Bantfu Labasha, Khulisani Sifiso Senu Sekukhonta Jehova

“Khumbula uMdali wakho etinsukwini tebusha bakho.”—SHU. 12:1.

1. Bantfwana baka-Israyeli batfola simemo sani?

 SEKWENDLULE iminyaka lecishe ibe ngu-3 500, umphrofethi waJehova longuMosi ayala baphristi kanye nemadvodza lamadzala watsi: “Hlanganisa sonkhe sive, emadvodza, nebafati, nebantfwana . . . , khona batewulalela bafundze nekwesaba Simakadze Nkulunkulu wenu. Nibowalandzela ngekucophelela lokukhulu onkhe lamavi alomtsetfo.” (Dut. 31:12) Naka kutsi bobani labanikwa umyalo wekuya emihlanganweni yekukhonta Nkulunkulu: ngemadvodza, labasikati kanye nebantfwana. Kunjalo, ngisho nebantfu labasha bebasekhatsi kwalabo lobekumelwe balalele, bafundze futsi balandzele kucondziswa nguJehova.

2. Jehova wakubonisa njani kukhatsalela bantfu labasha ebandleni lebuKhristu langelikhulu lekucala leminyaka?

² Ngelikhulu lekucala leminyaka, Jehova wachubeka abonisa kubakhatsalela bantfu labasha. Nasi sibonelo: Waphefumulela umphostoli Pawula kutsi afake ngisho neticondziso talabasha kuletincwadzi latibhalela futsi watitfumelela emabandla. (Fundza Efesu 6:1; Kholose 3:20.) EmaKhristu lamasha ngeminyaka, lasebentisa leseluleko, ayatfutfuka ekubongeni Babe wawo lonelutsandvo losezulwini aphindze avuna netibusiso.

3. Bantfu labasha lamuhla basibonisa njani sifiso sekukhonta Nkulunkulu?

³ Solo bantfu labasha bayamenywa yini kutsi bahlangane batewukhonta Jehova lamuhla? Yebo! Kungumtfombo wenjabulo kubantfu bonkhe kubona labanyenti labasha balalela futsi bafaka enhlitiyweni sikhutsato saPawula lesitsi: “Ngako-ke asinakane, sisitane ngekukhutsatana elutsandvweni nasemisebentini lemihle. Singakuyekeli kuhlangana ndzawonye, njengobe labanye sebanemkhuba wekungahlangani; kodvwa asikhutsatane kakhulu, njengobe nani niyabona kutsi lilanga selisondzele.” (Heb. 10:24, 25) Ngetulu kwaloko, bantfwana labanyenti bashumayela tindzaba letinhle teMbuso waNkulunkulu kanye nebatali babo. (Mat. 24:14) Kute tibonise lutsandvo lolusenhlitiyweni ngaJehova, tinkhulungwane tebantfu labasha umnyaka nemnyaka tiyabhajatiswa futsi titfole tibusiso tekuba balandzeli baKhristu.—Mat. 16:24; Mak. 10:29, 30.

Yemukela Lesimemo—Nyalo

4. Labasha bangasemukela nini simemo sekukhonta kuNkulunkulu?

⁴ Umshumayeli 12:1 utsi: “Khumbula uMdali wakho etinsukwini tebusha bakho.” Kudzingeka nibe neminyaka lemingakhi nine labasha kute nemukele simemo sekukhonta Jehova? Ayikho iminyaka lekaliwe lesemiBhalweni lengcwele. Ngako-ke, ningahudvuli tinyawo nicabange kutsi nisebancane kakhulu kutsi ningalalela futsi nikhonte Jehova. Umncane nobe umdzala, sikukhutsata kutsi ungaphotisi maseko kulendzaba.

5. Batali bangabasita njani bantfwana babo kute tibacacele kahle timfundziso teliBhayibheli?

⁵ Labasha labanyenti basitwa batali babo kute tibakhanyele timfundziso teliBhayibheli. Kwenteka lokufana ncamashi nakuThimothi lowaphila ngalesikhatsi kubhalwa liBhayibheli. Wafundziswa imibhalo lengcwele kusukela ebuntfwaneni ngunina wakhe Yunisi, nagogo  wakhe Lowisi. (2 Thim. 3:14, 15) Kungenteka kutsi batali bakho bayakucecesha ngekutsi bafundze nawe liBhayibheli, ingasatekwa-ke yekuthandaza nawe, kuya emihlanganweni yelibandla, nasemihlanganweni lemikhulu kanye nekushumayela nawe. Nembala, lona ngumsebenti lobaluleke kakhulu Jehova lawubeke emahlombe ebatali bakho kutsi bakufundzise tindlela takhe. Uyalatisa yini lutsandvo nekuba nendzaba labanako ngawe?—Taga 23:22.

6. (a) Nguyiphi indlela yekukhonta Jehova lemjabulisako lechazwe kuTihlabelelo 110:3? (b) Sitawuhlolani nyalo?

⁶ Njengobe nikhula, Jehova ufuna kutsi “nitekwati kuhlolisisa loko lokuyintsandvo yaNkulunkulu,” nilingisa Thimothi. (Rom. 12:2) Loko kuhlanganisa kuba mdzibimunye nelibandla hhayi nje ngekutsi nitsenge emehlo ebatali kodvwa ngesizatfu sekutsi nifuna kwenta intsandvo yaNkulunkulu. Jehova utawujabula nangabe nimkhonta ngenhlitiyo levumako. (Hla. 110:3) Ungamkhombisa njani Jehova kutsi ufuna kukhulisa sifiso sakho sekumlalela nekucondziswa nguye? Sitawuhlola tindlela letintsatfu letibalulekile tekwenta loko. Tifaka ekhatsi kudatisha liBhayibheli, kuthandaza nendlela yekutiphatsa. Asihlole indlela yinye sikhatsi ngasinye.

Yati Jehova Njengobe Wati Umuntfu

7. Jesu wasibekela siphi sibonelo ekufundzeni imiBhalo, futsi wasitwa bobani?

⁷ Indlela yekucala leningakhombisa ngayo kujulisa sifiso sekukhonta Jehova, kutsi nifundze liBhayibheli onkhe emalanga. Ninganelisa lilukuluku lenu lekukhonta Nkulunkulu ngekufundza liBhayibheli sikhatsi sonkhe. (Mat. 5:3) Jesu wakwenta loko emahlandla lamanyenti. Kulelinye lihlandla aneminyaka lengu-12 budzala, watfolwa batali bakhe ethempelini ‘ahleti netati temtsetfo, atilalele futsi atibuta nemibuto.’ (Luk. 2:44-46) Kusukela asengumntfwana, Jesu abenenkhaphunkhaphu yekuchazelwa imiBhalo lengcwele. Bobani labamsita? Akungabateki kutsi unina wakhe Mariya kanye neyise wakhe wasemhlabeni Josefa bamsita kakhulu. Bobabili bebatikhonti taNkulunkulu futsi ngibo labafaka kuJesu timfundziso tasezulwini kusukela asemncane.—Mat. 1:18-20; Luk. 2:41, 51.

8. (a) Batali kumelwe bacale nini kunamatselisa lutsandvo lweBhayibheli kubantfwana babo? (b) Shano sento lesibonisa buhle bekucecesha bantfwana kusukela basebancane

⁸ Batali labesaba Nkulunkulu lamuhla bayakwati kubaluleka kwekunamatselisa timfundziso teliBhayibheli tisuka nje kubantfwana babo. (Dut. 6:6-9) Nguloko kanye inkhosikati lengumKhristu Rubi leyakwenta kumntfwana wayo wekucala longumfana, Josefa. Lilanga ngalinye bebafundza INcwadzi Yami Yetindzaba TeliBhayibheli. Njengobe akhula, Josefa wakwati kubamba ngenhloko lamanye emavesi. Kwamsita yini loko? Watsi nje nakacala kukhuluma tangapheli emlonyeni wakhe tindzaba labetifundze kulencwadzi. Nakaneminyaka lengu-5 nje budzala, wacala kwetfula inkhulumo eSikolweni Semsebenti wemaKhristu.

9. Kufundza nekuzindla ngetintfo letiseBhayibhelini kubaluleke ngani?

⁹ Kute nichubeke nikhula ekukholweni, nine labasebasha, kudzingeka nikwente umkhuba kufundza liBhayibheli onkhe emalanga kusukela nisebancane kuchubeke. (Hla. 71:17) Kungani kufundza liBhayibheli njalo kunganisita kutsi nente intfutfuko? Nakisisa lokwakhulunywa nguJesu ngalesikhatsi athandaza kuBabe wakhe, watsi: “Kuphila lokuphakadze nguloku: kutsi bakwati wena, Nkulunkulu longuye yedvwa weliciniso.” (Joh. 17:3) Kuliciniso, kufundza ngaJehova kutanisita kute kunikhanyele bha! kutsi Jehova unguNkulunkulu lonjani, futsi nichubeke nijulise lutsandvo lwenu ngaye. (Heb. 11:27) Ngako-ke, sikhatsi ngasinye nangabe ufundza indzima letsite yeliBhayibheli, yente ikufundzise lokutsite ngaJehova. Tibute: ‘Lendzaba lengiyifundzako ingitjelani ngaJehova? Lutsandvo lwaNkulunkulu ngami luvetwe njani kulendzaba?’ Kutinika sikhatsi nizindla ngemibuto lenjalo kunganisita nifundze indlela Jehova lacabanga futsi ative ngayo kanye naloko lakulindzele kubantfu. (Fundza Taga 2:1-5.) NjengaThimothi, nitawuchubeka ‘nikukholelwa’  loko lenikufundze emiBhalweni, lokutawuphumela ekutseni nigcine senikhonta Jehova ngenhlitiyo yonkhe.—2 Thim 3:14.

Indlela Umthandazo Longajulisa Ngayo Lutsandvo Lwenu NgaJehova

10, 11. Umthandazo unisita njani kutsi nikhulise sifiso senu sekukhonta Nkulunkulu?

¹⁰ Imithandazo yenu iyindlela yesibili leningakhulisa ngayo sifiso senu sekukhonta Jehova ngalokusuka enhlitiyweni. Encwadzini yetiHlabelelo 65:2, siyafundza: “Wena uva imithandazo uyiphendvule; bonkhe bantfu bafanele kuta kuwe.” Ngisho nangesikhatsi Nkulunkulu ente sivumelwane nesive sema-Israyeli, betive nabo bebavunyelwe kuthandaza kuye. (1 Khos. 8:41, 42) Nkulunkulu akakhetsi, labo labatfobela imitsetfo yakhe bangaba nelitsemba lekutsi utawubalalela. (Taga 15:8) Kuliciniso, ‘bonkhe bantfu,’ lokufaka ekhatsi nani nine labasha, ningathandaza kuye.

¹¹ Nati kamhlophe kutsi sisekelo sebungani sibili, kubhobhokelana. Kuliciniso kutsi niyakujabulela kucocisana nebangani benu mhlawumbe mayelana naloko lenikucabangako, lokunihluphako kanye nekubatjela imiva yenu. Ngendlela lefananako, ngemthandazo losuka enhlitiyweni nisuke nichumana neMdali wenu loMkhulu. (Fil. 4:6, 7) Khulumani naJehova, nimtjele ngaloko lokusetinhlitiyweni tenu ngendlela lebeningenta ngayo kubatali benu labanitsandzako nobe kubangani. Ecinisweni, kunekuhlobana lokukhulu endleni lenithandaza ngayo nasendleleni lenitiva ngayo ngaJehova. Nitawunaka kutsi njengobe bungani benu naJehova bukhula, nemithandazo yenu itawujula.

12. (a) Kungani imithandazo lesuka enhlitiyweni isho lokungetulu kwemavi lowakhulumako? (b) Yini letanenta nibone ngalokukhanya bha kutsi Jehova usedvute nani?

¹² Akube setingcondvweni tenu kutsi imithandazo lesuka enhlitiyweni ingetulu kwaloko lenifane nje nikusho ngemilomo, ngobe yona ifaka ekhatsi ngisho nemiva yenu. Emithandazweni yenu, khulumani ngendlela lenimtsandza ngayo Jehova, indlela lenimhlonipha ngayo kanye nendlela lenimetsemba ngayo. Njengobe nati kutsi Jehova utiva njani ngemithandazo yenu, nitawunaka kutsi “Simakadze [Jehova] usedvute nabo bonkhe labambitako.” (Hla. 145:18) Nakanjani, Jehova utawusondzela kini anicinise kute nikwati kumelana naDeveli futsi nente kukhetsa lokuhle ekuphileni.—Fundza Jakobe 4:7, 8.

13. (a) Bungani naNkulunkulu bamsita njani Cherie? (b) Bungani naNkulunkulu bunisita njani kutsi nilwisane nekucindzetelwa botsanga yenu?

¹³ Cabanga indlela Cherie latfola ngayo emandla ngekuba nebuhlobo naJehova. Emfundvweni yelibanga leliphakeme esikolweni, Cherie wahlonyeliswa tipho letitsite ngesizatfu sekutsi wenta kahle kakhulu etifundvweni takhe nakutemidlalo. Nakacedza sikolwa, waniketwa umfundzate lowawutamenta achubekele embili emfundvweni lephakeme. Cherie utsi: “Lomfundzate wawungenta ngicabange kanyenti, futsi baceceshi bemidlalo lengangiyidlala kanye nalabo ngangifundza nabo, bangikhutsata kutsi ngiwutsatse.” Noko-ke, wacaphela kutsi kuchubeka nemfundvo kutamenta acitse sikhatsi lesinyenti atadisha futsi  lesinye sikhatsi asicitse aticeceshela imidlalo—abetawuba nesikhatsi lesincane kakhulu sekukhonta Jehova. Yini Cherie layenta? Utsi: “Ngemuva kwekuthandaza kuJehova, ngawala lomfundzate ngase ngicalisa kuba lihlahlandlela lelivamile.” Sikhuluma nje, sewube lihlahlandlela iminyaka lesihlanu. Utsi: “Angitisoli nakancane ngobe kwati kutsi ngakhetsa kwenta loko lokujabulisa Jehova, kungenta ngijabule. Ecinisweni, nangabe ubeka uMbuso waNkulunkulu kucala, tonkhe leti letinye tintfo utawengetelwa tona.”—Mat. 6:33.

Kutiphatsa Lokuhle Kukhombisa Kutsi ‘Ninenhlitiyo Lengenacala’

14. Kungani indlela lenitiphatsa ngayo ibalulekile emehlweni aJehova?

¹⁴ Indlela yesitsatfu leningakhombisa ngayo kutsi nikhonta Jehova ngenhlitiyo lemhlophe, yindlela lenitiphatsa ngayo. Jehova uyababusisa labasha labatiphatsa kahle. (Fundza Tihlabelelo 24:3-5) Samuweli losemusha wala waphetsa kulingisa sibonelo lesibi sekutiphatsa kwebantfwana bemPhristi loMkhulu Eli. Kutiphatsa kahle kwaSamuweli kwabonwa bantfu labanyenti. LiBhayibheli litsi: “Umfana Samuweli wachubeka wakhula ngesicu semtimba nasekutsandvweni nguSimakadze [Jehova] nasekutsandzekeni kubantfu.”—1 Sam. 2:26.

15. Ngutiphi letinye tizatfu letenta kutsi nitiphatse kahle?

¹⁵ Siphila eveni leligcwele bantfu labatitsandzako, labatigabisako, labangalaleli batali, labangabongi, labangatsembeki, labanebulwane, labakhukhumukiswe kutatisa, labatsandza kutijabulisa kunekutsi babe ngulabajabulisa Nkulunkulu—nasibala nje letinye taletimphawu letashiwo nguPawula. (2 Thim. 3:1-5) Ngako-ke, kungaba matima ngani kutiphatsa kahle njengobe niphila kulelive lelonakele kangaka. Nobe kunjalo, ngaso sonkhe sikhatsi nanenta lokulungile futsi nibalekele kwenta lokubi, nisuke nikhombisa kutsi niseluhlangotsini lwaJehova kulemphikiswane yebukhosi bakhe. (Jobe 2:3, 4) Ngetulu kwaloko, niphindze nenetiswe kwati kutsi niyasabela kunasi sicelo saJehova selutsandvo: “Ndvodzana yami, hlakanipha, khona ngitewujabula, ngitekwati kuphendvula nome ngabe ngubani longedzelelako.” (Taga 27:11) Kwati kutsi Jehova uyakwemukela loko lenikwentako, kutawubangela kutsi sifiso senu sekumkhonta sikhule.

16. Lomunye lomsikati wayenta njani inhlitiyo yaJehova yajabula?

¹⁶ Njengalosemusha longumKhristu, lomunye dzadze libito lakhe lokungu-Carol, wanamatsela etimisweni teliBhayibheli kusukela asafundza sikolwa, futsi labanyenti bakunaka kutiphatsa kwakhe lokuhle. Yini leyenteka ngemuva kwaloko? Lafundza nabo ekilasini Carol, bamhleka ngesizatfu sekutsi nembeza wakhe loceceshwe liBhayibheli wawungamvumeli kutsi ahlanganyele ekugubheni emaholidi kanye nemikhosi ledvumisa live. Ngaleto tikhatsi abetfola litfuba lekuchazela labanye ngaloko lakukholelwako. Kwatsi sekwendlule iminyaka leminyenti, Carol watfola likhadi lelalibuya kulotsite labefundza naye. Lalitsi: “Benginelitsemba lekutsi ngitawuchumana nawe futsi ngikubonge ngekutiphatsa kwakho lokuhle nangesibonelo sakho lesihle ngalesikhatsi usemusha. Sibindzi lowasikhombisa ngekwala kugubha emaholidi, sabonwa bantfu labanyenti. Waba nguFakazi waJehova wekucala ngca lengahlangana naye.” Sibonelo sa-Carol samtsintsa kakhulu lona abefundza naye kangangekutsi ngekuhamba  kwesikhatsi wacala kufundza liBhayibheli. Wabhala kulelikhadi kutsi sewube ngulomunye waboFakazi BaJehova iminyaka lengu-40! Njenga Carol, nine labasha lamuhla leninamatsela etimisweni teliBhayibheli, ningenta bantfu labanetinhlitiyo leticotfo kutsi bamati Jehova.

Labasha Labadvumisa Jehova

17, 18. (a) Utiva njani ngalabasha labasebandleni lenu? (b) Libaphatseleni likusasa labasha labesaba Nkulunkulu?

¹⁷ Sonkhe enhlanganweni yaJehova siyajabula nasibona tinkhulungwane letikhutsele talabasha tihlanganyela ekukhonteni kweliciniso! Laba labasebasha bacinise sifiso sabo sekukhonta Jehova ngekufundza liBhayibheli onkhe emalanga, ngemthandazo kanye nangekutiphatsa ngendlela lehambisana nentsandvo yaNkulunkulu. Labasha labasibonelo bayabajabulisa batali babo nakubo bonkhe bantfu labakhonta Jehova.—Taga 23:24, 25.

¹⁸ Esikhatsini lesitako, labasha labetsembekile batawubalwa nalabatawusindza futsi bangene eveni lelisha laNkulunkulu laletsembisile. (Semb. 7:9, 14) Ngaleso sikhatsi, batawutfola tibusiso letinyenti njengobe bachubeka bakhula ekumtsandzeni Jehova, futsi batawumdvumisa kute kube phakadze.—Hla. 148:12, 13.

Ungachaza?

• Labasha bangahlanganyela njani ekukhonteni kweliciniso lamuhla?

• Kute nizuze ekufundzeni kwenu liBhayibheli, kungani kuzindla kubalulekile?

• Umthandazo unisita njani kutsi nisondzele kuJehova?

• Kuba namuphi umphumela kutiphatsa lokuhle kwemaKhristu?

[Imibuto Yesihloko Lesifundvwako]

[Sitfombe ekhasini 17]

Kungumkhuba wakho yini kufundza liBhayibheli onkhe malanga?