyakeni lelishumi leyengcile, bantfu labangetulu kwa-2 700 000 bakhetse kukhonta Jehova baphindze babhajatiswa kute bakhombise kutinikela kwabo kuye. Loku kusho kutsi kubhajatiswa bantfu labangetulu kwa-5 000 liviki neliviki! Kukhetsa kubhajatiswa kusekelwe ekubeni nelutsandvo ngaNkulunkulu, kwati imiBhalo kanye nekukholwa loko lekufundzisako. Kubhajatiswa kusento lesibaluleke kakhulu ekuphileni, ngobe kusicalo sebuhlobo lobuhle naJehova. Kubhajatiswa kuphindze kubonisa kutsi sinelitsemba lekutsi utawusisita kute sikwati kumkhonta ngekwetsembeka, njengobe asita tinceku takhe tasendvulo kutsi tikwati kuhamba endleleni yakhe.—Isa. 30:21.
Kungani Kufanele Ubhajatiswe?
4, 5. Yisho letinye tibusiso kanye netinzuzo tekubhajatiswa.
4 Kungenteka sewufundzile ngaNkulunkulu, wenta lushintjo endleleni lobewuphila ngayo, kodvwa nyalo usengummemeteli longakabhajatiswa. Intfutfuko lenjalo ibongwa kakhulu. Kodvwa sewutinikele yini kuNkulunkulu ngemthandazo, futsi kuseluhlelweni lwakho yini kutsi ubhajatiswe? Ekufundzeni kwakho liBhayibheli, ufundzile kutsi kufanele udvumise Jehova, hhayi kutsi utijabulise wena wedvwa nobe ufune umcebo. (Fundza Tihlabelelo 148:11-13; Lukha 12:15) Ngako ngutiphi tibusiso kanye netinzuzo lesititfola ngekubhajatiswa?
5 Ngalesikhatsi sewutinikele, kuphila kwakho kutawuba nenjongo kakhulu. Utawujabula ngobe wenta intsandvo yaNkulunkulu. (Rom. 12:1, 2) Umoya longcwele waJehova utawukwenta kutsi ube netimfanelo letifanana netaNkulunkulu letinjengekuthula kanye nekukholwa. (Gal. 5:22, 23) Nkulunkulu utayiphendvula imithandazo yakho futsi ayibusise nemetamo yakho yekuvumelanisa kuphila kwakho neliVi lakhe. Umsebenti wakho wekushumayela utawujabulela, nekuphila ngendlela leyemukelwa nguye kutawucinisa litsemba lakho lekuphila emhlabeni phakadze. Ngetulu kwaloko, kutinikela kuNkulunkulu ngemthandazo bese uyabhajatiswa kutawukhombisa kutsi vele uyafuna kuba ngulomunye waboFakazi BaJehova.—Isa. 43:10-12.
6. Kubhajatiswa kwetfu kubonisani?
6 Ngekutinikela kuNkulunkulu bese siyabhajatiswa, sikwenta kube sebaleni kutsi sibaJehova. Umphostoli Pawula wabhala: ‘Kute la emkhatsini wetfu lotiphilelako, futsi kute nalotifelako. Nasiphila, siphilela Jehova, nome sifa sifela Jehova, ngako-ke nome siphila nome sifa sibaJehova.’ (Rom. 14:7, 8, NW.) Nkulunkulu ubonise kutsi utsandza umuntfu nemuntfu ngekusipha inkhululeko yekutikhetsela. Nangabe sikhetsa lendlela yekuphila lencono kakhulu ngesizatfu sekutsi sitsandza Nkulunkulu, sitawenta inhlitiyo yakhe ijabule. (Taga 27:11) Ngekubhajatiswa sibonisa kutsi sitinikele kuNkulunkulu futsi loko kwenta kucace kutsi unguMbusi wetfu. Kubhajatiswa kuphindze kukhombise nekutsi sitsetse luhlangotsi lwakhe endzabeni yekulwelwa kwebukhosi bakhe. (Imis. 5:29, 32) Ngako-ke, Jehova useluhlangotsini lwetfu. (Fundza Tihlabelelo 118:6.) Lubhabhatiso lusivulela indlela yekutfola tibusiso letinyenti takamoya nyalo ngisho nasesikhatsini lesitako.
Bafundzi Lababhajatisiwe Babusiswe Ngebuzalwane Belutsandvo
7-9. (a) Ngusiphi sicinisekiso Jesu lasiniketa labo labashiye tonkhe tintfo futsi balandzela yena? (b) Sigcwaliseka njani setsembiso saJesu lesikuMakho 10:29, 30?
7 Umphostoli Phetro watsi kuJesu: “Asubuke, tsine sishiye konkhe, salandzela wena. Kepha siyawutfolani?” (Mat. 19:27) Phetro abefuna kwati kutsi likusasa limphatseleni yena kanye nalabanye bafundzi baJesu. Bebente kutinikela lokubalulekile ngekutsi bacitse sikhatsi sabo sonkhe emsebentini wekushumayela ngeMbuso. (Mat. 4:18-22) Jesu wabaniketa siphi sicinisekiso?
8 Ngekusho kwaMakho, Jesu wakuveta kutsi bafundzi bakhe bebatawuba yincenye yebuzalwane bebuKhristu. Watsi: “Lowo loshiye umuti, nome bomnakabo, nome bodzadzewabo, nome unina, nome uyise, nome bantfwana, nome emasimi, ngenca yami nangenca yeliVangeli, uyakwemukeliswa lokunyenti aselapha kulomhlaba. Uyawuphiwa ngalokuphindvwe kalikhulu: imiti, nabomnakabo, nabodzadzewabo, nabonina, nebantfwana, nemasimi, yebo, ngisho netinhlupheko, bese kutsi kulelitako atfole kuphila lokuphakadze.” (Mak. 10:29, 30) EmaKhristu elikhulu lekucala leminyaka, lafaka ekhatsi boLidiya, Akhwila, Phrisila kanye naGayusi abengulamanye alawo lavula “imiti” yawo futsi aba “bomnakabo, nome bodzadzewabo, nome [bonina]” kulabo abekholwa nabo njengobe Jesu abetsembisile.—Imis. 16:14, 15; 18:2-4; 3 Joh. 1, 5-8.
9 Loko Jesu lakusho kugcwaliseka ngelizinga lelisetulu lamuhla. “Emasimi” balandzeli bakhe labawashiyako, asho yonkhe imisebenti yekutiphilisa leshiywa ngulabanyenti, lokufaka ekhatsi titfunywa telivangeli, emalunga emndeni waseBethel, tisebenti temhlaba wonkhe, kanye nalabanye, ngesizatfu sekutfutfukisa umsebenti weMbuso emaveni lamanyenti. Labanye bazalwane nabodzadze bashiye emakhaya abo kute bente kuphila kwabo kubemelula, futsi kusijabulisa kakhulu kuva lokuhlangenwe nako kwabo lokukhombisa indlela Jehova labanakekela ngayo nendlela umsebenti labawentela yena lobajabulisa ngayo. (Imis. 20:35) Ngetulu kwaloko, tonkhe tinceku taJehova letibhajatisiwe tingajabulela tibusiso ‘tekufuna kucala umbuso waNkulunkulu kanye nekulunga kwakhe’ njengencenye yebuzalwane bebuKhristu bemhlaba wonkhe.—Mat. 6:33.
Kuvikeleka ‘Endzaweni Lesitsekile’
10, 11. Iyini ‘indzawo lesitsekile yaLosetikwako Konkhe,’ futsi singangena njani kuyo?
10 Kutinikela nekubhajatiswa kuphumela kulesinye sibusiso—lilungelo lekuhlala ‘endzaweni lesitsekile yaLosetikwako Konkhe.’ (Fundza Tihlabelelo 91:1.) Lena yindzawo lengumfanekiso yekulondzeka nalesivikelo—isimo sekuvikeleka ekulimaleni ngakamoya. Iyindzawo ‘lesitsekile’ ngobe bantfu labete umbono waNkulunkulu nalabangametsembi, abayati. Ngekuphila ngekuvumelana nekutinikela kwetfu nekumetsemba ngendlela lephelele Jehova, ecinisweni siyobe sitsi: “Wena usiphephelo sami nenqaba yami unguNkulunkulu wami lengetsembele kuye.” (Hla. 91:2) Nkulunkulu Jehova uba yindzawo yetfu levikelekile yekuhlala. (Hla. 91:9) Kute lenye indzawo lesingaphephela kuyo kute sivikeleke ngaphandle kwalena!
11 Kutfola indlela yekungena ‘kulendzawo lesitsekile’ yaJehova kukhombisa kutsi sibusiswe ngelilungelo lekwakha nekukhulisa buhlobo betfu naye. Loku kucala ngekutsi sitinikele siphindze sibhajatiswe. Ngemuva kwaloko, sitfutfukise buhlobo betfu naNkulunkulu ngekutsi sibe nesifundvo setfu seliBhayibheli, sithandaze kuye ngalokusuka enhlitiyweni futsi simlalele. (Jak. 4:8) Kute lowake wasondzelana naJehova ngelizinga lelisetulu kwendlula Jesu, longazange ngisho nakanye agucule umcondvo wakhe ngekwetsembeka kuMdali. (Joh. 8:29) Ngako-ke, asingacali singabate Jehova nobe sifiso sakhe kanye nelikhono lakhe lekusisita kutsi sigcwalise setsembiso setfu sekutinikela kuye. (Shu. 5:4) Emalungiselelo akamoya Nkulunkulu lawentele bantfu bakhe abufakazi lesingeke sibuphike bekutsi uyasitsandza futsi ufuna siphumelele ekumkhonteni.
Asilondvolote LiPharadisi Letfu Lakamoya
12, 13. (a) Liyini lipharadisi lakamoya? (b) Singabasita njani labo labasebasha enhlanganweni?
12 Kutinikela bese siyabhajatiswa nako kusivulela ematfuba ekuhlala epharadisi lakamoya. Lena yindzawo lehlukile yakamoya lesiyijabulela naletinye tikhonti letinekuthula naNkulunkulu Jehova. (Hla. 29:11; Isa. 54:13) Lelive lite lesingakufananisa nelipharadisi lakamoya. Loku kuvele kuticacele nasisemihlanganweni yetive, ngalesikhatsi bazalwane nabodzadze labachamuka etiveni letehlukahlukene, labakhuluma tilwimi letingafani, ngisho nalabo labanemasiko langafanani babutsene ndzawonye ngekuthula, nebunye, nangelutsandvo lwebuzalwane.
13 Lipharadisi lakamoya lesilijabulelako lehluke kakhulu esimeni lesidzabukisako selive lesiphila kulo lamuhla. (Fundza Isaya 65:13, 14.) Ngekumemetela umlayeto weMbuso, sinelilungelo lekumema labanye kutsi bangene kulelipharadisi lakamoya. Kusibusiso kusita labo muva nje labatihlanganise nelibandla, futsi bangazuza ngekuceceshwa ensimini. Njengobe labadzala ebandleni basicondzisa, sitawujabula ngelilungelo lekusita labatsite labasebasha kulenhlangano, njengobe Akhwila naPhrisila “bamchazela kahle ngeNdlela yaNkulunkulu” Apolosi.—Imis. 18:24-26.
Chubeka Ufundza KuJesu
14, 15. Sinatiphi tizatfu letivakalako tekuchubeka sifundza kuJesu?
14 Sinetizatfu letivakalako tekuchubeka sifundza kuJesu. Asengakabi ngumuntfu, Jesu wacitsa tinkhulungwane teminyaka asebenta neYise. (Taga 8:22, 30) Abati kutsi kukhonta Nkulunkulu nekufakazela liciniso, kwakuyindlela lencono kakhulu yekuphila. (Joh. 18:37) Kwacaca kuJesu kutsi lenye indlela yekuphila leyehlukile kulena yayitawukhombisa kuba nebugovu kanye nekwehluleka kuba nekwehlulela lokuhle. Abati kutsi utawulingwa futsi abulawe ngesibhuku. (Mat. 20:18, 19, NW; Heb. 4:15) Njengobe asibonelo setfu, wasifundzisa nekutsi singabugcina njani bucotfo betfu.
15 Jesu watsi nje asabhajatisiwe, Sathane wamlinga kute alahle indlela lencono kakhulu yekuphila—kepha leso silingo sehluleka. (Mat. 4:1-11) Loku kusifundzisa kutsi nome ngabe Sathane wentani, singakwati kuhlala sicotfo. Utimisele kunaka kakhulu labo labasafuna kubhajatiswa nobe labo labasandza kubhajatiswa. (1 Phet. 5:8) Ngesizatfu sekufuntwa emanga ngaboFakazi BaJehova, emalunga emindeni yetfu angasiphikisa acabanga kutsi ayasivikela. Nobe kunjalo, letilingo tisipha litfuba lekutsi sikwati kuveta timfanelo letinhle tebuKhristu, letifaka ekhatsi kuba nenhlonipho kanye nekuhlakanipha, ngalesikhatsi siphendvula imibuto letsite futsi sifakaza. (1 Phet. 3:15) Loko kungabatsintsa kakhulu labo labasilalele.—1 Thim. 4:16.
Namatsela Endleleni Lencono Kakhulu Yekuphila!
16, 17. (a) Ngutiphi timfuneko letintsatfu tekuphila letisisekelo letitfolakala encwadzini yaDutheronomi 30:19, 20? (b) Jesu, Johane kanye naPawula bakusekela njani lokwabhalwa nguMosi?
16 Eminyakeni lengaba ngu-1 500 asengakefiki Jesu emhlabeni, Mosi wakhutsata ema-Israyeli kutsi akhetse indlela leyayincono kakhulu. Watsi: “Lamuhla ngibita lizulu nemhlaba kutsi kube ngufakazi kini kutsi ngibeke embikwenu kufa nekuphila, tibusiso neticalekiso. Ngako khetsani kuphila, kuze niphile nine kanye nebantfwabenu, kuze nitsandze Simakadze [Jehova] wenu, nive liphimbo lakhe, ninamatsele kuye.” (Dut. 30:19, 20) Israyeli akazange atsembeke kuNkulunkulu, kepha letimfuneko letintsatfu letisisekelo letabhalwa nguMosi atikashintji. Jesu nalabanye baphindze bakhuluma ngato.
17 Kwekucala ‘kufanele simtsandze Jehova Nkulunkulu wetfu.’ Sikhombisa kutsi siyamtsandza Nkulunkulu nasenta tintfo ngekuvumelana netindlela takhe letilungile. (Mat. 22:37) Kwesibili, ‘kufanele silalele livi laJehova’ ngekufundza liBhayibheli nangekulalela imiyalo yakhe. (1 Joh. 5:3) Loku kusho kutsi kufanele sibe khona njalo emihlanganweni yebuKhristu, lapho kucocwa khona ngeliBhayibheli. (Heb. 10:23-25) Kwesitsatfu, ‘kufanele sinamatsele kuJehova.’ Ngisho nobe yini lekufanele sibhekane nayo, shengatsi singahlala sinekukholwa kuNkulunkulu futsi silandzele iNdvodzana yakhe.—2 Khor. 4:16-18.
18. (a) Ngemnyaka wa-1914, i-Watch Tower yalichaza njani liciniso? (b) Kufanele sitive njani ngekukhanya kweliciniso lamuhla?
18 Ase ubuke kutsi kusibusiso lesingakanani kuphila ngeliciniso leBhayibheli! Nga-1914 kwashicilelwa nakha emavi labalulekile ku-Watch Tower: “Asisibo yini bantfu lababusisekile nobe labajabulako? Nkulunkulu wetfu akaketsembeki yini? Nangabe kukhona lowati lokunconywana, akatsatse kona-ke. Nangabe akhona emkhatsini wenu lotfole lokunconywana, setsemba kutsi utawusitjela. Kute lesikwatiko lokwendlula loko lesikutfole eVini laNkulunkulu . . . Angeke sikwati kuchaza indlela kuthula, injabulo kanye nesibusiso lwati ngaNkulunkulu weliciniso lolusiletsele kona etinhlitiyweni tetfu nasekuphileni kwetfu. INdzaba lemayelana neKuhlakanipha kwaNkulunkulu, Kulunga, Emandla kanye neLutsandvo lwakhe, kusenetisa kokubili engcondvweni nasenhlitiyweni. Akukho lokunye lesikudzingako. Kute lokunye lesikufunako ngephandle kwekukhulisa lwati lwetfu ngaNkulunkulu.” (I-Watch Tower, ya-December 15, 1914, emakhasi 377-378) Kujabulela kwetfu kukhanya kwakamoya angeke kushintje. Nembala, sinesizatfu lesikhulu sekujabula ngekutsi nyalo “sihamba ekukhanyeni kwaSimakadze [Jehova].”—Isa. 2:5; Hla. 43:3; Taga 4:18.
19. Kungani labo lasebakulungele kubhajatiswa kufanele basitsatse ngekushesha leso sinyatselo?
19 Nangabe ufuna ‘kuhamba ekukhanyeni kwaJehova’ kepha usengakatinikeli futsi waba ngumKhristu lobhajatisiwe, ungaphotisi maseko. Yenta nome ngabe yini ledzingekako kute ube netimfuneko letisemBhalweni tekubhajatiswa—lokuyindlela letendlula tonkhe yekubonisa kubonga Nkulunkulu naKhristu ngaloko labasentele kona. Nika Jehova lokuncono kakhulu kwakho futsi nalokuligugu—kuphila kwakho. Bonisa kutsi utimisele kwenta intsandvo yaNkulunkulu ngekulandzela iNdvodzana yakhe. (2 Khor. 5:14, 15) Ngephandle kwekungabata, lena ngiyo indlela lencono kakhulu yekuphila!
Ungaphendvula Njani?
• Kubhajatiswa kwetfu kubonisani?
• Kutinikela kuNkulunkulu kanye nekubhajatiswa kuphumela kutiphi tibusiso?
• Kungani kufundza kuJesu kubaluleke kakhulu?
• Yini letasisita sinamatsele endleleni lencono kakhulu yekuphila?
[Imibuto Yesihloko Lesifundvwako]
[Sitfombe ekhasini 29]
Kubhajatiswa kwakho kukhombisa kutsi ukhetse indlela lencono kakhulu yekuphila
[Titfombe ekhasini 31]
Ulondzekile yini ‘endzaweni lesitsekile’?