Yiba Nencenye Lenkhulu Emsebentini Wekuvuna Bantfu Lomkhulu

‘Khutsalani emsebentini weNkhosi.’—1 KHOR. 15:58.

1. Sitsini simemo Jesu lasendlulisela kubafundzi bakhe?

 KWAKUNGUMNYAKA wanga-30 C.E., eluhambeni lwakhe lolwadzabula indzawo yaseSamariya ngesikhatsi Jesu atsi gozololo esicojeni semanti lebesisedvute nelidolobha laseSikhari. Ngaleso sikhatsi washo naku kubafundzi bakhe: “Phakamisani emehlo enu nibone kutsi emasimi asamhlophe, asalungele kuvunwa.” (Joh. 4:35) Jesu bekangasho kuvuna phaca, kodvwa bekasho kuvunwa kwekucocwa ndzawonye kwebantfu labalungile labebayawuba balandzeli bakhe. Inkhulumo yaJesu beyisho kutsi kumelwe kusetjentwe. Wawumkhulu umsebenti lobekufanele wentiwe ngesikhatsi lesifushane.

2, 3. (a) Yini lekhombisa kutsi siphila esikhatsini sekuvunwa kwebantfu? (b) Sitawucoca ngani kulesihloko?

² Inkhulumo yaJesu isho lokukhulu esikhatsini salamuhla. Siphila esikhatsini lapho bantfu labasemhlabeni wonkhe bafana nemasimu ‘lamhlophe lalungele kuvunwa.’ Umnyaka nemnyaka, tigidzi tebantfu tiwemukela ngato totimbili emaciniso eliBhayibheli. Umphumela waloko kutsi tinkhulungwane talabo bantfu tigcine setibhajatisiwe. Tsine siphiwe mi litfuba lekuba nendzima kulomsebenti wekuvuna bantfu, lophetfwe yiNkhosi yekuvuna, lokunguNkulunkulu Jehova. Wena, uyatimisela yini kutsi ‘ukhutsale’ emsebentini wekuvuna bantfu?—1 Khor. 15:58.

³ Iminyaka lemitsatfu nesigamu layicitsa emsebentini wekushumayela, Jesu waphindze wafundzisa bafundzi bakhe kute bakwati kuwenta kahle lomsebenti wekuvuna. Lesihloko sitawudzingidza tindlela letintsatfu kuletinyenti tifundvo lesingatifundza kuloko Jesu lakufundzisa bafundzi bakhe. Sifundvo ngasinye sitawugcamisa imfanelo lemcoka kitsi njengobe sizabalaza kulomsebenti wekubutfwa kwebafundzi baKhristu esikhatsini salamuhla. Ase sihlatiye leto timfanelo ngayinye ngayinye.

Kutfobeka Kumcoka

4. Ngusiphi sibonelo lesagcizelelwa nguJesu mayelana nekutfobeka?

⁴ Cabanga nganayi indzaba leyenteka: Bafundzi baJesu bebasandza kuhhwilitisana ngekutsi ngubani lomkhulu kubo. Kungetsembani nekulambela sikhundla bekubonakala ebusweni babo. Kungakagadzi muntfu, Jesu wabita umntfwana wamletsa embikwabo. Jesu wagcamisa kakhulu buncane balomntfwana watsi: “Ngicinisile, ngitsi kini: Naningaphendvuki [nobe “nitente nibe bancane,” Byington] nibe njengebantfwana, ningeke ningene embusweni welizulu.” (Fundza Matewu 18:1-4.) Kunekutsi bacabangise kwebantfu labangakholwa, labakala imphumelelo yemuntfu ngemandla akhe ekubusa, ngebunjinga kanye nesikhundla lanaso, bafundzi baJesu bekudzingeka bati kutsi bukhulu babo bebusime ‘ekutenteni bafane nebantfwana’ kulabanye bantfu. Jehova bekatawubabusisa aphindze abanike imisebenti, kuphela nje nangabe batfobekile.

5, 6. Kungani kudzingeka kutfobeka kute sibe nencenye lenkhulu emsebentini wekuvuna bantfu? Yichaze lendzaba usebentisa lokwenteka kulomunye umzalwane.

⁵ Esikhatsini salamuhla bantfu labanyenti batinikele ekucosheni kubusa labanye, bunjinga kanye netikhundla. Umphumela waloko kutsi bagcina sebete sikhatsi sekukhonta Nkulunkulu. (Mat. 13:22) Kantsi bantfu baJehova bona, bayakutsakasela ‘kutenta bafanane nebantfwana’ kulabanye  kute batfole tibusiso nekwamukelwa ngaletimhlophe yiNkhosi yemsebenti wekuvuna bantfu.—Mat. 6:24; 2 Khor. 11:7; Fil. 3:8.

⁶ Nasi sibonelo: Francisco ukhonta njengendvodza lendzala ebandleni eveni leliseNingizimu nelivekati iMelika. Nakaselijaha, washiya phansi kufundza enyuvesi kute abe lihlahlandlela. Naku lakukhumbulako: “Ngemuva kwesikhatsi ngatsembisa lomsikati umshado. Ngaleso sikhatsi bengingawutfola umsebenti lobewutawenta ngiyihole ngelisaka imali, kujabule umfati wami. Kunekukhetsa bunjinga, sakhetsa kuphila imphilo lengabiti kute sichubeke nemsebenti wekushumayela sikhatsi sonkhe. Ngemuva kwesikhatsi lesitsite satfola bantfwana labasiletsela tinsayeya. Kodvwa Jehova wasisita sanamatsela emgomeni wetfu.” Umzalwane Francisco uyisonga ngalendlela indzaba yakhe: “Ngikutsakasele kukhonta njengalomdzala welibandla iminyaka lengetulu kwa-30, futsi ngenta naleminye imisebenti yaJehova. Asitisoli ngekukhetsa kuphila imphilo lengabiti.”

7. Wetame njani kusebentisa seluleko lesisembhalweni waRoma 12:16?

⁷ Nangabe utala tintfo ‘letiphakeme’ talomhlaba futsi uvuma kutsi ‘unebudlelwane nalabatfobekile,’ nawe ungayitfola injabulo netibusiso letinyenti kanye nelitfuba lelihle lekuba semsebentini wekuvuna bantfu.—Rom. 12:16; Mat. 4:19, 20; Luk. 18:28-30.

Kusebenta Ngekukhutsala Kuletsa Tibusiso

8, 9. (a) Ase uchaze umfanekiso waJesu wemathalenta. (b) Lomfanekiso ungakhutsata bobani?

⁸ Lenye imfanelo lokufanele sibe nayo kute sikwati kuhlanganyela ngalokuphelele emsebentini wekuvuna bantfu, kukhutsala. Jesu wenta umfanekiso lomayelana naloko ngalesikhatsi akhuluma ngemathalenta. a Lomfanekiso bowumayelana nenkhosi lokwatsi ngembikwekutsi ihambe yanika tisebenti tayo letintsatfu tintfo tayo. Sisebenti sekucala satfola emathalenta lasihlanu, sesibili sona satfola emathalenta lamabili kwatsi sesitsatfu satfola lithalenta linye. Ngemva kwaloko inkhosi yekuvuna yahamba. Sisebenti sekucala nesesibili sawasebentisa ngekutimisela lamathalenta futsi ngekushesha ‘tawatalisa.’ Ngalokwehlukile kuleti tekucala, sisebenti sesitsatfu ‘besivilapha.’ Salitsatsa lelithalenta sayolimbela. Naseyibuyile inkhosi yesivuno, yabusisa sisebenti sekucala nesesibili ‘ngekutibeka kutsi tengamele lokunyenti.’ Yatsatsa lithalenta lebeyilinike sisebenti sesitsatfu, yabese iyasicosha emtini wayo.—Mat. 25:14-30.

⁹ Akukho kungabata kutsi inhlitiyo yakho ifuna ulingise letisebenti letasebenta ngekutimisela lokukhulunywe ngato emfanekisweni waJesu. Loko kutakusita kutsi ube mdzibimunye emsebentini wekwenta bantfu babe bafundzi. Kodvwa kutsiwani nangabe kuvela timo letitakuvimbela kutsi ube nencenye  kulomsebenti? Kungenteka kutsi simo semnotfo sikucindzetela kakhulu ute ufune kusebenta sikhatsi lesidze kute ukwati kunakekela umndeni wakho. Kungenteka kutsi sewute emandla lobewunawo esikhatsini sebusha bakho futsi nemphilo yakho seyibutsakatsaka. Nangabe kunjalo, umfanekiso waJesu wemathalenta ucuketse umlayeto longakukhutsata.

10. Inkhosi yekuvuna lokukhulunywa ngayo emfanekisweni wemathalenta yakubonisa njani kucabangela, futsi kungani loku kukukhutsata?

¹⁰ Caphela kutsi lenkhosi yesivuno lesemfanekisweni waJesu wemathalenta yabona kutsi letisebenti tinemandla langafani. Loko yakubonisa ngalesikhatsi itinika lamathalenta ‘ngekwemandla ato.’ (Mat. 25:15) Njengobe bekulindzelekile, sisebenti sekucala senta lokungetulu kwaloko lokwentiwe ngulesi sesibili. Nobe kunjalo, lenkhosi yakujabulela loko lokwentiwe nguletisebenti yate yatibita ngekutsi titisebenti ‘letinhle naletetsembekile.’ Ekugcineni yatibusisa ngendlela lefananako. (Mat. 25:21, 23) NjengeNkhosi yekuvuna, Nkulunkulu Jehova uyati kutsi bumatima lesibhekana nabo buyayitsintsa indlela lesisebenta ngayo emsebentini wakhe. Angeke ehluleke kubona imetamo lesiyentako lesuka etinhlitiyweni tetfu yekumkhonta, futsi utasibusisa.—Mak. 14:3-9; fundza Lukha 21:1-4.

11. Chaza indzaba lebonisa kutsi kutimisela ngisho nobe ubhekene netimo letimatima kungaphumela ekutfoleni tibusiso letinyenti.

¹¹ Sibonelo saSelmira, dzadze longumKhristu lohlala eBrazil, sikhombisa kutsi kutimisela emsebentini waNkulunkulu akuyi ngekutsi timo tikuhambela kahle ekuphileni. Eminyakeni lengemashumi lamabili leyendlulile, indvodza yaSelmira yadutjulwa tigebengu yafa, wasala nebantfwana bakhe labatsatfu lobekufanele abakhulise. Kwadzingeka kutsi asebente emakhishini ema-awa lamanyenti futsi abehamba libanga lelidze nakaya emsebentini. Nanobe abebhekene nebumatima lobunjalo, walungisa timo takhe kute akwati kuba lihlahlandlela lelivamile. Bantfwana bakhe lababili nabo baba ngemahlahlandlela. Selmira uyachaza: “Kuleminyaka lengibe ngayo lihlahlandlela, ngifundzele bantfu labangetulu kwa-20 liBhayibheli futsi sebangemalunga emndeni wami. Kute kube ngunyalo, ngijabulela lutsandvo kanye nebungani nabo. Lona ngumcebo longeke utsengwe ngemali.” INkhosi yekuvuna yayibusisa kakhulu imetamo yaSelmira yekutimisela.

12. Singakukhombisa njani kutimisela emsebentini wekushumayela?

¹² Nangabe timo lobhekane nato ekuphileni kwakho tikuvimbela kutsi ube nesikhatsi lesinyenti emsebentini wekushumayela, ungakwati kutfutfukisa incenye loba nayo emsebentini wekuvuna ngekutsi wente indzawo loshumayela kuyo itsele. Nawusebentisa loko lokufundza eMhlanganweni Wemsebenti lobakhona maviki-onkhe, utawutfutfukisa likhono lakho lekushumayela futsi usebentise tindlela letinsha tekufundzisa. (2 Thim. 2:15) Ungaphindze wetame kuhlela timo takho ngekutsi usebentise sikhatsi lebewusisebentisela kwenta imisebenti lengakabaluleki kakhulu kute ube khona emsebentini wekushumayela nelibandla.—Khol. 4:5.

13. Yini longayenta kute uhlakulele futsi ulondvolote kutimisela emsebentini wakho wekushumayela?

¹³ Hlala ukhumbula kutsi kutimisela kusuka enhlitiyweni. (Hla. 40:8) Sisebenti sesitsatfu lokukhulunywe ngaso emfanekisweni waJesu besiyesaba inkhosi yaso, sicabanga kutsi ingumuntfu lofuna lokungetulu kwemandla aso futsi nalongacabangelani. Ngaleso sizatfu, lesisebenti salimbela lelithalenta lebesiniketwe lona esikhundleni sekutsi silitalise. Kute natsi singenti ngendlela lefananako, kufanele sihlakulele siphindze silondvolote buhlobo betfu neNkhosi yekuvuna, lenguJehova. Tinike sikhatsi sekutadisha kanye nekuzindla ngetimfanelo taJehova letinhle—lutsandvo lwakhe, kubeketela kanye neluvelo. Nawenta njalo, utawufuna kwenta lokuncono emsebentini wakhe wekushumayela.—Luk. 6:45; Fil. 1:9-11.

“Banini Ngcwele”

14. Ngutiphi tincabekelwane letibalulekile lokufanele titsatfwe ngulabo labafuna kuba tisebenti tekuvuna bantfu?

¹⁴ Acaphuna emiBhalweni yesiHebheru, umphostoli Phetro waveta injongo yaNkulunkulu ngetinceku takhe letisemhlabeni, watsi: “Njengobe lowo lonibitile angcwele, nani-ke banini ngcwele kuko konkhe kuhamba kwenu. Umbhalo utsi: ‘Banini ngcwele, ngobe nami ngingcwele.’” (1 Phet. 1:15, 16; Lev. 19:2; Dut. 18:13) Lamavi  agcizelela kutsi tisebenti tekuvuna bantfu kufanele tihlobe ngekutiphatsa kanye nasemoyeni. Singakwati kuhlangabetana naleto tincabekelwane letibalulekile ngekutsi sitsatse tinyatselo tekutsi sitigeze kute sihlobe. Singakwenta njani loko? Singakwenta ngelusito lelivi laNkulunkulu leliciniso.

15. Liciniso lelivi laNkulunkulu linemandla ekusentelani?

¹⁵ Livi laNkulunkulu leliciniso lifananiswa nemanti lanemandla ekuhlanta lokutsite. Nasi sibonelo: Umphostoli Pawula watsi libandla lemaKhristu lagcotjwe ngemoya lihlobile emehlweni aNkulunkulu. Lifanana namakoti waKhristu longenabala, logezwe ‘ngesigezo semanti, ngelivi, . . .  kute abe ngcwele futsi angabi nacala.’ (Ef. 5:25-27) NaJesu wake wakhuluma ngemandla ekuhlanta livi laNkulunkulu lelinawo, futsi waze washumayela ngalo. Ngalesikhatsi akhuluma nebafundzi bakhe, Jesu watsi: “Nine-ke senigezekile ngalelivi lesengilikhulume kini.” (Joh. 15:3) Ngako-ke, livi laNkulunkulu leliciniso linemandla ekusigeza ngakamoya nasendleleni lesitiphatsa ngayo. Nangabe sivumela liciniso lelivela kuNkulunkulu kutsi lisigeze, kukhonta kwetfu kutawemukeleka kuye.

16. Singenta njani kute sitigcine sihlobile ngakamoya nasekutiphatseni?

¹⁶ Kute semukelwe njengetisebenti tekuvuna bantfu, kwekucala kudzingeka sehlukane nekutiphatsa lokubi ekuphileni kwetfu, kungaba semoyeni nobe ngekutiphatsa. Kute sichubeke sitisebenti tekuvuna bantfu, kufanele sibe sibonelo ekugcineni timiso taJehova etindzabeni tekutiphatsa nakamoya. (Fundza 1 Phetro 1:14-16.) Njengobe sikunaka kuhloba emtimbeni, kufanele sichubeke sikwemukela kugezwa livi laNkulunkulu leliciniso. Loku kufaka ekhatsi kufundza liBhayibheli kanye nekuba khona njalo emihlanganweni yebuKhristu. Kuphindze kufake ekhatsi ngisho nekwenta imetamo letsite kute sisebentise tikhumbuto taNkulunkulu ekuphileni kwetfu. Ngekwenta njalo, sitawukwati kwehlula butsakatsaka lesinabo lobusenta sifune kwenta sono siphindze sincobe ngisho nekuhungwa tifiso letikulomhlaba. (Hla. 119:9; Jak. 1:21-25) Kuliciniso kutsi kuyasidvudvuta kwati kutsi ngelusito lelivi laNkulunkulu, singakwati ‘kugezwa’ ngisho nasetonweni.—1 Khor. 6:9-11.

17. Kute sihlale sihlobile, ngutiphi teluleko teliBhayibheli lokufanele sitilalele?

¹⁷ Uyakwemukela yini lokugezwa livi laNkulunkulu leliciniso ekuphileni kwakho? Wenta njani nangabe wecwayiswa ngetingoti letikulelive etindzabeni tekutijabulisa? (Hla. 101:3) Nangabe kute sidzingo, uyakubalekela yini kutimbandzakanya nalofundza nabo nobe losebenta nabo labangasiwo emaKhristu? (1 Khor. 15:33) Utimisele yini kufaka umfutfo kute wehlule nobe ngubuphi butsakatsaka lobungakwenta ungemukeleki kuJehova? (Khol. 3:5) Uyatehlukanisa yini netindzaba tembangalive kanye nemoya walelive logcwele kutemidlalo lamuhla?—Jak. 4:4.

18. Kutiphatsa kahle ngakamoya nasekutiphatseni kutasisita njani kutsi sitsele emsebentini wekuvuna bantfu?

¹⁸ Kwetsembeka etindzabeni letifanana naleti, kutawukuletsela imiphumela lemihle. Acatsanisa bafundzi bakhe nemagala emvini, Jesu watsi: “Onkhe emagala lakimi langatseli titselo [Babe wami] uyawajuba. Onkhe emagala latsela titselo uyawatsena, kuze atewutsela kakhulu.” (Joh. 15:2) Njengobe utiletsa kute ugezwe ngemaciniso eliBhayibheli, utawutsela titselo letinyenti.

Tibusiso Tanyalo Netesikhatsi Lesitako

19. Babusiswa njani bafundzi baJesu ngesizatfu sekufaka umfutfo emsebentini wekuvuna bantfu?

¹⁹ Bafundzi labetsembekile labavuma kuceceshwa nguJesu, kwatsi ngemuva kwesikhatsi batfola emandla ngeliPhentekhoste ngemnyaka wanga-33 C.E. Lamandla abasita kutsi babe bofakazi “kuze kube ngusekugcineni kwemhlaba.” (Imis.  1:8) Bachubeka baba ngemalunga esigungu lesibusako, titfunywa telivangeli kanye nalabadzala labajikeletako futsi baba nendzima lebalulekile ekushumayeleni tindzaba letinhle “emhlabeni wonkhe jikelele.” (Khol. 1:23) Cabanga ngetibusiso lebatitfola, nenjabulo labayiletsa kulabanye!

20. (a) Ngutiphi tibusiso lotitfolile ngekufaka sandla emsebentini wekuvuna bantfu? (b) Yini lotimisele kuyenta?

²⁰ Ngekukhombisa kutfobeka, kutimisela kanye nekugcina timiso teliVi laNkulunkulu, sitawukwati kuchubeka sijabulela kuba nencenye emsebentini lomkhulu wekuvana bantfu. Njengobe bantfu labanyenti babhekene nelusizi kanye nekukhungatseka lokuhambisana nendlela yekuphila yalelive yekutsandza umcebo, tsine sitfola injabulo sibili nekwenetiseka. (Hla. 126:6) Lokubaluleke kakhulu kutsi ‘kusebenta kwetfu akusilo lite eNkhosini.’ (1 Khor. 15:58) INkhosi yekuvuna, Nkulunkulu Jehova, utawusibusisa kute kube phakadze ngesizatfu ‘semisebenti yetfu yelutsandvo lesiyikhombisile ngelibito lakhe.’—Heb. 6:10-12.

[Umbhalo longentasi]

Usakhumbula?

Njengobe ufaka umfutfo kute wente umsebenti wekuvuna bantfu . . .

• kungani kubalulekile kutfobeka?

• ungakuhlakulela uphindze ukulondvolote njani kutimisela?

• kungani kubalulekile kutigcina uhlobile ekutiphatseni nakamoya?

[Imibuto Yesihloko Lesifundvwako]

[Sitfombe ekhasini 25]

Kutfobeka kungasisita kutsi siphile imphilo lengabiti lenamatsele etintfweni teMbuso