Vele LiBhayibheli LiliVi LaNkulunkulu Yini?

“Yonkhe imiBhalo iphefumulelwe nguNkulunkulu; ilungele kufundzisa, nekusola, nekucondzisa, nekuyala ngekulunga, kuze umuntfu waNkulunkulu atewuhlonyiswa alungele kwenta wonkhe umsebenti lomuhle lamiselwe wona.”—2 THIMOTHI 3:16, 17.

LELICOCO lemagama langenhla lanemfutfo lakhulunywa ngumphostoli Pawula achaza liBhayibheli njengencwadzi ledla lubhedvu. Pawula abekhulumela imiBhalo yesiHebheru nobe Lithestamente Lelidzala njengobe Lithestamente Lelisha lalisengakabhalwa ngaleso sikhatsi. Ingcikitsi yemavi alomphostoli asebenta kuto tonkhe tincwadzi letingu-66 teliBhayibheli letifaka ekhatsi tincwadzi letabhalwa bafundzi baJesu labetsembekile ngelikhulu lekucala leminyaka C.E.

LiBhayibheli ulihlonipha kakhulu njengaPawula yini? Wena ucabanga kutsi babhali balo bebaphefumulelwe nguNkulunkulu sibili yini? EmaKhristu angelikhulu lekucala leminyaka abecabanga kanjalo. Loko solo akukashintji kumaKhristu eliciniso. LiNgisi lelingu-John Wycliffe lelaphila ngelikhulu lesi-14 leminyaka, latsatsa liBhayibheli “njengencwadzi yeliciniso.” Sichazamagama i-The New Bible Dictionary sasho naku lokulandzelako ngemavi aPawula lacashunwe lapha ngenhla, “kuphefumulelwa kweliBhayibheli kuchaza kutsi lifundzisa emaciniso odvwa.”

Kushintja Kwemicondvo Yebantfu NgeliBhayibheli

Kwetsemba ligunya leliBhayibheli sekunciphile esikhatsini salamuhla. Incwadzi i-The World’s Religions itsi: “Ngemlomo onkhe emaKhristu [nanyalo] asalemukela liBhayibheli njengencwadzi leneligunya lekulawula inkholo yawo kanye nekuphila kwawo.” Nobe kunjalo, imisebenti yona iphuma eceleni  njengajoyisaka. Lucucaba lwebantfu lutsatsa liBhayibheli “njengencwadzi yebantfu lengatsembeki.” Nanobe bantfu bavuma kutsi babhali beliBhayibheli bebakholwa, kodvwa batsi benta emaphutsa futsi bekwesindza kwehlela ngabo kuchaza letinye tintfo. Bayagomela ngekutsi bebashoda ngekuhlakanipha lesinako lamuhla.

Bambalwa kakhulu lamuhla bantfu labavumela liBhayibheli kutsi licondzise kucabanga kanye netento tabo. Wena kukangakhi uva bantfu batsi imitsetfo yalo yekutiphatsa yabopewula futsi ayisebentiseki? Labanyenti benyela liBhayibheli inyama emantini kangangekutsi abanendzaba nabephula imitsetfo netimiso talo. Labanye abayinaki imitsetfo yeliBhayibheli nababona kutsi kukhona lapho ibaphatamisa khona. Labanye “labatibita ngekutsi bangemaKhristu “ batitsela ngalabandzako kuloko lokushiwo liBhayibheli ngebundlundlulu, kuphinga, kungetsembeki kanye nekudzakwa.—1 Khorinte 6:9, 10.

Kubangelwa yini loko? Lesinye sizatfu savetwa ngusomlandvo Sir Charles Marston, encwadzini yakhe i-The Bible Is True ngelikhulu lema-20 leminyaka. Watsi bantfu “baba bovuma zonke kubaphikisi beliBhayibheli balamuhla” labahlasela buciniso balo. Solo kusenjalo yini nalamuhla? Imibono kanye netimfundziso letihudvulela phansi liBhayibheli kumelwe sitente njani? Fundza sihloko lesilandzelako lesitawudzingidza lolodzaba.