Kubhekana Nesimo Lapho Loshade Naye Akwentele Phansi

MARIYA nendvodza yakhe Bongani, besebatikhonti taJehova tasikhatsi sonkhe iminyaka leminyenti. a Kodvwa kwatsi ngemuva nje kwekutfola umntfwana wabo wekucala longumfana, Bongani wacala kwehlisa emandla ekukhonteni Jehova. Ekugcineni Bongani wacala kutiphatsa kabi wabese uyasuswa ebandleni lebuKhristu. Mariya utsi: “Ngalesikhatsi kwenteka konkhe loku, ngativa shengatsi ngitawufa. Inhlitiyo yami yaba buhlungu bengingati kutsi yini lokufanele ngiyente.”

Kungakapheli nesikhatsi lesidze Nomusa ashadile, indvodza yakhe yamhlukumeta. Yacala kumshaya. Nomusa utsi: “Ngelilanga lekucala langishaya ngalo ngesibhakela, ngetfuka kakhulu, ngativa nginemahloni futsi ngihlazisekile. Wakwenta umkhuba kutsi angishaye bese ucela kutsi ngimcolele. Bengisolo ngicabanga kutsi ngibophekile kutsi njalo ngimcolele futsi ngikhohlwe ngobe ngingumKhristu. Kantsi bengicabanga nekutsi kutawube kungesiko nani kwetsembeka nangabe ngitjela labanye bantfu ngetinkinga tetfu—ngisho nalabadzala belibandla imbala. Lomkhuba wekutsi ngitawushaywa nami ngicole, wachubeka iminyaka leminyenti. Sonkhe lesikhatsi, bengisolo ngicabanga kutsi kukhona lengingakwenta kute indvodza yami ingitsandze. Ekugcineni, kwatsi ngalesikhatsi sehlukana naye,  mine nendvodzakati yetfu, ngativa shengatsi ngisehluleki, bekufanele ngente nobe ngisho lokutsite kute ngiwubambe lomshado ungapheli.”

NjengaMariya naNomusa, mhlawumbe nawe kwentelwa phansi nguloyo loshade naye, kukushiye uphukile emoyeni, ute imali, nobe buhlobo bakho naJehova butsintsekile. Nobe mhlawumbe uyindvodza leve buhlungu ngobe umfati wakho wente kungetsembeki. Liciniso kutsi siphila ‘etikhatsini letimatima lokulukhuni ngisho nekuphila kuto,’ njengobe liBhayibheli labiketela. Lesiphrofetho sakhombisa kutsi “emalangeni ekugcina,” bunye bemndeni butawuhlaselwa, lutsandvo lwemvelo luphele. Labanye batawumane batsi bakhonta Nkulunkulu kodvwa imisebenti yabo ibe ikuphikisa loko. (2 Thim. 3:1-5) EmaKhristu eliciniso nawo aba nato letinkinga; ngako-ke, yini lengakusita kutsi umelane nesimo sekwentelwa phansi nguloyo loshade naye?

Tibone Ngendlela Jehova Lakubona Ngayo

Ekucaleni, kungaba matima kukukholwa kutsi umuntfu lomtsandzako angakuvisa buhlungu kangaka. Mhlawumbe ungahle ucale ngekutibona uneliphutsa ngekutiphatsa kwakhe lokubi.

Khumbula kutsi ngisho nendvodza lebeyite sono, Jesu yentelwa phansi ngumuntfu lebeyimetsemba futsi imtsandza. Jesu wakhetsa bangani bakhe labakhulu, baphostoli bakhe, ngemva kwekutsi acabangisise kahle futsi wathandaza ngalendzaba. Labaphostoli labangu-12 baba tinceku taJehova letetsembekile. Ngako-ke, akungabateki kutsi Jesu wadzabuka kakhulu ‘nasekajikelwa’ nguJudasi. (Luk. 6:12-16) Nobe kunjalo, Jehova akamsolanga Jesu ngetento taJudasi.

Kuliciniso kutsi kwanyalo akekho umuntfu lote sono kulabashadile. Bobabili laba labashadile bayawenta emaphutsa. Umhlabeli waphefumulelwa kutsi abhale: “Kube wena, Simakadze, [Jehova] bewusibalela tono tetfu, ngubani labengaphunyula, angalahlwa?” (Hla. 130:3) Bobabili laba labashadile kufanele balingise Jehova bacolelane emaphutsa abo.—1 Phet. 4:8.

Noko-ke, “sonkhe siyawulandza ngatsi matfupha ngamunye ngamunye kuNkulunkulu.” (Rom. 14:12) Nangabe loshade naye anemkhuba wekukhuluma kabi nobe enta tento letimbi, nguye lonelicala futsi kufanele alandzise kuJehova. Jehova uyabulahla budlova kanye nekukhuluma kabi, ngako-ke, kute sizatfu lesivakalako sekuphatsa umuntfu loshade naye ngendlela lekhombisa kungabi nelutsandvo nekungamhloniphi. (Hla. 11:5; Ef. 5:33; Khol. 3:6-8) Ecinisweni, nangabe umKhristu atinikela entfukutselweni leyesabekako kanyenti futsi angafuni kuphendvuka, kufanele asuswe ebandleni lebuKhristu. (Gal. 5:19-21; 2 Joh. 9, 10) Lona lophatfwa kabi akukafanele ative aneliphutsa ngekubika kulabadzala belibandla lokutiphatsa lokubi kwaloyo lashade naye. Nembala, Jehova ubavela buhlungu labo labaphatfwa ngalendlela.

Uma umuntfu loshadile aphinga, akoneli kuphela lona lashade naye, kodvwa wonela naJehova imbala. (Mat. 19:4-9; Heb. 13:4) Nangabe lona lotiphetse kahle atikhandla kute aphile ngetimiso teliBhayibheli, kute sidzingo sekutiva anelicala ngalesento sekuphinga kwalona longaketsembeki.

Khumbula kutsi Jehova uyayati indlela lotiva ngayo. Utichaza anjengemyeni longumnikati wesive sema-Israyeli, futsi liVi lakhe licuketse tindzinyana letinyenti letendlulisela buhlungu labekabuva ngekungetsembeki kwalesive sakhe lesasiphinga. (Isa. 54:5, 6; Jer. 3:1, 6-10) Yati kahle kutsi Jehova uyakubona kukhala kwakho nawentelwa phansi nguloyo loshade naye. (Mal. 2:13, 14) Uyati kutsi udzinga indvudvuto kanye nesikhutsato.

Indlela Jehova Laniketa Ngayo Indvudvuto

Lenye indlela Jehova laniketa ngayo indvudvuto, libandla lebuKhristu. Nomusa wasekelwa ngaleyondlela. Nomusa utsi: “Umbonisi wesifundza wefika ngalesikhatsi lebengitiva ngephuke umoya ngaso. Abati indlela lengicindzeteleke ngayo ngekufuna kwendvodza yami kungidivosa. Watinika sikhatsi sekungisita kutsi ngizindle ngemiBhalo lenjenga-1 Khorinte 7:15. Lamavesi eliBhayibheli kanye nemavi akhe lanemusa angisita ngakhululeka kulomuva wekuba nelicala futsi anginika kuthula kwengcondvo.” b

 Mariya lokukhulunywe ngaye ekucaleni, naye wafundza kutsi Jehova uniketa lusito lolubonakalako ngelibandla lebuKhristu. Utsi: “Kwatsi nasekubonakala kahle kutsi indvodza yami ayiphendvuki, ngatsatsa bantfwana bami ngayewuhlala kulelinye lidolobha. Ngatsi nangifika, ngatfola emakamelo lamabili, ngaticashela wona. Ngelilanga lelilandzelako nganganywa kudvumala, bengisatfulula tikhwama ngalesikhatsi ngiva lotsite anconcotsa emnyango. Ngacabanga kutsi lolonconcotsako ngumcashi wami lohlala endlini leseceleni kwalengikuyo. Bengishaye phansi ngobe lomuntfu lobekanconcotsa bekungulomsikati lobekake wachubela make wami nemndeni wakitsi wonkhe sifundvo seliBhayibheli, lokwasenta sagcina sonkhe sesingemaKhristu. Bekangakagadzi kungikhandza kulendlu, ngobe bekete kumchashi wami atewumchubela sifundvo seliBhayibheli. Ngativa ngetfuleka umtfwalo—ngehluleka kutibamba. Ngamchazela ngesimo lebengikuso sase siyasidzindza sililo sobabili. Ngalelo langa wahlela kutsi siye emhlanganweni yebuKhristu. Nasifika ebandleni, bazalwane basemukela ngato totimbili. Emadvodza lamadzala elibandla enta luhlelo lolucacile lekunakekela tidzingo takamoya temndeni wami.”

Indlela Labanye Bantfu Labangalekelela Ngayo

Akubutwa kutsi emalunga elibandla lebuKhristu angaba lusito ekunikeni umuntfu tidzingo nchanti. Sibonelo saloko kutsi Mariya sewulitfolile litoho. Lomunye umndeni ebandleni watinikela kutsi usite bantfwabakhe nasebaphumile esikolweni.

“Lengikubonga kakhulu” kusho Mariya, “kuba nebazalwane nabodzadze lesiba ndzawonye nabo nebantfwabami nasisemsebentini wekushumayela.” Ngelusito lolunjalo, emalunga elibandla asuke ‘atfwalisana imitfwalo,’ ngekwenta njalo akhombisa kutsi alalela ‘umtsetfo waKhristu,’—Gal. 6:2.

Bantfu labadvonsa kamatima ngenca yetono letentiwa ngulabanye bayalilobikela lusito. Sebentile walahlwa yindvodza yakhe yamshiya aselutakwini lesikweleti sa-E110 000 (R110 000) yaphindze yamshiya nelusapho lwebantfwana labane. Utsi: “Bazalwane kanye nabodzadzewetfu lesikhonta nabo bebangangitsandzi bangibutsa phansi. Kube abekho bazalwane, kuphila kwami ngabe kuyinhlekisa. Nginemuva wekutsi Jehova ungiphe bazalwane labanemusa labatente baba lusito kubantfwabami. Inhlitiyo yami iyajabula nangibona bantfwabami bavutfwa kamoya ngalolo lusito. Emadvodza lamadzala elibandla ahlale avule emagede ngekungeluleka nangidzinga seluleko. Nangifuna kutihhamula, lamadvodza lamadzala atinika sikhatsi ngami.”—Makho 10:29, 30.

Kuliciniso kutsi umngani sibili usebentisa kuhluteka kwengcondvo kute angakhulumi indzaba letawuvisa lomunye buhlungu.  (Umshumayeli 3:7) Mariya utsi: “Etikhatsini letinyenti kuyangijabulisa kucoca nebazalwane ebandleni lesengikulo; ngemsebenti wekushumayela, ngekuchuba tifundvo teliBhayibheli nangebantfwabetfu—asicoci-ke ngetinkinga. Ngikubonga kakhulu kutsi bangisita ngakhohlwa ngetintfo lengatenta emuva kodvwa bangisita ngacala imphilo lensha.”

Lwisana Nemoya Wekuphindzisela

Ngaletinye tikhatsi, esikhundleni sekutsi utive ubophekile ngaloko umlingani wakho wemshado lakwentile, ungativa utfukutsele ngesizatfu sekutsi uhlupheka nje ngenca yemaphutsa lawentile. Nangabe intfukutselo lenjalo uyifukamela, ingabangela kutsi sincumo lositsetse sekuhlala wetsembekile kuJehova, siphelele ebaleni. Ngalesinye sikhatsi, ungase utikhandze sewufuna tindlela tekuphindzisela kumlingani wakho wemshado longaketsembeki.

Nangabe uva kukhula sifiso sekuphindzisela kuwe, kungaba kuhle kutsi ucabange ngesibonelo saJoshuwa naKhalebi. Lamadvodza latsembekile afaka kuphila kwawo engotini kute ayewuhlola Live Lesetsembiso. Letinye taletinhloli taphelelwa kukholwa futsi tenta bantfu bangamlaleli Jehova. Lamanye ema-Israyeli ate afuna kujikijela boJoshuwa naKhalebi ngematje ngalesikhatsi betama kugcugcutela lesive kutsi sihlale setsembekile. (Numeri 13:25–14:10) Loko lokwentiwa ngema-Israyeli kwaphumela ekutseni boJoshuwa naKhalebi batikhandze bandzindza lapha ehlane iminyaka lengu-40, hhayi ngenca yemaphutsa abo kodvwa ngenca yemaphutsa alabanye.

Nanobe nje boJoshuwa naKhalebi badvumateka, kodvwa abatange bavumele kutsi loko lokwentiwa bomnakabo kubente babe munyu. Banaka kakhulu umsebenti labebawentela Jehova. Ekupheleni kweminyaka lengu-40 basehlane, bona kanye nemaLevi babusiswa ngekutsi kube ngibo labasindza kuleso situkulwane futsi bahamba bate bayongena Eveni Lesetsembiso.—Numeri 14:28-30; Joshuwa 14:6-12.

Loko lokwentiwa ngumlingani wakho wemshado longaketsembeki, kungakwenta ucindzeteleke. Umshado wenu ungacitseka, ngemva kwaloko ungatikhandza ucindzetelekile ngekwemivelo futsi ubhekene nesimo lesimatima kutemnotfo. Nobe kunjalo, esikhundleni sekutsi uvumele lelifu lelimnyama kutsi likwente ucindzeteleke engcondvweni, khumbula kutsi Jehova uyati kamhlophe indlela lokufanele asebentelane ngayo nalabo labadzicela phansi ngemabomu kuphila ngendlela layifunako. Ema-Israyeli latsembekile akubona loko ehlane.—Hebheru 10:30, 31; 13:4.

Ungakhona Kuphumelela!

Esikhundleni sekutsi uvumele imicabango lemibi kutsi ikwente uphelelwe ngemandla, gcwalisa ingcondvo yakho ngemicabango yaJehova. Nokukhanya watsi: “Ngatfola kutsi kulalela emakhasethi latsetjuliwe eSicongosekulindza ne-Phaphama ngiko lokwangisita ngakwati kuphumelela. Imihlangano nayo yaba ngumtfombo lowangicinisa. Kuhlanganyela ngenkhutsalo emihlanganweni kwangisita ngakhona kungacabangi kakhulu ngetinkinga tami. Nemsebenti wekushumayela nawo wangisita ngendlela lefanako. Ngekusita labanye bakhe kukholwa kwabo kuJehova, nami matfupha ngacinisa kwami kukholwa. Kusita tifundvo tami teliBhayibheli nako kwangenta nganaka kakhulu tintfo letibalulekile.”

Sebentile lokukhulunywe ngaye ekucaleni yena utsi: “Kuba khona kwami ngaso sonkhe sikhatsi emihlanganweni nasemsebentini wekushumayela, kungisitile ngakhona kubeketela. Umndeni wami sewunebunye futsi sewunebudlelwane lobuhle nelibandla. Simo lesimatima lebengibhekene naso sangisita ngakhona kubona lapho ngibutsakatsaka khona. Ngabhekana nebumatima, kodvwa ngelusito lwaJehova ngakhona kuphumelela.”

Nawe ungakhona kubeketelela timo letifanana naleti. Ngisho nobe kunebuhlungu lobubangelwe ngulomlingani wakho wemshado lokwentele phansi, lwela kulandzela seluleko lesiphefumulelwe lesitsi: “Asingadzinwa kwenta lokuhle; ngobe nasingadzinwa, siyawuvuna ngesikhatsi lesifanele.”—Galathiya 6:9.

[Imibhalo lengentasi]

[Sitfombe ekhasini 31]

Labo labalahlwe ngulabo labashade nabo, bayakujabulela kutfola lusito kulamanye emaKhristu emsebentini wekushumayela