Sebentisa ‘Inkemba Yemoya’ Ngelikhono

‘Nitsatse . . . nenkemba yemoya lelivi laNkulunkulu.’—EF. 6:17.

1, 2. Yini lokufanele siyente njengobe sicaphela sidzingo sebashumayeli belivangeli leMbuso?

 JESU watsi nakabona sicumbi sebantfu kutsi silambele kudla kwakamoya, watjela bafundzi bakhe: “Kuvuna kukhulu, kodvwa tisebenti timbalwa. Ngako-ke ncusani eNkhosini yekuvuna kutsi itfumele tisebenti ekuvuneni kwayo!” Jesu akagcinanga nje ngekumane asho lamavi. Ngemva nje kwekuwasho, “wase ubitela ndzawonye bafundzi bakhe labali-12.” Futsi wabatfuma kutsi bayoshumayela nobe ‘bayovuna’. (Mat. 9:35-38; 10:1, 5) Ngemuva kwaloko, Jesu ‘wakhetsa labanye labangu-70 wabatfuma ngababili’ kutsi bayowenta umsebenti lofananako.—Luk. 10:1, 2, catsanisa ne-NW.

² Sidzingo salabo labashumayela ngeMbuso sikhulu nalamuhla. Emhlabeni wonkhe, bantfu labangu-18 168 323 bebakhona eSikhumbutweni nga-2009. Lenombolo yendlula linani laboFakazi BaJehova ngetigidzi letingetulu kwelishumi. Kuyacaca kutsi vele emasimu sekamhlophe futsi asalungele kuvunwa. (Joh. 4:34, 35) Ngako-ke, kufanele sithandaze sicele tisebenti letinyenti. Kodvwa singabonisa njani kutsi siyavumelana nalesicelo? Ngekutsi sibe tisebenti letitselako njengobe sihlanganyela ngenkhutsalo ekushumayeleni livangeli leMbuso nasekwenteni bafundzi.—Mat. 28:19, 20; Mak. 13:10.

3. Umoya waNkulunkulu usisita njani kutsi sibe bafundzisi labaphumelelako?

³ Sihloko lesengcile sikhulume ngekutsi kute ‘sikhulume livi laNkulunkulu ngesibindzi,’ sidzinga kucondziswa ngumoya waNkulunkulu. (Imis. 4:31) Umoya waNkulunkulu ungaphindze usisite kutsi sibe bafundzisi labanelikhono. Lenye indlela lehamba embili lengasisita kutsi sitfutfukise likhono letfu kulomsebenti, kulisebentisa kahle lithulusi Nkulunkulu Jehova lasiphe lona—liVi lakhe liBhayibheli. Likhona ngesizatfu semoya longcwele. (2 Thim. 3:16) Umlayeto walo uphefumulelwe nguNkulunkulu. Ngako-ke, nangabe sisebentisa imiBhalo njengaleyo lesisekelo saloko lesikufudzisako, indlela yetfu yekufundzisa kuyosho kutsi icondziswa ngumoya longcwele. Ngembikwekutsi sihlole kutsi loku singakwenta njani, asesibone kutsi leliVi linemandla kanganani.

‘LiVi laNkulunkulu Linemandla’

4. Umlayeto waNkulunkulu lovela eBhayibhelini ungaletsa luphi lushintjo kumuntfu?

⁴ Livi laNkulunkulu linemandla lamakhulu! (Heb. 4:12) Ngendlela lengumfanekiso, umlayeto lovela eBhayibhelini ukhaliphe kwengca nobe nguyiphi inkemba leyakhiwe ngumuntfu, ngobe usika udzimate wehlukanise emalunga nemkantja. Liciniso lelisemiBhalweni lifinyelela inhlitiyo, futsi lingena lijule emicabangweni nasemiveni yemuntfu, likwente kubonakale ebaleni loko loyomuntfu languko. Emandla eliciniso leBhayibheli angakugucula kuphila kwemuntfu. (Fundza Kholose 3:10.) Kuliciniso, liVi laNkulunkulu lingakugucula kuphila!

5. LiBhayibheli lingasicondzisa ngatiphi tindlela, futsi loko kungaletsa muphi umphumela?

⁵ Ngetulu kwaloko, liBhayibheli liyincwadzi lenekuhlakanipha longeke ukutfole kunobe ngabe nguyiphi lenye incwadzi. Linekwatiswa lokungasita bantfu babone kutsi bangaphila njani kunali live leligcwele tinkinga letingaka. LiVi laNkulunkulu alisikhanyiseli nje kuphela tinyawo tetfu, liphindze ngisho libe kukhanya endleleni yetfu. (Hla. 119:105) Lisisita kakhulu ngalesikhatsi sibhekene netinkinga, nalapho sikhetsa labo labatawuba bangani betfu, liphindze lisisite ngisho nasetindzabeni tekutijabulisa, emsebentini, ekugcokeni, kanye  nakulokunye lokunyenti. (Hla. 37:25; Taga 13:20; Joh. 15:14; 1 Thim. 2:9) Kusebentisa timiso letitfolakala eVini laNkulunkulu ekuphileni kwetfu, kwenta kube melula ngatsi kutsi sibe nebudlelwane lobuhle nalabanye. (Mat. 7:12; Fil. 2:3, 4) Nangabe sivumela livi laNkulunkulu kutsi lisikhanyisele indlela yetfu, singakwati kubona kutsi kukhetsa lesikwentile kutawuba nemiphumela lemibi esikhatsini lesitako. (1 Thim. 6:9) ImiBhalo iphindze ibiketele ngenjongo yaNkulunkulu ngelikusasa, isisite kutsi silwele kuphila ngendlela levumelana naleyonjongo. (Mat. 6:33; 1 Joh. 2:17, 18) Umuntfu angaphila imphilo lenhle nakavumela kutsi timiso taNkulunkulu timcondzise ekuphileni kwakhe.

6. LiBhayibheli lisikhali lesinemandla kangakanani emphini yetfu yakamoya?

⁶ Ase uphindze ucabange ngekutsi liBhayibheli lisikhali lesinemandla kangakanani emphini yetfu yakamoya. Pawula wabita livi laNkulunkulu ngekutsi ‘yinkemba yemoya.’ (Fundza Efesu 6:12, 17.) Nangabe usetjentiswe ngendlela lefinyelela inhlitiyo, umlayeto loseBhayibhelini ungasita bantfu kutsi bakubalekele kucondziswa nguSathane. Liyinkemba lesindzisa kuphila esikhundleni sekukubhubhisa. Ngako-ke, kufanele silwele kulisebentisa ngelikhono.

Liphakele Kahle Livi LaNkulunkulu

7. Kubaluleke ngani kufundza kuyisebentisa kahle ‘inkemba yemoya’?

⁷ Lisotja lingakwati kutisebentisa kahle tikhali talo nangabe liceceshwe kahle futsi lafundza kutisebentisa ngendlela lefanele. Kuyafanana nangekusebentisa ‘inkemba yemoya’ kulemphi yetfu yakamoya. Pawula wabhala: “Khutsalela kutiveta wemukelekile kuNkulunkulu, ube sisebenti lesetsembekile kuye lesite emahloni nalesiliphakela kahle livi leliciniso.”—2 Thim. 2:15.

8, 9. Yini lengasisita kutsi sitfole umcondvo waloko lokushiwo liBhayibheli? Niketa sibonelo.

⁸ Yini leyawusisita kutsi siliphakele kahle livi leliciniso emsebentini wetfu wekushumayela? Ngembikwekuba sikundlulisele kulabanye loko lokushiwo liBhayibheli, natsi kufanele sikucondze kahle. Loko kusho kutsi kufanele sinakisise lokushiwo livesi nelivesi nobe indzinyana yalo. Lesinye sichaza magama sitsi: “Umgogodla weligama, wemusho nobe wendzaba seyiyonkhe ucuketse emagama, imisho nobe sigaba lesisetjentiswe nalelo gama futsi uyasita ekwenteni loko lokushiwoko kutsi kukhanye bha.”

⁹ Kute siyicondze kahle indzinyana letsite yemBhalo, kufanele sifundze nalamanye emavesi lahlobene nayo. Emavi aPawula latfolakala kuGalathiya 5:13 asibonelo lesihle saloko. Wabhala: “Ngobe bazalwane, nabitelwa enkhululekweni; kuphela nje ningayisebentisi inkhululeko yenu kunika ematfuba ekwenta sono, kodvwa khontanani ngelutsandvo lomunye kulomunye.” Nguyiphi inkhululeko Pawula abekhuluma ngayo lapha? Abekhuluma ngekukhululeka esonweni nasekufeni yini, etimfundzisweni temanga nome kulokunye lokutsite? Umgogodla walendzaba uveta kutsi Pawula abekhuluma ngenkhululeko lebangelwa ‘kukhululwa ekucalekisweni ngumtsetfo.’ (Gal. 3:13, 19-24; 4:1-5) Abekhuluma ngenkhululeko yekulandzela Khristu.  Labo labajabulela lenkhululeko, lutsandvo lwabenta kutsi bakhontane. Labo labebangayitsandzi bebachubeka bahlebana futsi baphikisana.—Gal. 5:15.

10. Kute siwutfole kahle umcondvo wemBhalo, ngukuphi kwatiswa lokufanele sikutfole, futsi singakutfola njani?

¹⁰ Ligama lelitsi “umgogodla wendzaba” liphindze lichazwe nangalenye indlela. Lamanye emagama lafanana nalo afaka ekhatsi lelitsi “umsuka,”nalelitsi “timo.” Kute sikwati kucondza kutsi umbhalo lotsite usho kutsini, kufanele sitfole kwatiswa lokwenabile ngawo, njengekutsi ngubani lowabhala leyoncwadzi yeliBhayibheli, yabhalwa nini, futsi ngaphansi kwatiphi timo. Kuphindze kube lusito kakhulu nekwati injongo yekubhalwa kwaleyoncwadzi, nakungenteka siphindze sati nekutsi ngaleso sikhatsi sasinjani simo sekuphila kwebantfu, indlela yabo yekutiphatsa kanye netinkholelo tabo. a

11. Yini lokufanele siyicaphele nasichaza imibhalo?

¹¹ “Kuphakela livi laNkulunkulu kahle” kufaka ekhatsi lokungetulu kwekumane nje uchaze kahle imiBhalo. Kufanele sicaphele kutsi liBhayibheli asilisebentiseli kwesabisa bantfu. Nanobe singayisebentisa imiBhalo kuvikela liciniso, njengobe naJesu enta ngalesikhatsi alingwa nguDeveli, kufanele sikhumbule kutsi liBhayibheli akusiyo nani incwadzi yekwesabisa bantfu. (Dut. 6:16; 8:3; 10:20; Mat. 4:4, 7, 10) Kufanele silalele sikhutsato semphostoli Phetro lesitsi: “Kepha mngcweliseni Khristu abe yiNkhosi etinhlitiyweni tenu, nimhloniphe, nihlale nilungele kubaphendvula bonkhe labanibuta ngelitsemba lelikini.”—1 Phet. 3:15.

12, 13. Ngutiphi tintfo ‘letimbelwe tashona’ letingabhidlitwa liVi laNkulunkulu? Niketa sibonelo.

¹² Lingafezani liciniso leliVi laNkulunkulu nangabe liphakelwe ngendlela lekahle? (Fundza 2 Khorinte 10:4, 5, NW.) Liciniso lemiBhalo ‘lingacitsa timfundziso letimbelwe tashona,’ njengetimfundziso temanga, imikhuba lelimatako kanye netinkholelo letibonakalisa kuhlakanipha kwemuntfu longakapheleli. Singalisebentisa liBhayibheli kucedza nobe ngabe ngumuphi umbono ‘lovimbela kwati ngaNkulunkulu.’ Timfundziso teliBhayibheli tingasetjentiswa kute tisite labanye balungise indlela yabo yekucabanga kute ivumelane neliciniso.

¹³ Ase ucabange ngesibonelo salomsikati waseNdiya loneminyaka lengu-93 budzala. Kusukela aseluswane wafundziswa kukholelwa kakhulu emfundzisweni yekutalwa kabusha. Ngesikhatsi acala kufundza liBhayibheli ngeliposi nendvodzana yakhe leyayihlala ngesheya kwetilwandle, wakwemukela ngenjabulo loko abekufundza ngaJehova nangetetsembiso takhe. Noko-ke, imfundziso yekutalwa kabusha beyingene yatsi-shi engcondvweni yakhe kangangekutsi ngesikhatsi indvodzana yakhe imbhalela ngesimo salabafile, wayiphikisa. Wase utsi: “Angikwati kulicondza liciniso lalemiBhalo yakho. Tonkhe tinkholo tifundzisa kutsi kunalokutsite ngekhatsi kitsi lokungafi. Bengisolo ngikholwa kutsi  umtimba uyafa nekutsi incenye letsite lengabonakali ichubeka italwa kuleminye imitimba tikhatsi letingu-8 400 000. Kungenteka njani kutsi loku kungasabi liciniso? Linyenti laletinkholo tinemanga yini?” ‘Inkemba yemoya’ ingakwati yini kuyicitsa lenkholelo lembelwe yashona kangaka? Ngemuva kwekucoca ngemiBhalo letsite lemayelana nalendzaba, emavikini lambalwa lalandzela wabhala: “Nyalo-ke, sengicala kulicondza liciniso lokungulona lona ngekufa. Kungijabulisa kakhulu kwati kutsi nasekuvuka labafile, sitawukwati kuphindze sibabone labo lesibatsandzako labafile. Ngifisa shengatsi uMbuso waNkulunkulu ungefika ngekushesha.”

Lisebentise Ngendlela Lenetisako

14. Kusho kutsini kwenetisa tilaleli tetfu?

¹⁴ Kusebentisa liBhayibheli ngendlela lephumelelako emsebentini wetfu wekushumayela, akusho kumane nje ucaphune imibhalo. Pawula wakhuluma ‘ngekwenetisa,’ ngako natsi kufanele sente lokufananako. (Fundza Imisebenti 19:8, 9; 28:23.) ‘Kwenetisa’ kusho “kwenta umuntfu akukholelwe loko lokushoko.” Loyo lowenetisiwe “uyaciniseka kangangekutsi loko lokushiwoko uvele akwetsembe.” Nasenetisa umuntfu kutsi emukele loko lokufundziswa liBhayibheli, sisuke simenta kutsi abeke litsemba lakhe kuleyo mfundziso. Kute sikwati kwenta loko, kudzingeka sicinisekise tilaleli tetfu kutsi kuliciniso kangakanani loko lesikushoko. Singakwati kwenta loko nganati tindlela letilandzelako.

15. Singakucondzisa njani kunaka eBhayibhelini ngendlela letawenta kutsi lihlonishwe?

¹⁵ Condzisa konkhe kunaka eVini laNkulunkulu ngendlela letawenta kutsi lihlonishwe. Nawufundza umbhalo, condzisa konkhe kunaka endleleni Nkulunkulu lativa ngayo ngaloko lenicoca ngako. Ngemuva kwekuba sewutfole imphendvulo yembuto lowubute umnikati welikhaya, ungahle utsi, ‘ase sibone kutsi uyini umbono waNkulunkulu ngalendzaba.’ Mhlawumbe ungaphindze ubute, ‘Ucabanga kutsi Nkulunkulu utiva njani ngalendzaba?’ Nangabe setfula imibhalo ngalendlela sisuke sigcizelela kutsi liBhayibheli livela kuNkulunkulu futsi loko kusita tilaleli tibone kubaluleka kwalo. Kwenta njalo kubaluleke kakhulu nasishumayela kumuntfu lokholelwa kuNkulunkulu kodvwa longaketayelani naloko lokufundziswa liBhayibheli.—Hla. 19:7-10.

16. Yini lengasisita kutsi sikwati kuchaza kahle imibhalo?

¹⁶ Yenta lokungetulu kwekumane nje ufundze imibhalo; yichaze. Pawula abetayele ‘kuchaza aphindze akhombe nemibhalo’ lemayelana naloko labekusho. (Imis. 17:3) Ngalesinye sikhatsi umBhalo uba nemaphuzu lamanyenti, ngako-ke kungahle kudzingeka ucacise lelo phuzu lelihambisana naloko lenikhuluma ngako. Ungakwenta loko ngekutsi uphindze ufundze lencenyana yelivesi lenaleliphuzu nome ubute umbuto lotawusita umnikati wemuti kutsi alibone. Ngemuva kwaloko chaza loko lokushiwo ngulelo phuzu lalombhalo, bese usita silaleli sakho sibone kutsi lombhalo usebenta njani kuso.

17. Ungabonisana njani nalabanye ngemiBhalo ngendlela lecinisekisako?

¹⁷ Bonisana nebantfu ngemiBhalo ngendlela lecinisekisako. Pawula ngekucinisekisa ‘wabonisana nebantfu ngemiBhalo’ ngendlela lenemivelo nekucabangela. (Imis. 17:2, 4, NW) NjengaPawula, asetame kufinyelela tinhlitiyo tetilaleli tetfu. ‘Khipha’ loko lokusetinhlitiyweni tato ngekusebentisa imibuto letatenta tivete loko letikutsandzako. (Taga 20:5) Yekela kuba bete luvelo. Veta imibono yakho ngendlela lecacile nangekuhlakanipha. Imibono yakho kufanele isekelwe bufakazi lobenetisako. Loko lokukhulumako kufanele  kusekelwe eVini laNkulunkulu liBhayibheli. Kuncono kusebentisa umbhalo munye uwuchaze kahle futsi uwufananise nalelo phuzu lolichazako, kunekutsi usebentise imibhalo leminyenti ngesikhatsi sinye. Kusebentisa bufakazi lobuliciniso kungakwenta ‘ukhulume emavi lanetisako.’ (Taga 16:23) Ngaletinye tikhatsi kungahle kudzingeke uhlolisise kute ukwati kuniketa bufakazi lobubanti. Lona lomsikati lesikhulume ngaye loneminyaka lengu-93 budzala abefuna kwati kutsi kungani lemfundziso yekungafi kwemphefumulo igcwele yonkhe indzawo. Kucondza kutsi lemfundziso yavela kuphi nekutsi yangena njani etinkholweni letisemhlabeni wonkhe, kwakubalulekile kute enetiseke futsi emukele loko liBhayibheli lelikufundzisako ngalendzaba. b

Chubeka Ulisebentisa Ngelikhono

18, 19. Kungani kufanele sisebentise ‘inkemba yemoya’ ngelikhono?

¹⁸ LiBhayibheli litsi: “Simo salelive siyendlula.” Bantfu lababi basuka kulokubi baya kulokubi kakhulu. (1 Khor. 7:31; 2 Thim. 3:13) Ngako-ke, kubalulekile kutsi sichubeke ‘sicitsa timfundziso letimbelwe tashona’ sisebentise ‘nenkemba yemoya, lelivi laNkulunkulu.’

¹⁹ Siyajabula ngekuba neliVi laNkulunkulu liBhayibheli, nekusebentisa umlayeto walo lonemandla lotiveta ebaleni timfundziso temanga futsi lofinyelela tinhlitiyo talabacotfo! Ayikho imfundziso lembelwe yashona lenemandla kwendlula livi laNkulunkulu liBhayibheli. Ngako-ke, asitimisele kuyisebentisa ngelikhono ‘lenkemba yemoya’ emsebentini wetfu lesiwuphiwe nguNkulunkulu wekumemetela ngeMbuso.

[Imibhalo lengentasi]

Yini Loyifundzile?

• Linemandla kangakanani liVi laNkulunkulu?

• Yini lengasisita kutsi ‘siliphakele kahle livi’?

• Yini umlayeto weliBhayibheli longayenta ‘ngetimfundziso letimbelwe tashona’?

• Ungakutfutfukisa njani kukhuluma ngendlela leyenetisako emsebentini wekushumayela?

[Imibuto Yesihloko Lesifundvwako]

[Libhokisi/Sitfombe ekhasini 21]

Tindlela Tekusebentisa LiVi LaNkulunkulu Ngendlela Leyenetisako

▪ Yenta kutsi liBhayibheli lihlonishwe

▪ Chaza imiBhalo

▪ Bonisana nebantfu ngekuciniseka kute ukwati kufinyelela tinhlitiyo tabo

[Sitfombe ekhasini 20]

Kufanele ufundze kuyisebentisa kahle ‘inkemba yemoya’