Dvudvuta Labashonelwe, Njengobe Kwenta Jesu

LAZARO, labehlala eBhetani wagula kakhulu. Bodzadzewabo, Mata naMariya, batfumela umlayeto kuJesu, umngani wabo lomkhulu. Lazaro wagcina afile. Njengobe abesalele ethuneni, bangani kanye nabomakhelwane bakhe bebavakashele boMata naMariya kute ‘babalilele.’ (Johane 11:19) Ekugcineni, Jesu wafika eBhetani futsi waya kuyawubona bangani bakhe labatsandzekako. Kucabangisisa ngaloko lakusho futsi wakwenta, kungasisita sifundze lokutsite mayelana nendlela yekudvudvuta labashonelwe.

Kuba Khona Kwakho Kuveta Kutsi Uyabakhatsalela

Kute Jesu afike eBhetani, kwadzingeka kutsi ahambe emalanga lamabili, awele uMfula iJordane futsi akhuphuke emgwacweni longumcansa losuka eJerikho. Masinyane, Mata waya kuyawuhlangabeta Jesu emgwacweni waleyo ndzawo. Ngekuhamba kwesikhatsi, Mariya weva kutsi Jesu sewufikile futsi naye ngekushesha waya kuyawumbona. (Johane 10:40-42; 11:6, 17-20, 28, 29) Kuliciniso kutsi kuba khona kwaJesu  kwabadvudvuta kakhulu boMata naMariya labebaselusizini.

Ngendlela lefananako nalamuhla, kuba khona kwetfu kungabadvudvuta labaselusizini. Scott kanye naLydia, labalahlekelwa nguTheo, indvodzana yabo leneminyaka lesitfupha budzala engotini, batsi: “Sasidzinga kutsi umndeni kanye nebangani babe khona kute basisekele. Bafika ekhatsi nebusuku, futsi bavele bacondza esibhedlela.” Yini leyashiwo ngulabangani babo? “Ngaleso sikhatsi besingadzingi kutsi basho lokutsite. Kuba khona kwabo ngiko lebesikudzinga—bekufakazela kutsi bayasikhatsalela.”

LiBhayibheli litsi ngalesikhatsi Jesu abona labo labebakhala ngesizatfu sekufa kwaLazaro, naye “wadzabuka kakhulu” futsi “wakhala tinyembeti.” (Johane 11:33-35, 38) Jesu akazange atsatse kukhala embikwebantfu njengentfo lekhombisa kungabi yindvodza sibili. Wabucondza buhlungu labebabuva kanye nebuhlungu babo bekulahlekelwa. Ngusiphi sifundvo lesisitfolako? Nasivakashele bantfu labashonelwe, akukafaneli sitive sinemahloni ekukhala nalabakhalako. (Roma 12:15) Ngakulokunye, akukafaneli wetame kukhalisa lomuntfu loshonelwe, ngobe labanye banconota kukhala nababodvwana.

Lalela Ngeluvelo

Kungenteka kutsi Jesu abekulungele kusho emavi ekudvudvuta boMata naMariya, kodvwa kuyacaca kutsi wavumela bona kutsi bakhulume kucala. (Johane 11:20, 21, 32) Ngalesikhatsi akhuluma naMata, wabuta umbuto, futsi ngemuva kwaloko walalela.—Johane 11:25-27.

Kuba silaleli lesihle kuveta kukhatsalela ngebucotfo. Kute sidvudvute loshonelwe, kufanele sibe tilaleli letinhle. Singaveta kutsi sitilaleli letinhle ngekubuta imibuto leyenta labo labashonelwe bakhulume ngekukhululeka. Kodvwa kufanele ucaphele kutsi ungabaphoceleli kutsi bakhulume nangabe bafuna kutibindzela, ngobe kungenteka kutsi badziniwe futsi bafuna kuphumula.

Bantfu labaselusizini bangase bangativa kahle, futsi ngaletinye tikhatsi bangaphindzaphindza emavi lafananako. Labanye baveta nendlela labativa ngayo. BoMata naMariya batsi kuJesu: “Nkhosi, kube mane bewukhona ngabe umnaketfu akafi.” (Johane 11:21, 32) Yini Jesu layenta? Wabalalela ngesineke nangeluvelo. Akazange abatjele kutsi kufanele bative njani, ngobe bekati kutsi bebeva buhlungu kakhulu.

Nangabe ungati kutsi kufanele utsini kumuntfu loshonelwe, ungamane umbute nangumbuto: “Ungatsandza yini kutsi sikhulume ngako?” Ngemuva kwaloko, naka indlela lakuphendvula ngayo. Kulalelisise loko lakutjela kona. Mbuke emehlweni futsi wetame kucondza indlela lativa ngayo.

Kucondza indlela umuntfu loshonelwe lativa ngayo akusimelula. Lydia uyachaza: “Indlela lebesitiva ngayo yashintja. Ngaletinye tikhatsi besingakhoni kutibamba, besivele sikhale embikwetivakashi. Kodvwa besifuna kutsi bantfu basidvudvute. Bangani betfu betama ngawo onkhe emandla abo kucondza indlela lesitiva ngayo.”

Jesu wakwenta kahle kakhulu loku. Bekati kutsi umuntfu ngamunye ‘unesishayo neminjunju enhlitiyweni yakhe.’ (2 Tikhronike 6:29) Wabaphendvula ngetindlela letehlukehlukene boMata naMariya. Mata wachubeka akhuluma, futsi Jesu wamphendvula. Ngesizatfu sekutsi Mariya abekhala, Jesu akazange akhulume naye sikhatsi lesidze. (Johane 11:20-28, 32-35) Yini lesiyifundzako esibonelweni sakhe? Kungaba kuhle kutsi  sivumele lona loshonelwe kube nguye locala kukhuluma. Kulalela kwakho njengobe baveta indlela labativa ngayo kungabadvudvuta kakhulu.

Emavi Laphilisako

Ngalesikhatsi boMariya naMata batsi kuJesu: “Kube mane bewukhona,” Jesu akazange asole muntfu nobe akuphikise loko labakushoko. Waphendvula Mata ngekumcinisekisa watsi: “Umnakenu utawuvuka aphile.” (Johane 11:23) Ngalamavi lamafishane, Jesu wamsita kutsi abuke embili futsi wamkhumbuta ngemusa kutsi likhona litsemba.

Nawukhuluma nebantfu labashonelwe, khumbula kutsi emavi lacotfo, lambalwa futsi ladvudvutako angaba lusito. Emavi ekudvudvuta angakhulunywa nobe abhalwe phansi. Njengobe incwadzi kanye nelikhadi kungaphindze kufundvwe ngalesinye sikhatsi, kungachubeka kuletsa indvudvuto lengapheli. Ngemuva kwetinyanga letiyimfica indvodza yakhe Bob ishonile, Kath waphindze wawafundza emakhadi labebambhalele wona. Watsi: “Angisita kakhulu ngaleso sikhatsi futsi ngulapho indvudvuto bengiyitfola khona.”

Yini longayibhala encwadzini yekudvudvuta umuntfu loshonelwe? Ungabhala lokutsite mayelana nemufi—kungaba yintfo lowayijabulela kanye naye nobe imfanelo yakhe lobewuyitsandza kakhulu. Kath utsi: “Emavi emusa labawabhala mayelana naBob kanye nebuntfu bakhe angenta ngafuna kumamatseka kanye nekukhala ngesikhatsi lesifananako. Tindzaba letihlekisako letatimayelana naye tangenta ngahleka ngedvwa futsi ngakhumbula kuphila lokumnandzi lebesikujabulela. Emakhadi lamanyenti lengihlale ngiwakhumbula abenemavesi lavela eBhayibhelini.”

Bentele Tintfo Letilusito

Kute asite umndeni waLazaro, Jesu wenta intfo lesingeke sikwati kuyenta. Wavusa Lazaro. (Johane 11:43, 44) Kodvwa tikhona tintfo lesingakhona kutenta, njengekupheka, kulungisa indzawo yekulala yalabo labavakashele laba labashonelwe, kuwasha timphahla, kunakekela bantfwana labancane, kubayela etindzaweni letitsite, kanye nekubasekela ngekwekuhamba. Akungabateki kutsi bantfu labashonelwe batawutibonga kakhulu tento letincane letiveta lutsandvo lolucotfo.

Kuliciniso kutsi bantfu labalilako bayasidzinga sikhatsi sekuba bodvwana. Nanobe kunjalo, ungatsatsa tinyatselo letifanele kute uchubeke utsintsana nabo. Lomunye make lowafelwa ngumntfwana utsi: “Kulila akupheli, futsi kute nelilanga lelibekiwe lekutsi ube ncono.” Labanye bantfu betama kubakhumbula labo labashonelwe, ngemalanga lakhetsekile, njengelilanga lekukhumbula umshado, nobe ngelilanga lafelwa ngalo. Ngekuba khona etikhatsini letinjengaleti, utawuba ngumngani lolusito ngisho nangetikhatsi letimatima.—Taga 17:17.

Indvudvuto yaJesu yafaka ekhatsi nelitsemba lalifundzisa bafundzi bakhe. Watsi: “Lazaro, sihlobo setfu, sewulele, kodvwa ngitawuya ngitemvusa.” (Johane 11:11) Jesu wabacinisekisa balandzeli bakhe ngekutsi labafile batawuvuswa. Wabuta Mata: “Uyakukholwa loku?” Yena waphendvula watsi: “Yebo, Nkhosi.”—Johane 11:24-27.

Wena uyakholwa yini kutsi Jesu utawubavusa labafile? Nangabe kunjalo, tjela bantfu labashonelwe ngalelitsemba lelihle kangaka. Basekele futsi ube lusito kubo. Emavi kanye netento takho kutawubaletsela indvudvuto.—1 Johane 3:18.

[Libalave ekhasini 9]

(Kute ubone kwatiswa lokuhlelwe kahle, fundza incwadzi)

IPHEREYA

UMfula iJordane

IJerikho

IBhetani

Lwandle Lweluswayi

IJerusalema

ISAMARIYA