Umholi Wetfu Lamuhla

“Wahamba ancoba, ayawuncoba.”—SEMB. 6:2.

1, 2. (a) LiBhayibheli likuchaza njani kubusa kwaKhristu njengenkhosi kusukela ngemnyaka wanga-1914? (b) Kusukela abekwa esihlalweni sebukhosi, ngutiphi tinyatselo Khristu latitsetse?

 NGEMNYAKA wanga-1914, Khristu wabekwa njengeNkhosi yaJehova yeMbuso webuMesiya. Ngemehlo engcondvo, simbona anjani Jesu? Simbona njengenkhosi lehleti esihlalweni sebukhosi lenomako yini? Nome simbona njengenkhosi lebuke njo emhlabeni kute abone kutsi libandla lakhe lenta kahle yini? Nangabe sicabanga njalo, sikhe phansi sayishiya eludziweni. Incwadzi yeTihlabelelo kanye neyeSembulo, imchaza njengenkhosi lenemandla legibele lihhashi ‘lehamba incoba, futsi iyawuncoba,’ itawuchubeka kuze kube ngusekugcineni ‘incoba.’—Semb. 6:2; Hla. 2:6-9; 45:1-4.

² Kwatsi nje ngemuva kwekuba asabekiwe kutsi abe yinkhosi, Khristu wancoba kwekucala ngca ngalesikhatsi ehlula ‘nyokangwenya netingilosi takhe.’ Njengengilosi lenkhulu, Mikhayeli lowengamele tonkhe tingilosi, wamjikijela phansi Sathane kanye netingilosi takhe. Wamkhipha ezulwini wamlahlela phansi emhlabeni. (Semb. 12:7-9) Emsebentini wakhe ‘njengesitfunywa sesivumelwane’ saJehova, Jesu weta kanye nababe wakhe kute batewuhlola lithempeli lakamoya. (Mal. 3:1) Wehlulela emaKhristu Mbumbulu, lafananiswa ‘neBhabhulona lenkhulu,’ wawatfola anelicala lengati futsi agwadla ngakamoya ngekutimbandzakanya etindzabeni tepolitiki.—Semb. 18:2, 3, 24.

Khristu Uhlanta Tinceku Takhe Tasemhlabeni

3, 4. (a) Ngumuphi umsebenti Khristu lawufeza ‘njengesitfunywa’ saJehova? (b) Ngalesikhatsi kuhlolwa lithempeli, yini leyaba sebaleni, futsi njengeNhloko yelibandla Jesu ubeke bobani kutsi balinakekele?

³ Luhlolo lolwentiwa nguJehova kanye ‘nesitfunywa  sakhe,’ lwaphindze lwakhombisa kutsi emagcekeni asemhlabeni alelithempeli lakamoya, kunelicembu lemaKhristu eliciniso. LamaKhristu eliciniso akasiyo nakancane incenye yemaKhristu Mbumbulu. Nobe kunjalo, ngisho nawo lamaKhristu lagcotjwe ngemoya, nobe ‘emadvodzana emaLevi,’ kwakufanele ahlantwe. Kwakufanana ncamashi naloko lokwashiwo ngumphrofethi Malakhi, nakatsi: “Uyawuhlala [Jehova] njengemcengi nanjengemhlanti wesiliva; uyawuhlanta emaLevi awacenge njengegolide nesiliva. Simakadze uyawuba nemadvodza layawuletsa iminikelo ngekulunga.” (Mal. 3:3) Jehova wasebentisa “sitfunywa sesivumelwane,” Jesu Khristu, kute ahlante Israyeli wakamoya.

⁴ Khristu wakhandza kutsi lamaKhristu latsembekile lagcotjwe ngemoya, enta konkhe lokusemandleni kute anikete bantfu kudla kwakamoya. Kusukela ngemnyaka wanga-1879 kuchubeke, kumnyama kubovu bebaloku bakhipha emaciniso eliBhayibheli lamayelana neMbuso waNkulunkulu kulomagazini. Jesu waphrofetha kutsi ‘nakefika,’ utawuhlola bendlu yakhe ngesikhatsi “sekuphela kwetikhatsi.” Bekatawukhandza kutsi lesisebenti sibapha “kudla ngesikhatsi lesifanele.” Utawutsi siyajabula leso sisebenti futsi ‘utawusimisa ngetulu kwako konkhe lanako’ emhlabeni. (Mat. 24:3, 45-47) Njengenhloko yelibandla lebuKhristu, Khristu usebentisa ‘sisebenti lesetsembekile’ kute sengamele tindzaba letiphatselene neMbuso emhlabeni. Uniketa ‘bendlu’ yakhe kanye ‘naletinye timvu’ ticondziso asebentisa Sigungu Lesibusako.—Joh. 10:16.

Sikhatsi Sekuvuna

5. Embonweni lowabonwa ngumphostoli Johane, yini labona Mesiya ayenta?

⁵ Umphostoli Johane wabona umbono walokunye inkhosi Mesiya leyayitakwenta “ngelilanga leNkhosi,” ngemuva nje kwekuba seyibekiwe esihlalweni sebukhosi nga-1914. Johane wabhala: “Ngase ngibona lifu lelimhlophe, lona bekahleti etikwalo afanana neNdvodzana yemuntfu, anemchele wegolide enhloko yakhe, ngesandla sakhe aphetse lisikela lelikhaliphako.” (Semb. 1:10; 14:14) Johane weva ingilosi lebuya kuJehova itjela lomVuni kutsi aletsembe lelisikela lakhe ngobe “sikhatsi sekuvuna sesifikile.”—Semb. 14:15, 16.

6. Yini Jesu latsi itawuvela njengobe sikhatsi sichubeka?

⁶ “Sikhatsi sekuvuna” sisikhumbuta umfanekiso waJesu wemabele nelukhula. Jesu watifananisa nendvodza leyahlanyela ensimini yayo emabele inelitsemba lekutsi itawushaya inala yemabele, lemelela “bantfwana bembuso,” lokungemaKhristu lagcotjwe ngemoya latawubusa naye eMbusweni wakhe. Kodvwa kwatsi ekhatsi nebusuku, sitsa ‘lesinguDeveli,’ sahlanyela lukhula emkhatsini walamabele, lolumelela “bantfwana baLomubi.” Umhlanyeli watjela tisebenti takhe kutsi tiwayekele lamabele akhule ndzawonye nalolukhula kudzimate kufike sikhatsi sekuvuna, lokusikhatsi “sekuphela kwelive.” Ngaleso sikhatsi, utawutfumela tingilosi takhe kute titewehlukanisa emabele kulolukhula.—Mat. 13:24-30, 36-41.

7. Wasisebentisa njani Khristu “sikhatsi sekuvuna”?

 ⁷ Ngalesikhatsi kugcwaliseke umbono waJohane, Jesu abesolo enta umsebenti wekuvuna wemhlaba wonkhe. “Sikhatsi sekuvuna” sacala ngalesikhatsi kubutfwa labo labangu-144 000 labasasele emhlabeni ‘lababantfwana bembuso,’ Jesu lakhuluma ngabo emfanekisweni wakhe ‘wemabele.’ Umehluko losemkhatsini wemaKhristu eliciniso newemanga, wabonakala kahle ngemuva kwemphi yeKucala yeMhlaba wonkhe. Loko kwaholela encenyeni yesibili ‘yesikhatsi sekuvuna’—kubutfwa kwalabo labatimvu. Laba abasibo “bantfwana bembuso,” kodvwa ‘basicumbi lesikhulu’ lesingaphansi kwalowo Mbuso. Bavunwe ‘emaveni onkhe, nasetilwimini tonkhe.’ Batitfoba ngephansi kweMbuso waMesiya, lowakhiwa nguKhristu Jesu kanye nalabo labangu-144 000 “labangcwele” labayawuhlangana naye kuhulumende wasezulwini.—Semb. 7:9, 10; Dan. 7:13, 14, 18.

Kuholwa Kwemabandla

8, 9. (a) Yini lekhombisa kutsi Khristu akagcini ngekubuka kutiphatsa kwelibandla, kodvwa uphindze abuke kutiphatsa kwelilunga ngalinye? (b) Njengobe sifundzile ekhasini 29, ngutiphi “tintfo letijulile taSathane” lokufanele sitigweme?

⁸ Njengobe sifundzile esihlokweni lesendlulile, Khristu wasibona simo sakamoya semabandla elikhulu lekucala leminyaka C.E. Nalamuhla, njengeNkhosi lebusako ‘lenemandla ezulwini nasemhlabeni,’ Khristu uMholi wetfu unemandla etikwawo onkhe emabandla nakubabonisi bawo. (Mat. 28:18; Khol. 1:18) Jehova umbeke “kutsi abe yinhloko etikwako konkhe ebandleni” lalabagcotjwe ngemoya. (Ef. 1:22) Njengenhloko yelibandla, ubona konkhe lokwenteka emabandleni langetulu kwalangu-100 000, aboFakazi BaJehova.

⁹ Nangu umlayeto Jesu lawutfumela ebandleni laseThiyathira: “Nali livi leliphuma kuye loyiNdvodzana yaNkulunkulu, lonemehlo lavutsako kube shangatsi ngemalangabi emlilo, . . . Ngiyayati imisebenti yakho.” (Semb. 2:18, 19) Jesu wekhuta emalunga alelo bandla ngekutiphatsa kabi kwawo nangekutsandza umcebo, watsi: “Nginguye lophenyisisa ingcondvo nenhlitiyo. Ngulowo nalowo emkhatsini wenu ngiyawumnika njengekwemisebenti yakhe.” (Semb. 2:23) Lenkhulumo ibonisa kutsi Khristu akagcini ngekubuka kutiphatsa kwelibandla, kodvwa ubuka nendlela lilunga ngalinye lelitiphatsa ngayo. Jesu wawabonga emaKhristu aseThiyathira ‘langazange atifundze tintfo “letijulile taSathane.”’ (Semb. 2:24) Nalamuhla, Khristu wemukela labancane nalabadzala labayekela kufundza “tintfo letijulile taSathane,” letifaka ekhatsi emakheli ekuchumana e-Internet, imidlalo yema-video nobe kutijabulisa ngetintfo letingakalungi. Ujabula kakhulu ngekubona imetamo kanye nekutikhandla lamanye emaKhristu lakwentako lamuhla kute alingise sibonelo sakhe ekuphileni kwawo.

10. Kucondzisa kwaKhristu asebentisa emadvodza lamadzala elibandla, kuchazwa njani, futsi yini lokufanele ayicaphele?

¹⁰ Khristu uniketa ticondziso letibonisa lutsandvo emabandleni akhe lalapha emhlabeni asebentisa emadvodza lamadzala. (Ef. 4:8, 11, 12) Ekhulwini lekucala leminyaka, bonkhe babonisi bebagcotjwe ngemoya longcwele Sembulo sabafananisa netinkhanyeti letisesandleni saKhristu sangesekudla. (Semb. 1:16, 20) Emabandleni lamanyenti lamuhla, emadvodza lamadzala labekiwe akhiwa nguletinye timvu. Kodvwa abekwa ngemuva kwekuba kuthandaziwe futsi kwalandzelwa sicondziso semoya longcwele. Ngako-ke, nabo baba ngephansi kwesicondziso saKhristu nobe esandleni sakhe lesicondzisako. (Imis. 20:28) Ayacaphela kutsi Khristu usebentisa licembu lelincane lemaKhristu lagcotjwe ngemoya lakha Sigungu Lesibusako kute ahole futsi acondzise bafundzi bakhe labasemhlabeni.—Fundza Imisebenti 15:6, 28-30.

“Kota, Nkhosi Jesu”

11. Kungani sinemdlandla wekubona uMholi wetfu?

¹¹ Sembulo lesaniketwa umphostoli Johane, kanyenti sitsi, Jesu uyeta masinyane. (Semb. 2:16; 3:11; 22:7, 20) Akusimangalisi kutsi abesho  kutsi uyeta atewukhipha sehlulelo eBhabhulona Lenkhulu nakulelive lelibuswa nguSathane. (2 Thes. 1:7, 8) Anelilukuluku lekubona tonkhe letiphrofetho letimangalisako tigcwaliseka, umphrofethi Johane wababata watsi: “Amen! Kota, Nkhosi Jesu!” Natsi siphila esikhatsini sekuphela futsi silindzele ngalabovu kubona uMholi wetfu loyiNkhosi efika eMbusweni wakhe kute atewugcwelisa libito laBabe wakhe futsi advumise bukhosi bakhe.

12. Ngumuphi umsebenti Khristu latawucedzela ngembikwekuba umoya wekubhujiswa ukhululwe?

¹² Ngembikwekuba Jesu abhubhise inhlangano yaSathane lebonakalako, emalunga ekugcina alabo labangu-144 000 a-Israyeli wakamoya kufanele abekwe luphawu kucala. LiBhayibheli litsi umoya wekubhubhisa live laSathane angeke ukhululwe usengakacedvwa umsebenti wekubeka labo labangu-144 000 luphawu.—Semb. 7:1-4.

13. Yini letawentiwa nguKhristu esiwombeni sekucala ‘sekuhlupheka lokukhulu’ ngesikhatsi sekubuya kwakhe?

¹³ “Kubuya” kwaKhristu bekuloku kubonakala kubantfu labanyenti emhlabeni kusukela ngemnyaka wanga-1914. (2 Phet. 3:3, 4) Masinyane, utakwenta kubuya kwakhe kuvakale kakhulu ngekukhipha tigwebo taJehova atibhekise etincenyeni letehlukahlukene telive lelibuswa nguSathane. Kubhujiswa ‘kwemuntfu longenamtsetfo,’ lokubafundisi bemaKhristu Mbumbulu, akubutwa kutsi kuyawuba ‘kubonakala kwenkhatimulo yekufika kwakhe.’ (Fundza 2 Thesalonika 2:3, 8.) Loko kuyawuniketa bufakazi lobukhanyako bekutsi Khristu uLijaji lelibekwe nguJehova. (Fundza 2 Thimothi 4:1.) Kucotfulwa kwencenye lenkhulu yeBhabhulona Lenkhulu kutawendvulela kubhujiswa kwelive lelilawulwa nguSathane, lokungumbuso wenkholo yemanga. Jehova utawubangela baholi betepolitiki kutsi bayibulale lengwadla. (Semb. 17:15-18) Loko kuyawuba siwombe sekucala ‘sekuhlupheka lokukhulu.’—Mat. 24:21.

14. (a) Ngusiphi sizatfu lesiyawubangela kutsi emalanga ekuhlupheka lokukhulu ancishiswe? (b) ‘Kubonakala kwesibonakaliso seNdvodzana yeMuntfu’ kutawusho kutsini kubantfu baJehova?

¹⁴ Jesu watsi emalanga ekuhlupheka lokukhulu ayawuncishiswa ‘ngenca yalabakhetsiwe,’ lokungemaKhristu lasasele emhlabeni kulawo lagcotjwe ngemoya. (Mat. 24:22) Jehova angeke akuvumele kutsi kubhujiswa kwenkholo yemanga kutsintse ngisho nemaKhristu lagcotjwe ngemoya nebangani bawo, lokunguletinye timvu. Lokunye lokwashiwo nguJesu kutsi “emvakwaleto tinhlupheko,” kuyawuba khona tibonakaliso elangeni, enyangeni nasetinkhanyetini. Kuyawutsi ngemuva kwaloko ‘iNdvodzana yeMuntfu ibonakale ita ngelifu.’ “Tonkhe tive temhlaba tiyawukhala” natibona leto tentakalo. Ngaleso sikhatsi, emaKhristu lanematsemba ekuphila ezulwini kanye nebangani bawo, batawube bakhululekile. Lawo maKhristu ‘ayawusukuma aphakamise tinhloko tawo, ngobe insindziso yawo iyawube isedvutane.’—Mat. 24:29, 30; Luk. 21:25-28.

15. Khristu utawenta muphi umsebenti nakabuya?

¹⁵ Ngembikwekutsi isonge kuncoba kwayo, iNdvodzana yemuntfu itawuta ngalenye futsi indlela. Khristu lucobo lwakhe waphrofetha watsi: “INdvodzana yeMuntfu nayita ngenkhatimulo yayo netingilosi tayo tonkhe, iyawuhlala esihlalweni sayo sebukhosi, tonkhe tive temhlaba tiyawubutselwa embikwayo. Iyawubehlukanisa labanye kulabanye, njengemelusi ehlukanisa timvu netimbuti. Iyawumisa timvu ngesekudla sayo, netimbuti ngesancele.” (Mat. 25:31-33) Loluhlobo lekuta laKhristu lisho kuta  kwakhe njengeLijaji lelitawehlukanisa bantfu bato “tonkhe tive” babe ticheme letimbili: “timvu,” lokungemaKhristu latawube asekele bomnakabo labagcotjwe ngemoya, (emaKhristu lagcotjiwe layawube asemhlabeni ngaleso sikhatsi) kanye ‘netimbuti,’ labo ‘labangalaleli liVangeli leNkhosi yetfu Jesu.’ (2 Thes. 1:7, 8) Bantfu ‘labatimvu,’ labachazwa ngekutsi “ngulabo labalungile,” labayawuniketwa “kuphila lokuphakadze,” bese kutsi labo labafanana netimbuti bona “bahambe baye ekujezisweni” nobe ekubhujisweni.—Mat. 25:34, 40, 41, 45, 46.

Khristu Uphotfula Kuncoba Kwakhe

16. Umholi wetfu Khristu utakucedzela nini nconono kuncoba kwakhe?

¹⁶ Ngemuva kwekutsi linani lalabo lababekwe luphawu lekuba ngemakhosi nebaphristi futsi nalabatimvu sebavelile, base babangephansi kwekuvikelwa nguye, Khristu ‘uyawuhamba ancoba, ayoncoba.’ (Semb. 5:9, 10; 6:2) Akukho kungabata kutsi libutfo laKhristu leliholwa tingilosi letibomnkantjubovu, letihambisana nabomnakabo labayawube sebavusiwe, batamenta silo sengubo Sathane kanye nalo lonkhe luhlelo lwakhe letepolitiki, tembutfo kanye netentsengiselwane letisemhlabeni. (Semb. 2:26, 27; 19:11-21) Khristu utawucedzela nconono kuncoba kwakhe nakabhubhisa bantfu labalawulwa nguSathane. Ngemuva kwaloko, Sathane utawujikijelwa emgodzini longenamkhawulo iminyaka leyinkhulungwane.—Semb. 20:1-3.

17. Khristu utabaholela kuphi bantfu labanjengetimvu emkhatsini wekuBusa kwakhe kweMinyaka Leyinkhulungwane, futsi yini lokufanele sitimisele kuyenta?

¹⁷ Umphostoli Johane aphrofetha ‘ngesicumbi lesikhulu’ sebantfu labachaza ngekutsi nguletinye timvu labayawusindza ekuhluphekeni lokukhulu, watsi: “LiWundlu laNkulunkulu lelisenkhabeni yesihlalo sebukhosi, liyawubelusa, libaholele emtfonjeni wemanti ekuphila.” (Semb. 7:9, 17) Kuliciniso kutsi kuso sonkhe sikhatsi lesiyiMinyaka Leyinkhulungwane yekuBusa kwaKhristu, utawuchubeka ahola letinye timvu letiyawube tilalela livi lakhe futsi atiholele ekuphileni lokuphakadze. (Fundza Johane 10:16, 26-28.) Kungaba yintfo lenhle kulingisa uMholi wetfu loyinkhosi kulesikhatsi sanyalo kuchubeka, kuze singene catsatsa emhlabeni lomusha Jehova lasetsembise wona.

Asibukete

• Yini Khristu layenta ngalesikhatsi abekwa esihlalweni sebukhosi?

• Usebentisa bobani Khristu emhlabeni kute ahole emabandla?

• UMholi wetfu Khristu utawubuya ngatiphi tindlela?

• Khristu utawuchubeka njani asiholela emhlabeni lomusha?

[Imibuto Yesihloko Lesifundvwako]

[Sitfombe ekhasini 32]

Kubhujiswa kwebantfu labalawulwa nguSathane kutawenta kubonakale kubuya kwaKhristu