Hlala Unesimo Sekubonga
Indlela 3
Hlala Unesimo Sekubonga
LIFUNDZISANI LIBHAYIBHELI? “Bongani kuko konkhe.”—1 Thesalonika 5:18.
INKINGA LEKHONA. Siphila nebantfu labatigabatisako nalabangabongi, futsi natsi singacala kutiphatsa njengabo. (2 Thimothi 3:1, 2) Ngetulu kwaloko, singativa siphocelelekile kutsi sente kuphila kwetfu kube matasatasa kakhulu kunaloko lobekungiko esikhatsini lesendlulile. Singaba netinkinga letinyenti nobe sinake loko lokubaluleke kakhulu kitsi, futsi singabi naso sikhatsi sekujabulela loko lesinako kanye netintfo labanye labasentela tona.
YINI LONGAYENTA? Tinike sikhatsi sekuzindla ngetintfo letinhle lotijabulelako nyalo. Kuliciniso kutsi ungase utive unetinkinga letinyenti. Kodvwa asewunake sibonelo seNkhosi Davide. Ngaletinye tikhatsi, naye abetiva acindzetelekile, futsi alingwa kakhulu. Nanobe kunjalo, wathandaza kuNkulunkulu: “Ngizindla ngemisebenti yakho yonkhe, ngicabange ngato tonkhe tento takho.” (Tihlabelelo 143:3-5) Nanobe alingwa, Davide walondvolota simo sekubonga futsi wahlala enetisekile.
Cabanga ngaloko labanye labakwentele kona kute bakusite, bese uyababonga ngemetamo yabo. Jesu usibekele sibonelo lesihle kuleyo ndzaba. Nasi sibonelo: Ngesikhatsi umngani wakhe Mariya amtsela ngemafutsa ladulile enhloko nasetinyaweni, labanye babuta: “Kudlalelwani ngalamafutsa?” a Labo labebakhonona bebanemuva wekutsi bekutawuba ncono kube lamafutsa atsengisiwe, lemali yase inikwa labamphofu. Jesu wabaphendvula: “Myekeleni; nimhluphelani?” Wachubeka watsi: “Wente umsebenti lomuhle kimi.” (Makho 14:3-8; Johane 12:3) Esikhundleni sekunaka loko Mariya langazange akwente, Jesu wajabulela loko lakwentile.
Labanye bacala kucaphela kubaluleka kwemndeni, kwebangani, kanye naletinye tibusiso labebanato ngesikhatsi setibalahlekele. Ungawubalekela umphumela lobuhlungu lonjengalona, ngekutsi ucabange ngetintfo lotijabulelako. Kungani ungacabangi nobe ubhale luhla lwetintfo lotijabulelako?
Njengobe “tonkhe tipho letinhle” tivela kuNkulunkulu, senta kahle ngekuthandaza simbonge. (Jakobe 1:17) Kwenta njalo ngaso sonkhe sikhatsi, kutawusisita silondvolote simo setfu sekubonga futsi sihlale senetisekile.—Filiphi 4:6, 7.
[Umbhalo longentansi]
a Ekhulwini lekucala leminyaka, kutsela emafutsa enhloko yesivakashi bekuyindlela yekuveta kutsi semukelekile; kantsi kutsela emafutsa etinyaweni taso bekusento sekutfobeka.
[Sitfombe ekhasini 6]
Uyababonga yini labanye ngaloko labakwentela kona?