Singakwati Yini Kwenetiseka?

“Kwenetiseka kwenta bantfu labamphofu banjinge; kungenetiseki kona kwenta tinjinga tiphuye.”—Benjamin Franklin.

NGEKUVUMELANA nalesaga, bantfu labanyenti baye bafundza kutsi kwenetiseka angeke ukutsenge njengetintfo letivamile letitsengiswako. Akumangalisi-ke kutsi kwenetiseka—lokungumuva wangekhatsi wekujabula—kuyintfo lengakavami kulelive lelikhutsata sifiso sekuba netintfo letinyenti, imphumelelo lenkhulu, nobe imphilo lejatjulelwa ngulabanye. Kukhona yini lokukutsintsako kuletintfo letilandzelako?

• Bakhangisi bakutjela kutsi ungenetiseka kuphela nangabe utsenga tintfo letinyenti.

• Kuncintisana emsebentini nobe esikolweni kukwenta ucabange kutsi ungaba lusito kuphela nangabe wenta tonkhe tintfo locabanga kutsi labanye bayatenta.

• Bantfu abakubongi loko lobentela kona.

• Bangani bakho bakwenta ube nemona ngetintfo labanato.

• Awutitfoli timphendvulo temibuto yakho lebalulekile lemayelana nekuphila.

Njengobe sihlangabetana naletinsayeya, singakwati yini vele kwenetiseka? Umphostoli Pawula wakhuluma ‘ngemfihlakalo yekwenetiseka.’ Ngaletinye tikhatsi abeba nenala, kantsi ngaletinye tikhatsi abeswela. Bangani bakhe bebamhlonipha, kodvwa labanye bantfu bebahlekisa ngaye. Nanobe kunjalo, watsi ‘sewufundze kutsi enetiseke nome akusiphi simo.’—Filiphi 4:11, 12.

Kwenetiseka kuyintfo lengatiwa kubantfu labangakake batsatsa tinyatselo tekukutfola, kodvwa njengobe Pawula asho, singakwati kukufundza. Nyalo, siyakucela kutsi ucabange ngetindlela letisihlanu lesingatfola ngato kwenetiseka letitfolakala eVini laNkulunkulu liBhayibheli.