Indzima Yemoya Longcwele Ekwenteni Inhloso YaJehova Iphumelele

“Linjalo-ke nelivi lami leliphuma emlonyeni wami . . . liyawukwenta loko lengikuhlosile, liwufeze umgomo walo lengilikhiphele wona.”—ISA. 55:11.

1. Fananisa umehluko emkhatsini wekuhlela intfo letsite nenhloso.

 ASE ucabange ngemadvodza lamabili lalungiselela luhambo ngemoto. Lenye yalamadvodza ikhetsa indlela letayisebentisa. Leyesibili iyati nayo kutsi iyakuphi kodvwa yati letinye tindlela letiya endzaweni lefananako. Leyesibili futsi ikulungele kusebentisa nome ngabe nguyiphi kuletindlela nangabe lenye indlela iba netinkinga. Kungefani kwetindlela letisetjentiswa ngulamadvodza lamabili kwenta sibone umehluko emkhatsini wekuhlela nenhloso. Luhlelo lungafaniswa nekuhlela luhambo, kodvwa inhloso isho kuhlela luhambo futsi ube ukulungele kwenta lushintjo lapha nalapha.

2, 3. (a) Ihlanganisani inhloso yaNkulunkulu futsi yini Jehova layenta kute ahlelembise simo ngekona kwa-Adamu na-Eva? (b) Kungani kufanele sikubuke ngalabovu kuphumelela kwenhloso yaNkulunkulu?

² Kute intsandvo yakhe yenteke, Jehova akenti luhlelo lolungagucuki, kodvwa unenhloso. (Ef. 3:11) Lenhloso ihlanganisa loko labekuhlosele bantfu bonkhe kanye nemhlaba, sifiso sakhe sekugucula umhlaba wonkhe jikelele ube lipharadisi uhlale bantfu labete sono baphile ngekuthula, nenjabulo lengeke iphele. (Gen. 1:28) Jehova wahlangana naleso simo  lesibucayi ngesikhatsi bo-Adamu na-Eva bona, futsi wahlelembisa tintfo kute inhloso yakhe iphumelele. (Fundza Genesisi 3:15.) Jehova wachaza kutsi utawusebentisa lomsikati lomele lokutsite, labatawuletsa “intalo” yona ibhubhise Sathane. Lentalo itawuphindze icedze wonkhe umonakalo lobangelwe nguSathane.—Heb. 2:14; 1 Joh. 3:8.

³ Kute sidalwa saNkulunkulu lesisemhlabeni nome ezulwini lesinemandla ekuvimba imphumelelo yenhloso yaNkulunkulu. (Isa. 46:9-11) Sisho lani loko? Kungobe Jehova usebentisa umoya wakhe longcwele. Lomoya uyikhomba yekutsi tinhloso taNkulunkulu ‘titawufezeka.’ (Isa. 55:10, 11) Kudzingeka sihlale sicabanga ngemphumelelo yenhloso yaNkulunkulu. Imphilo yetfu yangunaphakadze isime ekuphumeleleni kwaleyonhloso. Ngetulu kwaloko, kukholwa kwetfu kuyasimama nasicabanga ngendlela Jehova lasebentisa ngayo umoya longcwele. Ase sihlole indzima ledlalwa ngumoya longcwele ekuphumeleliseni inhloso yaNkulunkulu etikhatsini letehlukahlukene—endvulo, nyalo kanye nesesikhatsini lesitako.

Indzima Yemoya Longcwele Endvulo

4. Jehova uyichaze kanjani kancane kancane inhloso yakhe?

⁴ Ngesikhatsi kusabhalwa liBhayibheli, Jehova wachaza inhloso yakhe kancane kancane. Ngasekucaleni, leNhlanyelo yachazwa ngekutsi ‘yimfihlo lengcwele.’ (1 Khor. 2:7) Jehova wabindza dvu! iminyaka lengu-2 000 ngalenhlanyelo. (Fundza Genesisi 12:7; 22:15-18.) Naku-Abrahama, Jehova wakhuluma ngenhloso yakhe. Emagama latsi “ngetitukulwane takho” akhanyisa bha! emaciniso ekutsi lenhlanyelo ingumuntfu longumtukulu wa-Abrahama. Sathane abeyihlahlele emehlo lendzaba. Bekungumthandazo wakhe lomubi kutsi abone batukulu ba-Abrahama bonakala, lobekuyobangela kuphatamiseka kwenhloso yaNkulunkulu. Abeshaye phansi Sathane, ngobe Jehova abesebentisa umoya wakhe longcwele. Nkulunkulu wawusebentisa ngatiphi tindlela lomoya?

5, 6. Jehova wawusebentisa njani umoya wakhe kute avikele batukulu ba-Abrahama labebayoveta iNtalo?

⁵ Jehova wasebentisa umoya wakhe kute avikele indlu ya-Abrahama lebeyitawuveta iNhlanyelo letsenjisiwe. Jehova watsi ku-Abrahama: “Ngisihlangu sakho.” (Gen. 15:1) Lamagama bekangasiyo inganekwane. Sibonelo saloku ngulokwenteka ku-Abrahama nemfati wakhe Sara ngemnyaka wanga-1919 B.C.E. Ngaleso sikhatsi, bebatse-gozololo eGerari. Inkhosi yaseGerari Abimeleki yasoma Sara ingati kutsi loyo ngumfati wa-Abrahama. BekunguSathane yini lobekatfume Abimeleki kuSara, lobekuyovimba Abrahama ahlanyele lenhlanyelo kuSara? Alisho lutfo liBhayibheli kulombuto? Liyasho kodvwa kutsi Jehova wangena kuloludzaba. Asebentisa liphupho, wadvonsa Abimeleki ngendlebe kutsi angacali embatsise Sara ingubo.—Gen. 20:1-18.

⁶ Jehova wasebentisa umoya wakhe emahlandla lamanyenti. Kukanyenti lapho Jehova akhulula Abrahama kanye nendlu yakhe. (Gen. 12:14-20; 14:13-20; 26:26-29) Kuvikelwa kwa-Abrahama kanye nebantfu basendzaweni yangakubo wakuchaza ngalendlela umhlabeli: “[Jehova] akavumelanga muntfu kutsi abahluphe, ngenca yabo wajezisa ngisho emakhosi. Watsi: ‘ningabatsintsi labagcotjiwe bami, ningacali nilimate baphrofethi bami.’”—Hla. 105:14, 15.

7. Jehova wasivikela ngatiphi tindlela sive sakhe sema-Israyeli?

⁷ Jehova wavikela sive sema-Israyeli endvulo lebesitawuveta iNtalo letsenjisiwe, asebentisa umoya wakhe. Nguwo loyo moya lawusebentisa kute kubhalwe uMtsetfo lowagcina emaJuda akholwa ngeliciniso. Ngetulu kwaloko wavikela emaJuda ekonakaleni ekukholweni kanye nasekutiphatseni. (Eks. 31:18; 2 Khor. 3:3) Ngesikhatsi ema-Israyeli abuswa Tikhulu, Jehova waphindze wafaka umoya wakhe kulamanye emadvodza, laba nemandla ekuncoba titsa tema-Israyeli. (Khu. 3:9, 10) Emakhulwini eminyaka leyaphumela ekutalweni kwaJesu, intalo  ya-Abrahama lesesigabeni sakhe sekucala, kubonakala shengatsi umoya longcwele wavikela liJerusalema, iBhetlehema kanye nelithempeli—konkhe lokwakutawuba nendzima ekugcwalisekeni kwetiphrofetho letikhuluma ngaJesu.

8. Yini lekhombisa kutsi umoya longcwele bewulawula Jesu ekuphileni kanye nasekushumayeleni kwakhe?

⁸ Umoya longcwele bewulawula imphilo nemsebenti wekushumayela waJesu. Lomoya wenta incophamlandvo esinyeni sentfombi ntfo! lenguMariya, yabamba futsi yabeleka uMfana lote sono. Lomoya wavikela Jesu kutsi angafi asemncane. (Luk. 1:26-31, 34, 35) Ngesikhatsi aneminyaka lengu-30 budzala, Jesu wagcotjwa nguNkulunkulu ngemoya longcwele kute ashumayele. Ngemuva kwesikhatsi Jesu abetawutsatsa sikhundla sekuba yindlalifa ebukhosini baDavide. (Luk. 1:32, 33; 4:16-21) Jesu wenta timangaliso letinyenti letifaka ekhatsi: kulapha tigulane, kondla bantfu labaphetfwe yindlala ngisho nekuvusa labafile ngemoya longcwele. Timangaliso letinjalo betingemabalengwe aloko lokutawentiwa nguJesu esikhatsini lesitako nasabusa njengenkhosi.

9, 10. (a) Umoya longcwele wabonakala njani kubafundzi baJesu ekhulwini lekucala leminyaka? (b) Inchubekala phambili yenhloso yaJehova yabonakala njani ngelikhulu lekucala leminyaka C.E.?

⁹ Kusukela ngePhentekhoste ngemnyaka wa 33 C.E., Jehova wasebentisa umoya longcwele kute agcobe sigaba sesibili sentalo ya-Abrahama, linyenti labo lebelingasibo batukulu ba-Abrahama. (Rom. 8:15-17; Gal. 3:29) Tabonakala titselo temoya longcwele kubafundzi bakhe ekhulwini lekucala leminyaka, ngesikhatsi bashumayela ngekutimisela lokukhulu futsi benta timangaliso. (Imis. 1:8; 2:1-4; 1 Khor. 12:7-11) Kwententiwa kwetimangaliso bekuyinkhomba yekutsi inhloso yaJehova inenchubekela phambili. Jehova wase ushintja indlela yekumkhonta labeyinike bokhokho besive sema-Israyeli lebeyitinte ethempelini leliseJerusalema. Emehlo aJehova asuka kuleyo ndlela yekukhonta, ase atsi njo! ebandleni lemaKhristu lebelilisha. Kusukela ngaleso sikhatsi, Jehova bekasolo asebentisa libandla lebuKhristu laligcobe ngemoya kute aphumelelise inhloso yakhe.

¹⁰ Jehova wasebentisa umoya wakhe longcwele kute avikele bantfu, abanike emandla futsi abagcobe ekuphumeleliseni inhloso yakhe. Namuhla-ke? Uwusebentisa njani nyalo lomoya kute aphumelelise tinhloso takhe? Kumcoka kwati ngobe silawulwa ngumoya longcwele. Asihlole tindlela tekusebenta kwemoya longcwele lamuhla.

Indzima Yemoya Longcwele Lamuhla

11. Yini lebonisa kutsi umoya longcwele uyabahlobisa bantfu baNkulunkulu, futsi singabonisa njani kutsi siyabambisana nalomoya?

¹¹ Kwekucala, umoya longcwele usita bantfu baNkulunkulu kutsi bahlale bahlobile. Labo labakhonta Jehova ngendlela levumelana nentsandvo yakhe, kufanele bahlobe ngekutiphatsa. (Fundza 1 Khorinte 6:9-11.) Labanye lababa ngemaKhristu eliciniso esikhatsini lesendlulile, bebake benta bundlundlulu, baphinga futsi benta ngisho nebunkonkoni. Sifiso lesiphumela ekwenteni sono singangena sijule kubantfu. (Jak. 1:14, 15) Lamanye emaKhristu ‘agezwa’ futsi loko kwakukhombisa kutsi ente lushintjo loludzingekako ekuphileni kwawo kute ajabulise Nkulunkulu. Yini lebangela kutsi umuntfu lotsandza Nkulunkulu ehlukane ngendlela lephelele nesifiso sekwenta lokubi? Incwadzi ya-1 Khorinte 6:11 itsi, ‘ngumoya waNkulunkulu.’ Ngekutiphatsa kahle, usuke ukhombisa kutsi uvumela lomoya kutsi usebente ekuphileni kwakho.

12. (a) Ngekusho kwembono waHezekeli, Jehova uyicondzisa njani inhlangano yakhe? (b) Singakhombisa njani kutsi siyavumelana nemoya longcwele?

¹² Kwesibili, Jehova usebentisa umoya wakhe longcwele kute acondzise inhlangano yakhe nome kuphi lapho afuna iye khona. Embonweni waHezekeli, incenye lesezulwini yenhlangano yaJehova ichazwa ngekutsi inkalishi lengaphatanyiswa lutfo ekuhambeni kwayo kute igcwalise tinjongo taJehova. Yini lebangela kutsi lenkalishi ijikajike? Ngumoya  longcwele. (Hez. 1:20, 21) Asikhumbule kutsi inhlangano yaJehova yakhiwa tincenye letimbili, lenye incenye isezulwini kantsi lenye ilapha emhlabeni. Nangabe lencenye lesezulwini icondziswa ngumoya longcwele, nalencenye lesemhlabeni nayo icondziswa nguwo. Nangabe utitfoba futsi wetsembele esicondzisweni lesivela encenyeni yenhlangano yaNkulunkulu lesemhlabeni, usuke ukhombisa kutsi uhambisana nenkalishi yaJehova futsi usebenta ngekuvumelana nemoya wakhe longcwele.—Heb. 13:17.

13, 14. (a) Bobani labakha ‘situkulwane’ Jesu lakhuluma ngaso? (b) Ase unikete tibonelo letikhombisa kutsi umoya longcwele uyasebenta ekutseni silicondze kahle liBhayibheli. (Fundza libhokisi lelitsi: “Uhambisana nekukhanya lokuchubekako yini?”)

¹³ Kwesitsatfu, umoya longcwele usisita kutsi sicondze emaciniso eliBhayibheli. (Taga 4:18) Lomagazini bewusolo usetjentiswa ‘sisebenti lesetsembekile nalesihlakaniphile’ njengelithulusi leliyinhloko lekuveta emaciniso eliBhayibheli kancane kancane. (Mat. 24:45) Nasi sibonelo: Ase ucabange ngendlela lesiyicondza ngayo indzaba leyashiwo nguJesu mayelana ‘nalesitukulwane.’ (Fundza Matewu 24:32-34.) Jesu abekhuluma ngasiphi situkulwane? Sihloko lesitsi “Ukuba Khona KukaKristu—Kusho Ukuthini Kuwe?” sachaza kutsi Jesu abebhekisele kubafundzi bakhe labebatawugcotjwa ngemoya longcwele, hhayi kubantfu lababi. a Bafundzi baJesu labagcotjiwe ekhulwini lekucala leminyaka ngisho nalamuhla, ngibo labangeke bagcine ngekubona letimphawu kuphela, kodvwa batawati nekutsi kusho kutsini kutsi Jesu “usemnyango.”

¹⁴ Lenchazelo isho kutsini kitsi? Nanobe singeke sisho ngalokucondze ngco! kutsi ‘lesitukulwane’ sasiyotsatsa sikhatsi lesingakanani, sitawube senta kahle kakhulu kucabanga ngetintfo letehlukahlukene letishiwo nguleligama lelitsi “situkulwane”: Lichaza bantfu bebudzala lobehlukene labaphila ngesikhatsi lesitsite futsi lesinesiphetfo (Eks. 1:6) Kufanele siwacondze njani-ke emavi aJesu mayelana ‘nalesitukulwane’? Ngalokucacile abesho kutsi kuphila kwalabagcotjiwe labebayobe bakhona ngalesikhatsi timphawu ticala kubonakala nga-1914, kwakuyewulakanyana nekuphila kwalabanye labagcotjiwe labatawubona kucala kwekuhlupheka lokukhulu. Lesitukulwane saba nesicalo futsi nakanjani sitawuba nesiphetfo. Kugcwaliseka kwaletimphawu letehlukahlukene, kukhombisa ngalokusebaleni kutsi kuhlupheka lokukhulu sekusondzele. Ngekutsi uhlale ucaphela kutsi sikhatsi sesiphelile  futsi uhlale ulindzile, ukhombisa kutsi uhambisana nekukhanya lokuchubekako futsi ulandzela kucondzisa kwemoya longcwele.—Mak. 13:37.

15. Yini lekhombisa kutsi ngumoya longcwele losisita kutsi sishumayele tindzaba letinhle?

¹⁵ Kwesine, umoya longcwele usinika emandla ekutsi sishumayele tindzaba letinhle. (Imis. 1:8) Yini lenye lengakhombisa lizinga tindzaba letinhle lesetishunyayelwe ngalo emhlabeni kabanti? Cabanga nje, kusenekwenteka ungulomunye walabo labesabako kushumayela ngesizatfu sekuba nemahloni nome luvalo, labake batsi: ‘Angeke ngikwati kushumayela emtini ngemuti!’ Nobe kunjalo, nyalo uhlanganyela ngenshiseko kulomsebenti. b Nobe baphikiswa futsi bashushiswa, labanyenti boFakazi BaJehova bachubeka bashumayela. Ngumoya waNkulunkulu kuphela longasinika emandla ekususa imicabo lenjengekwesaba futsi usisite sente tintfo lesingeke sitikhone ngewetfu emandla. (Mik. 3:8; Mat. 17:20) Ngekuhlanganyela ngendlela lephelele emsebentini wekushumayela, usuke ukhombisa kutsi uyavumelana nemoya longcwele.

Indzima Yemoya Longcwele Esikhatsini Lesitako

16. Kungani kufanele setsembe kutsi Jehova utawuvikela bantfu bakhe ngesikhatsi sekuhlupheka lokukhulu?

¹⁶ Esikhatsini lesitako, Jehova utawusebentisa umoya wakhe longcwele kute afeze tinjongo takhe. Kwekucala, ase sikhulume ngekuvikeleka. Njengobe sifundzile, Jehova wasebentisa umoya longcwele esikhatsini lesendlulile kute avikele umuntfu nemuntfu nesive saka-Israyeli. Ngako-ke, sinetizatfu letivakalako tekukholelwa kutsi utawusebentisa lawo mandla lafananako kute avikele bantfu bakhe ekuhluphekeni lokukhulu. Akudzingeki kutsi sicombelele mayelana nendlela Jehova latasinakekela ngayo. Esikhundleni saloko, kufanele silindzele sikhatsi lesitako ngelitsemba sati kutsi bonkhe labatsandza Jehova, utawubapha umoya wakhe longcwele.—2 Khr. 16:9; Hla. 139:7-12.

17. Jehova utawusebentisa njani umoya wakhe longcwele eveni lelisha?

¹⁷ Jehova utawusebentisa njani umoya wakhe longcwele eveni lelisha? Lomoya utawusebenta etincwadzini letinsha letiyawuvulwa ngaleso sikhatsi. (Semb. 20:12) letincwadzi titawube ticuketseni? Ecinisweni, titawube ticuketse loko Jehova lafuna sikwente ekhatsi neminyaka leyinkhulungwane. Ukulindzele ngalabovu yini kuhlola loko lokuyawube kucuketfwe nguletincwadzi? Ngenkhaphunkhaphu, silindzele lelo live lelisha. Akuve kumnandzi kucabanga ngemphilo lejabulisako lesiyilindzele, ngalesikhatsi Jehova atawusebentisa umoya wakhe longcwele kute afeze tinjongo takhe ngemhlaba kanye nebantfu labatawube baphila kuwo.

18. Yini lotimisele kuyenta?

¹⁸ Akukafaneli sikhohlwe kutsi injongo yaJehova itawugcwaliseka nakanjani. Phela usebentisa umoya wakhe longcwele—emandla lamakhulu kunowo onkhe endzaweni yonkhe—kute ayifeze. Leyonjongo yaJehova, ifaka ekhatsi nawe. Ngako-ke, akube ngumgomo wakho kucela Jehova kutsi akuphe umoya wakhe futsi wente ngekuvumelana nendlela lakucondzisa ngayo. (Luk. 11:13) Nangabe wenta kanjalo, ungaba nelitsemba lekutsi utawuphila ngendlela Jehova labehlose kutsi bantfu baphile ngayo—kuphila phakadze ePharadisi emhlabeni.

[Imibhalo lengentasi]

Usakhumbula?

• Jehova wawusebentisa ngatiphi tindlela umoya wakhe longcwele etikhatsini teBhayibheli kute afeze tinjongo takhe?

• Uwusebentisa njani Jehova umoya wakhe longcwele lamuhla?

• Utawusebentisa njani umoya wakhe longcwele Jehova esikhatsini lesitako kute afeze tinjongo takhe?

[Imibuto Yesihloko Lesifundvwako]

[Libhokisi ekhasini 22]

Uyahambisana Yini Nekukhanya Lokwengetekako?

Jehova uchubeka akhanyisela bantfu bakhe emaciniso eliBhayibheli. Nguwaphi lamanye emaciniso lakhanyiswe ku-Sicongosekulindza?

▪ Umfanekiso waJesu wembiliso ukhanyisa siphi sifundvo lesibalulekile mayelana nekukhula ngakamoya? (Matewu 13:33)—July 15, 2008, emakhasini 19-20.

▪ Kubitwa kwemaKhristu lanelitsemba lekuphila ezulwini kuphela nini?—May 1, 2007, emakhasini 30-31.

▪ Kusho kutsini kukhonta Jehova ‘ngemoya’? (Johane 4:24)—July 15, 2002, ekhasini 15.

▪ Sicumbi lesikhulu simkhonta kuliphi lithempeli Jehova? (Sembulo 7:15)—May 1, 2002, emakhasini 30-31.

▪ Bayohlukaniselwa kuphi labo labanjengetimvu netimbuti? (Matewu 25:31-33)—October 15, 1995, emakhasini 18-28.