Sitawuhamba Ngebucotfo Betfu!

“Kodvwa mine ngihamba ngebucotfo.”—HLA. 26:11.

1, 2. Yini Jobe layisho mayelana nebucotfo bakhe, futsi yini leshiwo ngaye encwadzini yaJobe sehluko 31?

 ETIKHATSINI tasendvulo, sisindvo setintfo besivame kulinganiswa ngesikali selukhuni. Lesikali besivame kuba nensimbi lecondzile lebeyilenga emkhatsini kwalolukhuni. Bekuba nemapani labelengiswa kuleso naleso siphetfo sesikali. Lentfo lebeyisuke ilinganiswa beyibekwa kulelinye lalamapani bese kutsi kuleli lelinye lipani kubekwe sisindvo. Bantfu baNkulunkulu bekufanele basebentise tikali kanye netilinganiso letetsembekile.—Taga 11:1.

² Ngesikhatsi Jobe, indvodza lebeyesaba Nkulunkulu ahlupheka ngesizatfu sekuhlaselwa nguSathane, watsi: “[Jehova] akangilinganise ngesilinganiso seliciniso, utabe sewuyatfola kutsi ngimsulwa.” (Jobe 31:6) Ngaleso sizatfu, Jobe wakhuluma ngetimo letinyenti lebetingavivinya umuntfu locotfo. Kodvwa Jobe waluncoba ngemphumelelo luvivinyo lobelumhlupha, njengobe kuveta emavi akhe labhalwe encwadzini yaJobe sehluko 31. Sibonelo sakhe lesihle sisikhutsata kutsi natsi sente ngendlela lefananako, futsi njengemhlabeli Davide sitsi: “Kodvwa mine ngihamba ngebucotfo.”—Hla. 26:11.

3. Kungani kubalulekile kutsi setsembeke kuNkulunkulu etindzabeni letinkhulu naletincane?

³ Nanobe Jobe avivinywa tikhatsi letinyenti, wahlala atsembekile kuNkulunkulu. Labanye bantfu bangasho nekusho kutsi Jobe usibonelo lesihamba embili sekuba cotfo nanobe ashushiswa tikhatsi letinyenti. Tsine asihlupheki ngendlela Jobe lahlupheka ngayo. Nanobe kunjalo, nangabe sifuna kuveta kutsi sihamba ngebucotfo futsi sisekela bukhosi baJehova, kufanele setsembeke kuye etindzabeni letinkhulu naletincane.—Fundza Lukha 16:10.

Kubalulekile Kutsi Sibe Cotfo Etindzabeni Tekutiphatsa

4, 5. Njengemgcini webucotfo, ngukuphi kutiphatsa Jobe lakubalekela?

⁴ Kute silondvolote bucotfo betfu kuJehova, kufanele silalele timiso takhe tekutiphatsa, njengobe nje kwenta Jobe. Watsi: “Ngenta sivumelwane nemehlo ami kutsi ngingeke ngiyibuke ngenkhanuko intfombi . . . Nangabe inhlitiyo yami ike yahungwa ngulomunye umfati, nome-ke ngike ngayawukhukhubala emvakwesivalo samakhelwane, nakunjalo-ke, umfati wami akahambe ayawusilela lenye indvodza, alale nalamanye emadvodza.”—Jobe 31:1, 9, 10.

⁵ Ngesizatfu sekutsi Jobe abetimisele kulondvolota bucotfo bakhe kuNkulunkulu, wakubalekela kubuka umuntfu wesifazane ngenjongo yekumkhanuka. Njengendvodza leshadile, akazange adlale ngelutsandvo nebesifazane labangakashadi, nobe enetise inkhanuko yakhe nemfati walenye indvodza. ENshumayelweni yakhe yaseNtsabeni, Jesu wakhuluma ngendzaba lenemandla lemayelana nekutiphatsa ngekwelicasi—lokuliphuzu labo labagcina bucotfo lokufanele balinake.—Fundza Matewu 5:27, 28.

Ungabanjwa Tento Tekungetsembeki

6, 7. (a) Njengasendzabeni yaJobe, yini Nkulunkulu layisebentisako kute alinganise bucotfo betfu? (b) Kungani kungakafaneli sibe bantfu labangaketsembeki nobe labakhohlisako?

⁶ Nangabe sifuna kubalwa kanye nalabo lababagcini bebucotfo angeke sente tento tekungetsembeki. (Fundza Taga 3:31-33.) Jobe watsi: “Nangabe ngihamba ngekungetsembeki, nome-ke lunyawo lwami lusheshisile lwajakela  emangeni, Nkulunkulu akangilinganise ngesilinganiso seliciniso, utabe sewuyatfola kutsi ngimsulwa.” (Jobe 31:5, 6) Jehova ulinganisa bonkhe bantfu ‘ngetilinganiso teliciniso.’ Njengasendzabeni yaJobe, Nkulunkulu usebentisa timiso takhe letiphelele tekwehlulela kute abone kutsi sibagcini bebucotfo yini.

⁷ Nangabe siba bantfu labangaketsembeki nobe labakhohlisako, sisuke singabulondvoloti bucotfo betfu kuNkulunkulu. Bantfu labagcina bucotfo ‘sebayilahlile yonkhe imisebenti yebumnyama neyelihlazo,’ futsi ‘abaphili ngebucili.’ (2 Khor. 4:1, 2) Kodvwa kutsiwani nangabe ngekungetsembeki elulwimini nobe etentweni tetfu, siye senta likholwa lesikanye nalo lakhala kuNkulunkulu lacela lusito? Sitawutfola umphumela lomubi! Umhlabeli wahlabela: “Nangisekuhluphekeni, ngiyakhala kuSimakadze, yena angiphendvule. Simakadze, ngisindzise kulabangicalela emanga nakubakhohlisi.” (Hla. 120:1, 2) Kuhle kukhumbula kutsi Nkulunkulu uyakwati kuhlola luhlobo lwebantfu lesingilo ngekhatsi, ‘uhlola tingcondvo netinhlitiyo’ kute abone kutsi sibagcini bebucotfo mbamba yini.—Hla. 7:8, 9.

Bani Sibonelo Endleleni Lobaphatsa Ngayo Labanye

8. Jobe abebaphatsa njani labanye bantfu?

⁸ Kute silondvolote bucotfo betfu kufanele sibe njengaJobe, lobekatsembekile, atfobekile, futsi abacabangela labanye. Watsi: “Nangabe ngingakatiphatsi njengekwemtsetfo tisebenti tami letidvuna naletisikati, natinetikhalo ngami, ngitawukwenta njani, nangabe Nkulunkulu asabhekana nami ngaloko? Ngitawuphendvula ngitsini, nasengibutwa? Akusiye yini yena lowo lowabumba mine esiswini lona lowabumba tona? Akusiye yini lowaseluka sonkhe etiswini tabomake?”—Jobe 31:13-15.

9. Ngutiphi timfanelo Jobe lativeta endleleni lebekasebentelana ngayo netinceku takhe, futsi yini tsine lokufanele siyente mayelana nalendzaba?

⁹ Kungenteka kutsi ngesikhatsi saJobe betingekho timiso letiyinkimbinkimbi tekutsetfwa kwemacala langekwemtsetfo. Emacala abetsetfwa ngendlela lehleliwe, ngisho netigcili betikwati kuya enkantolo. Jobe watiphatsa ngekwetsembeka nangemusa tinceku takhe. Nangabe sifuna kuhamba ngebucotfo betfu, kufanele sivete timfanelo letinjalo, ikakhulukati nangabe sikhonta njengalabadzala belibandla lemaKhristu.

Bani Ngulophanako, Ungabi Bukhali

10, 11. (a) Sati njani kutsi Jobe abephana futsi alusito? (b) Incwadzi yaJobe 31:16-25 ingasikhumbuta siphi seluleko semBhalo?

¹⁰ Jobe abephana futsi alusito, abete bugovu nobe bukhali. Watsi: “Nangabe . . . ngente emehlo emfelokati aphophota tinyembeti, nangabe ngatigodlela mine kudla kwami, ngangete ngahlephulelana nalabatintsandzane . . . Nangabe ngake ngabukelela umuntfu afa, abulawa kweswela kwekwembatsa . . . Nangabe ngake ngaphakamisa sandla sami etikwaloyintsandzane, ngati kahle kutsi mine ngiyalalelwa enkhundleni, nakunjalo-ke, umkhono wami awumane uncutfuke lapha elungeni lesiphanga, awujubeke elungeni lesiphanga, ulahleke phansi.” Jobe abengeke akwati kubugcina bucotfo bakhe kube abetsi egolideni: “Wena usivikelo sami.”—Jobe 31:16-25.

¹¹ Lamavi ebumbongi asikhumbuta lawo emfundzi Jakobe latsi: “Kukholwa lokumsulwa lokungenasici embikwaNkulunkulu longuBabe ngunaku: kuhambela tintsandzane nebafelokati elusizini lwabo, nekutigcina ungangcoliswa live.” (Jak. 1:27) Aphindze asikhumbute secwayiso saJesu lesitsi: “Caphelani, nikubalekele konkhe kufisa lokubi; ngobe imphilo yemuntfu ayinconotiswa bunjinga bakhe.” Ngemuva kwaloko, Jesu wakhuluma ngemfanekiso wendvodza lecebile lebeyibukhali, leyafa ‘ingakacebi kuNkulunkulu.’ (Luk. 12:15-21) Kute sibe bagcini bebucotfo, kufanele singabanjwa sono sekuba bukhali nobe sekuba nebugovu. Kuba bukhali kukukhonta titfombe ngobe sifiso semuntfu lonebugovu simenta ayekele kunaka Jehova, bese leyontfo iba sithico sakhe. (Khol. 3:5) Kuba cotfo kanye nekuba nebugovu akuhlangani.

 Ungakushiyi Kukhonta Kweliciniso

12, 13. Ngusiphi sibonelo lesabekwa nguJobe mayelana nekubalekela kukhonta titfombe?

¹² Bantfu labagcina bucotfo abakushiyi kukhonta lokuhlantekile. NaJobe wenta kanjalo, ngobe watsi: “Nangabe nganaka lilanga ekukhanyeni kwalo nome inyeti ekuhambeni kwayo lokumangalisako, kangangekutsi inhlitiyo yami yase iyebeka ngikuhloniphe ngekwanga sandla sami, nakunjalo-ke, konkhe loko tono lokusafanele tehlulelwe, ngobe ngabe bengingaketsembeki kuNkulunkulu losetulu.”—Jobe 31:26-28.

¹³ Jobe akazange akhonte tintfo letingaphili. Nangabe inhlitiyo yakhe beyingabanjwa kubona indalo yasezulwini, njengenyeti, nangabe ‘abenganga sandla sakhe,’ mhlawumbe ange ngesandla sakhe ngendlela lekhombisa kukhonta titfombe, loko bekutawusho kutsi ukhonta titfombe futsi abesaphike Nkulunkulu. (Dut. 4:15, 19) Kute silondvolote bucotfo betfu kuNkulunkulu, kufanele sitibalekele tonkhe tinhlobo tekukhonta titfombe.—Fundza 1 Johane 5:21.

Ungatiphindziseleli Nobe Utentise

14. Kungani singatsi Jobe abengesiye umuntfu loyingoti?

¹⁴ Jobe abengasiye umuntfu loyingoti nobe lonelunya. Bekati kutsi kuba ngumuntfu lonjalo bekutawuveta kutsi akasicotfo, ngobe watsi: “Nangabe ngajabulela sitsa sami, nasehlelwa ngulokubi, nome ngagalajela inhlupheko leyasehlela, angizange ngiwuvumele umlomo wami kutsi wone ngekutsi ngikhiphe sicalekiso simelane nemphilo yaso.”—Jobe 31:29, 30.

15. Kungani kungakalungi kujabula nangabe umuntfu lositondzako ehlelwa yinhlekelele?

¹⁵ Jobe abelungile ngobe akazange ajabule nangabe umuntfu lomtondzako ehlelwa ngulokubi. Lesinye saga siyecwayisa: “Ungakujabuleli kuwa kwesitsa sakho, inhlitiyo yakho ingatfokoti nasikhubatela; ngobe Simakadze angahle akubone angete ajabula, esuse lulaka lwakhe kuso.” (Taga 24:17, 18) Njengobe Jehova afundza inhlitiyo, uyabona nangabe sijabula ngasese ngebubi lobehlela lomunye umuntfu, futsi akakwemukeli kutiphatsa lokunjalo. (Taga 17:5) Nkulunkulu angasilungisa simo lesisikhatsatako, ngobe utsi: “Kuphindzisela kwami.”—Dut. 32:35.

16. Nanobe singakanjingi, singatingenisa njani tihambi?

¹⁶ Jobe abengenisa tihambi. (Jobe 31:31, 32) Kungenteka kutsi tsine asikanjingi, kodvwa natsi ‘singakhutsala ekungeniseni tihambi.’ (Rom. 12:13) Singadla kudla lokwetayelekile nalabanye, sikhumbule kutsi “kuncono kudla umbhidvo ngekuvana kunekudla inyama lenonile ngekutondzana.” (Taga 15:17) Ngisho nekudla lokwetayelekile lesikudla ndzawonye nebazalwane kanye nabodzadzewetfu labangemaKhristu sinelutsandvo emkhatsini wetfu, kungasijabulisa futsi kusakhe.

17. Kungani kungakafaneli setame kufihla tono tetfu letinkhulu?

¹⁷ Kungenteka kutsi bekwakha ngekwakamoya kuba naJobe, ngobe abengatentisi. Abengafanani nebantfu labangamhloniphi Nkulunkulu labangena ngekunyenyela ebandleni langelikhulu lekucala leminyaka futsi ‘labebahamba ngetinkhanuko tabo letimbi . . . kute kuphumelele bona.’ (Juda 3, 4, 16) Jobe akazange atifihle tiphambeko takhe nobe ‘afihle sono sakhe,’ esaba kutsi bantfu batawutsini. Wavumela Nkulunkulu kutsi amhlole ngobe nguye lobekufanele avume tono takhe kuye. (Jobe 31:33-37) Nakungenteka sente sono lesibi kakhulu, singetami kusifihla kute sitivikele. Yini lesingayenta kute sivete kutsi setama kugcina bucotfo betfu? Singavuma tono tetfu, siphendvuke, sifune lusito  lwakamoya, futsi sente imetamo yekulungisa lesimo.—Taga 28:13; Jak. 5:13-15.

Umgcini Webucotfo Uyalingwa

18, 19. (a) Kungani kungatsiwa Jobe akazange abaphatse kabi labanye bantfu? (b) Yini Jobe labelungele kuyenta kube kwatfolakala kutsi unelicala?

¹⁸ Jobe abetsembekile futsi alungile. Kungaleso sizatfu atsi: “Nangabe live lami likhala ngami, nayo yonkhe imisedlana yalo imanti tinyembeti, nangabe bengidle titselo talo ngaphandle kwekukhokha tindleko talo, nome ngababulalisa ngendlala labo labahlala kulo, nakunjalo-ke, akuvumbuke emanyeva kulo esikhundleni sakolo; kuvumbuke lukhula esikhundleni sebhali.” (Jobe 31:38-40) Jobe akazange etame kutsatsa live lalabanye bantfu, futsi akazange atiphatse kabi tisebenti takhe. Njengaye, kufanele sigcine bucotfo betfu kuJehova etindzabeni letinkhulu naletincane.

¹⁹ Embikwebangani bakhe labatsatfu kanye nelijaha lelingu-Elihu, Jobe wakhuluma ngendlela labephila ngayo. Jobe wacela nobe ngabe ngumuphi umuntfu labekambeka licala kutsi aletse timangalo takhe tekumelana nembhalo logciniwe wekuphila kwakhe, lowawufakazelwa kutsi ‘wawushicilela.’ Kube kwatfolakala kutsi Jobe abenelicala, abetawukulungela kutfola sijeziso. Ngako-ke, wetfula licala lakhe futsi walindzela sijubo senkantolo yaNkulunkulu. Ngako, “aphela lapho-ke emavi aJobe.”—Jobe 31:35, 40.

Ungakwati Kugcina Bucotfo Bakho

20, 21. (a) Kungani Jobe akwati kugcina bucotfo bakhe? (b) Singalwakha njani lutsandvo ngaNkulunkulu?

²⁰ Jobe wakwati kugcina bucotfo bakhe ngobe abetsandza Nkulunkulu. NaJehova abemtsandza futsi amsita. Jobe watsi: “Wanginika kuphila, wangentela umusa [lutsandvo lolwetsembekile], nangekungilondvolota kwakho welusa umoya wami.” (Jobe 10:12) Ngetulu kwaloko, Jobe abebatsandza labanye, futsi abecaphela kutsi umuntfu logodlela labanye bantfu lutsandvo lolwetsembekile utawuyekela nekwesaba Somandla ngenhlonipho. (Jobe 6:14) Bantfu labagcina bucotfo bayamtsandza Nkulunkulu kanye nabomakhelwane babo.—Mat. 22:37-40.

²¹ Lutsandvo ngaNkulunkulu singalwakha ngekutsi sifundze liVi lakhe malanga onkhe, futsi sizindle ngaloko lelisitjela kona ngaye. Ngemthandazo losuka enhlitiyweni, singadvumisa Jehova futsi simbonge ngemusa lasentela wona. (Fil. 4:6, 7) Singahlabelela Jehova futsi sizuze ekuhlanganyeleni njalo nebantfu bakhe. (Heb. 10:23-25) Lutsandvo lwetfu ngaNkulunkulu lutawukhula njengobe sishumayela futsi simemetela “insindziso yakhe.” (Hla. 96:1-3) Ngaletindlela, singakwati kubugcina bucotfo, njengobe kwenta umhlabeli lowahlabela: “Kungilungele kusondzela kuNkulunkulu, Simakadze, iNkhosi, ngimente waba siphephelo sami.”—Hla. 73:28.

22, 23. Njengebantfu labasekela bukhosi baJehova, imisebenti yetfu ifanana njani neyalabo labagcina bucotfo esikhatsini lesendlulile?

²² Emakhulwini eminyaka lendlulile, Jehova uye waniketa bantfu labagcina bucotfo tabelo letehlukehlukene. Nowa wakha umkhumbi futsi waba ‘ngumshumayeli wekulunga.’ (2 Phet. 2:5) Joshuwa wahola ema-Israyeli wawangenisa eVeni Lesetsembiso, kodvwa waphumelela kuphela ngobe abefundza “emavi alencwadzi yemtsetfo . . . busuku nemini,” futsi aphila ngekuvumelana nawo. (Josh. 1:7, 8) EmaKhristu elikhulu lekucala leminyaka enta bafundzi futsi ahlangana njalo kute atadishe imiBhalo.—Mat. 28:19, 20.

²³ Sisekela bukhosi baJehova futsi sigcine bucotfo betfu ngekutsi sishumayele ngekulunga, sente bafundzi, sisebentise teluleko temiBhalo, futsi sihlangane njalo nalesikholwa nabo ebandleni, kanye nasemihlanganweni lemincane nalemikhulu. Imisebenti lenjalo isisita kutsi sibe nesibindzi, sicine ngekwakamoya, futsi siphumelele ekwenteni intsandvo yaNkulunkulu. Loku akusimatima kakhulu kitsi ngobe sisekelwa nguBabe wetfu wasezulwini kanye neNdvodzana yakhe. (Dut. 30:11-14; 1 Khos. 8:57) Ngetulu kwaloko, sisekelwa ‘bazalwane’ betfu, labahamba ngebucotfo futsi bahloniphe Jehova njengeNkhosi yabo lenguMbusi.—1 Phet. 2:17.

Ungaphendvula Njani?

• Kufanele sititsatse njani timiso taJehova tekutiphatsa?

• Ngutiphi timfanelo taJobe letikukhanga kakhulu?

• Njengobe kuvetiwe encwadzini yaJobe 31:29-37, Jobe abephila njani?

• Kungani natsi singakhona kugcina bucotfo betfu kuNkulunkulu?

[Imibuto Yesihloko Lesifundvwako]