‘Umoya Namakoti Bachubeka Batsi: “Kota!”’
‘Umoya Namakoti Bachubeka Batsi: “Kota!”’
‘UMoya namakoti bachubeka batsi: “Kota!” . . . Lowo lowomile akete; nalowo lofuna emanti ekuphila, akawanatse mahhala.’—SEMB. 22:17.
1, 2. Tintfo letimayelana neMbuso kufanele tibe nayiphi indzawo ekuphileni kwetfu, futsi kungani kufanele kube njalo?
TINTFO letimayelana neMbuso kufanele tibe nayiphi indzawo ekuphileni kwetfu? Jesu watjela balandzeli bakhe kutsi ‘bachubeke bafuna umbuso kucala,’ wabacinisekisa ngekutsi nabenta njalo, Nkulunkulu utawubanika loko labakudzingako. (Mat. 6:25-33) Wafananisa uMbuso waNkulunkulu nemcebo loligugu lokwatsi indvodza letsite nayiwutfola ‘yayawutsengisa ngako konkhe leyayinako, yancandzeka yayawutsenga.’ (Mat. 13:45, 46) Akukafaneli yini kutsi lomsebenti wekushumayela ngeMbuso newekwenta bafundzi siwutsatse njengaloyo lobaluleke kakhulu kitsi?
2 Njengobe sibonile kuletihloko letimbili letengcile, kukhuluma kwetfu ngesibindzi kanye nekulisebentisa ngelikhono liVi laNkulunkulu emsebentini wekushumayela, kukhombisa kutsi sicondziswa ngumoya waNkulunkulu. Lomoya unendzima lebalulekile ekutseni sikwati kuhlanganyela njalo kulomsebenti wekushumayela ngeMbuso. Asesibone kutsi ukwenta njani loko.
Simemo Lesiya Kubo Bonkhe Bantfu!
3. Nguluphi luhlobo lwemanti bonkhe bantfu labamenywa kutsi ‘bete’ batewanatsa?
3 Umoya longcwele ukhiphe simemo lesiya kubo bonkhe bantfu. (Fundza Sembulo 22:17.) Bamenywa kutsi ‘bete’ batewucedza koma ngeluhlobo lolutsite lwemanti lakhetsekile. Akusiwo nani emanti letayelekile lentiwe ngetincenye letimbili te-hydrogen kanye nencenye yinye lekutsiwa ngumoya mphilo. Nanobe emanti lesiwetayele abalulekile kute asekele kuphila emhlabeni, Jesu abecabanga ngalolunye luhlobo lwemanti lolwehlukile ngalesikhatsi atjela lomsikati waseSamariya lobekasemtfonjeni: “Lowo loyawunatsa emanti lengiyawumnika wona, angeke aphindze ome naphakadze; ngobe emanti lengiyawumnika wona, ekhatsi kuye ayawuba ngumtfombo wemanti laphuphumako, kube kuphila lokuphakadze.” (Joh. 4:14) Lamanti lamangalisako bantfu labamenywa kutsi bawanatse, aniketa kuphila lokuphakadze.
4. Sabakhona njani sidzingo semanti ekuphila, futsi yini lemelela lawo manti?
4 Sidzingo salamanti ekuphila sabakhona ngesikhatsi umuntfu wekucala, Adamu, ahlanganyela nemfati wakhe Eva ekungamlalelini loyo lobekabadalile—Nkulunkulu Jehova. (Gen. 2:16, 17; 3:1-6) Labantfu bekucala bacoshwa kulelikhaya labo leliyingadze ‘kute kutsi Adamu angakhi kulesihlahla sekuphila adle, bese uphila kuze kube phakadze naphakadze.’ (Gen. 3:22) Njengakhokho wetfu, Adamu wabese wendlulisela kufa kubo bonkhe bantfu. (Rom. 5:12) Emanti ekuphila amelela onkhe emalungiselelo aNkulunkulu ekusindzisa bonkhe bantfu labalalelako esonweni nasekufeni bese batfola kuphila lokuphelele nalokungapheli ePharadisi emhlabeni. Lamalungiselelo akhona ngesizatfu semhlatjelo waJesu Khristu wesihlengo.—Mat. 20:28; Joh. 3:16; 1 Joh. 4:9, 10.
5. Lesimemo sekuta ‘utewutsatsa emanti ekuphila mahhala’ sibuya kubani? Ase uchaze.
5 Sibuya kubani lesimemo sekutsi bantfu bete ‘batewutsatsa emanti ekuphila mahhala’? Ngalesikhatsi onkhe emalungiselelo ekuphila atfolakala ngebunyenti ngaJesu Khristu ekhatsi nekuBusa kwakhe Kweminyaka leyiNkhulungwane, achazwa ‘njengemfula wemanti ekuphila, lakhanya njengengilazi.’ “Emanti awo abegeleta aphuma esihlalweni sebukhosi saNkulunkulu neseliWundlu.” (Semb. 22:1) Jehova uMniki weKuphila, ungumtfombo wemanti laniketa kuphila. (Hla. 36:9) Nguye lowenta lamanti atfolakale, ngaJesu Khristu ‘liWundlu.’ (Joh. 1:29) Lomfula longumfanekiso uyindlela yaJehova yekucedza yonkhe imiphumela lemibi leyabangelwa kungalaleli kwa-Adamu. Liciniso, simemo lesitsi “kota” sivela kuNkulunkulu Jehova.
6. ‘Umfula wemanti ekuphila’ wacala nini kugeleta?
6 Nanobe ‘lomfula wemanti ekuphila’ utawugeleta ngemcondvo lophelele ekhatsi kweMinyaka leyiNkhulungwane yekuBusa kwaKhristu, wacala kugeleta “ngelilanga leNkhosi” lelacala ngalesikhatsi kugcotjwa ‘Imvana’ ezulwini nga-1914. (Semb. 1:10) Kungaleso sizatfu lamanye emalungiselelo ekuphila acala kutfolakala ngemuva nje kwaloko. Afaka ekhatsi liVi laNkulunkulu liBhayibheli, ngobe umlayeto walo kutsiwa ‘ungemanti.’ (Ef. 5:26) Lesimemo sekutsatsa “emanti ekuphila” ngekulalela futsi sente loko lokushiwo tindzaba letinhle teMbuso, siya kubo bonkhe bantfu. Kodvwa ngubani lona lowendlulisela lesimemo ngelilanga leNkhosi?
‘Makoti’ Utsi “Kota!”
7. Bobani labendlulisela lesimemo lesitsi “kota,” kwekucala “ngelilanga leNkhosi,” futsi basendlulisela kubobani?
7 Emalunga elicembu lamakoti—emaKhristu lagcotjwe ngemoya—ngiwo ekucala latfola lesimemo lesitsi: “kota.” Lesimemo besicondziswe kubobani? Lamavi akhe abecondziswe kulabo labanelitsemba lekuzuza kuphila lokuphakadze emhlabeni ngemuva kwekuba “imphi yelilanga lelikhulu laNkulunkulu, Somandla” seyiliwe.—Fundza Sembulo 16:14, 16.
8. Yini lekhombisa kutsi emaKhristu lagcotjiwe abesolo endlulisela lesimemo saJehova kusukela nga-1918?
8 Balandzeli baKhristu labagcotjiwe bebasolo bandlulisa lesimemo kusukela nga-1918. Ngalowo mnyaka, inkhulumo yelinyenti leyayinesihloko lesitsi “Tigidzi Letiphilako Nyalo Kungenteka Tingasafi” yaniketa litsemba lekutsi labanyenti batawutfola kuphila emhlabeni lolipharadisi ngemuva kwemphi ye-Amagedoni. Inkhulumo leyetfulwa emhlanganweni weBafundzi beliBhayibheli lowawuse-Cedar Point, Ohio, U.S.A., ngemnyaka wa-1922 yagcugcutela tilaleli kutsi ‘timemetele kubantfu ngeNkhosi kanye nembuso wayo.’ Lesicelo sasita insali yelicembu lalomakoti kutsi likwati kufinyelela bantfu labanyenti ngalesimemo. Nga-1929, Sicongosekulindza sa-March 15, (lesitfolakala ngasingisi) besinesihloko lesitsi “Simemo Semusa,” lesasisekelwe kuSembulo 22:17. Incenye yalesehluko beyitsi: “Insali yalelicembu leletsembekile yatihlanganisa [naLosetikwako Konkhe] kulesimemo lesitsi, ‘Kota.’ Lomlayeto kufanele umenyetelwe kulabo labanesifiso sekulunga kanye neliciniso. Kudzingeka wentiwe nyalo.” Nalamuhla lelicembu lalomakoti liyasendlulisela lesimemo.
“Wonkhe Umuntfu Lovako Akatsi: ‘Kota!’”
9, 10. Labo labasivile lesimemo base baphendvula ngekutsi, “Kota!” yini labayentile?
9 Kutsiwani ngalabo labeva lesimemo lesitsi, “kota”? Nabo bayamenywa kutsi baphendvule batsi, “Kota!” Sibonelo saloku kutsi Sicongosekulindza sa-August 1, 1932, emakhasini 232 (lesitfolakala ngesingisi) sitsi: “Vumela labo labagcotjiwe kutsi bakhutsate bonkhe labafuna kuba nencenye ekutjeleni bantfu tindzaba letinhle tembuso. Akudzingeki kutsi baze babe ngulabagcotjiwe beNkhosi kute bamemetele umlayeto weNkhosi. Kuyindvudvuto lenkhulu kakhulu kuboFakazi BaJehova kwati kutsi bavunyelwe kuphatsa emanti ekuphila ecenjini lebantfu lokungenteka basindze e-Amagedoni futsi batfole kuphila lokuphakadze emhlabeni.”
10 Sicongosekulindza sa-August 15, 1934 emakhasini 249, (lesitfolakala ngesingisi) naku lesakusho nasigcizelela loko lokwakufanele kwentiwe ngulabo labeva lesimemo bese nabo batsi, “Kota!”: “Labo labakha licembu lemaJonadabi kufanele bahambisane nalabo labakha licembu laJehu lalabagcotjiwe, futsi bamemetele umlayeto wembuso ngisho nobe bangesibo boFakazi BaJehova labagcotjiwe.” Ngemnyaka wanga-1935, kubonakala ‘kwesicumbi lesikhulu’ lesichazwe kuSembulo 7:9-17, kwacaca ngalokusebaleni. Loko kwenta kutsi kube nemiphumela lemikhulu emsebentini wekwendlulisa lesimemo saNkulunkulu. Kusukela ngaleso sikhatsi linani lelikhulako lesicumbi lesikhulu setikhonti teliciniso—letingetulu kwetigidzi letisikhombisa lamuhla—liye lasabela kuleso simemo. Ngemva kwekuba sebawuvile lomlayeto, batinikele kuNkulunkulu baphindze babhajatiswa futsi baba secenjini lamakoti ngekuchubeka ngenkhutsalo bamema labanye kutsi ‘bete banatse emanti ekuphila mahhala.’
‘Umoya’ Utsi, “Kota!”
11. Ekhulwini lekucala leminyaka C.E., umoya longcwele bewunayiphi indzima emsebentini wekushumayela?
11 Ngalesikhatsi Jesu ashumayela esinagogeni laseNazaretha, wavula incwadzi legociwe yemphrofethi Isaya, wayifundza: “Umoya weNkhosi ukimi, ngobe ungigcobile kutsi ngishumayele tindzaba letimnandzi etimphuyeni; ungitfumile kutsi ngimemetele inkhululeko kulabatfunjiwe, nekuvula emehlo etimphumphutseni, nekukhulula labacindzetelekile, ngimemetele umnyaka iNkhosi letakukhombisa umusa wayo ngawo.” Ngako Jesu waphindze wacondzisa lamavi kuye, watsi: “Lamuhla lomBhalo ugcwalisekile, njengobe nitivele nje kutsi utsini.” (Luk. 4:17-21) Ngembikwekuba anyukele ezulwini, naku Jesu lakutjela bafundzi bakhe: “Kodvwa nine nitawugcwaliswa ngemandla, nasefikile kini [umoya] longcwele, niyawuba bofakazi bami . . . kuze kube ngusekugcineni kwemhlaba.” (Imis. 1:8) Ekhulwini lekucala leminyaka, umoya longcwele ube lusito kakhulu emsebentini wekushumayela.
12. Umoya waNkulunkulu uhlobene njani nekwendlulisela simemo kulabanye lamuhla?
12 Umoya longcwele waNkulunkulu ube nayiphi indzima ekwendluliseni simemo kubantfu lamuhla? Jehova nguye umtfombo wemoya longcwele. Usebentisa umoya wakhe kute avule tinhlitiyo netingcondvo talabo labakha licembu lamakoti kute bacondze liVi lakhe liBhayibheli. Umoya longcwele ubasita kutsi bendlulisele lesimemo futsi bachaze emaciniso emiBhalo kulabo labanelitsemba lekuphila phakadze ePharadisi emhlabeni. Kutsiwani ngalobo labemukela lesimemo bese baba bafundzi baJesu Khristu, baphindze bendlulisele lesimemo kulabanye? Nabo umoya uyabasekela. Ngesizatfu sekutsi babhajatiswe ‘egameni lemoya longcwele,’ bavumelana nawo futsi batsembela elusitweni lawo. (Mat. 28:19) Asewuphindze ucabange ngemlayeto loshunyayelwa ngulabagcotjiwe kanye nesicumbi lesikhulu. Nawo useBhayibhelini—incwadzi lebhalwe kusetjentiswa umoya waNkulunkulu. Ngako-ke, lesimemo sendluliselwa ngemoya longcwele. Natsi lamuhla sicondziswa ngumoya longcwele. Loko kufanele kusitsintse njani sikhatsi lesisicitsa emsebentini wekumema labanye?
‘Bachubeka Batsi: “Kota!”’
13. Akhombisani lamavi latsi ‘umoya namakoti bachubeka batsi: “Kota!”’?
13 ‘Umoya namakoti’ abamane nje batsi “Kota!” Lapha sento lesitsi bachubeka, sifane sisho intfo letsite loyenta ngalokuchubekako ungayekeli. Ase ucabange ngalokujulile ngaleliciniso, i-New World Translation ifundzeka ngalendlela: ‘Umoya namakoti bachubeka batsi: “Kota!”’ Loku kusho kuchubeka njalo utjela labanye ngalesimemo saNkulunkulu. Kutsiwani ngalabo labasivako futsi basemukele lesimemo? Nabo batsi, “Kota!” Sicumbi lesikhulu setikhonti teliciniso kutsiwa ‘sikhonta imini nebusuku ethempelini laJehova.’ (Semb. 7:9, 15) Sikwenta ngamuphi umcondvo kukhonta Jehova ‘imini nebusuku’? (Fundza Lukha 2:36, 37; Imisebenti 20:31; 2 Thesalonika 3:8.) Tibonelo letimbili, semphrofethikati longu Ana kanye nemphostoli Pawula tiyasikhombisa kutsi kukhonta lesikwentela Jehova ‘imini nebusuku’ kufane nje kusho kuchubeka ngemandla nangenkhutsalo senta umsebenti wekushumayela.
14, 15. Danyela wakukhombisa njani kubaluleka kwekukhonta Jehova njalo?
14 Umphrofethi Danyela naye wakhombisa kubaluleka kwekuchubeka ukhonta Nkulunkulu njalo. (Fundza Danyela 6:4-10, 16.) Akazange asigucule simiso sakhe sekutondla ngakamoya—umkhuba wakhe wekuthandaza kuNkulunkulu “katsatfu ngelilanga, . . . njengobe abevame kwenta ngaphambili”—ngisho nenyanga yinye, nobe loko kwakusho kujikijelwa emgodzini wemabhubesi. Indlela lenta ngayo yabakhombisa ngalokusebaleni labo labebabukele kutsi kute lokubaluleke kwendlula kukhonta Jehova njalo.—Mat. 5:16.
15 Danyela watsi asacitse busuku bonkhe asemgodzini wemabhubesi, inkhosi yeta yamemeta yatsi: “Danyela, nceku yaNkulunkulu lophilako, loNkulunkulu wakho, lomkhonta njalonjalo, ukhonile yini kukulamlela emabhubesini?” Danyela masinyane waphendvula: “Lunwele loludze, nkhosi! Nkulunkulu wami utfumele ingilosi yakhe, lefike yavala imilomo yemabhubesi. Akangilimati, ngobe ngitfolakele ngite licala emehlweni akhe, kantsi nakuwe nkhosi, kute lengikonile.” Jehova wambusisa Danyela ngobe ‘wacinisela ekumkhonteni.’—Dan. 6:19-22.
16. Sibonelo saDanyela kufanele sisente sitibute miphi imibuto mayelana nekuhlanganyela kwetfu emsebentini wekushumayela?
16 Danyela abetimisele kufane afe kunekutsi ayekele kuchubeka akhonta Jehova. Kutsiwani ngatsi? Ngukuphi kutinikela lesikwentako nobe lesifisa kukwenta kute simemetele tindzaba letinhle teMbuso waNkulunkulu ngalokuchubekako? Asingayivumeli inyanga kutsi iphele nya, singakakhulumi nalabatsite ngaJehova. Nangabe timo tisivumela, asikwente umkhuba kuba khona liviki neliviki emsebentini wekushumayela. Nobe ngabe sibutsakatsaka emtimbeni, kodvwa nasikhona kufakaza cishe imizuzu lengu-15 enyangeni, kufanele leso sikhatsi sisibike. Ngani? Ngobe kwenta kwetfu kanjalo kuyokhombisa kutsi natsi sinesifiso sekusho kanye kanye nemoya namakoti sitsi, “Kota!” Yebo, sifuna kwenta konkhe lokusemandleni etfu kutsi ngaso sonkhe sikhatsi sihlale sibamemeteli beMbuso labashumayela njalo.
17. Mayelana nekutjela labanye ngesimemo saJehova, ngumaphi ematfuba lokungakafaneli asilahlekele?
17 Kufanele sisebentise onkhe ematfuba lesiwatfolako kute sendlulisele simemo saJehova, hhayi nje kuphela ngesikhatsi lesisibekele kuba sensimini. Cabanga nje kutsi kulilungelo kanganani kumema labo labomile kutsi ‘bete batsatse emanti ekuphila mahhala’ ngaletinye tikhatsi, njengalapho siyotsenga, sihamba, sisemaholidini, emsebentini nobe ngisho nasesikolweni! Nobe nje tiphatsimandla tiwuvimbela umsebenti wetfu wekushumayela, sichubeka siwenta ngekuhlakanipha—mhlawumbe ngekutsi sisebente imiti nje lembalwa kuleyo ndzawo bese sendlulela kulenye nobe ngekufakaza lokungakahlelwa.
Chubeka Utsi, “Kota!”
18, 19. Nguyiphi indlela longakhombisa ngayo kutsi lelilungelo lekuba sikhonti saNkulunkulu ulitsatsa njengalelo lelibalulekile?
18 Sekwendlule iminyaka lengetulu kwa-90, umoya namakoti batsi, “Kota!” kunobe ngubani lowomele emanti ekuphila. Wake wasiva yini lesimemo sabo lesijabulisa nakangaka? Ngako-ke, nawe ucelwa kutsi usendlulisele kulabanye.
19 Asati kutsi lesimemo saJehova selutsandvo siyawuchubeka sendluliselwa kulabanye sikhatsi lesidze kangakanani, kodvwa kusabela kwetfu ngekutsi sitsi, “Kota!” kusenta sibe tisebenti letikanye naNkulunkulu. (1 Khor. 3:6, 9) Cabanga nje ngelilungelo lelinjalo! Shengatsi singakhombisa kutsi silitsatsa njengalelibalulekile lelo lungelo, futsi ‘simbonge njalo Nkulunkulu, simdvumise’ ngekushumayela ngaso sonkhe sikhatsi. (Heb. 13:15) Sikanye namakoti, shengatsi sonkhe tsine lesinelitsemba lekuphila emhlabeni singachubeka sitsi, “Kota!” Shengatsi futsi labanyenti bangatsatsa nakha emanti ekuphila mahhala!
Ufundzeni?
• Lesimemo lesitsi “kota” sendluliselwa kubobani?
• Kungani singatsi lesimemo lesitsi “kota” sisuka kuJehova?
• Umoya longcwele unayiphi indzima ekwendluliseleni lesimemo lesitsi “kota”?
• Kungani kufanele silwele kuba khona njalo emsebentini wekushumayela?
[Imibuto Yesihloko Lesifundvwako]
[Lishadi/Titfombe ekhasini 25]
(Kute ubone kwatiswa lokuhlelwe kahle, fundza incwadzi)
Chubeka Utsi, “Kota!”
1914
Bamemeteli labangu-5 100
1918
Labanyenti batawutfola kuphila lokuphakadze emhlabeni
1922
“Memetelani, memetelani, memetelani, iNkhosi nembuso wayo”
1929
Insali leyetsembekile itsi, “Kota!”
1932
Lesimemo lesitsi, “Kota!” sendluliselwa nakulabo labangakagcotjwa
1934
Labo labakha licembu lemaJonadabi bayamenywa kutsi bashumayele
1935
“Sicumbi lesikhulu” sicaca ngalokusebaleni
2009
Bamemeteli labangu-7 313 173