Loko Lilanga LaJehova Leliyokwembula

“Lilanga leNkhosi [Jehova] liyawufika njengelisela, . . . umhlaba nemisebenti lekuwo kuyawusha.”—2 PHET. 3:10.

1, 2. (a) Lelive lelibi laSathane lesiphila kulo litawuphela njani? (b) Ngumiphi imibuto lesitawucoca ngayo?

 BUBI lesibubona kulomhlaba lesiphila kuwo bubangelwa ngemanga latsi umuntfu angakwati kubusa umhlaba ngaphandle kwelusito lwaJehova. (Hla. 2:2, 3) Nobe ngabe yini lenemsuka wemanga, ingaphumelela yini? Cha, angeke iphumelele! Ngako-ke, akukafanele silindze sikhatsi lesitsite kute bantfu lababuswa nguSathane babhujiswe. Esikhundleni saloko, Nkulunkulu utababhubhisa ngesikhatsi sakhe lesifanele nangendlela lahlele ngayo. Loko Nkulunkulu latawukwenta ngalomhlaba logcwele bubi kutawukhombisa kulunga kanye nelutsandvo lwakhe ngendlela lephelele.—Hla. 92:7; Taga 2:21, 22.

² Umphostoli Phetro wabhala: “Lilanga leNkhosi [Jehova] liyawufika njengelisela, mhlazana emazulu ayakwendlula ngekuhlokoma; tonkhe tisekelo temkhatsi tiyakusha tincibilike, umhlaba nemisebenti lekuwo kuyawusha.” (2 Phet. 3:10) Ayini “emazulu” kanye ‘nemhlaba’ lokukhulunywa ngawo lapha? Tiyini “tisekelo temkhatsi” letiyawuncibilikiswa? Abesho kutsini Phetro nakatsi “umhlaba nemisebenti lekuwo kuyawusha”? Kwati timphendvulo talemibuto kutasisita kutsi sililindzele ngalabovu lelilanga leletfusako lelitawufika ngekuphutfuma lokukhulu.

Emazulu Kanye Nemhlaba Lokutawendlula

3. Ayini “emazulu” lokukhulunywa ngawo emBhalweni wa-2 Phetro 3:10, futsi atawendlula njani?

³ Nalisetjentiswe eBhayibhelini ngendlela yekutsi lichaze lokutsite, ligama lelitsi “emazulu” livamise kusho emandla ekubusa babusi labavamise kuwasebentisa kulabo labababusako. (Isa. 14:13, 14; Semb. 21:1, 2) ‘Emazulu latawendlula’ amelela indlela bantfu labangamkhonti Nkulunkulu lababuswa ngayo. Kwendlula kwawo njengemsindvo lomkhulu ‘wekuhlokoma’ nobe “wekubhodla lokukhulu,” lenye incwadzi itsi loko kusho kutsi lamazulu atawubhujiswa ngalokuphelele.

4. Uyini “umhlaba,” futsi utawubhujiswa njani?

⁴ “Umhlaba” umelela bantfu labangamkhonti Nkulunkulu. Bantfu labanjalo bake babakhona ngesikhatsi saNowa, futsi babhujiswa ngaZamcolo. “Ngalo lelivi emazulu nemhlaba lokukhona nyalo kugcinelwe umlilo ngelilanga lekwehlulelwa, lapho kuyawubhujiswa khona labangamesabi Nkulunkulu.” (2 Phet. 3:7) Njengobe Zamcolo wabhubhisa bonkhe labo labangamkhonti Nkulunkulu ngesikhatsi sinye, nenhlekelele letako itawufika ngesikhatsi ‘sekuhlupheka lokukhulu.’ (Semb. 7:14) Encenyeni yekucala yalenhlupheko, Nkulunkulu utawubangela babusi bemhlaba kutsi babhubhise “liBhabhulona Lenkhulu,” futsi ngekwenta njalo utawukhombisa kutsi lengwadla etindzabeni tenkholo, ayisilutfo. (Semb. 17:5, 16; 18:8) Encenyeni yekugcina yenhlupheko lenkhulu, Jehova lucobo lwakhe utawusebentisa imphi yakhe i-Amagedoni kute asuse wonkhe umonakalo lobangelwe live lelibuswa nguSathane.—Semb. 16:14, 16; 19:19-21.

‘Tisekelo Temkhatsi . . . Tiyawuncibilikiswa’

5. Tisekelo temkhatsi letingumfanekiso tisho kutsini?

⁵ Tiyini ‘tisekelo temkhatsi letiyawuncibilikiswa’? Sichazamagama seliBhayibheli sichaza “tisekelo temkhatsi” ngekutsi “timiso nchanti.” Siphindze sitsi leligama “lalisetjentiswa  njengetinhlavu temagama letakha inkhulumo.” Ngako-ke, “tisekelo temkhatsi” Phetro labekakhuluma ngato tatisho tintfo letisisekelo letenta bantfu labangamkhonti Jehova kutsi bavete timfanelo letikhombisa kungamhloniphi Nkulunkulu. Tifaka ekhatsi simo sengcondvo lesibi, indlela lengakalungi labenta ngayo tintfo kanye nemigomo lengakalungi. “Tisekelo temkhatsi” tiphindze tifake ekhatsi “umoya welive” loyo moya “losasebenta kubantfu labangalaleli Nkulunkulu.” (1 Khor. 2:12; fundza Efesu 2:1-3.) Lowo “moya” uhhusha kulelive lelibuswa nguSathane. Wenta bantfu kutsi bacabange, bahlele tintfo, bakhulume futsi bente tintfo letihambisana nemicabango yaSathane ‘longumbusi wemandla emkhatsi’ lotigcabhako futsi longafuni kulalela Nkulunkulu.

6. Umoya welive laSathane ubahunge njani bantfu?

⁶ Ngako-ke, nobe bati nobe bangati, labo labahabule umoya welive lelibuswa nguSathane, bavumela tingcondvo kanye netinhlitiyo tabo tihungwe nguye. Loko kubenta bacabange futsi batiphatse njengaye. Uphumela waloko ube kutsi bente loko lokufunwa ngibo ngaphandle kwekucondziswa ngumtsetfo waNkulunkulu. Ngisho nalapho kuvela timo letimatima bachubeka batikhukhumeta futsi bangacabangeli, baphindze babonise nemoya wekuhlubuka kulabo labanemagunya. Loko kuphindze kwabenta bangena batsi shi ‘enkhanukweni yenyama, nasenkhanukweni yemehlo.’—Fundza 1 Johane 2:15-17. a

7. Kungani kufanele ‘silondvolote tinhlitiyo tetfu’?

⁷ Ngako-ke, kubaluleke kakhulu ‘kulondvolota tinhlitiyo tetfu’ ngekusebentisa kuhlakanipha kwaNkulunkulu nangabe sikhetsa bangani, tincwadzi lesitifundzako, tekutijabulisa kanye Nemakheli ekuchumana e-Internet. (Taga 4:23) Umphostoli Pawula wabhala: “Caphelani-ke kutsi kubete lonitfumba ngekuhlakanipha, nangekukhohlisa lokulite, aniyenge ngemikhuba yebantfu nangetimfundziso temimoya yemvelo emkhatsini. Konkhe loko kuphambene nendlela yaKhristu.” (Khol. 2:8) Lesecwayiso siphutfuma kakhulu njengobe lilanga laJehova lisondzela, futsi kushisa kwalo lokukhulu kutawuncibilikisa “tonkhe tisekelo temkhatsi” talelive lelibuswa nguSathane ngekutsi kube sebaleni kutsi uyehluleka kubusa lomhlaba. Loku kusikhumbuta emavi lakuMalakhi 4:1 latsi: “Lilanga liyeta; liyawushisa njengemlilo lowesabekako nalohhumako. Bonkhe labatigcabhako bangangihloniphi nalabenta lokubi bayawuba tinhlanga, lelo langa lelitako liyawubalumekela ngemlilo.”

“Umhlaba Nemisebenti Lekuwo Kuyawusha”

8. “Umhlaba nemisebenti lekuwo kuyawusha” njani?

⁸ Bekasho kutsini Phetro nakabhala atsi “umhlaba nemisebenti lekuwo kuyawusha”? Ligama lelitsi “kuyawusha” lisho “kutfola intfo lebeyingatiwa” nobe “kunekela ebaleni.” Phetro abesho kutsi ngesikhatsi senhlupheko lenkhulu, Jehova utawunekela lilanga live lelibuswa nguSathane, alingcunule kutsi alihambisani naye kanye neMbuso Wakhe. Siphrofetho lesitfolakala ku-Isaya 26:21 sitsi: “Simakadze [Jehova] uphumela ngephandle kwendzawo yakhe yekuhlala, utewujezisa tive temhlaba ngenca yetono tato. Umhlaba utawuveta ebaleni yonkhe ingati leyacitseka kuwo, lababulewe kuwo ungeke usabafihla.”

9. (a) Yini lokufanele siyilahle, futsi ngasiphi sizatfu? (b) Yini lokufanele sifake umfutfo kuyenta, futsi leni?

⁹ Ngelilanga laJehova lekugweba, bonkhe labo labalawulwa ngulelive lelibuswa nguSathane kanye nemimoya yakhe batawuveta kuba luhlata kwabo, baphindze bagangadzane. Ematfuba makhulu ekutsi tinhlobo letinyenti temidlalo letisematseni lamuhla letikhombisa budlova tidvunga tingcondvo tebantfu kute ngelilanga laJehova lekugweba ‘ngulowo nalowo abambe sandla salomunye bahlaselane bodvwana.’ (Zak. 14:13) Kubaluleke sibili-ke kutsi sikulahle konkhe naku lokulandzelako: Emabhayisikobho, tincwadzi kanye nemidlalo ye-video—lokungahlanyela kitsi imikhuba lemibi leyenyanyekako kuNkulunkulu lefaka ekhatsi kutigcabha  kanye nebudlova. (2 Sam. 22:28; Hla. 11:5) Kunaloko, asifake umfutfo sitsele titselo temoya longcwele. Letitselo titawubangela kutsi singokhelwa ngumlilo nangabe lilangabi lenhlitiyo lelingumfanekiso livutsa.—Gal. 5:22, 23.

“Emazulu Lamasha, Nemhlaba Lomusha”

10, 11. Ayini “emazulu lamasha nemhlaba lomusha”?

¹⁰ Fundza 2 Phetro 3:13. “Emazulu lamasha,” nguMbuso waNkulunkulu wasezulwini lowasungulwa ngemnyaka wanga-1914. Kulowo mnyaka, “sikhatsi sabo [betive]” saphela. (Luk. 21:24) Lombuso wasebukhosini wakhiwa nguJesu Khristu nebantfu labangu-144 000, labamdzibimunye ekubuseni naye. Linyenti labo sebafike catsatsa emazulwini futsi sebawutfolile umkhlomelo wabo. Encwadzini yeSembulo, labantfu labangu-144 000 bafananiswa ‘nelikhaya lelingcwele iJerusalema Lensha, lelehla liphuma ezulwini kuNkulunkulu, lilungiswe kahle lahlotjiswa njengamakoti ahlobele kuyawuhlangabeta umyeni wakhe emshadweni.’ (Semb. 21:1, 2, 22-24) Njengobe lidolobha iJerusalema ngulapho bekutinte khona umbuso wema-Israyeli phaca, liJerusalema Lelisha kanye Nemyeni walo bakha hulumende weluhlelo lolusha lwekubusa. Lidolobha lelinenkhatimulo ‘litawehla livela ezulwini’ ngekutsi lilawule tintfo letentiwa emhlabeni.

¹¹ “Umhlaba lomusha” usho umhlaba lowakhiwa bantfu labatawube sebasikhombisile sifiso sabo sekutfobela uMbuso waNkulunkulu. Lipharadisi lakamoya lelitsakaselwa bantfu baNkulunkulu nyalo kutawutsi ngesikhatsi lesibekiwe libe lihle ngalokugcwele ‘emhlabeni lotako.’ (Heb. 2:5) Singenta njani kute sibe nencenye kulolohlelo lolusha?

Tilungiselele Lilanga LaJehova Lelikhulu

12. Kungani lilanga laJehova litawetfusa umhlaba?

¹² Bobabili boPawula naPhetro, babika kadzeni kutsi lilanga laJehova liyawufika “njengelisela”—ngekunyenya, lingakagadvwa. (Fundza 1 Thesalonika 5:1, 2.) Ngisho nemaKhristu lalibuke ngalobovu lelolanga, atawubamba wangephansi nalifika ngobe litawufika ngekutuma lokukhulu. (Mat. 24:44) Umhlaba wona utawutfuka kakhulu kunemaKhristu. Phetro akhuluma ngalendzaba, wabhala watsi: “Ngesikhatsi bantfu batsi: ‘Kunekuthula nenhlalakahle,’ ngekushesha lokukhulu kubhujiswa kuyawubatuma njengemhelo ufikela umfati nasatawubeleka; futsi kute loyawusindza.”—1 Thes. 5:3.

13. Singakubalekela njani kukhohliswa kukhalela “Kuthula nenhlalakahle”?

¹³ Kukhalela “Kuthula nenhlalakahle” kutawuba ngemanga laluhlata khlaba lavela emadimonini kodvwa ngeke abayenge bantfu baJehova. Pawula wabhala: “Kodvwa nine, bazalwane, anikho ebumnyameni, anikafaneli kutunywa ngulelo langa njengekutunywa lisela. Nine nonkhe ningemadvodzana ekukhanya nemadvodzana emini.” (1 Thes. 5:4, 5) Sonkhe siyacelwa kutsi sihlale ekukhanyeni lokutawusenta sibe khashane nebumnyama lobuvela kulelive lelibuswa nguSathane. Phetro wabhala watsi: “Kodvwa nine, batsandzekako, seniyakwati loko. Ngako-ke, caphelani, kuze ningedukiswa ngemaphutsa alabangenamtsetfo, bese niyawa ekucineni kwenu.”—2 Phet. 3:17.

14, 15. (a) Nguyiphi indlela Jehova lakhombisa ngayo kutsi uyasihlonipha? (b) Nguwaphi emavi laphefumulelwe lokufanele sicabange ngawo?

¹⁴ Naka kutsi Jehova akamane nje asitjele kutsi  ‘sicaphele’ ngemva kwaloko ashiye nje kunjalo. Esikhundleni saloko, uyasihlonipha ngobe ngemusa ‘usenta sati’ ngaloko lokutawenteka esikhatsini lesitako.

¹⁵ Kuyadzabukisa kutsi labanye abanaki nobe babhonca tindlebe ekulaleleni tikhumbuto letimayelana neticondziso tekutsi sihlale siphapheme. Labanye bate batsi: ‘Sekuphele emashumi eminyaka sitjelwa intfo yinye.’ Nobe kunjalo, labo labasuke bakhuluma kanjalo, kufanele bati kutsi emavi lanjalo bawacondzise ngco kuJehova nasendvodzaneni yakhe hhayi esisebentini lesetsembekile. Jehova utsi lesikhatsi ‘asisilindzele.’ (Hab. 2:3) Ngendlela lefananako, Jesu watsi: “Ngako-ke caphelani, ngobe anilati lilanga iNkhosi yenu leyawubuya ngalo.” (Mat. 24:42) Ngetulu kwaloko, Phetro naye naku lakubhala: “Nine-ke kufanele nibe bantfu labanjani? Kufanele nitinikele ngalokuphelele kuNkulunkulu, niphile ngekumesaba yena, nilindzele kufika kwelilanga laNkulunkulu.” (2 Phet. 3:11, 12) Sisebenti lesetsembekile kanye neSigungu Lesibusako angeke siwatsatsele phansi lawo mavi labaluleke kangaka.

16. Ngusiphi simo sengcondvo lokufanele sisigweme, futsi kungani kubalulekile kwenta njalo?

¹⁶ Ecinisweni, “sisebenti lesibi” sisonga ngekutsi iNkhosi iyabambelela. (Mat. 24:48) Lesisebenti lesibi siyincenye yalelicembu lelichazwe encwadzini ya-2 Phetro 3:3, 4. Phetro wabhala: “Ngemalanga ekugcina kuyawufika baphukuti labahamba netinkhanuko tabo,” babahleke bulima labo labagcina lilanga laJehova lisetingcondvweni tabo. Esikhundleni sekutsi tifune uMbuso, letiphukuti titinaka tona kakhulu kanye netifiso tato. Shengatsi singakubalekela kungalaleli lokunjalo nalokuyingoti. Esikhundleni saloko, ‘kubeketela kweNkhosi asikutsatse ngekutsi kusentela ematfuba ekusindziswa.’ Kute sisindziswe, kufanele sibematasa emsebentini wekushumayela ngeMbuso newekwenta bantfu babe bafundzi. Kufanele futsi singakhatsateki kakhulu ngetintfo lesati kamhlophe kutsi nguNkulunkulu Jehova lowatiko kutsi tiyokwenteka ngasiphi sikhatsi.—2 Phet. 3:15; fundza Imisebenti 1:6, 7.

Tsembela KuNkulunkulu Wensindziso

17. EmaKhristu latsembekile asabela njani emyalweni waJesu wekutsi abaleke eJerusalema, futsi kungani enta njalo?

¹⁷ Ngemuva kwekuba emabutfo emaRoma angene shi eJudiya nga-66 C.E.,emaKhristu latsembekile alalela umyalo waJesu abaleka kulelidolobha laseJerusalema ngaleso sikhatsi. (Luk. 21:20-23) Yini leyababangela batsatsa sinyatselo ngekushesha bangabe babamba bayekela? Kungobe bagcina secwayiso saJesu etingcondvweni tabo. Bebacabanga kutsi loko labebakukhetsile kutabaletsela bulukhuni, njengobe Khristu abecwayisile. Kodvwa ngesikhatsi  lesifanako, bebati kutsi Jehova angeke abashiye labetsembekile bakhe.—Hla. 55:22.

18. Emavi aJesu lakuLukha 21:25-28 akwenta ube namuphi umuva mayelana nekuhlupheka lokukhulu?

¹⁸ Natsi lamuhla kufanele setsembele kuJehova, ngobe utawusisindzisa ngalesikhatsi lomhlaba lesiphila kuwo uvelelwa kuhlupheka lokukhulu lokungakake sekwenteke. Kutawutsi sekucalile lokuhlupheka lokukhulu, Jehova asengakasikhiphi sehlulelo sakhe kubantfu bonkhe emhlabeni, bantfu “bayawucaleka babenesiyeti ngenca yekwesaba loko labayawube babheke kutsi kwenteke emhlabeni wonkhe.” Nobe kunjalo, titsa taNkulunkulu tiyawutsi tishayisana ngetinhloko ngenca yekwesaba, tinceku taJehova letetsembekile tona tiyawube tite ngisho nalokuncane kwesaba. Ngalokwehlukile, tiyawujabula ngobe titawube tati kamhlophe bha kutsi kukhululwa kwato sekusemnyango.—Fundza Lukha 21:25-28.

19. Sitawucoca ngani esihlokweni lesilandzelako?

¹⁹ Cabanga ngelikusasa lelimangalisako lelilindzelwe ngulabo labatigcina batehlukanisile nalelive kanye ‘netisekelo talo temkhatsi.’ Nobe kunjalo, nangabe sifuna kutfola kuphila, kufanele sifake umfutfo kute singenti lokubi, njengobe sihloko lesilandzelako sitawuchaza. Kufanele sibe netimfanelo letijabulisa Jehova futsi sente loko lakufunako kitsi.—2 Phet. 3:11.

[Umbhalo longentasi]

Ungachaza?

• Kumelelani loku lokulandzelako. . .

‘emazulu kanye nemhlaba’ lokukhona nyalo?

“tisekelo temkhatsi”?

“emazulu lamasha, nemhlaba lomusha”?

• Kungani kufanele setsembele ngendlela lephelele kuNkulunkulu?

[Imibuto Yesihloko Lesifundvwako]

[Sitfombe ekhasini 17]

‘Ungayilondvolota njani inhlitiyo yakho’ futsi uhlale wehlukile eveni?

[Sitfombe ekhasini 18]

Singakhombisa njani kutsi ‘kubeketela kweNkhosi sikutsatsa ngekutsi kusentela ematfuba ekusindziswa’?