Indlela 1

Tsandza Bantfu, Hhayi Imali Netintfo Lonato

LIFUNDZISANI LIBHAYIBHELI? “Kutsandza imali kuyimphandze yako konkhe lokubi.”—1 Thimothi 6:10.

INKINGA LEKHONA. Bantfu labatsengisako basenta singenetiseki ngetintfo lesinato. Bafuna sisebente sikhatsi lesinyenti kute sikwati kutfola imali yekutsenga tintfo letinsha, letincono, kanye naletinkhulu. Imali iyayengana. Kamelula, singacala kuyitsandza futsi siyitsatse njengalebaluleke kakhulu. Nanobe kunjalo, liBhayibheli lecwayisa ngekutsi umuntfu lotsandza umcebo angeke enetiseke. INkhosi Solomoni yabhala: ‘Umuntfu lotsandza imali akenetiseki ngayo, nemuntfu lotsandza bunjinga lobukhulu akenetiswa nguloko lakutfolile.’—Umshumayeli 5:10.

YINI LONGAYENTA? Lingisa Jesu, futsi ufundze kutsandza bantfu kunekutsandza tintfo lonato. Ngesizatfu sekutsi Jesu abebatsandza bantfu, abetimisele kulahlekelwa nguko konkhe labenako—ngisho nekuphila kwakhe imbala. (Johane 15:13) Watsi: “Kubusisiwe kupha kunekwemukela.” (Imisebenti 20:35) Nangabe sikwenta umkhuba kupha labanye sikhatsi kanye netintfo tetfu, nabo batawukwenta lokufananako kitsi. Jesu watsi: “Phanani, nani nitawuphiwa.” (Lukha 6:38) Labo labaphishanekela kutfola imali kanye netintfo letinyenti batibangela buhlungu kanye nekuhlupheka. (1 Thimothi 6:9, 10) Ngakulokunye, kwenetiseka kweliciniso kutfolakala ngekutsandza labanye kanye nangekutsandvwa.

Kungani ungahloli indlela longakwenta ngayo kuphila kwakho kube melula? Ungalinciphisa yini linani letintfo lonato nobe lohlela kutitsenga? Nawenta kanjalo, utawutfola kutsi uba nesikhatsi lesinyenti kanye nemandla ekwenta tintfo letibaluleke kakhulu ekuphileni—lokukusita labanye bantfu kanye nekukhonta Nkulunkulu, lokunguye lokuphe konkhe loko lonako.—Matewu 6:24; Imisebenti 17:28.

[Sitfombe ekhasini 4]

“Phanani, nani nitawuphiwa”