Kuthula Kuyinkhomba Yekukhonta Kweliciniso

“Ngiyawunibutsisela nonkhe ndzawonye njengetimvu tibuyela esibayeni sato.”—MIK. 2:12.

1. Tintfo letidalwe nguNkulunkulu tikubonisa njani kuhlakanipha kwakhe?

 UMHLABELI washo naku ngemfutfo: “Awu, Simakadze! [Jehova]. Maye, minyenti imisebenti yakho! Yonkhe uyente ngekuhlakanipha; umhlaba ugcwele tidalwa takho.” (Hla. 104:24) Kuhlakanipha kwaNkulunkulu kuba sebaleni nawubuka tigidzigidzi tetinhlobonhlobo tetihlahla, tilokatane, tilwane kanye netilwane letibanga emagciwane letakha luhlelo lolucakile lwekuphila. Umtimba wetfu, unetimiso letinyenti letenta imisebenti lehlukahlukene. Leto timiso tenteka kusukela etitfweni letinkhulu temtimba kuze kuye emasotjeni emtimba. Umphumela wekusebentisana kwemtimba kuba ngumuntfu lophelele nalongumcemane.

2. Njengobe kubonisiwe ekhasini 16, kungani bunye belibandla lebuKhristu ngelikhulu lekucala leminyaka bebubonakala busimangaliso?

² Jehova wadala bantfu ngendlela yekutsi badzingane. Luhlanga lwebantfu lwakhiwa bantfu lababukeka ngetindlela letingafanani, labanebuntfu lobungafanani kanye nemakhono langafani. Ngetulu kwaloko, bantfu bafute nse bantfu bekucala, ngekuba netimfanelo letifanana netaNkulunkulu. Leto timfanelo tenta kube melula kutsi bantfu basebente ngekubambisana futsi ngulowo nalowo atsembele kulomunye. (Gen. 1:27; 2:18) Ngalokuphambene naloko, umhlaba wonkhe uyimphumalanga nenshonalanga naNkulunkulu, futsi uyehluleka kutsi uwonkhe ube nekuthula. (1 Joh. 5:19) Emaciniso ekutsi libandla lebuKhristu langelikhulu lekucala leminyaka lase-Efesu belakhiwa bantfu labamihibahiba, labafaka ekhatsi bantfu base-Efesu labebatigcila, emakhosikati langemaGriki ladvumile, labadvuna labangemaJuda labebatifundziswa kanye nalabebakhonta titfombe ngembikwekutsi bakholwe, abangela kutsi kubonakale kusimangaliso kuba nebunye kwawo.—Imis. 13:1; 17:4; 1 Thes. 1:9; 1 Thim. 6:1.

3. LiBhayibheli libuchaza njani bunye lobukhona kumaKhristu, futsi yini lesitayidzingidza kulesihloko?

³ Kukhonta kweliciniso kubangela kutsi bantfu babambisane ngendlela umtimba wemuntfu lobambisana ngayo. (Fundza 1 Khorinte 12:12, 13.) Letinye tingoni lesitawutihlola kulesihloko ngunati: Kukhonta kweliciniso kubenta njani bantfu kutsi babe munye? Kungani kunguJehova kuphela longakhona kubumba bantfu labatigidzi labachamuka etiveni tonkhe babe munye? Ngutiphi tingibe letisongela kuthula Jehova lasisita kutsi sitengame? Endzabeni yekuthula, ukhona yini umehluko emkhatsini wemaKhristu eliciniso kanye nemaKhristu Mbumbulu.

Kukhonta Kweliciniso Kubakha Njani Bunye Kubantfu?

4. Kukhonta kweliciniso kubenta njani bantfu kutsi babe nebunye?

⁴ Bantfu labamatasatasa ngekukhonta ngeliciniso bayati kutsi nguJehova lowadala tonkhe tintfo, unguMbusi wendzawo yonkhe. (Semb. 4:11) Akuwatsatsi mkhuba emaKhristu eliciniso kuphila ngemitsetfo yaNkulunkulu kanye netimiso teliBhayibheli, nanobe aphila emimangweni leminyenti nasetimeni letingafani. Onkhe emaKhristu eliciniso asebentisa sicu saJehova lesitsi “Babe” nakakhuluma naye. (Isa. 64:8; Mat. 6:9) Kungako babazalwane futsi bajabulela bunye lobumangalisako lobachazwa ngumhlabeli, nakatsi: “Maye, kuhle kumnandzi kuhlalisana kwebazalwane ngekuvana.”—Hla. 133:1.

5. Nguyiphi imfanelo lefaka sandla ebunyeni ekukhonteni kweliciniso?

⁵ Nanobe emaKhristu eliciniso anesono,  akhonta Nkulunkulu ndzawonye ngebunye ngobe afundziswe kutsandzana. NguJehova lowafundzisa kutsi atsandzane kulomunye nalomunye. (Fundza 1 Johane 4:7, 8.) LiVi lakhe litsi: “Ngako-ke njengebantfu labakhetsiwe baNkulunkulu, labangcwele nalabatsandzekako, yembatsani bubele benhlitiyo, nesisa, nekutitfoba, nebumnene, nekucinisela. Nibeketelelane, nitsetselelane, nangabe umuntfu akhube lomunye; ngobe phela neNkhosi yanitsetselela, nani-ke yentani njalo. Kodvwa ngetulu kwako konkhe loko yembatsani lutsandvo, lolusibopho sekuphelela.” (Khol. 3:12-14) Lesibopho sebunye—lutsandvo—luyimfanelo leyinhloko yekubona emaKhristu eliciniso. Wena ngekwakho, ububonile yini bunye lobuluphawu lolwehlukanisa kukhonta kweliciniso?—Joh. 13:35.

6. Litsemba ngeMbuso waNkulunkulu lisisita njani kutsi sibe nebunye?

⁶ Lesinye sizatfu lesenta kutsi emaKhristu eliciniso abe nebunye, kwetsembela kwawo ngalokugcwele eMbusweni waNkulunkulu njengelitsemba lebantfu bonkhe. Ayati kutsi masinyane uMbuso waNkulunkulu utawususa bonkhe bohulumende bebantfu. Ngetulu kwaloko, utawubusisa bonkhe bantfu labalalelako ngekuthula lokuyohlala njalo. (Isa. 11:4-9; Dan. 2:44) Loko kungumphumela wekutsi emaKhristu ayakulalela lokwashiwo nguJesu ngebalandzeli bakhe, nakatsi: “Njengobe nami ngingesiye walelive, nabo abasibo balelive.” (Joh. 17:16) EmaKhristu eliciniso akatimbandzakanyi netimphikiswane talapha emhlabeni. Kungako-ke anekuthula nanobe akakwe bantfu lababambene ngetihlutfu.

Umtfombo Loyinhloko Weticondziso Takamoya

7, 8. Ticondziso letisemiBhalweni tisifaka njani sandla ekusenteni sibe munye?

⁷ EmaKhristu angelikhulu lekucala leminyaka abejabulela bunye ngobe onkhe abetfola sikhutsato lesivela emtfonjeni lofanako. Abecaphela kutsi Jesu abefundzisa futsi acondzisa libandla asebentisa sigungu lesibusako, lesasihlanganisa baphostoli kanye nemadvodza lamadzala aseJerusalema. Lamadvodza latinikele, tincumo tawo tatinamatsela kuloko lokushiwo liVi laNkulunkulu. Kwakuphindze kube nebabonisi labajikeletako labebasakata leto ticondziso emabandleni lamanyenti. LiBhayibheli nalikhuluma ngalabo babonisi, litsi: “Basahamba badzabula emadolobheni batjela emakholwa tincumo letemiswa baphostoli nebabonisi lababeseJerusalema kutsi batigcine.”—Imis. 15:6, 19-22; 16:4.

⁸ Nalamuhla Sigungu Lesibusako sakhiwa ngemaKhristu lagcotjwe ngemoya lafaka sandla ebunyeni bemhlaba wonkhe emabandleni. Sigungu Lesibusako sishicilela tincwadzi letikhutsatako takamoya ngetilwimi letinyenti. Letincwadzi tinamatsele eVini laNkulunkulu. Ngako-ke, loko lokufundziswa nguletincwadzi akuveli kubantfu kodvwa kuvela kuJehova.—Isa. 54:13.

9. Umsebenti lesiwuniketwe nguNkulunkulu, usisita njani kutsi sibumbane?

⁹ Babonisi labangemaKhristu baphindze batfutfukise bunye ngekutsi bahambe embili emsebentini wekushumayela. Budlelwane balabo labasebenta ngekubambisana emsebentini waNkulunkulu, bucine nko kwendlula budlelwane bantfu lababa nabo kulelive lesiphila kulo. Libandla  lebuKhristu alisiyo nje indzawo yekutijabulisa, kodvwa lasungulwa ngenjongo yekutsi sidvumise Jehova futsi sente nemsebenti wekushumayela tindzaba letinhle, sente bafundzi siphindze sakhe ngisho nalamanye emabandla. (Rom. 1:11, 12; 1 Thes. 5:11; Heb. 10:24, 25) Kungaleso sizatfu umphostoli Pawula asho nankha emavi ngemaKhristu, watsi: “Nime nicinile emoyeni munye, kukholwa liVangeli nikulwele ngebunye.”—Fil. 1:27.

10. Ngutiphi letinye tindlela letisenta sibe munye njengebantfu baNkulunkulu?

¹⁰ Njengebantfu baJehova, simunye ngesizatfu sekutsi semukela buKhosi bakhe. Sitsandza bazalwane betfu, sinelitsemba eMbusweni waNkulunkulu futsi siyabahlonipha labo labasebentisako kute bahole emabandla. Jehova uyasisita kute silwisane netimo letisongela bunye betfu njengobe sibantfu labanesono.—Rom. 12:2.

Indlela Yekulwisana Nekutigabatisa Nemona

11. Kungani kutigabatisa kubehlukanisa bantfu, futsi Jehova usisita njani kute sikwati kulwisana nako?

¹¹ Kutigabatisa, kuyabehlukanisa bantfu. Umuntfu lotigabatisako, utikhandza ancono kunalabanye futsi uvamise kujabula ngekutichayisa kwakhe. Kodvwa kwenta njalo kubangela kutsi bantfu bangabi nebunye. Labo lababona kutichayisa kwaloyo muntfu, bangahle babe nemona. Umfundzi longuJakobe usitjela ngemusa utsi: “Konkhe kutigabatisa lokunjalo kubi.” (Jak. 4:16) Usuke ute lutsandvo nangabe uphatsa labanye shengatsi batintfo letingenamsebenti. Kuyajabulisa kutsi Jehova usibonelo lesihamba embili semuntfu lotehlisako njengobe asebentelana nebantfu labanesono. Davide wabhala: “Utehlisa wena [Nkulunkulu] kuze uphakamise mine.” (2 Sam. 22:36) LiVi laNkulunkulu lisisita kutsi sincobe kutigabatisa ngekusifundzisa kutsi sicabange ngendlela lefanele. Pawula waphefumulelwa kutsi abute nansi imibuto: “Vele kambe ngubani lokwenta ube ncono kunalabanye? Yini lonayo longazange uyiphiwe? Nangabe-ke waphiwa, utigabatiselani wente shangatsi awuzange uphiwe?”—1 Khor. 4:7.

12, 13. (a) Kungani kuyintfo lemelula ngatsi kutsi sibe nemona? (b) Uba yini umphumela nangabe silingisa Jehova ekusebentelaneni kwetfu nalabanye?

¹² Umona nawo ungulomunye umcabo lobangela kutsi sibete bunye. Ngesizatfu sekutsi sinesono, sonkhe “sinemkhuba wekuba nemona.” Ngisho nemaKhristu asendvulo kusenekwenteka kutsi bekaba nawo umona ngetimo letitsite letifaka ekhatsi kuba nemona ngaloko labanye labebanako, imisebenti yabo nobe emakhono labebanawo. (Jak. 4:5, NW) Nasi sibonelo kulendzaba: Umzalwane loshadile lonebantfwana, angaba nemona ngemsebenti lomuhle lowentiwa sikhonti sesikhatsi sonkhe emsebentini wekushumayela. Ngakulolunye luhlangotsi, sikhonti sesikhatsi sonkhe naso singaba nemona ngemzalwane loshadile lonebantfwana. Singawuvimbela njani umona lofanana nalona ekonakaliseni bunye lesinabo?

¹³ Kute sibalekele umona, kufanele sikhumbule kutsi liBhayibheli lifananisa emalunga lagcotjwe ngemoya elibandla lebuKhristu nemalunga emtimba wemuntfu. (Fundza 1 Khorinte 12:14-18.) Nanobe liso lingulelinye lilunga lemtimba lelibonakala ngemehlo, loko akusho kutsi libaluleke kwendlula inhlitiyo. Ngendlela lefananako, Jehova uwatsatsa njengalawo labalulekile onkhe emalunga elibandla, nanobe lamanye angabonakala shengatsi avelele kunalamanye. Shengatsi natsi singaba nembono lofanana newaJehova ngemaKhristu lesikanye nawo. Esikhundleni sekutsi sibe nemona ngawo, singawakhombisa kutsi siyawatsandza futsi siwabonise lolo tsandvo. Nangabe senta njalo, sitawube sifaka sandla ekwenteni umehluko emkhatsini  wemaKhristu eliciniso kanye nemaKhristu Mbumbulu.

EmaKhristu Mbumbulu—Abonakala Ngekwehlukana

14, 15. Inkholo yalabo labahlubuka enkholweni yebuKhristu, yehlukana njani?

¹⁴ Bunye bemaKhristu eliciniso, buhluke kakhulu ekucabaneni lokwenteka kumaKhristu Mbumbulu. Ngelikhulu lesine leminyaka, inkholo yalabo labahlubuke enkholweni yebuKhristu beyandze kakhulu ngobe umbusi waseRoma lolicaba wacala kuyilawula, futsi loko kwaholela ekutseni kube nemaKhristu Mbumbulu. Ngemva kwaloko, imibuso leminyenti yehlukana neRoma yase icala emasontfo lamasha emaVeni ayo.

¹⁵ Emakhulwini eminyaka leyendlulile, leyo mibuso beyiloku ilwa yodvwana. Ekhatsi nelikhulu leminyaka lesi-17 kuya ku-18, bantfu baseBritain, eFrance kanye nase-United States, batinikela ngalokuphelele emaVeni abo kuze buve babo bufanane nenkholo. Nasekhatsi kwelikhulu leminyaka lesi-19 kuya ekhulwini leminyaka lesi-20, kubandlulula ngebuve kwacala kulawula indlela bantfu labacabanga ngayo. Ekugcineni, emasontfo emaKhristu emanga ehlukana aba tinhlelo letehlukene, lamanyenti kuwo abekuvumela kubandlulula ngebuve. Bantfu bemasontfo, bebadzimate baye nasemphini kuze balwe nalabo labakholwa nabo, labangulesinye sive labahlala kulamanye emave. Nalamuhla, emaKhristu Mbumbulu ehlukene aba tinkholo letehlukene letinetimfundziso letingafanani kanye nebuve.

16. Ngutiphi tinkinga letehlukanisa emaKhristu Mbumbulu?

¹⁶ Ngelikhulu leminyaka lesi-20, lamanye emacembu emaKhristu Mbumbulu lamanyenti acala lolunye luhlelo kute kube nebunye emkhatsini wawo. Kodvwa ngemuva kweminyaka leminyenti, ambalwa emasontfo labumbana. Bantfu labasontsako solo basehlukaniswe ngimibuto lemayelana nekutigucukela kwemvelo, kukhipha sisu, naleminye lemayelana netitabani kanye nekuba bafundisi kwebantfu labasikati. Kuletinye tindzawo bafundisi betama kuletsa bantfu bakulamanye emacembu ngekutsi bangafundzisi ngaloko lokubente bahlukana. Kodvwa kwenta kwabo njalo, kushiye bantfu babutsakatsaka ekukholweni futsi loko akuzange kubente babe nebunye bantfu labangemaKhristu Mbumbulu.

Tikhonti Teliciniso Atibandlululani Ngebuve

17. Kukhonta kwelicinso kutawubahlanganisa njani bantfu “ngemalanga ekugcina”?

¹⁷ Nanobe bantfu lamuhla bahlukane kakhulu, bunye seloku bukhona etikhonti teliciniso. Umphrofethi waNkulunkulu Mikha washo nankha emavi ngalendzaba: “Ngiyawunibutsela nonkhe ndzawonye njengetimvu tibuyela esibayeni sato.” (Mik. 2:12) Mikha watsi kukhonta kweliciniso kutawandza kwendlula tonkhe tindlela tekukhonta, letifaka ekhatsi kukhonta bonkulunkulu bemanga nobe kukhonta Sive lesitsite njengankulunkulu. Waphindze wabhala watsi: “Ngemalanga ekugcina intsaba yelithempeli laSimakadze [Jehova] iyawucina, ibe ngulephakeme kwendlula tonkhe tintsaba; iyawuphakanyiswa ibe ngetulu kwemagcuma, tive letinyenti tiyawubekelela tiye kuyo tingasakhawuli. Tonkhe tive tikhonta tihloniphe bonkulunkulu bato, kodvwa tsine siyawukhonta  Simakadze Nkulunkulu wetfu.”—Mik. 4:1, 5.

18. Kukhonta kweliciniso kusisite kutsi sente luphi lushintjo?

¹⁸ Mikha waphindze wachaza indlela kukhonta kweliciniso lokutawakha ngayo bunye kulabo bebatitsa. Watsi: “Tive [bantfu] letinyenti tiyawufika titsi: ‘Wotani, senyukele entsabeni yaSimakadze, endlini yaNkulunkulu waJakobe. Utasifundzisa tindlela takhe, khona sitewuhamba emikhondvweni yakhe.’ . . . Tona-ke tiyawukhandza tinkemba tato, titente tibe ngemakhuba, tikhali tato tibe tikelo tekutsena tihlahla. Sive singeke sihlasele lesinye ngenkemba, futsi tive tingeke tisaceceshelwa kulwa imphi.” (Mik. 4:2, 3) Labo labangabakhonti bonkulunkulu labentiwe bantfu nobe sive sabo kute bakhonte Jehova ngebunye, Nkulunkulu ubacondzisa ngelutsandvo.

19. Kubutselwa ndzawonye kwetigidzi tebantfu ekukhonteni kweliciniso, kubufakazi bani?

¹⁹ Bunye bemhlaba wonkhe lobukhona kumaKhristu eliciniso alamuhla abukavami, futsi loku kubufakazi bekutsi Jehova uyachubeka acondzisa bantfu bakhe ngemoya wakhe. Sibalo sebantfu lababutselwa ndzawonye lamuhla labaphuma emaveni lamanyenti sikhule kakhulu ngendlela lengakaze yenteke esikhatsini lesendlulile. Loku kuhlobene nekugcwaliseka kwesiphrofetho lesimangalisako lesitfolakala encwadzini yeSembulo 7:9, 14, lesibonisa kutsi ngekushesha Nkulunkulu utawukhulula “imimoya” letawubhubhisa bantfu lababi. (Fundza Sembulo 7:1-4, 9, 10, 14.) Akusijabulisi yini kuba nebunye nebazalwane bemhlaba wonkhe? Yini ngamunye wetfu lokufanele ayente kute abe nencenye ekwakheni bunye? Sitawucoca ngaloko esihlokweni lesilandzelako.

Itsini Imphendvulo Yakho Kulemibuto?

• Kukhonta kweliciniso kubenta njani bantfu kutsi babumbane?

• Singawuvimbela njani umona ekutseni wonakalise bunye lesinabo?

• Kungani kubandlululana ngebuve kungawehlukanisi emaKhristu eliciniso?

[Imibuto Yesihloko Lesifundvwako]

[Sitfombe ekhasini 16]

EmaKhristu angelikhulu lekucala leminyaka abevela etindzaweni letingafanani

[Titfombe ekhasini 18]

Kusita kwakho ekwakhiweni kwemaHholwa eMbuso kusifaka njani sandla ekubeni nebunye?