Liciniso Mayelana Nesono

INDVODZA legulako ingacinisekisa yini kutsi ayinawo umkhuhlane ngekuphula i-thermometer? Cha, angeke. Nangendlela lefananako, ngesizatfu sekutsi labanyenti bayawulahla umbono waNkulunkulu ngesono akusho kutsi sono asikho. LiVi lakhe liBhayibheli linalokunyenti lelingakusho ngalendzaba. Yini vele leliyifundzisako ngesono?

Sonkhe Siyasilela

Eminyakeni letinkhulungwane letimbili leyengcile, umphostoli Pawula waveta kudideka labenako mayelana nekutsi ‘lokulungile latsandza kukwenta, akakwenti, kodvwa lokubi langafuni kukwenta, uyakwenta.’ (Roma 7:19) Nangabe setsembekile, kufanele sivume kutsi simo setfu siyafanana nalesi saPawula. Mhlawumbe sinesifiso sekuphila ngeMitsetfo Lelishumi nobe letinye tindlela tekutiphatsa, nobe sitsandza nobe singatsandzi sonkhe siyasilela. Akusho kutsi senta ngemabomu nangabe singatilandzeli leto tindlela, kodvwa kungenca yekutsi sibutsakatsaka. Kungani kunjalo? Pawula usiniketa imphendvulo: “Nangabe ngenta lengingatsandzi kukwenta, loko kusho kutsi akusesimi lowo lokwentako, kodvwa ngulesono lesihlala kimi.”—Roma 7:20.

NjengaPawula, bonkhe bantfu batelwe banebutsakatsaka—lokubufakazi bekutsi sinesono. “Bonkhe bantfu bonile, bakhashane kakhulu nenkhatimulo yaNkulunkulu.” Yini lebangela lesimo? Umphostoli Pawula uchubeka atsi: “Sono sangena ngemuntfu munye [Adamu] emhlabeni, sangena nekufa, kufa kwase kwendlulela kubo bonkhe bantfu, njengobe bonkhe bonile.”—Roma 3:23; 5:12.

Nanobe bantfu labanyenti bangakwetsembi kutsi siphambeko sebatali betfu bekucala sasihlukanisa naNkulunkulu futsi sisibangela kutsi sibe nesono, ecinisweni nguloko kanye liBhayibheli lelikufundzisako. Ngekucaphuna emavi latfolakala esehlukweni sekucala saGenesisi, Jesu wakhombisa kutsi uyavumelana nalomlandvo wabo-Adamu na-Eva.—Genesisi 1:27; 2:24; 5:2; Matewu 19:1-5.

Lesinye sisekelo semlayeto weliBhayibheli sikutsi Jesu weta emhlabeni kute atewubakhulula esonweni labo labanekukholwa kuye. (Johane 3:16) Imphumelelo yelikusasa letfu isekelwe ekwamukeleni indlela yaJehova yekusindzisa bantfu bonkhe esimeni lesimatima lokungasimelula kuphuma kuso. Kodvwa nasingati kahle kutsi siyini sono ngekwembono waNkulunkulu, angeke sikujabulele kutsi usilungiselele indlela yekusisindzisa kuso.

Lokwenta Kutsi Umhlatjelo WaJesu Udzingeke

Jehova wenta bantfu bekucala kutsi babe nelitsemba lekuphila phakadze. Nangabe nje Adamu abetawuvukela Nkulunkulu abetawulahlekelwa litsemba lekuphila phakadze. Ekugcineni Adamu wamvukela Nkulunkulu futsi ngekwenta njalo waba nesono. (Genesisi 2:15-17; 3:6) Adamu wenta lokuphambene nentsandvo yaNkulunkulu, wehluleka kwenta lokulungile, futsi wafaka buhlobo bakhe naNkulunkulu engotini. Ngalesikhatsi ona ngekungawulaleli umyalo waNkulunkulu, wagcina asafile. Lokubuhlungu kutsi yonkhe intalelwane ya-Adamu—lokufaka ekhatsi natsi—satalwa sinesono, futsi ekugcineni sitawufa ngenca yaso. Kungani kunjalo?

Imphendvulo yalombuto imelula. Umtali lonesono angeke atale bantfwana labete sono. Sonkhe siyintalelwane ya-Adamu sitalwe sinesono. Phela kungako umphostoli Pawula waze watsi: “Inkhokhelo yesono kufa.” (Roma 6:23) Nobe kunjalo, incenye yesibili yalelivesi isinika litsemba: “Kodvwa sipho semusa saNkulunkulu sikuphila lokuphakadze ngaKhristu Jesu iNkhosi yetfu.” Loko kusho kutsi ngekufa kwaJesu njengemhlatjelo,  kungaba melula ngebantfu labalalelako, nalababonisa kubonga kutsi bagezwe esonweni lesentiwa ngu-Adamu. a (Matewu 20:28; 1 Phetro 1:18, 19) Loku kufanele kukwente utive njani?

“Lutsandvo LwaKhristu Luyasichuba”

Umphostoli Pawula lobekaphefumulelwe usiniketa imphendvulo levela kuNkulunkulu yalombuto longenhla. Wabhala: “Lutsandvo lwaKhristu luyasichuba. Sesidzimate sefika kunasi siphetfo sekutsi: Munye lowafela bonkhe; . . . kuze kutsi bonkhe labo labafela bangabe basatiphilela, kodvwa baphilele yena lowabafela waphindze wavuselwa bona.” (2 Khorinte 5:14, 15) Nangabe umuntfu ajabulela kutsi umhlatjelo waJesu ungamkhulula esonweni—futsi atimisele kukhombisa kutsi uyalubonga lolo hlelo—kufanele asebente kamatima kute aphile imphilo levumelana nendlela yaNkulunkulu. Loku kufaka ekhatsi kwati loko Nkulunkulu lakufunako kitsi, kuphindze kufake ekhatsi nekutsi siceceshe bonembeza betfu ngekusebentisa timiso teliBhayibheli, ekugcineni, siphile ngekuvumelana nato.—Johane 17:3, 17.

Kwenta tintfo letingakalungi kuphatamisa buhlobo betfu naNkulunkulu Jehova. Ngalesikhatsi iNkhosi Davide icaphela kutsi yonile ngekuphinga naBhatisheba kanye nekubulala indvodza yakhe, akungabateki kutsi kwayenta yaba nemahloni. Kodvwa lokwayivisa buhlungu kakhulu—futsi kube bekufanele—kutsi sono sayo samtfukutselisa Nkulunkulu. Ngekutisola ngaloko leyakwenta, yavuma kuJehova: “Ngonile kuwe, wena wedvwa, ngente lokunengekako emehlweni akho.” (Tihlabelelo 51:4) Ngendlela lefananako, ngesikhatsi Josefa alingwa kutsi aphinge, nembeza wakhe wamenta watibuta: “Ngingabenta kanjani lobubi lobungaka, ngone kuNkulunkulu?”—Genesisi 39:9.

Ngako sono akusiwo umuva wekutiva sinelicala ngobe basitfole senta lokutsite lokungakalungi. Akusiko kutsi kufanele simise timbilapho kubantfu ngenca nje yeliphutsa lelitsite lesilentile. Kungawulaleli umtsetfo waNkulunkulu mayelana nekuphinga nobe bufebe, kungetsembeki, kungamhloniphi, kungamkhonti kanye nalokunye, kuphatamisa buhlobo betfu naye. Nangabe  sona ngemabomu, sisuke sitenta titsa taNkulunkulu. Leli liciniso lokufanele silivume nobe kanjani.—1 Johane 3:4, 8.

Sekwentekeni ngesono? Liciniso likutsi akukashintji lutfo ngaso. Bantfu baze basibite ngalamanye emagama ngobe betsemba kutsi nabenta njalo angeke sibonakale siyingoti kangako. Bantfu labanyenti bonembeza babo abasasebenti futsi labanye ababanaki nangabe babecwayisa. Bonkhe labafuna kutsi Nkulunkulu ababonise umusa kufanele bayibalekele imibono lenjalo. Njengobe sibonile, inkhokhelo yesono, ayisiso nje silondza lesincane nobe kuphoceka, kodvwa isho kufa. Sono siyabulala.

Tindzaba letinhle ngesono titsi, singacolelwe ngesisekelo sensindziso lenkhulu yemhlatjelo waJesu wesihlengo nangabe siphendvuka ngekwetsembeka etonweni tetfu futsi sitishiya. Pawula wabhala: “Babusisiwe labo Nkulunkulu labatsetselele tiphambuko tabo, nalabo labatono tabo tisitjekelwe. Ubusisiwe umuntfu, iNkhosi [Jehova] lengeyumbalela sono.”—Roma 4:7, 8.

[Umbhalo longentasi]

[Libhokisi/Sitfombe ekhasini 10]

Imfundziso Yenkholo Leyashitjwa Yonkhe

Kubantfu labanyenti benkholo yemaKhatholika, umbono weLimbo bewusolo ungevakali kahle. Eminyakeni lesadza kwendlula, lombono bewusolo uncipha kancane kancane wate wangasatfolakali ngisho nakuthekhizimu. Ngemnyaka wa-2007 lisontfo lemaKhatholika lasayina incwadzi lebeyicedza yonkhe inkholo yebuLimbo ‘lebeyinetizatfu tenkholo tekuba nelitsemba lekutsi bantfwana labancane labafa bangakabhajatiswa bangasindziswa bese batfola injabulo lengunaphakadze.’—International Theological Commission.

Kungani kwaba nekushintja lokukhulu kangaka? Lokushintja kwakhulula emasontfo kutsi angasakunaki loko umbhali wemFulentji Henri Tincq lakubita ngekutsi “lifa lelingumtfwalo, lebelisolo livikelwa lisontfo lelingundlovu kayiphikiswa kusukela eminyakeni lesekhatsi kuya ekhulwini leminyaka lema-20, lelaletfusa batali ngeLimbo kute babhabhatise bantfwababo ngekushesha kakhulu.” Kepha kushintjwa kwalenkholelo kwenta kutsi kube naleminye imibuto.

Beyisuselwa Enkholelweni Lelite Nobe EmiBhalweni Yini? Ngekusho kwemlandvo, lenkholelo yachamuka etimpikiswaneni tetati tenkholo letacala ngelikhulu lesi-12 letatihlobene nemfundziso yekubakhona kwendzawo yekuhlushwa kwemoya webantfu labafile ngembikwekutsi baye ezulwini (purgatory). Lisontfo lemaKhatholika belifundzisa kutsi umphefumulo uyasindza nangabe umuntfu afa, ngako kwadzingeka kutsi lichaze kutsi kwentakani ngemiphefumulo yebantfwana labafa bangakabhajatiswa kepha lokungafanele baye esihogweni. Wabese ucala ngaleyondlela umbono weLimbo.

Nobe kunjalo, liBhayibheli alifundzisi kutsi umphefumulo uyasindza nakufa umtimba. Kunaloko likubeka ngalokucacile kutsi imiphefumulo leyonako “ingabhujiswa” nobe “ife”. (Imisebenti 3:23; Hezekeli 18:4, Douay-Rheims Version) Njengobe-ke ingekho intfo lesindzako umtimba nawufa, loko kusho kutsi indzawo lekutsiwa yiLimbo ayikho. Ngetulu kwaloko, liBhayibheli liyakhuluma ngekufa litsi kusimo sekungaphili, kufanana nekulala.—Umshumayeli 9:5, 10; Johane 11:11-14.

LiBhayibheli likhombisa kutsi Nkulunkulu utsi bantfwana bemtali longumKhristu bangcwele. (1 Khorinte 7:14) Emavi lanjalo abengeke avakale kube kubhajatiswa kwebantfwana bekudzingekile kute basindziswe.

Imfundziso yeLimbo beyiyinhlamba kuNkulunkulu, imveta anguNkulunkulu lomubi, lonesibhuku, lojezisa bantfu labate licala, kunekutsi abe nguBabe lolungile nalonelutsandvo. (Dutheronomi 32:4; Matewu 5:45; 1 Johane 4:8) Kungaleso sizatfu lemfundziso lengekho eBhayibhelini ingenangcondvo emaKhristwini.

[Titfombe ekhasini 9]

Kuphila ngekuvumelana neliVi laNkulunkulu kuphumela ekubeni nebuhlobo lobuhle naye kanye nalabanye