Umbuto Lovela Kubafundzi . . .

Nkulunkulu Unaso Yini Sicalo Semphilo?

▪ LiBhayibheli liphendvula lombuto ngekutsi chake, futsi likubeka ebaleni kutsi asikho sikhatsi labekangaphili ngaso Nkulunkulu. Kubonakala kuyinkanankana kuvisisa liciniso lekutsi Nkulunkulu bekavele akhona, kodvwa loko akusho kutsi leyo ndzaba kufanele siyijikijele ngelifasitelo.

Kunengcondvo ngelizinga lelingakanani kugadza kwati konkhe nconono ngaNkulunkulu? Umphostoli Pawula walisho lagcwala umlomo watsi: “Maye, kujula kwemcebo, nekwenhlakanipho, nekwelwati lwaNkulunkulu! Ngubani nje longaphenya kwehlulela kwakhe ahlolisise imfihlakalo yetindlela takhe? (Roma 11:33) Tingcondvo tetfu atikhoni kuvisisa kahle kujula kwekuhlakanipha nelwati ngaNkulunkulu. Loko kufanana ncamashi nemntfwana lomncane, ngobe naye angeke kwenteke ati tonkhe tintfo ngemtali wakhe. Kuliciniso kutsi lamavi labhalwa nguPawula langenhla ahlatiya kuhlakanipha nebubele baNkulunkulu. Lamavi aphindze akukhanyise kutsi kunemaciniso nemisebenti yaJehova lokungumcansa kutsi siyivisise. Indzaba yekutsi Nkulunkulu ute sicalo sekuphila ibonakala idida. Nobe kunjalo sikwetsemba ngalokugcwele lokufundziswa liBhayibheli ngaNkulunkulu. Naku lokwashiwo nguJesu Khristu ngemibhalo lengcwele: “Livi lakho liliciniso.”—Johane 17:17.

Naku lokwashiwo nguMosi nakathandaza kuJehova: “Bewuvele ukhona futsi uyohlala ukhona.” (Tihlabelelo 90:2, The Holy Bible, New Century Version) Lapha Mosi uchaza kuba khona kwaNkulunkulu ngetindlela letimbili. Yekucala ikhuluma ngesikhatsi lesitako. Jehova ‘unguloyo lophila kuze kube phakadze.’ (Sembulo 4:10) Ngako-ke, kuba khona kwaNkulunkulu kuchubeka kuze kube phakadze. Yesibili ikhuluma ngaye kusukela endvulo. Ngalamanye emagama, Nkulunkulu akazange adalwe nobe abe nesicalo sekuphila. Kunaloko, Nkulunkulu bekaloku akhona.

Lenkhulumo akusimelula kuyivisisa. Nobe kunjalo, ngaletinye tikhatsi kudzingeka kutsi siyivume imibono lesibonako kutsi akusimelula kuyicondza. Ingafaka ekhatsi emaciniso ngetinombolo letisukela ku-1 kuya etulu nobe letisukela ku-1 tiye ngephansi kwakhe. Kubala akupheli, kungaba kucala etulu nobe phansi. Lesibonelo angeke yini sisifananise neminyaka leyaphilwa nguMdali wetfu?

Kuyevakala-ke kutsi yini lebangela kutsi kube nguNkulunkulu yedvwa-vo lokutsiwa ‘yiNkhosi . . . lengabhubhi.’ (1 Thimothi 1:17) Cabanga nje: Jesu Khristu, tingilosi letinyenti ezulwini kanye nabo bonkhe bantfu emhlabeni banesicalo ngobe badalwa. (Kholose 1:15, 16) Kodvwa akunjalo ngaNkulunkulu. Kubhoka ngenkhani siloku sitsi kufanele kube Nkulunkulu wadalwa, kulite futsi angeke kusiyise ndzawo. Jehova abekhona “kusukela phakadze kuze kube phakadze.” (Tihlabelelo 90:2) Loko kusho kutsi Nkulunkulu abekhona “ngaphambi kwetikhatsi.”—Juda 25.

Khumbula kutsi indzaba yekutsi Nkulunkulu abesolo akhona, inamatsele ebufakazini lobuliciniso. Nasifakela tibuko lomthandazo waMosi, wembula kutsi Nkulunkulu longabhubhi usetsembisa kuphila lokuphakadze. Loko kwehluke kakhulu endleleni lesiphila ngayo nyalo, ngobe siphila sikhashana. Nkulunkulu uchazwa ngekutsi ‘usiphephelo setfu etitukulwaneni netitukulwane.’ NjengaBabe lonelutsandvo, Jehova uyabanakekela bantfu bakhe, futsi utawuchubeka abanakekela. Shengatsi ungatfola indvudvuto kulamaciniso lamahle kangaka.—Tihlabelelo 90:1.