LiBhayibheli LiliVi LaNkulunkulu Leliphefumulelwe Sibili

UMPHOSTOLI PAWULA abesho kutsini ngalesikhatsi atsi liBhayibheli ‘liphefumulelwe nguNkulunkulu’? (2 Thimothi 3:16) Pawula lowabhala ngelulwimi lwesiGriki, wasebentisa inkhulumo levamile letsi “Nkulunkulu waphefumulela.” Pawula abesho kutsi Nkulunkulu wasebentisa umoya wakhe longcwele kute acondzise babhali beliBhayibheli babhale loko lokufunwa nguYe.

Umphostoli Phetro watsi babhali beliBhayibheli “bakhuluma lokukwaNkulunkulu, bachutjwa ngumoya  longcwele.” (2 Phetro 1:21) Ngaleso sizatfu umphostoli Pawula waphindze wachaza tincwadzi teliBhayibheli ‘njengemiBhalo lengcwele lenemandla ekuhlakaniphisa kube kusindziswa ngekukholwa nguKhristu Jesu.’—2 Thimothi 3:15.

Bantfu labanyenti bayaphika kutsi liBhayibheli labhalwa nguNkulunkulu. Baphikisi beliBhayibheli—esikhatsini lesinyenti benta loko lokushiwo ngu-Charles Marston losifundziswa semlandvo. Yena watsi bantfu abalihloniphi nhlobo liBhayibheli futsi abakunaki loko lelikushoko bakuhlasela ngalokuphindzaphindziwe naloko lelikufundzisako. Labanye bantfu abalemukeli ngobe bacabanga kutsi “licuketse tinganekwane.”

Cabanga Nganabu Bufakazi

Singaletsemba yini liBhayibheli? Kubalulekile kutsi ucabange kahle ngalendzaba. Ngani? Ngobe nangabe liBhayibheli licuketse emavi aNkulunkulu, kutawuba bulima—nobe liphutsa kungalinaki. Lizinga lolivumela ngalo kutsi licondzise tinyatselo takho futsi likhulise kukholwa kwakho litawuncipha nangabe ulitsatsa njengelivi lemuntfu kunekutsi ulitsatse njengeliVi laNkulunkulu.—1 Thesalonika 2:13.

Ungakhetsa njani? Ukhetsa njani kwetsemba bantfu locala ngca kubabona? Lesiciniseka ngako kunye-vo: kutsi kumatima kwetsemba umuntfu longamati kahle. Kodvwa nasewuchubeka ubati kahle bantfu uyawubati kutsi batsembekile. NeliBhayibheli utawulati ngendlela lefananako. Ungayetsembi imibono yebantfu kanye nekwehlulela kwabo lokungakasekelwa ndzawo lokungakwenta ungabate liBhayibheli. Tinike sikhatsi sekucabanga ngebufakazi lobusekela imibono yeliBhayibheli ‘leliphefumulelwe nguNkulunkulu.’

Kuphikiswa “Bantfu Labatenta Emakholwa”

Ungamangaliswa kutsi labanye bantfu bangatsi betayelene neliBhayibheli babe  baphikisana naloko lelikushoko. Lamuhla, bantfu labenta shengatsi bayalati liBhayibheli baphindze batibite ngekutsi bangemaKhristu, batsi “imiBhalo ingumlandvo lowabhalwa bantfu,” ngekusho kwe-New Dictionary of Theology.

Bantfu labafundza ngetenkholo baphikisana ngekutsi ngubani mbamba lowabhala liBhayibheli. Nasi sibonelo: Labanye batsi umphrofethi Isaya akazange ayibhale incwadzi ya-Isaya. Batsi lencwadzi yeliBhayibheli yabhalwa asafile Isaya. I-Concise Bible Commentary, leyabhalwa ngu-Lowther Clarke itsi “liBhayibheli libhalwe bantfu labanyenti labahlanganisa ngisho netitukulwane letinyenti.” Imibono lenjalo ikhombisa kungakunaki kutsi Jesu Khristu kanye nebafundzi bakhe bakusho ngalokuphindziwe kutsi incwadzi ya-Isaya yabhalwa nguye Isaya.—Matewu 3:3; 15:7; Lukha 4:17; Johane 12:38-41; Roma 9:27, 29.

Lokubi kakhulu kutsi baphikisi beliBhayibheli labafanana naJ. R. Dummelow, batsi tiphrofetho letitfolakala encwadzini yaDanyela “tingumlandvo lowenteka kadzeni kodvwa umbhali wayo utsi tiphrofetho.” Ngekwenta kwabo ngalendlela ababunaki bufakazi baJesu Khristu. Jesu wecwayisa ngaloko lakubita ngekutsi ‘sinengisoncitsakalo lesime endzaweni lengcwele, njengobe asho umphrofethi Danyela.’ (Matewu 24:15) Kuyintfo lelungile yini ngemaKhristu kukholelwa kutsi Jesu Khristu abetawuba nendzima ekudukiseni bantfu—ngekutsi asekele umlandvo lobonakala shengatsi usiphrofetho? Cha, bekungeke.

Kuyawenta yini umehluko Loku?

Ungase utibute,“kuyawenta yini umehluko kwati kutsi ngubani lobhale tincwadzi teliBhayibheli?” Yebo, kunemehluko lomkhulu kakhulu. Ungayetsemba yini incwadzi yelifa lokutsiwa ibhalwe ngumngani wakho, ekugcineni utfole kutsi ayikabhalwa nguye? Bocwepheshe nabo bakutjela kutsi iyincwadzi mbumbulu—lokusho kutsi kunebantfu lababhalile labacabanga kutsi kutifiso temngani wakho. Bewungeke yini lencwadzi uyitsatse njengaleyo lengakabaluleki? Bewungachubeka uyetsemba yini nanobe sewati kutsi ayikabhalwa ngumngani wakho?

Kuyafanana neliBhayibheli. Bantfu labanyenti—ngisho nalabo labatibita ngekutsi bangemaKhristu nabo abakulaleli loko lokushiwo imibhalo mayelana nekwetsembeka, kutiphatsa kabi ngetasecansini, kanye nalokunye. Sekukangakhi uva bantfu batsi, “Hhawu, Lithestamente Lelidzala lelo!”—bakhuluma shengatsi alikabaluleki kakhulu. Nobe kunjalo, loku akulishintji liciniso lekutsi umphostoli Pawula wachaza Lithestamente Lelisha ‘njengemiBhalo lengcwele lephefumulelwe nguNkulunkulu.’

“Ecinisweni, angeke umane ungabuhloniphi bonkhe bufakazi lobushiwo ngibo bonkhe bocwepheshe nabongcondvongcondvo,” utawubulalela lobunye. Loku kungobe kwetsembeka kwalabanye bongcondvongcondvo kusisite sakwati kubona kutsi nguliphi liBhayibheli lokungulonalona. Kuyacaca kutsi akhona emaphutsa lamancane eBhayibhelini ngobe selishicilelwe tikhatsi letinyenti kulamakhulu eminyaka lamanyenti lendlulile. Khumbula kutsi kunemehluko lomkhulu emkhatsini wekubona liphutsa lelincane lelabakhona ngalesikhatsi kushicilelwa  tincwadzi teliBhayibheli kanye nekucabanga kutsi liyincwadzi yemuntfu futsi alikabaluleki.

Gcina Kukholwa Kwakho ‘EmiBhalweni Lengcwele’

Asengakasho kutsi liBhayibheli liphefumulelwe nguNkulunkulu, Pawula watjela Thimothi kutsi kungani lena ncwadzi lephefumulelwe ibaluleke kakhulu. Watsi: “Emalangeni ekugcina . . . lababi nebakhohlisi bayawudlanga ngebubi, bedukise, nabo bedukiswe.” (2 Thimothi 3:1, 13) Emalangeni aPawula bantfu ‘labahlakaniphile kanye netati’ besebavele basebentisa ‘tinkhulumo temanga’ kute badvunge tingcondvo tebantfu futsi banciphise kukholwa kwabo kuJesu Khristu. (1 Khorinte 1:18, 19; Kholose 2:4, 8) Kute angahungwa ngibo, umphostoli Pawula wecwayisa Thimothi ngekutsi ‘achubeke kuloko lakufundzile futsi wakukholwa . . . ebuntfwaneni bakhe wayati imiBhalo lengcwele’ lesiyinikwe nguNkulunkulu.—2 Thimothi 3:14, 15.

Kubalulekile nakuwe kutsi wente njalo ‘kulamalanga ekugcina.’ Ungayitsatsi melula ingoti yekudukiswa ‘tinkhulumo temanga’ letikhulunywa bantfu labahlakaniphile. Kunaloko, tivikele njengobe emaKhristu elikhulu lekucala leminyaka atsembela ngendlela lephelele kuloko labekufundze emavesini eliBhayibheli—nembala liliVi laNkulunkulu leliphefumulelwe.

Bofakazi BaJehova batawukujabulela kukusita kutsi ulikholelwe liBhayibheli. Nasi sibonelo: Batakukhombisa kutsi kungani timiso teliBhayibheli betisolo tetsenjwa kusukela endvulo, nekutsi liBhayibheli livumelana nesayensi nalikhuluma ngetindzaba tesayensi, liphindze livumelane lona ngekwalo kusuka ekucaleni kuye ekugcineni, futsi tiphrofetho talo letiliciniso tiyagcwaliseka ngaso sonkhe sikhatsi—nalokunye lokunyenti. Nangabe utsandza, tive ukhululekile kubhalela bashicileli balomagazini kute utfole kwatiswa lokubanti lokusite bantfu labatigidzi labanetinhlitiyo leticotfo babona kutsi nembala liBhayibheli liliVi laNkulunkulu.

[Emavi lacashuniwe lasekhasini 5]

Yini longayenta kute wetsembe bantfu locala ngca kubabona?

[Emavi lacashuniwe lasekhasini 6]

Siyajabula ngekutsi bongcondvongcondvo labetsembekile basisitile kutsi sikwati kubona liBhayibheli lokungulonalona