Ningawudzabukisi Umoya Longcwele WaJehova
Ningawudzabukisi Umoya Longcwele WaJehova
‘Ningawudzabukisi umoya longcwele waNkulunkulu, lenabekwa luphawu ngawo.’—EF. 4:30.
1. Jehova ubenteleni bantfu labatigidzigidzi futsi loko kubenta babe nasiphi sibopho?
JEHOVA wentele bantfu labatigidzigidzi labaphila kulelive leligcwele tinkinga intfo lebalulekile. Uvule indlela levumela bantfu kutsi basondzelane naye basebentisa iNdvodzana yakhe lelitinyo lekubulala lenguJesu Khristu. (Joh. 6:44) Usekhatsi kwalabo bantfu nangabe sewutinikele kuNkulunkulu uphindze uphila ncamashi! ngalokuhambisana naloko lokufundzile. Kubhajatiswa kwakho egameni lemoya longcwele kukwenta ube nesibopho sekuphila ngekuvumelana naloyo moya.—Mat. 28:19.
2. Ngumiphi imibuto lesitawucoca ngayo?
2 Sonkhe tsine ‘lesihlanyela sinembono wemoya’ sesembetse umuntfu lomusha. (Gal. 6:8; Ef. 4:17-24) Umphostoli Pawula uyaseluleka aphindze asidvonse ngendlebe kutsi singawudzabukisi umoya longcwele waNkulunkulu. (Fundza Efesu 4:25-32.) Ase sifakele tibuko leseluleko salomphostoli. Abesho kutsini Pawula nakatsi singawudzabukisi umoya longcwele? Umuntfu lotinikele kuNkulunkulu angawudzabukisa njani loyo moya? Singakubalekela njani kudzabukisa umoya waJehova?
Lobekushiwo NguPawula
3. Chaza lokushiwo ngumBhalo wa-Efesu 4:30.
3 Kwekucala kulendzaba, cabangisisa ngenkhulumo yaPawula lebhalwe ku-Efesu 4:30. Wabhala: ‘Ningawudzabukisi umoya longcwele waNkulunkulu, lenabekwa luphawu ngawo kudzimate kube lilanga lekuhlengwa.’ Pawula abengafuni kutsi emakholwa akubo afake elutakwini buhlobo bawo naNkulunkulu. Bekube ngumoya longcwele waJehova lowasetjentiswa kute ‘babekwe luphawu ngawo kudzimate kube lilanga lekuhlengwa.’ Umoya longcwele waNkulunkulu esikhatsini lesendlulile wabeka luphawu, futsi nanyalo usenta njalo, uphindze ube ‘sibambiso saloko lokutako’ kulabacotfo labagcotjwe ngemoya. (2 Khor. 1:22) Loluphawu luchaza kutsi bayimphahla yaNkulunkulu baphindze babe nelitsemba lekuphila ezulwini. Sebabonkhe labo lababekwe luphawu, babantfu labangu-144 000.—Semb. 7:2-4.
4. Kubaluleke ngani kubalekela kudzabukisa umoya waNkulunkulu?
4 Kudzabukisa umoya longcwele kungaba sinyatselo sekucala lesingakulahlekisela kulawulwa nguwo. Loko kukhanya bha! nasihlola lokwashiwo nguDavide ngemuva kwekona naBhatisheba. Davide wacela shwele kuJehova watsi: ‘Ungangicoshi ebusweni bakho, ungangemuki umoya wakho longcwele.’ (Hla. 51:11) Ngulabo ‘labetsembeka kuze kube ngusekufeni’ kulabagcotjwe ngemoya labatawutfola “umchele” wekuphila lokunemtimba longaboli ezulwini. (Semb. 2:10; 1 Khor. 15:53) EmaKhristu lanelitsemba lekuphila emhlabeni ayawudzinga umoya longcwele kute alondvolote bucotfo kuNkulunkulu futsi atfole sipho sekuphila ngesisekelo semhlatjelo waKhristu. (Joh. 3:36; Rom. 5:8; 6:23) Sonkhe-ke, kudzingeka sikuhlahlele emehlo kungawudzabukisi umoya longcwele waJehova.
UmKhristu Angawudzabukisa Njani Umoya Longcwele?
5, 6. UmKhristu angawudzabukisa njani umoya longcwele waJehova?
5 NjengemaKhristu latinikele kuNkulunkulu, singakubalekela kudzabukisa umoya longcwele. Loko kungenteka nangabe ‘sihamba ngemoya longcwele’ lotasisita singancotjwa tifiso letimbi futsi singenti tintfo letimbi. (Gal. 5:16, 25, 26) Lomkhuba lomuhle ungashintja. Singawudzabukisa ngandlelatsite umoya waNkulunkulu nasitsambela kudeda futsi singakanaki sitikhandze sesenta imikhuba liVi laNkulunkulu leliyijikijela ngelifasitelo.
6 Nasibhonca tindlebe esicondzisweni lesivela ngemoya longcwele, sitawubangela bumunyu kuJehova lucobo lwakhe, longuMtfombo walomoya. Kuhlolisisa umBhalo wa-Efesu 4:25-32 kutasikhombisa kutsi kufanele sitiphatse njani, ngaleyo ndlela sibalekele kudzabukisa umoya longcwele waNkulunkulu.
Tindlela Tekubalekela Kudzabukisa Umoya Longcwele
7, 8. Chaza kutsi kungani kufanele setsembeke.
7 Kufanele setsembeke. Naku Pawula lakubhala encwadzini ya-Efesu 4:25: “Lahlani emanga, akube ngulowo nalowo akhulume liciniso kumzalwane wakhe, ngobe sonkhe singemalunga lomunye kulomunye emtimbeni munye.” Njengobe simunye, futsi “singemalunga lomunye kulomunye emtimbeni munye,” akukafanele sitondze nobe sidukise labo lesikholwa nabo ngemabomu, ngobe loko kutawubonisa kutsi asiketsembeki kubo. Nobe ngubani lochubeka enta njalo, buhlobo bakhe naNkulunkulu bungaphela.—Fundza Taga 3:32.
8 Emavi kanye netento letikhohlisako, kungabuphatamisa bunye lobukhona ebandleni. Ngako-ke, kufanele sibe njengemphrofethi Danyela labetsembekile, lokungazange kutfolakale kuye kungalungi. (Dan. 6:4) Kufanele sikhumbule seluleko saPawula lebesiya kumaKhristu lanelitsemba lekuphila ezulwini lesitsi lilunga ngalinye ‘lemtimba waKhristu,’ lebantfu bonkhe futsi kufanele libe nebunye nebalandzeli baKhristu labagcotjwe ngemoya. (Ef. 4:11, 12) Nangabe sifisa kuphila phakadze emhlabeni loliPharadisi, kufanele sikhulume liciniso futsi sibe munye nebazalwane betfu labasemhlabeni wonkhe.
9. Kungani kubalulekile kusebentisa umbhalo wa-Efesu 4:26, 27?
9 Kufanele simelane naDeveli, kute angatewukwati kusilimata ngakamoya. (Jak. 4:7) Umoya longcwele nguwo losisita kutsi simelane naSathane. Sibonelo saloku kutsi umoya longcwele usisita kutsi singakhulumi emanga. Pawula wabhala: “Tfukutselani, kodvwa ningoni; lilanga lingashoni solomane nitfukutsele. Ningamniki Sathane litfuba.” (Ef. 4:26, 27) Nangabe kunalokutsite lokusente satfukutsela, kuthandaza ngaso leso sikhatsi kutasisita kutsi ‘sihlale sipholile,’ sikhombise kutibamba kunekutsi sente ngendlela letawudzabukisa umoya longcwele waNkulunkulu. (Taga 17:27) Ngako-ke, singahlali sisesimeni sekutfukutsela, ngobe sitawunika Sathane litfuba lekusenta sone. (Hla. 37:8, 9) Lenye indlela lesingamelana ngayo naSathane, kulungisa tinkinga ngaso leso sikhatsi sisebentisa seluleko saJesu.—Mat. 5:23, 24; 18:15-17.
10, 11. Kungani kungakalungi kweba nobe kungetsembeki?
10 Akukafanele sivumele nobe ngabe ngusiphi sifiso lesisenta sifune kweba nobe kungetsembeki. Mayelana nekweba, Pawula wabhala: “Lisela alingabe liseba, kepha kunaloko alikhutsale, lisebente lokuhle ngetandla talo, khona litewuba nako lelingahle likwabele labadzingako.” (Ef. 4:28) Nakungenteka umKhristu lobhajatisiwe ebe, ‘angahlazisa Nkulunkulu’ futsi amente advumale. (Taga 30:7-9) Ngisho nebuphuya abusiniki sizatfu sekutsi sibe ngemasela. Labo labatsandza Nkulunkulu nabomakhelwane, bayacaphela kutsi kweba akakwemukeli.—Mak. 12:28-31.
11 Pawula akagcinanga nje ngekusitjela loko lokungakafanele sikwente, waphindze wasitjela naloko lokufanele sikwente. Nangabe siphila ngemoya longcwele, sitawusebenta matima kute sikwati kunakekela imindeni yetfu siphindze sibe nalokutsite ‘lesingahle sikwabele labadzingako.’ (1 Thim. 5:8) Jesu kanye nebaphostoli bakhe babekela eceleni samba lesitsite semali lebesitawusita bantfu labaphuyile, kodvwa Judasi Skariyothi wayeba lenye yalemali. (Joh. 12:4-6) Judasi Skariyothi abengacondziswa ngumoya longcwele kuloko lakwenta. Tsine lamuhla lesicondziswa ngumoya longcwele waNkulunkulu, ‘senta lokulungile kuko konkhe ngaso sonkhe sikhatsi,’ njengobe naPawula enta njalo. (Heb. 13:18) Ngekwenta njalo, sisuke sibalekela kudzabukisa umoya longcwele waJehova.
Letinye Tintfo Lokufanele Sitibalekele Kute Singawudzabukisi Umoya Longcwele
12, 13. (a) Njengobe kuvetwe encwadzini ya-Efesu 4:29, inkhulumo lenjani lokufanele siyibalekele? (b) Indlela yetfu yekukhuluma kufanele ibe njani?
12 Kufanele sinake indlela lesikhuluma ngayo. Pawula watsi: “Akungabe kusaphuma nalinye livi lelibolile emlonyeni wenu, kodvwa kube ngulelilungele kwakha njengalokuswelekile, kuze libavetele umusa labevako.” (Ef. 4:29) Nalana futsi umphostoli Pawula akagcini nje ngekusitjela loko lokufanele singakwenti, usitjela naloko lokumelwe sikwente. Nasiholwa ngumoya waNkulunkulu longcwele, sitawukhuluma ‘lokulungele kwakha kuze kubavetele umusa labevako.’ Ngetulu kwaloko, akukafanele sivumele “livi lelibolile” kutsi liphume emilonyeni yetfu. Ligama lesiGriki lelitsi ‘kubola’ lisho intfo lebolile lenuka phu! lenjengesitselo, inhlanti nobe inyama. Njengobe sicabanga nganaku kudla lokubolile, sitawuyitondza inkhulumo Jehova latsi yimbi.
13 Indlela yetfu yekukhuluma kufanele ibe nesizotsa, nemusa, ‘inandziswe ngeluswayi.’ (Khol. 3:8-10; 4:6) Bantfu kufanele babone kutsi sehlukile nabalalela indlela lesikhuluma ngayo. Ngako-ke, asisite labanye ngekutsi sikhulume loko ‘lokulungele kwakha.’ Shengatsi singativa ngendlela umhlabeli lativa ngayo ngesikhatsi ahlabela atsi: “Emavi emlomo wami netizindlo tenhlitiyo yami atimukeleke kuwe, Simakadze [Jehova], Dvwala lami, nemkhululi wami.”—Hla. 19:14.
14. Ngekusho kwa-Efesu 4:30, 31, yini lokudzingeka siyiyekele?
14 Kufanele siyekele lulaka, kutfukutsela, kuhlambalata nako konkhe lokubi. Ngemuva kwekuba ecwayise ngekudzabukisa umoya waNkulunkulu, Pawula wabhala: “Konkhe lokubabako, nelulaka, nekutfukutsela, nemsindvo, nekuhlambalata akususwe kini, kanye nako konkhe lokubi.” (Ef. 4:30, 31) Njengebantfu labanesono, sonkhe kudzingeka sisebente kamatima kute silungise indlela lesicabanga futsi sente ngayo tintfo. Nasingachubeka ‘sikhuluma inkhulumo lebabako, siba nelulaka, sitfukutsela futsi sihlambalata,’ sitawudzabukisa umoya longcwele waNkulunkulu. Kutawenteka lokufananako nangabe sihlale sikhumbula tintfo letimbi labasente tona, siba nemagcubu futsi singafuni kutsetselela labanye. Ngisho nalapho singasinaki seluleko seliBhayibheli, singaba nesifiso lesingasenta sidzabukise umoya longcwele futsi loko kungaba nemiphumela lebuhlungu.
15. Nangabe lotsite asonile, yini lokufanele siyente?
15 Kufanele sibe nemusa, bubele futsi sitsetselelane. Pawula wabhala: “Kodvwa phatsanani ngebumnene, nihawukelane, nitsetselelane, njengobe naNkulunkulu wanitsetselela ngaKhristu.” (Ef. 4:32) Ngisho nobe lotsite asiphetse kabi kakhulu, kufanele simtsetselele silingise Nkulunkulu. (Luk. 11:4) Ase sitsi lomunye umKhristu ukhulume kabi ngatsi, kute silungise lendzaba, kudzingeka siye kuye. LomKhristu ukhombisa kudzabuka futsi ucela kutsetselelwa. Ngaleso sizatfu, siyamcolela. Kodvwa kunalokunye lokufanele sikwente. Incwadzi yaLevithikhusi 19:18 itsi: “Ungatibuyiseleli nome ube nemagcubu nebantfwana bebantfu bakini, kodvwa uyawumtsandza makhelwane wakho njengobe utitsandza wena. NginguSimakadze [Jehova.]”
Kudzingeka Ucaphele
16. Niketa sibonelo lesikhombisa kutsi singalungisa ndzawanatsite kute singawudzabukisi umoya longcwele waJehova.
16 Ngisho nasemasitseleni, singalingeka kutsi sente lokutsite lokungamjabulisi Nkulunkulu. Nasi sibonelo: Kusenekwenteka kutsi umzalwane abeloku alalela umculo longakamfaneli umKhristu. Ekugcineni, nembeza wakhe uyamhlupha ngesizatfu sekutsi akasilalelanga seluleko seliBhayibheli lesikhishwa ‘sisebenti lesetsembekile nalesihlakaniphile.’ (Mat. 24:45) Angathandaza ngalenkinga, futsi akhumbule emavi aPawula labhalwe encwadzini ya-Efesu 4:30. Atimisele kwetama ngako konkhe lokusemandleni akhe kungawudzabukisi umoya longcwele waNkulunkulu, ugcina mfo! kulalela umculo longawafaneli emaKhristu. Jehova utayibusisa imetamo yalomzalwane. Ngako-ke, asitigadze singacali siwudzabukise umoya longcwele waNkulunkulu.
17. Yini lengenteka nasingacapheli futsi singathandazi?
17 Nangabe singacapheli futsi singathandazi, singatikhandza sesingene-shi! ekutiphatseni lokubi lokungawudzabukisa umoya longcwele. Njengobe umoya longcwele kunguwo losenta sivete timfanelo taBabe wetfu losezulwini, ngalesinye sikhatsi singawudzabukisa—loko yintfo lesingafuni nanini kuyenta. (Ef. 4:30) Babhali bemaJuda bangelikhulu lekucala leminyaka, bona ngemabomu ngekutsi batsi Jesu abewatsatse kuSathane emandla ekwenta timangaliso. (Fundza Makho 3:22-30.) Leto titsa taKhristu ‘tawuhlambalata umoya longcwele’ futsi tenta sono lebesingeke sitsetselelwe. Shengatsi singetama ngawo onkhe emandla kungatilingisi.
18. Singabona njani kutsi asikenti sono lesingeke sitsetselelwe?
18 Njengobe singafuni nakancane kwenta sono lesingeke sitsetselelwe, kufanele sikhumbule loko lokwashiwo nguPawula mayelana nekungawudzabukisi umoya longcwele. Kodvwa kutsiwani nangabe sente sono lesikhulu? Nangabe siphendvukile, futsi silutfolile lusito kubazalwane labadzala belibandla, singafinyelela esiphetfweni sekutsi Nkulunkulu sewusitsetselele futsi asikawudzabukisi umoya longcwele. Ngelusito lwaNkulunkulu, singaphindze sibalekele kudzabukisa umoya longcwele nangalenye indlela.
19, 20. (a) Ngutiphi letinye tintfo lokufanele sitibalekele? (b) Yini lokufanele setame ngawo onkhe emandla kuyenta?
19 Ngemoya wakhe longcwele, Nkulunkulu wenta kutsi bantfu bakhe babe nelutsandvo, injabulo kanye nekuthula. (Hla. 133:1-3) Ngako-ke, kufanele sikubalekele kudzabukisa umoya longcwele ngekutsi sigweme kuhleba nobe kukhuluma emagama latiswana ladzicela phansi labadzala belibandla. (Imis. 20:28; Juda 8) Esikhundleni saloko, kufanele silwele kuvana futsi sihloniphane ebandleni. Ecinisweni, akukafanele sikhutsate bantfu baNkulunkulu kutsi bakhe emacembu ekhatsi ebandleni. Pawula wabhala: “Bazalwane bami labatsandzekako, ngiyanincenga ngelibito leNkhosi yetfu Jesu Khristu kutsi nivumelane ngantfo yinye nonkhe; kubete kwehlukana emkhatsini wenu, kodvwa nipheleliswe emcondvweni munye nasembonweni munye.”—1 Khor. 1:10.
20 Jehova uyafuna futsi angakhona kusisita sibalekele kudzabukisa umoya longcwele. Shengatsi singachubeka sithandazela umoya longcwele futsi setame ngako konkhe lokusemandleni kutsi singawudzabukisi. Shengatsi singachubeka ‘sihlanyela sinembono wemoya,’ siwufune kute usicondzise nyalo ngisho nasesikhatsini lesitako.
Ungaphendvula Njani?
• Kusho kutsini kudzabukisa umoya longcwele waNkulunkulu?
• Umuntfu lotinikele kuJehova angawudzabukisa njani umoya longcwele?
• Singakubalekela njani kudzabukisa umoya longcwele?
[Imibuto Yesihloko Lesifundvwako]
[Sitfombe ekhasini 30]
Lungisa nobe ngukuphi kungevani ngekushesha
[Sitfombe ekhasini 31]
Ngusiphi sitselo lesifanekisa kahle indlela lokhuluma ngayo?