Bantfu Labanyenti Besabani Kangaka?
Bantfu Labanyenti Besabani Kangaka?
“Akudzingeki kutsi ube likholwa kute ubone kutsi umhlaba uzulelwa ngemangce futsi utawungena elubishini.”—STEPHEN O’LEARY PHROFESA WE-UNIVERSITY OF SOUTHERN CALIFORNIA. a
UYAVUMELANA yini nalomusho lobhalwe lapha ngenhla? Letihloko letinyenti lesitawucoca ngato, titawuchaza tizatfu letenta bantfu bangenwe ngemanti emadvolweni ngelikusasa. Titawuphindze tichaze kutsi kungani kufanele sibe nadvolocina kutsi umhlaba ngeke ubhubhe. Sinesizatfu lesicatsa lesibangela kutsi sibe nelitsemba, ngetulu kwetindzaba letingemaciniso lesisetawufundza ngato.
Kusongela kwemphi ye-nuclear kuphakamisa emaphaphu. Emnyakeni wanga-2007, magazini i-Bulletin of the Atomic Scientists wecwayisa: “Kujikijelwa kwemabhomu e-atom kwekucala ngca lokwenteka e-Hiroshima nase-Nagasaki, kwasho kucala kwetikhatsi letibucayi emhlabeni.” Yini lebangela kukhatsateka lokungaka? I-Bulletin yabika kutsi ngemnyaka wanga-2007 bekunetikhali letingu-27 000 te-nuclear, letingu-2 000 kuto “tatingachuma nome nini.” Ngisho nobe kungachuma letimbalwa kuto, umonakalo longenteka kungafihlwa emehlo!
Kusongela kwemphi ye-nuclear sekugobile yini kusukela ngaleso sikhatsi? Ngekusho Kwencwadzi Yemnyaka ye-SIPRI yanga-2009, b c emave lasihlanu labonsondonzima ekusebentiseni emandla e-nuclear—i-China, i-France, i-Russia, i-United Kingdom kanye ne-United States—“asukumise tinhlelo tetikhali te-nuclear nobe ahlongota kutisukumisa.” Lencwadzi yemnyaka ye-SIPRI ichubeka ichaze kutsi lamave lasihlanu akasiwo odvwa emave lakhe tikhali te-nuclear. Luhlolo lukhombisa kutsi emave lanjengabo India, Pakistan, kanye ne-Israel, ngalinye linemabhomu e-nuclear lacishe abengu-60 kuya ku-80. Lombiko uphindze uvete kutsi emhlabeni wonkhe jikelele kunetikhali te-nuclear letingu-8 392 letakhiwe, letisetawetfulwa ngalokusemtsetfweni.
Kugucuka kwesimo selitulu, kungaletsa inhlekelele. Magazini i-Bulletin of the Atomic Scientists utsi: “Inhlekelele lebangelwa kugucuka kwesimo selitulu, yinkhulu ngendlela lefanana nse nemonakalo lobangelwa tikhali te-nuclear.” Bososayensi labahlonishwako labafaka ekhatsi Stephen Hawking, lobekanguphrofesa eNyuvesi i-Cambridge kanye neMnumzane Martin Rees, lobekangumpetha e-Trinity College yaseNyuvesi i-Cambridge, bayavumelana naletecwayiso. Bacabanga kutsi kungasetjentiswa kahle kwetebucwephesha kanye nekugucugucuka kwendlela bantfu labaphila ngayo emhlabeni, kungayigucula imphilo futsi kuyicedze nya inhlalakahle yebantfu.
Inhlekelele lokutsiwa iyeta, iphakamisa emaphaphu etigidzi tebantfu. Bhala emavi latsi “kuphela kwemhlaba” ngemnyaka “wanga-2012” ekhelini lekuchumana le-Internet lelitsandvwa kakhulu, utawutfola kutsi manyenti emakhasi lacombelela ngekutsi kuphela kutawufika ngaloyo mnyaka. Kungani kunjalo? Ikhalenda yasendvulo ye-Maya, leyatiwa ngekutsi “Kubala Lokudze,” iphelela emnyakeni wanga-2012. Labanyenti besaba kutsi loko kusho kutsi live libawubhujiswa.
Bantfu labanyenti labaya emasontfweni bafundzisa kutsi liBhayibheli litsi lomhlaba wona phaca utawubhujiswa. Bacabanga kutsi bonkhe bantfu labatsembekile batawuya ezulwini, bese kutsi labangakalungi babhadliswe ngemlilo esihogweni.
Vele liBhayibheli litsi lomhlaba utawubhujiswa yini? Umphostoli Johane uyasecwayisa: “Ningabohambe nikholwa ngibo bonkhe bomoya, nibahlola bomoya kutsi baNkulunkulu yini.” (1 Johane 4:1) Esikhundleni sekutsi ulalele imvabetsi, kungani ungavuli liBhayibheli lakho utibonele ngewakho kutsi litsini ngekuphela kwemhlaba? Loko lelikufundzisako, kungakushiya ubambe wangephansi.
[Imibhalo lengentansi]
a Itsatfwe esihlokweni lesitsi “Kuvela Kwetinhlekelele Emhlabeni Kwenta Bantfu Bacabange Ngekugadla Kwakhukhulelangoco Wenhlekelele,” lebhalwe ku-MSNBC Web site, yanga-October 19, 2005.
b SIPRI umelela kutsi Stockholm International Peace Research Institute.
c Umbiko loseNcwadzini Yemnyaka yanga-2009 we-SIPRI lowabhalwa ngu-Shannon, longumcwaningi lomkhulu nalophetse lucwaningo lwe-SIPRI Arms Control and Non-proliferation Programme; Vitaly Fedchenko, lomunye umcwaningi losebenta e-SIPRI Arms Control and Non-proliferation Programme; kanye na-Hans M.Kristensen, umcondzisi welucwaningo lwe-nuclear we-Federation of American Scientists.
[Emavi laveta Umtfombo wesitfombe ekhasini 4]
Mushroom cloud: U.S. National Archives photo; hurricane photos: WHO/League of Red Cross and U.S. National Archives photo