Imibuto Levela Kubafundzi

Njengobe Jehova angakuvumeli kukhonta titfombe, kungani angazange amjezise Aroni ngekwenta litfole legolide?

Njengobe kubhalwe ku-Eksodusi sehluko 32, ngalesikhatsi Aroni enta litfole legolide wephula umtsetfo waNkulunkulu macondzana nekukhonta titfombe. (Eksodusi 20:3-5) Umphumela waloko waba kutsi “Simakadze watfukutselela kubhubhisa Aroni amcedze, kodvwa [Mosi] nangaleso sikhatsi ngamncusela futsi na-Aroni.” (Dutheronomi 9:19, 20) Kuncusa kwendvodza lelungile Mosi, kwaba ‘nemandla lamakhulu’ yini endzabeni ya-Aroni? (Jakobe 5:16) Yebo. Loko kungenca yako kanye netizatfu letitsi atibe timbili. Kubonakala shengatsi Jehova wawuphendvula umthandazo waMosi futsi akazange amjezise Aroni.

Lesinye sizatfu kutsi Aroni abenemlandvo wekwetsembeka. Ngalesikhatsi Mosi atjelwa kutsi aye kuFaro futsi akhiphe bantfwana baka-Israyeli eGibhithe, Jehova wakhetsa Aroni kutsi ahambe naMosi futsi amkhulumele kahle. (Eksodusi 4:10-16) Lamadvodza lamabili lalalelako aya enkhosini yaseGibhithe tikhatsi letinyenti, atjela Faro ngemiphumela yekubusa kwakhe ngenhlitiyo lelukhuni. Ngalesikhatsi aseGibhithe, Aroni abenemlandvo lomuhle wekwetsembeka, futsi akhonta Jehova ngenhlitiyo lephelele.—Eksodusi 4:21.

Ase uphindze ucabange ngaloko lokwenta Aroni wenta litfole legolide. Mosi abeye eNtsabeni iSinayi emalanga langu-40. “Batsi kube babone kutsi Mosi sewutsetse sikhatsi lesidze angehli entsabeni,” bancenga Aroni kutsi abentele sitfombe lesibatiwe. Aroni wabalalela walenta litfole legolide. (Eksodusi 32:1-6) Nobe kunjalo, tento ta-Aroni takhombisa kutsi abengahambisani nekwentiwa kwalesitfombe. Kubonakala shengatsi bebamcindzetela kutsi alente. Kwatsi ngalesikhatsi Mosi akhuluma ngemiphumela yekukhonta tintfombe, onkhe emadvodzana aLevi—kufaka ekhatsi na-Aroni—baba seluhlangotsini lwaJehova. Bantfu labangu-3 000 labakhonta tintfombe babulawa.—Eksodusi 32:25-29.

Ngemva kwaloko naku Mosi lakutjela bantfu: “Nente sono lesikhulu lesesabekako.” (Eksodusi 32:30) Ngako Aroni akusuye yedvwa lowativa anelicala lekwenta sono. Yena kanye nalabantfu bazuza emuseni waJehova lomkhulu.

Kwatsi naseyendlulile indzaba yelitfole legolide, Jehova watsi Aroni akabekwe abe ngumphristi lophakeme. Naku Jehova lakutjela Mosi: “Ubogcokisa Aroni ngetembatfo tebuphristi, bese uyamgcoba abe ngcwele, khona atewukhonta njengemphristi.” (Eksodusi 40:12, 13) Jehova wamcolela Aroni ngebutsakatsaka bakhe. Aroni waba sikhonti lesetsembekile, futsi abengasiso sihlubuki lesikhonta titfombe.