Bazalwane—Hlanyelani Emoyeni WaNkulunkulu Futsi Nitimisele Kuniketwa Imisebenti Yelibandla!

“Kodvwa lohlanyela kumoya waNkulunkulu, uyawuvuna kuphila lokuphakadze.”—GAL. 6:8.

1, 2. Ugcwaliseka njani umbhalo waMatewu 9:37, 38, futsi loko kuletsa siphi sidzingo emabandleni?

 UNGUFAKAZI kulesikhatsi lokucopheka ngaso umlandvo! Umsebenti Jesu Khristu lakhuluma ngawo, nyalo usecophelweni lelisetulu futsi ukhula ngekucwabita kweliso. Jesu watsi: “Kuvuna kukhulu, kodvwa tisebenti timbalwa. Ngako-ke ncusani eNkhosini yekuvuna kutsi itfumele tisebenti ekuvuneni kwayo!” (Mat. 9:37, 38) Nkulunkulu Jehova uphendvula imithandazo lamuhla ngendlela lekwenta usale ubambe longephansi. Nyakenye, kusukela ngaSeptember 1, 2008 kuya ku-31 August 2009, linani lemabandla aboFakazi BaJehova emhlabeni wonkhe lakhula ngalangu-2 031, lafika enanini lelingu-105 298. Loko kusho kutsi lilanga ngalinye kubhajatiswa bantfu labangu-757.

² Kukhula kwemabandla kuletsa sidzingo semadvodza lafanele kutsi ahole ekufundziseni nasekuluseni emabandleni. (Ef. 4:11) Kuleminyaka leminyenti leyendlulile, Jehova abesolo abeka emadvodza lafanele kute anakekele tidzingo tetimvu futsi sinadvolocina kutsi utawuchubeka akwenta loko. Siphrofetho lesibhalwe encwadzini yaMikha 5:5 siveta kutsi emalangeni ekugcina, bantfu baJehova bebayawuniketwa “baholi . . . labanemadla kakhulu,” labamelela emadvodza lambalwa lanelikhono lekuhola libandla.

3. Chaza kutsi kusho kutsini ‘kuhlanyela unembono wemoya.’

³ Nangabe unguFakazi waJehova lomdvuna lobhajatisiwe, ungasitwa yini kute unikwe imisebenti yelibandla? Intfo lemcoka kutsi uyente ‘kuhlanyela unembono wemoya waNkulunkulu.’ (Gal. 6:8) Kwenta loko kufaka ekhatsi kuphila imphilo letawenta kubonakale kutsi ulawulwa ngumoya longcwele. Faka umfutfo wekutsi ‘ungahlanyeli unembono wenyama engcondvweni.’ Shaya ngendvuku phansi ungavumeli imphilo lentofontofo, tikhatsi tekutilibatisa kanye netekungcebeleka tinciphisi sifiso sakho sekufaka umfutfo emsebentini waNkulunkulu. Onkhe emaKhristu kumelwe ‘ahlanyele anembono wemoya,’ futsi labadvuna labenta njalo, ngemuva kwesikhatsi kungabafanela kuniketwa imisebenti yelibandla. Ngesizatfu sekutsi kunesidzingo lesikhulu salabanjalo, lesihloko sicondze ngco! kumaKhristu lamadvuna. Kungako-ke bazalwane sinicela kutsi nifundze lesihloko niphindze nicele lusito lwaNkulunkulu ngemthandazo kulendzaba.

Tfutfukelani Emsebentini Lomuhle

4, 5. (a) Labadvuna lababhajatisiwe, bancengwa kutsi basebentele kunikwa miphi imisebenti ebandleni? (b) Umuntfu usikhombisa njani sifiso sekunikwa imisebenti yelibandla?

⁴ Akutentakaleli kutsi indvodza lengumKhristu ibekwe kuba ngulomdzala welibandla. Indvodza kufanele itfutfukele ‘emsebentini lomuhle.’ (1 Thim. 3:1) Kufaka ekhatsi kuba lusito kulamanye emaKhristu futsi unakekele tidzingo tawo. (Fundza Isaya 32:1, 2.) Kusebentela kunikwa imisebenti ebandleni kwendvodza akusho kutsi ilambele sikhundla. Liciniso kutsi isuke inenkhaphunkhaphu yekuba lusito kulabanye.

⁵ Umuntfu lobonisa kuhalela kuba yinceku lesebentako  aphindze abe ngulomdzala welibandla ngekufaka umfutfo, kufanele ahlangabetane netincabekelwane taleyo misebenti letibhalwe emiBhalweni lengcwele. (1 Thim. 3:1-10, 12, 13; Thit. 1:5-9) Nangabe uyindvodza letinikele kuNkulunkulu tibute nayi imibuto lelandzelako: ‘Ngikhutsele yini emsebentini wekushumayela, futsi ngiyabasita yini labanye kutsi bente lokufanako? Ngiyabakha yini labanye ngekubonisa kubanakekela? Ngidvume ngekufundza liVi laNkulunkulu yini? Timphendvulo tami tiyayibonisa yini inchubekela phambili? Imisebenti lenginikwa yona ngulabadzala ebandleni ngiyatimisela yini kuyo?’ (2 Thim. 4:5) Imibuto lenjalo kufanele sicabange ngayo.

6. Yini lehamba embili lengasita labadvuna labangemaKhristu kutsi banikwe imisebenti ebandleni?

⁶ Lenye indlela yekufanelwa yimisebenti yelibandla kutsi ‘nibe nemandla kumuntfu wangekhatsi ngemoya wakhe [Nkulunkulu.]’ (Ef. 3:16) Kunikwa umsebenti wekuba yinceku lesebentako nome lomdzala welibandla, akusiko kunikwa umsebenti losikhundla. Kulitfuba lelibaluleke kakhulu lolitfola ngekutfutfukisa buhlobo bakho naJehova. Kutfolakala njani kutfutfuka ebuhlotjeni bakho naNkulunkulu? Lenye indlela yekutfutfuka kutsi ‘nihambe ngemoya’ futsi nivete titselo temoya longcwele. (Gal. 5:16, 22, 23) Kuveta timfanelo temoya longcwele kutakusita kutsi unikwe imisebenti leminyenti. Esikhatsini lesifanako, nangabe ulalela teluleko letikhombisa kutsi ungenta njani kute usetjentiswe, loko kungakusita ‘kute kuchubekela kwakho embili kubonakale.’—1 Thim. 4:15.

Umoya Wekutidzela Uyadzingeka

7. Kuba lusito kulabanye kufaka ekhatsi ini?

⁷ Kuba lusito kufaka ekhatsi kusebenta matima kuphindze kufune nemoya wekutinikela. Ngesizatfu sekutsi labadzala belibandla babelusi, tinkinga temhlambi waNkulunkulu atibaniki kuphumula. Nakisisa indlela imisebenti yelibandla nekuwelusa lomhlambi leyatsitsa ngayo umphostoli Pawula. Watjela bazalwane baseKhorinte naku: “Nganibhalela ngisebuhlungwini ngidzabukile enhlitiyweni, tinyembeti tigcwele emehlo, hhayi ngobe ngifuna kunivisa buhlungu, kepha kuze nati kutsi nginitsandza kangakanani.”  (2 Khor. 2:4) Kukhanya bha! kutsi Pawula abenta lomsebenti ngalokusuka ekujuleni kwenhlitiyo yakhe.

8, 9. Tsani caphu caphu tibonelo letiseBhayibhelini letikhombisa indlela emadvodza lanakekela ngayo tidzingo talabanye.

⁸ Umoya wekutidzela bewusolo ugcamisa emadvodza labekawa avuka kute asite tikhonti taJehova. Nasi sibonelo: Ase ucabange ngaNowa, wake wawusho yini nangu umbhedvo emndenini wakhe: ‘Yakhani lomkhumbi niwucedze ngitawubese ngiyangena.’ Mosi akashongo kuma-Israyeli labekaseGibithe kutsi: ‘Bambani indlela sitawuhlangana le eLwandle loluBovu. Nitawutibonela kutsi nitawufika kanjani khona.’ Joshuwa naye akashongo kutsi: ‘Nibongitjela nasetiwile tindvonga taseJerikho.’ Ngesikhatsi atfunywa nguNkulunkulu, Isaya umphrofethi akashongo kutsi: ‘Nanguya lomunye! Tfuma yena.’—Isa. 6:8.

⁹ Losibonelo lesitendlula tonkhe lowavumela kutsi umoya longcwele umlawule, nguJesu Khristu. Wawutsatsa ngototimbili tandla umsebenti wekuba nguMkhululi wabo bonkhe bantfu. (Joh. 3:16) Umoya wekutidzela waKhristu awufanele yini uvuse sifiso sekufuna kumlingisa? Lomunye lomdzala welibandla longumnkantjubovu uyichaza ngalendlela imiva yakhe ngemhlambi waNkulunkulu: “Emavi aJesu lawasho kuPhetro—yelusani timvu tami—ayangitsintsa. Kuleminyaka leminyenti leyendlulile ngifundze kutsi kumcoka kangakanani kuncoma lokulula nobe kwentela lotsite umusa. Kwelusa umhlambi waNkulunkulu ngumsebenti longiletsela injabulo.”—Joh. 21:16.

10. Yini lengabangela emadvodza langemaKhristu kutsi alingise sibonelo saJesu ebandleni?

¹⁰ Endzabeni yekuphatsa umhlambi waNkulunkulu, emadvodza latinikele kuNkulunkulu lasebandleni kungaba kuhle akhombise simo sengcondvo saJesu lowatsi: “Ngitaniphumuta.” (Mat. 11:28) Kukholwa kuNkulunkulu nelutsandvo ngelibandla kubangela emadvodza langemaKhristu kutsi alangatelele kuniketwa imisebenti leminyenti ebandleni. Lamadvodza akacabangi kutsi loko kungumcansa nobe kudla sikhatsi lesinyenti. Kutsiwani nangabe indvodza ite lilukuluku lekunikwa imisebenti leminyenti ebandleni? Indvodza lebhajatisiwe ingasihlakulela yini sifiso sekusebenta ebandleni?

Hlakulela Sifiso Sekusita

11. Umzalwane lobhajatisiwe angasihlakulela njani sifiso sakhe sekusita labanye?

¹¹ Nangabe usengakabi ngulomdzala nobe inceku lesebentako ebandleni, ngesizatfu sekutsi usete timfanelo letingakufikisa kuleso sigaba, kuhle kutsi uthandaze ucele umoya longcwele. (Luk. 11:13) Umoya waJehova utakusita kutsi ukwati kulwisana nekungatetsembi kulendzaba. Sifiso sekusita sisipho lesivela kuNkulunkulu, ngobe ngumoya wakhe lokhutsata umzalwane kutsi abe naleso sifiso sekusetjentiswa. Lomoya uphindze umnike emandla ekwenta inkonzo lengcwele. (Fil. 2:13; 4:13) Ngako-ke, kuyintfo levakalako kucela Jehova kutsi akusite ukhulise sifiso sakho sekwemukela imisebenti yelibandla.—Fundza Tihlabelelo 25:4, 5.

12. Umuntfu angakutfola njani kuhlakanipha lokwenele kute anakekele imisebenti laphatsiswe yona ebandleni?

¹² Njengobe abona kutsi tidzingo temhlambi tinyenti futsi kutinakekela kudla sikhatsi, umKhristu angakhetsa kungafinyeleli esigabeni sekuba ngulomdzala nobe inceku lesebentako. Ngalesinye sikhatsi angativa shengatsi ute kuhlakanipha lokwenele kwekwenta lomsebenti. Nangabe ativa ngaleyo ndlela, angatfola kuhlakanipha ngekutsi afundze kakhulu liVi laNkulunkulu kanye netincwadzi letisekelwe eBhayibhelini. Angase atibute, ‘Sikhona yini sikhatsi lengisibekela eceleni kute ngifundze liVi laNkulunkulu futsi ngithandazele sibindzi?’ Umphostoli Jakobe wabhala: “Nangabe emkhatsini wenu kukhona loswele kuhlakanipha, akakucele kuNkulunkulu lonika bonkhe bantfu ngekwephana lokungenakufehla utawuphiwa.” (Jak. 1:5) Uyawetsemba yini lamavi laphefumulelwe? Nakaphendvula umthandazo waSolomoni, Nkulunkulu wamnika “inhlitiyo lehlakaniphile” lokwabangela wakwati kwehlukanisa lokuhle nalokubi nakaniketa seluleko. (1 Khos. 3:7-14) Kuliciniso, endzabeni yaSolomoni kunalokutsite lokwakukhetsekile. Nobe kunjalo, kufanele setsembe kutsi Nkulunkulu utawanika kuhlakanipha emadvodza laphatsiswe umsebenti welibandla kute anakekele timvu takhe ngendlela lefanele.—Taga 2:6.

13, 14. (a) Chaza kutsi Pawula lwamtsintsa njani “lutsandvo lwaKhristu.” (b) “Lutsandvo lwaKhristu” lungasitsintsa njani?

 ¹³ Lenye indlela yekuhlakulela sifiso sekusita labanye, kucabangisisa ngalokujulile ngako konkhe Jehova kanye neNdvodzana yakhe lebasentele kona. Nasi sibonelo: Cabangela incwadzi ya-2 Khorinte 5:14, 15. (Fundza.) ‘Lutsandvo lwaKhristu lusichuba’ njani? Lutsandvo Khristu lalubonisa ngekusifela, lukhulu kangangekutsi nangabe silujabulela, nenhlitiyo yakho iyatsintseka. Pawula wavumela kutsi lutsandvo lwaKhristu lumcondzise. Lolotsandvo lwamvimbela kutsi angatigodli futsi lwamsita wakhona kwenta intfo lebeyibaluleke kakhulu ekuphileni kwakhe—kukhonta Nkulunkulu kanye nebantfu lebebamdzibimunye nelibandla ngisho nebantfu labangakholwa.

¹⁴ Kuzindla ngelutsandvo Khristu labenalo ngebantfu, kusenta sijabule. Ngaleso sizatfu, siyabona kutsi kungaba yintfo lembi kutsi sichubeke ‘sihlanyela sinembono wenyama’ ngekutsi sitibekele imigomo lenebugovu letawugcamisa tsine. Esikhundleni saloko, senta lushintjo ekuphileni kwetfu kute sente kucala umsebenti Nkulunkulu lasinikete wona. Lutsandvo lusenta ‘sikhontane.’ (Fundza Galathiya 5:13.) Nangabe sititsatsa njengetikhonti letiphansi senta umsebenti lotawusita tinceku letitinikele taJehova, sitatiphatsa ngemusa nangenhlonipho. Nakanjani, akukamelwe sibe nemoya wekugceka, newekwehlulela labanye njengobe umoya lonjalo ukhutsatwa nguSathane.—Semb. 12:10.

Lilunga Ngalinye Lemndeni Kumelwe Lifake Sandla

15, 16. Yini lokufanele yentiwe ngemalunga emndeni kute indvodza kuyifanele kubekwa njengenceku lesebentako nobe lomdzala ebandleni?

¹⁵ Nangabe umzalwane ashadile futsi anebantfwana, loko lokwentekako emndenini wakhe kucatjangelwa kakhulu nakuhlolwa kutsi kuyamfanela yini kuba yinceku lesebentako nobe lomdzala ebandleni. Ngako-ke, indlela umndeni wakho lovutfwe ngayo ngakamoya nelidvumela lawo, konkhe kunemtselela ekubekweni kwakho njengalomdzala nobe inceku lesebentako ebandleni. Loko kugcizelela kubaluleka kwaloko lokufanele kwentiwe ngumndeni ekusekeleni babe welikhaya njengobe asebentela kuba yinceku lesebentako nobe lomdzala welibandla.—Fundza 1 Thimothi 3:4, 5, 12.

¹⁶ Jehova uyajabula nangabe umndeni wemaKhristu ubhobokelana. (Ef. 3:14, 15) Kuyabita ngenhloko yemndeni kutsi iphatse imisebenti yelibandla kanye nemisebenti yelikhaya ngendlela ‘lekahle.’ Ngako-ke, kubalulekile kutsi inceku lesebentako nobe lomdzala ebandleni atadishe liBhayibheli nebantfwana bakhe kanye nemfati wakhe kute bonkhe bazuze ekuKhonteni kweMndeni kwamaviki onkhe. Kufanele ngaso sonkhe sikhatsi ube mdzibimunye nabo emsebentini wekushumayela. Ngesizatfu lesifananako, kubalulekile ngemalunga emndeni kutsi abambisane nemetamo leyentiwa yinhloko yelikhaya.

Ungaphindze Yini Usite?

17, 18. (a) Nangabe umzalwane sekungamfaneli kuba ngulomdzala nobe inceku lesebentako ebandleni, kudzingeka enteni? (b) Umzalwane loke waba ngulomdzala nobe inceku lesebentako ebandleni, kufanele abe namuphi umbono?

¹⁷ Kusenekwenteka uke waba ngulomdzala nobe inceku lesebentako ebandleni, kodvwa nyalo useyekelisiwe. Uyamtsandza Jehova futsi uyati kutsi naye solo uyakutsandza. (1 Phet. 5:6, 7) Watjelwa yini kutsi kufanele ulungise ndzawanatsite? Yiba nenkhaphunkhaphu yekwemukela liphutsa futsi wente konkhe lokusemandleni kute ulilungise. Tigadze kutsi  ungadvumali. Khombisa kuhlakanipha, futsi wemukele lesimo lesikwehlele. Lomunye lobekasabe ngulomdzala iminyaka leminyenti kodvwa lobekasayekelisiwe, watsi: “Ngatimisela kuchubeka ngiya njalo emihlanganweni, emsebentini wekushumayela kanye nekufundza liBhayibheli njengobe ngangenta ngalesikhatsi ngisengulomunye walabadzala ebandleni. Loyo mgomo ngakhona kuwutfola. Ngafundza kubeketela ngobe bengicabanga kutsi ngitawuphindze ngibe ngulomdzala ebandleni ngemuva nje kweminyaka lemibili. Kodvwa kwatsatsa iminyaka lelisontfo kutsi ngiphindze ngibe ngulomdzala welibandla. Ngalesikhatsi ngisengasuye lomdzala ebandleni, tikhutsato tekutsi ngingangenwa ngemanti emadvolweni kodvwa ngichubekele embili, tangisita kakhulu.”

¹⁸ Nangabe ungumzalwane lokulesimo lesichazwe lapha ngenhla, ungaphelelwa ngemandla. Khombisa kutsi Jehova uwubusise njani umsebenti wakho wekushumayela kanye nemndeni wakho. Yakha umndeni wakho ngakamoya, vakashela labagulako futsi ukhutsate lababutsakatsaka. Ngetulu kwako konkhe, kutsatse njengaloko lokuligugu kukhonta Nkulunkulu kanye nekushumayela tindzaba letinhle teMbuso njengalomunye waboFakazi BaJehova. a—Hla. 145:1, 2; Isa. 43:10-12.

Ase Uphindze Utihlole

19, 20. (a) Bonkhe bazalwane lababhajatisiwe bacelwa kutsi benteni? (b) Sitawucoca ngani esihlokweni lesilandzelako?

¹⁹ Sidzingo salabadzala netinceku letisebentako, sikhulu kakhulu lamuhla. Ngako-ke, sicela bonkhe bazalwane lababhajatiswe kutsi bahlolisise timo tabo futsi batibute, ‘Kungani ngingesuye lomdzala nobe inceku lesebentako ebandleni?’ Shengatsi umoya waNkulunkulu ungakusita kute ube nemoya lokahle ngalendzaba lebaluleke kangaka.

²⁰ Onkhe emalunga elibandla angazuza ekutinikeleni lokwentiwa ngulabo lakhonta nabo. Nangabe lomsebenti siwenta ngemusa nangekungatigodli, sivuna injabulo ngesizatfu sekutsi sisite labanye futsi sihlanyela sinembono wemoya. Nobe kunjalo, kufanele singawudzabukisi umoya longcwele waNkulunkulu, njengobe sihloko lesilandzelako sitawukhombisa. Singakuvimbela njani loko?

[Umbhalo longentasi]

Ungaphendvula Njani?

• Siphrofetho lesisemBhalweni waMikha 5:5, sisinika dvolocina mayelana nani?

• Chaza kutsi kusho kutsini kukhombisa umoya wekutidzela.

• Ungasihlakulela njani sifiso sekusita labanye?

• Kubaluleke kangakanani kubambisana ekhaya kute indvodza ilungele kusita njengenceku lesebentako nobe lomdzala ebandleni?

[Imibuto Yesihloko Lesifundvwako]

[Titfombe ekhasini 25]

Yini lokufanele uyente kute ube ngulomdzala nobe inceku lesebentako ebandleni?