Abasakwesabi Kuphela

NGASEKUPHELENI kwabo-1970, Gary kanye naKaren bebakholelwa kutsi kuphela sekusemnyango. Besuka endzaweni lesedolobheni labebahlala kuyo, bakhetsa kutisebenta. Bebafuna kusindza.

Kute bakwati kutfola emakhono labebawadzinga, batsenga tincwadzi, baya etikolweni letitsite baphindze baya nakuleminye imifundzasikolwa. Bebacoca ngisho nanebantfu labanyenti mayelana naloko labebafuna kukwenta. Balima ingadze yetibhidvo, bahlanyela netihlahla letingu-50 tetitselo. Batsenga tinhlanyelo letinyenti kanye nemathuluzi. Bafundza indlela yekulima kanye neyekugcina kudla. Umngani wabo wabafundzisa kuhlindza kanye nendlela yekomisa inyama. Karen abesakwati nekubona kudla kwasendle. Bebadla kona nabaphelelwe kudla. Gary yena wafundza kubasa umlilo ngendlela labenta ngayo emakhaya, wadzimate wakha nesitofu setinkhuni futsi wakha nendlu lesezingeni leliphansi.

Karen utsi: “Ngesizatfu sekutsi simo sasisibi kakhulu emhlabeni ngaleso sikhatsi, ngavele ngacabanga kutsi masinyane umhlaba utawubhubha.” Gary uyachaza: “Njengabo bonkhe bantfu labasha, ngangimatasatasa ngetama kucedza lubandlululo, Imphi yase-Vietnam kanye nenkhohlakalo. Kodvwa ngekushesha ngavele ngadvumala ngobe bantfu bebabonakala bangena batsi shi eweni.”

Gary utsi: “Ngalobunye busuku ngitiphumulele ngingenti lutfo, ngatsatsa liBhayibheli ngacala kulifundza kusuka kuMatewu kuya kuSembulo. Kwatsi ngemuva kwemalanga lamane,  ngaphindze ngacalela phansi kulifundza. Ngelilanga lesihlanu, naku lengakutjela Karen: ‘Siphila emalangeni ekugcina. Ngekushesha Nkulunkulu utawubhubhisa lomhlaba. Kufanele sifune labo labatawusindza.’” Gary kanye naKaren baya emasontfweni lamanyenti bafuna labo labatilungiselele kusindza nasekufike kuphela.

Ngemuva kwemalanga lambalwa, lomunye waboFakazi BaJehova wefika emtini wabo, futsi kwacaliswa sifundvo seliBhayibheli. Karen uyakhumbula: “Ngajabula kakhulu ngobe ngachazelwa kahle imiBhalo. Bengisolo ngifuna kutfola emaciniso lamayelana nekuphela, ekugcineni ngawatfola. Ngaba nelitsemba ngesikhatsi lesitako. Lokujabulisa kakhulu kutsi ngacala kuba nebuhlobo lobusedvute naBabe wami wasezulwini, uMdali longuNkulunkulu wemhlaba wonkhe.”

Gary utsi: “Kuphila kwami sekunenjongo. Ngatsi nje nasengicale kudadisha liBhayibheli, ngangingasakhoni kuyekela kulifundza. Ngafundza tiphrofetho teliBhayibheli, ngahlolisisa bufakazi lobukhombisa kutsi titawugcwaliseka yini, futsi ngacala kwetsemba kutsi masinyane Nkulunkulu utawutsatsa sinyatselo. Naku lengakucabanga: ‘Bantfu kufanele batilungiselele, hhayi kubhujiswa, kodvwa batilungiselele kutfola kuphila Nkulunkulu lafuna kutsi sibe nako.’” Gary kanye naKaren baba nembono lomuhle ngesikhatsi lesitako. Esikhundleni sekutsi bakhatsateke ngekuphela kwalomhlaba, baba nelitsemba lekutsi Nkulunkulu utawususa tinkinga letihlasela bantfu, bese wenta umhlaba uba lipharadisi.

Bamatasatasa ngani boGary naKaren nyalo, ngemuva kweminyaka lengu-25? Karen uphendvula utsi: “Angiyekeli kuchubeka ngikhulisa lutsandvo lwami nekukholwa kwami kuNkulunkulu Jehova, futsi ngetama nekusita labanye kutsi bente lokufanako. Mine kanye nendvodza yami siludvondvolo kulomunye nalomunye ekusiteni umndeni wetfu kutsi ubumbane futsi sibe munye ekukhonteni Nkulunkulu. Singumndeni lowenta tintfo ngabolonina, futsi sifaka umfutfo kute siphile imphilo lelula, sibe setama kuba lusito nakulabanye bantfu.”

Naku lokwengetwa nguGary kulendzaba: “Ngihlale njalo ngithandazela kufika kweMbuso waNkulunkulu kute utewukhulula tigidzigidzi tebantfu. Sikhatsi ngasinye nangishumayela livangeli leMbuso waNkulunkulu, ngihlale ngithandazela kutsi lokungenani munye webantfu lengicoce nabo asale atsintseke inhlitiyo ngetimfundziso teliBhayibheli. Jehova uwuphendvulile umthandazo wami kuleminyaka lengu-25 leyendlulile. Mine naKaren siyakukholelwa kutsi Jehova utawenta tingucuko letinkhulu kulomhlaba ngekucwabita kweliso, futsi kungako singasangenwa ngemanti emadvolweni nasicabanga ngekuphela.”—Matewu 6:9, 10; 2 Phetro 3:11, 12.

[Sitfombe ekhasini 9]

BoGary naKaren, bamatasatasa ngenjabulo lenkhulu basita bantfu kutsi babe nelitsemba ngemlayeto locuketfwe liBhayibheli