Chubekani Nakha Libandla LebuKhristu

“Dvudvutanani nakhane.”—1 THES. 5:11.

1. Ngutiphi tibusiso letitfolakala ngekuba sebandleni lebuKhristu, futsi ngubuphi bumatima lesibhekana nabo?

 KUBA lilunga lelibandla lebuKhristu kusibusiso lesikhulu ngobe uba nebuhlobo lobuhle naJehova. Kwetsembela kwakho eVini laNkulunkulu kukuvikela emiphumeleni lemibi yekuphila imphilo yebantfu labangakholwa. Nyalo sewunebangani labanyenti labacotfo labafuna wente tintfo letilungile. Nembala, tinyenti kakhulu tibusiso lotawutitfola. EmaKhristu lamanyenti anetinkinga, lamanye angahle adzinge lusito lekucondza timfundziso letijulile teliVi laNkulunkulu. Kantsi lamanye ayagula, acindzetelekile, futsi kungenteka akhatsatwa yimiphumela lemibi yetincumo letingakahlakaniphi latenta. Sonkhe siphila eveni lelinebantfu labatehlukanisile naNkulunkulu.

2. Yini lokudzingeka siyente nangabe bazalwane betfu babhekene nebumatima, futsi kungani kufanele sente njalo?

² Kute namunye kitsi lofuna kubona labo lesikholwa nabo bahlupheka futsi badvonsa matima. Kungaleso sizatfu umphostoli Pawula afananisa libandla nemtimba nakatsi: “Nangabe kuhlupheka sitfo sinye, kuhlupheka titfo tonkhe kanye naso.” (1 Khor. 12:12, 26) Etimeni letinjalo, kufanele sitimisele kusekela bazalwane nabodzadzewetfu. Kunetindzaba letinyenti  eBhayibhelini letikhuluma ngemalunga elibandla lasita labanye kute bakwati kubhekana futsi balungise tinkinga tabo. Njengobe nyalo sitawufundza ngetindzaba letimayelana naloko, ase ucabange kutsi ungabasita njani labanye usebentisa letindlela lokukhulunywa ngato kulemiBhalo. Ungabasita njani bazalwane nabodzadze kutsi bachubeke bakhonta Jehova, futsi ngekwenta njalo wakhe libandla?

“Bamtsatsa Bamyisa Ekhaya”

3, 4. Bo-Akhwila naPhrisila bamsita njani Apolosi?

³ Ngalesikhatsi Apolosi atfutsela e-Efesu, abesavele angumvangeli lonenshisekelo. Naku lokushiwo yincwadzi yeMisebenti ngaye: ‘Abegcwele inshisekelo emoyeni wakhe; afundzisa futsi achaza kahle emaciniso macondzana naJesu, kepha-ke yena bekati umbhabhatiso waJohane kuphela.’ Ngesizatfu sekutsi Apolosi abengati ngekubhajatiswa ‘egameni leYise, neleNdvodzana, nelemoya longcwele,’ kungenteka kutsi loko kusho kutsi wafundzelwa bafundzi baJohane uMbhabhatisi nobe balandzeli baJesu bangembikwePhentekhoste ya-33 C.E. Nanobe Apolosi abeshiseka, kodvwa kwakunalamanye emaciniso labalulekile labekangawacondzi. Kutihlanganisa nemaKhristu kwamsita njani?—Imis. 1:4, 5; 18:25; Mat. 28:19.

⁴ EmaKhristu labo-Akhwila naPhrisila eva Apolosi akhuluma ngekutetsemba esinagogeni, amtsatsa amfundzisa nalamanye emaciniso. (Fundza Imisebenti 18:24-26.) Lesi bekusento selutsandvo. Bo-Akhwila naPhrisila abamsolanga ngalutfo Apolosi kodvwa bakhuluma naye ngekuhlakanipha futsi bafuna kumsita. Apolosi abengawati umlandvo wendlela libandla lebuKhristu langembikwesikhatsi sakhe lelalichuba ngayo. Asingabati kutsi Apolosi wajabula ngalesikhatsi bangani bakhe labasha bamcocela ngaletintfo abengatati letimcoka. Lamaciniso ‘aba lusito lolukhulu’ ngobe Apolosi wawacocela bazalwane base-Akhaya, futsi washumayela ngawo ngendlela lephumelelako.—Imis. 18:27, 28.

5. Nguluphi lusito bamemeteli beMbuso labalunika labanye, futsi kuba namiphi imiphumela?

⁵ Bantfu labanyenti ebandleni lebuKhristu lamuhla bababonga kakhulu labo lababasita bacondza liBhayibheli. Banebungani lobucinile nalabo lababafundzela. Etikhatsini letinyenti, kusita bantfu kutsi bacondze emaciniso eliBhayibheli kudzinga kube neluhlelo lolungatsatsa tinyanga letinyenti. Noko-ke, bamemeteli beMbuso batimisele kwenta njalo ngobe bayabona kutsi loko kusho kuphila nabalalela nekufa nabangalaleli labantfu labangasiwo emaKhristu. (Joh. 17:3) Kuyajabulisa kubona bantfu bafundza emaciniso, baphila ngawo, futsi bawasebantisa ngaso sonkhe sikhatsi kute bente intsandvo yaJehova.

“Babemncoma”

6, 7. (a) Kungani Pawula akhetsa Thimothi kutsi ahambe naye emsebentini webuvangeli? (b) Nguyiphi intfutfuko Thimothi lasitwa kutsi ayifinyelele?

⁶ Ngalesikhatsi umphostoli Pawula naSilasi bavakashele eListra eluhambeni lwabo lwesibili batitfunywa telivangeli, batfola umfana libito lakhe lokwakunguThimothi, lobekaneminyaka lecishe ibe ngu-20 budzala. “Bazalwane baseListra nase-Ikhoniyumi babemncoma.” Make waThimothi, Yunisi nagogo wakhe Lowisi bebangemaKhristu latinikele, kodvwa babe wakhe abengakholwa. (2 Thim. 1:5) Kungenteka kutsi Pawula abetayelene nalomndeni ekuvakasheni kwakhe kwekucala kuleyo ndzawo eminyakeni lembalwa lebeyengcile. Kodvwa nyalo lomphostoli abesatsandza Thimothi ngobe lomfana bekabonakala anebuntfu lobuhle. Ngaleso sizatfu, sigungu salabadzala belibandla samvumela Thimothi kutsi ahambe naPawula amelekelele emsebentini webuvangeli.—Fundza Imisebenti 16:1-3.

⁷ Kunyenti Thimothi lakufundza kulomngani wakhe lokhulile longuPawula. Watfutfuka ngelizinga lelikhulu kangangekutsi Pawula wacala kumtfuma kutsi aye emabandleni yena labetawuya kuwo. Thimothi wajabulela kuhamba naPawula iminyaka lecishe ibe ngu-15. Lwati loluncane nekuba nemahloni labenawo ekucaleni kwaphela. Wenta intfutfuko lenhle ngakamoya lokwenta wabekwa njengembonisi lonelikhono.—Fil. 2:19-22; 1 Thim. 1:3.

8, 9. Yini emalunga elibandla lebuKhristu langayenta kute akhutsate bantfu labasha? Niketa sibonelo.

 ⁸ Nalamuhla bakhona bantfu labasha ebandleni lebuKhristu labanemandla ekwenta imisebenti yakamoya. Nabangakhutsatwa futsi banakwe bangani babo labasibonelo lesihle ekukhonteni Jehova, bangatfutfuka futsi banikwe leminye imisebenti lemikhulu ebandleni. Nawubuka ebandleni lakini, bakhona yini bantfu labasha labangatenta batfolakale njengobe kwenta Thimothi? Ngekubasita nangekubakhutsata, bangaba ngemahlahlandlela, tikhonti taseBethel, titfunywa telivangeli nobe babonisi labajikeletako. Yini wena longayenta kute ubasite bafinyelele lemigomo?

⁹ Martin, losaneminyaka lengu-20 alilunga lemndeni waseBethel, ukhumbula indlela umbonisi wesifundza lakhombisa kumkhatsalela ngayo eminyakeni lengu-30 leyengcile ngalesikhatsi basebenta ndzawonye ensimini. Lombonisi wamtjela kutsi nakasemusha wayijabulela kakhulu inkonzo yaseBethel. Wakhutsata Martin kutsi atente atfolakalele kusetjentiswa yinhlangano yaJehova njengobe naye enta. Martin kwamsita kakhulu kukhuluma nalombonisi ngobe utsi kwatsintsa nendlela yakhe yekukhetsa loko lafuna kukwenta. Nawe ungabasita bantfu labasha kutsi bente imisebenti yakamoya ifanane nemsebenti wekutiphilisa.

‘Nakekela Lababutsakatsaka’

10. Ephafrodithu wake wativa njani, futsi kungani ativa ngaleyo ndlela?

¹⁰ Ephafrodithu watsatsa luhambo loludze esuka eFiliphi aya eRoma kuyewuvakashela umphostoli Pawula lowaboshelwa kuba ngumKhristu. Kuleyo ndzawo abesitfunywa sebantfu baseFiliphi. Abengaketeli nje kuphela kutewuletsa tipho letivela kubaphostoli, kodvwa abehlele nekuhlala sikhashana kute anikete Pawula lusito laludzingako kulesosimo lesimatima. Ngalesikhatsi aseRoma, Ephafrodithu wagula kakhulu ‘wabasemkhatsini wekufa nekuphila.’ Abecabanga kutsi wehlulekile kufeza umgomo wakhe, futsi wacindzeteleka kakhulu.—Fil. 2:25-27.

11. (a) Kungani kungafanele simangale nangabe ebandleni kunalabacindzetelekile? (b) Yini Pawula lancoma kutsi yentiwe ngendzaba ya-Ephafrodithu?

¹¹ Bantfu bacindzetelwa tintfo letinyenti lamuhla. Luhlolo lolwentiwe yinhlangano yetemphilo i-World Health Organization lutsi kungenteka kutsi munye kubantfu labasihlanu angenwe sifo sekucindzeteleka (depression.) Bantfu baJehova nabo abakagomeki ekucindzetelekeni. Kwehluleka kondla umndeni wakho, imphilo lebutsakatsaka, kudvunyatwa kwehluleka kwenta lokutsite, nobe lokunye kungaba nesandla ekutseni umuntfu ative ephuke umoya. Yini lebeyingentiwa bantfu baseFiliphi kute basite Ephafrodithu? Pawula wabhala: “Ngako-ke memukeleni eNkhosini ngekutfokota konkhe; labanjalo ke nibobatisa. Ngobe ngenca yemsebenti waKhristu wacishe wafa, watidzela, kuze agcwalise lokusilele ekungikhonteni kwenu.”—Fil. 2:29, 30.

12. Singabadvudvuta njani bantfu labacindzetelekile?

¹² Natsi kufanele sibakhutsate bazalwane betfu labadvumele nalabacindzetelekile. Akungabateki kutsi kukhona tintfo letinhle lesingatisho ngenkonzo yabo labayentela Jehova. Mhlawumbe bente lushintjo lolukhulu emphilweni yabo kute babe ngemaKhristu nobe bangenele inkonzo yesikhatsi sonkhe. Siyayijabulela kakhulu imetamo yabo, futsi singabenta bacaphele kutsi naJehova uyayijabulela. Nangabe kuguga nekugula sekubavimbela kutsi bente tintfo labebatenta ngalesikhatsi basebasha, basadzinga kutsi sibahloniphe futsi sibabonge ngenkonzo yabo. Ngisho nobe kungaba ngusiphi simo lababhekene naso, seluleko saJehova ngabo bonkhe bantfu bakhe labetsembekile sitsi: “Nibanike sibindzi labaphelelwa ngemandla emoyeni, ninakekele lababutsakatsaka, babeketeleleni bonkhe.”—1 Thes. 5:14.

‘Mcoleleni Nimkhutsate’

13, 14. (a) Ngusiphi sinyatselo lesikhulu libandla laseKhorinte lelasitsatsa, futsi lasitsatsa ngasiphi sizatfu? (b) Sinyatselo sekutsi bamsuse ekuhlanganyeleni saba namuphi umphumela?

¹³ Libandla laseKhorinte langelikhulu lekucala leminyaka lalinendvodza lebeyenta bundlundlulu  futsi ingaphendvuki. Kutiphatsa kwayo kwabeka kuhloba kwelibandla engotini futsi loko kwetfusa ngisho nebantfu labangakholwa. Kungaleso sizatfu Pawula aniketa sicondziso sekutsi lendvodza isuswe ebandleni.—1 Khor. 5:1, 7, 11-13.

¹⁴ Lomfundzi abenesimo sengcondvo lesihle. Libandla lalondvolotwa ekutiphatseni lokubi, futsi lesoni sasanguluka engcondvweni futsi saphendvuka ngebucotfo. Ngesisekelo semisebenti yemuntfu lekhombisa kuphendvuka, Pawula wakhombisa encwadzini yakhe yesibili layibhalela lelibandla kutsi lomuntfu akabuyiselwe ekuhlanganyeleni. Nobe kunjalo, lobekufanele kwentiwe ngulelibandla bekungagcini lapho. Pawula waphindze waniketa lelibandla sicondziso sekutsi ‘limcolele futsi limkhutsate lomuntfu lowonile kute angahlali etinhlungwini adzimate aphele.’—Fundza 2 Khorinte 2:5-8.

15. Kufanele sibaphatse njani benti balokubi labaphendvukako nangabe babuyiselwa ebandleni?

¹⁵ Yini lesiyifundzako kulendzaba? Kusivisa buhlungu kubona labanye basuswa ekuhlanganyeleni. Kungenteka balihlambalatile libito laNkulunkulu futsi nelibandla balihlazisile. Mhlawumbe natsi basonile ngandlela tsite. Nobe kunjalo, nangabe labadzala belibandla bayihlola lendzaba batfola kutsi uphendvukile, sicondziso saJehova sitsi kufanele babuyisele lesoni ebandleni, loko kukhombisa kutsi lomuntfu ucolelwe nguJehova. (Mat. 18:17-20) Akukafanele yini natsi simlingise? Nembala, kukhakhabisa labanye nekungacoleli, kusho kuphikisana naJehova. Kute sibe nesandla ekwenteni libandla laNkulunkulu libe nebunye kanye nekuthula, futsi natsi semukelwe nguJehova, akukafanele yini ‘sikhombise soni lesiphendvukako nalesibuyiselwe kutsi siyasitsandza?’—Mat. 6:14, 15; Luk. 15:7.

“Ulusito Kimi”

16. Yini leyentiwa nguMakho leyavisa Pawula buhlungu?

¹⁶ Kunalenye indzaba lesemiBhalweni lekhombisa kutsi akukafanele sibabambele emagcubu labo labasivise buhlungu. Cabanga nganasi sibonelo: Johane Makho wavisa umphostoli Pawula buhlungu. Njani? Ngalesikhatsi Pawula naBhanabasi batsatsa luhambo lwabo lekucala lwebuvangeli, Makho wahamba nabo kute abalekelele. Kodvwa kwatsi basachubeka naloluhambo lwabo, Johane Makho wabajikela wancandzeka wabuyela ekhaya. Pawula kwamvisa buhlungu kakhulu loko kangangekutsi kwatsi nabahlela luhambo lwesibili, kwaba nekungaboni ngaso linye emkhatsini wakhe naBhanabasi ngekutsi batawuhamba naye yini Makho. Ngenca yaloko lobekwentekile eluhambweni lwabo lwekucala, Pawula akavumanga kutsi bahambe naMakho.—Fundza Imisebenti 13:1-5, 13; 15:37, 38.

17, 18. Sati njani kutsi lenkinga lebeyisemkhatsini waPawula naMakho yalungiswa, futsi yini lesiyifundzako kuloku?

¹⁷ Kuyacaca kutsi Makho akakuvumelanga kudvumateka kakhulu nanobe Pawula amalela kuhamba nabo. Makho wachubeka nemsebenti webuvangeli kulenye insimu ahamba naBhanabasi. (Imis. 15:39) Kwetsembeka kwakhe kuboniswa ngemavi labhalwa nguPawula ngemva kweminyaka letsite. Kwatsi ngalesikhatsi Pawula asiboshwa eRoma, wabhalela Thimothi incwadzi. Kulencwadzi Pawula watsi: “Ubota naMakho, ngobe ulusito kimi emsebentini.” (2 Thim. 4:11) Pawula abesakholwa kutsi ngaleso sikhatsi Makho bese atfutfuke kakhulu.

¹⁸ Kukhona lesingakufundza kulendzaba. Makho waba netimfanelo tekuba ngumvangeli lomuhle. Kwala kwaPawula kuhamba naye akumkhubanga. Pawula naJohane Makho bebanebuhlobo lobuhle naJehova, futsi kute  emagcubu labachubeka babambelene wona. Pawula wabese uyacaphela kutsi Makho uyindvodza lelusito kuye. Ngako-ke, nangabe bazalwane balungisa tinkinga futsi batindlulisa, lokukuphela kwentfo lelungile labangayenta kuyekela indzaba indlule futsi bachubeke basita labanye kutsi batfutfuke. Kuba nembono lonjalo lomuhle kuyalakha libandla.

Libandla Lisho Kutsini Kuwe

19. Onkhe emalunga elibandla lebuKhristu angasitana njani?

¹⁹ ‘Kuletikhatsi tebumatima lesiphila kuto,’ uyaludzinga lusito lwebazalwane bakho nabodzadzewenu labasebandleni, futsi nabo bayaludzinga lusito lwakho. (2 Thim. 3:1) EmaKhristu latsite ebandleni angeke ahlale atati tindlela tekulungisa timo letingaphakama, kodvwa nguJehova longakwati kutilungisa. Angasebentisa emalunga lehlukahlukene elibandla—lokufaka ekhatsi nawe lucobo lwakho kute usite labanye bahambe endleleni lefanele. (Isa. 30:20, 21; 32:1, 2) Ngako-ke, semukele ngenhlitiyo yakho yonkhe seluleko semphostoli Pawula lesitsi: ‘Chubekani nidvudvutana nakhane, njengobe nenta nje manje.’—1 Thes. 5:11.

Ungaphendvula Njani?

• Kungani kubalulekile kwakha labanye ebandleni lebuKhristu?

• Ngutiphi tinhlobo tebumatima longasita labanye kutsi batehlule?

• Kungani sidzinga lusito lwalabanye ebandleni?

[Imibuto Yesihloko Lesifundvwako]